Hebrews 1 - Badon Tolagan Na Biblia

Sema Kinachiyos Criston Anak Afo Chiyos

¹ Nonta bayag da, sema iren piyan Afo Chiyos a konen to ired ma afo-afo thayo la, inpaamta tho ired ma profita. Sema inpasing ton engipaamta, eminchakel cha ima-imag to, tan ekila-kilasin inpasing to.

² Nem niman a kaonoran a akow, sema iren piyan Afo Chiyos a konen tod si-kathayo, inpaamta thod Anak to. Seja Anak to, si-kathoy engiparsowaan Afo Chiyos na emiin a gwared dobong tan chiwa iyaykayang, tan si-katho pay i pinispis Afo Chiyos a menegwid na emiin.

³ Sema nihal Afo Chiyos, naesi-neng cha Cristo, tan si-kathoy kosto-koston kay-ingesan Afo Chiyos. Si Cristo pay i naengipatoloy tan naengipaolnos na emiin a parsowa babaen na esel ton manakabalin. Idi iyakcheng a dininisan toy basol na ketoo-too, imoli wed dangit et timokkong cha gwanan Afo Chiyos a Manakabalin.

Si Cristoy Kahejangan Iy Say Anghilis

⁴ Isonga kagol iren jay a imag Cristo, inpakayang Afo Chiyos iy say anghilis. Sema inngaran Afo Chiyos cha si-kathon “Anak Afo Chiyos,” kahejangan iy say ngaran na anghilis.

⁵ Tep nat kigwan Afo Chiyos cha angken sa-kin anghil i: “Si-kam i Anak ko. Niman ipaamtak i si-kak i Awam.” Tan nat kigwa-kigwan pay Afo Chiyos cha anghil i: “Si-kak aliy awam tan si-kam aliy anak ko.”

⁶ Nem nonta into-non Afo Chiyos i kafangodowanan a Anak to did ja dobong, kigwan to i: “Si-kayon anghilis ko, chayaw jo si-katho.”

⁷ Sejay i kigwan Afo Chiyos maypangkep na anghilis a: “Anghilis ko, si-kariy bagaen ko, tan mebedin a panbalin ko ira na inges toy chahem tan afoy.”

⁸ Nem sema kigwan to maypangkep na Anak to, sejay a “Si-kam a Chiyos, mantoray ka na ingked ingka. Kosto-kostoy pantoray mo.

⁹ Piyan moy mapteng, nem owes mo ngoy ngaaw. Isonga si-kak a Chiyos mo, mas banay i chayaw tan chadsak a in-i-kan kod si-kam iy say echom mo.”

¹⁰ Kigwan pay Afo Chiyos cha Anak to i: “Nonta kapkapoanan, Afo, si-kam i emarsowa niyay a dobong. Et sema iren gwared ma iyaykayang, seta ngon mismon diwam i engamag.

¹¹ Sema iren piyarso-parsowam, mepokaw iren emiin, nem on-ono-onong ka. Sema emiin, manbalin na chaan a inges toy baro.

¹² Tofihen mo iren singen kamisita. Sa-dathan mo iren singen baro. Nem si-kam, eg ka mesa-sa-dathan. Tan say biyag mo, nagwariy pengingkaan to.”

¹³ Nem nat kigwa-kigwan Afo Chiyos cha angken sa-kin anghil i kigwan tod Anak ton: “Tokkong ked ja gwanan ko ingkathod a-gwahen ko ira ma naengontred si-kam a singen inkathin mo ira.”

¹⁴ Nengo wiy osal iren ma anghilis? Si-kara ma bagaen Afo Chiyos a nat naesi-neng. Nainto-no iren Afo Chiyos a menolong iren ma tothoon maysalakan.