Galatians 1 - Badon Tolagan Na Biblia

¹ Si-kak si Paul a apostolis. Sema engi-kan na karebengan ko tan sema enotok cha si-kak a manbalin na apostolis, nat too, no diket si ira Jesu Cristo tan si Afo Chiyos a Aweton engipawil cha si-katho.

² Sejay i solat kod si-kayon naematin naekichayaw cha Galatia. Sema iren echom kod jay a naemati, mekikomosta kawin emiin cha si-kayo.

³ Sapay koma ta gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayon

⁴ engi-kan na biyag to say mepekawanan i basol tayo et maybolos kiyed ma ngaaw a gwared ja dobong niman. Sejay a inpasing Cristo, si-kathoy piyan Afo Chiyos a Awa thayo.

⁵ Sapay koma ta mecheja-chejaw si Afo Chiyos na ingked ingka. Amen.

Sa-ki Bengat I Mapteng A Chamag

⁶ Iyasdaawak a pasiyed si-kayo tep jowan beneki konon chakos si Afo Chiyos a ena-gway kayo babaen na kaasin Cristo. Jowan onori liy afil a toron kin jo i mapteng a chamag.

⁷ Say podno, nagwariy echom a mapteng a chamag tep sa-ki bengat. Nem gwara kono ira ma naeningod si-kayo tan naengiparas a ondoman niwa mapteng a chamag maypangkep Cristo.

⁸ Kowan banchaani kayo i angken si-kawi ngo ono anghil a edafod dangit a mengikaskasaba na afil cha mapteng a chamag a nainkaskasaba wid si-kayo nontan, sapay koma ta mechosed inpiyirno na ingked ingka.

⁹ Sejay i kigwan mid si-kayo nontan, nem ipidgwak ngorechan a no gwariy mengikaskasaba na afil cha mapteng a chamag a chingel jon sigod, sapay koma ta mechosed inpiyirno na ingked ingka.

¹⁰ No nemnemnemen jo i nakigwan ko, egwathan jo i sema piyan ko, nat sema apolbar na too, no diket sema apolbar Afo Chiyos. Nat kowan ipahat say mepnek i tood si-kak. Tep no seman ma, nat mebedin a mansilsilbiak cha Cristo.

Sema Penakchel Paul Na Kinaapostolis To Tan Sema Kinapodno Na Inkaskasaba Tho

¹¹ Aahik, piyan kon egwathan jon pasiya i sema mapteng a chamag a inkaskasabak cha si-kayo, nat edafod ma nemnem na too.

¹² Tep nat chiwa tooy engamtaan kon jay a mapteng a chamag. Nagwariy engitorod si-kak, no diket si Jesu Criston engipaamted si-kak.

¹³ Chingel jo pay i sigod a panbiyag ko nonta kowan onoriy ogadi na Hodjos. Amta yo i palado pay i engipadigat ko na toon Afo Chiyos a ematid Jesu Cristo, tan inpaha-pahat koy kabaalan ko say mepokaw koma ira ma ematid si-katho.

¹⁴ Edagwasak pay iy say chakel a echom kon Hodjon kaidaran kon engonod na rilijon mi, tan paladon inpahat kon mengonod na ogadi iren ma afo-afo wi la.

¹⁵ Nem say planon Afo Chiyos cha si-kak, afil. Tep angken nonta aneng i ingkay-anak ko, pinispis toak da, et babaen na kaasi tho, tiya-gway toak a mansilbid si-katho.

¹⁶ Idi mimothok i timpo na piyan ton ibiybiyan toak na Anak to tep say ikaskasabaan kod Gentiles, nagwaren polos a tooy timbal ko maypangkep niyay.

¹⁷ Ekak pay kimowan cha Jerusalem a mekitbal ired ma apostolis a edagwas iy say si-kak, nem kimowanak kitdin chakos cha Arabia, et imoliak cha Damascus.

¹⁸ Idi epalabas i tedon tawen, kimowanak cha Jerusalem a memisiten Peter, et iyan-iyanak cha si-katho na sawal na dimen akow.

¹⁹ Nagwariy mitak a echom a apostolis, malaksid si James bengat a ahin Jesu Criston Afo thayo.

²⁰ Kowan ipodnod sangoanan Afo Chiyos i seja kowan isolat cha si-kayo, nat itek.

²¹ Idi iyakcheng iwan, kimowanak cha sahop na Syria tan Cilicia.

²² Nontan a timpo, sema iren gropon ematid Criston gwared Judea, eg chaak pay mita-mita.

²³ Gwara bengat i chimag chen sema emadi-padigat cha si-kara nontan, towan ikasaba niman i pamatin inparas ton menagwara.

²⁴ Isonga, chijaw ches Afo Chiyos maypangkep cha si-kak.