1 John 1 - Badon Tolagan Na Biblia

Si Esel A Naengi-kan Na Biyag A Si Jesu Cristo

¹ Gwariy piyan min konen cha si-kayo maypangkep Jesu Cristo. Si-kathos Esel a naengi-kan na biyag a sigod a gwara ngorechan nonta kapkapoanan a aneng pay meparsowiy dobong. Inki-ngelan miy esel to, tan mita win mismo. Mita wi tan kiyapkap mi.

² Iyanparang si Jesu Criston tood ja dobong. Agpayson mita wi, isonga miyan ipaamted si-kayo. Tep si Jesu Cristoy naengi-kan na biyag a nagwariy pengingkaan to. Sigod a gwared Afo Chiyos a aweto et iyaybiybiy med si-kawi.

³ Sema iren mita wi tan inki-ngelan mi, si-kathoy ipaamta wid si-kayod ja solat say mayka-chom kayod inpansa-sa-ki wid Afo Chiyos a Awa thayo tan si Jesu Criston Anak to.

⁴ Miyan isolat iyay cha si-kayo say mepnek a kostoy chadsak mi.

Silow Si Afo Chiyos

⁵ Sema inki-ngelan min kigwan Cristo, si-katho ngoy ipaamta wid si-kayo. Si Afo Chiyos ket, silow tan nagwariy enboli-bolinget cha si-katho.

⁶ Isonga, no konen tayo i naiyay-echo-echom kiyed si-katho iy naiyan-iya-iyan kiyed kawad-an na enbolinget, maite-itek kiya tep sema naima-imag tayo, iyaybangking cha podno.

⁷ Nem no manbiyag kiyed kawad-an na silow a inges tos Afo Chiyos, onmapteng i pan-echo-echom tayo iren ma naemati, tan medinisan kiya tep ma-ma-kal i emiin a basol tayo babaen na chalen Jesus a Anak Afo Chiyos.

⁸ No nakigwan tayo i nagwariy basol tayo, nain-ite-itekan tayoy angel tayo, tan eg tayo napiyatiy podnon edafod Afo Chiyos.

⁹ Nem no igwanggwang tayoy basol tayod Afo Chiyos, pekawanan toy basol tayo tan dinisan to kiyed emiin a ensekig tep si Afo Chiyos, naepiyal tan maronong.

¹⁰ Nem no nakigwan tayo i eg kiya iyanbasol, nainpanbalin tayos Afo Chiyos a maitek, tan eg ondamot i esel tod nemnem tayo.