YELEMAI 1 - MBIVILIA ŨVOO MŨSEO

Kwĩtwa na Kũtũmwa kwa Yelemia

¹ Ii nĩ ndeto ila Yelemia mwana wa Ilikia waneenie. Yelemia aĩ ũmwe wa athembi ala mekalaa ndũanĩ ya Anathothi, kĩsionĩ kya nthĩ ya mbaĩ ya Mbengyameni.

² Mwĩai Ngai aneenie na Yelemia mwakanĩ wa ĩkũmi na itatũ wa kũsumbĩka kwa Yosia mwana wa Amoni mũsumbĩ wa Yuta.

³ O ta ũu nĩwaneenie nake ĩvindanĩ yonthe ya kũsumbĩka kwa Yeoiakimu mwana wa Yosia mũsumbĩ wa Yuta, kũvika mweinĩ wa katano wa mwaka wa ĩkũmi na ũmwe wa kũsumbĩka kwa Nzetekia mwana wa Yosia, yĩla andũ ma ndũa ya Yelũsalemu mataviwe matwawa nthĩ ya ũeninĩ.

⁴ Mwĩai Ngai nĩwaneenie nakwa ambĩa atĩĩ,

⁵ “Ndanamba ũkũmbĩa ĩvunĩ ya inyia waku nĩnakwĩsĩ, ũtanamba kũsyawa nĩnakũvathie; nĩnakũnyuvie ũtw'ĩke mwathani kwa mbaĩ mbingĩ.”

⁶ Nĩvo ĩndĩ namũsũngĩie namwĩa atĩĩ, “Asi, Mwĩai Ngai Mũsumbĩ! Nyie ndyĩsĩ kũneena, nũndũ nĩ o mũnini.”

⁷ Ĩndĩ Mwĩai Ngai nĩwanzũngĩie ambĩa atĩĩ, “Ndũkasye kana wĩ mũnini, nũndũ ũkathi kwa andũ onthe kũla nĩkũtũma, na ũkamatavya ũndũ w'onthe ũla nĩkwĩaĩa.

⁸ Ndũkamakĩe, nũndũ nĩ vamwe naku ngũvonokye. Nĩasya ũu nyie Mwĩai Ngai.”

⁹ Nĩvo ĩndĩ Mwĩai Ngai watambũũkisye kw'oko kwake akiita ilomo syakwa na ambĩa atĩĩ, “Yu nĩnakũnenga ndeto ila waĩlĩte kũneena.

¹⁰ Ũmũnthĩ nĩnakũnenga ũtonyi ĩũlũ wa mbaĩ sya andũ na mosumbĩ; ũtonyi wa kũkũa na kũomboa, kwananga na kũng'uthũla, kwaka na kũvanda.”

Yelemia Ayona Mawoni Elĩ

¹¹ Mwĩai Ngai nĩwaneenie nakwa angũlya atĩĩ, “Yelemia wĩona kyaũ?” Nĩnamũsũngĩie namwĩa, “Nĩngwona ũvonge wa mũtĩ wa mũlosi.”

¹² Nĩvo ĩndĩ Mwĩai Ngai wambĩie, “Nĩwoona nesa, nũndũ nĩnĩsyaĩĩsye ndeto yakwa yĩanĩe.”

¹³ Mwĩai Ngai nĩwaneenie nakwa o ĩngĩ angũlya atĩĩ, “Wĩona kyaũ?” Nakwa namũsũngĩa, “Nĩona mbisũ ĩtheũkĩte yĩ ngalĩko ya ĩũlũ, na nĩyeekete kwelekela ngalĩko ya ĩtheo.”

¹⁴ Nĩvo ĩndĩ Mwĩai Ngai wambĩie atĩĩ, “Kuma ngalĩko ya ĩũlũ wanangĩko ũkamokĩa onthe ala matũaa nthĩ ĩno.

¹⁵ Nũndũ nĩngwĩta mbaĩ syonthe sya mosumbĩ ma ngalĩko ya ĩũlũ na makooka vaa. Asumbĩ moo makaia ivĩla syoo sya kĩ-ũsumbĩ mĩvĩanĩ ya Yelũsalemu, na kũthyũlũlũka ngũta syayo, na kũthyũlũlũka ndũa syonthe sya Yuta. Nĩasya ũu nyie Mwĩai Ngai.

¹⁶ Ngamasilĩla nũndũ wa ũthũku woo wa kũndia na kũvĩvĩsya ngai ingĩ ũvani, ĩĩ, na kũthaitha mĩvw'anano ĩla maseũvĩtye na moko moo.

¹⁷ Ĩndĩ we Yelemia ĩyũmbany'e, na ũithi ũmatavye maũndũ onthe ala ngũkwĩaĩa. Ndũkamakĩe, ndikese kũtuma ũkĩa wĩ mbee woo.

¹⁸ Ũmũnthĩ nakwĩkĩa vinya ta ndũa mbiĩĩe, ta kĩtuĩ kya kyũma na ta ũkũta wa kyũma kĩtawa mbulonzi, nĩ kana wũkite na andũ ma nthĩ ĩno: Asumbĩ ma Yuta, atongoi mayo, athembi mayo, na andũ mayo.

¹⁹ Makokita naku ĩndĩ maikakũsinda, nĩkwĩthĩwa nĩ vamwe naku ngũvonokye. Nĩasya ũu nyie Mwĩai Ngai.”