SAVULI 1 - MBIVILIA ŨVOO MŨSEO

ĨVUKU YA MBEE Sav 1—41 Ũtanu wa W'o

¹ Nĩ mũathime mũndũ ũla ũtaatĩĩaa ũtao wa andũ ala athũku, kana kũatĩĩa ngelekany'o ya ene naĩ, kana kwĩkala kĩkalonĩ kya ala mavũthasya,

² ĩndĩ ũtanu wake nĩ kwĩanĩsya mĩao ya Mwĩai Ngai, na kũmĩsũanĩaa mũthenya na ũtukũ.

³ Ailyĩ ta mũtĩ ũvandĩtwe ũtee wa tũlũsĩ twĩ kĩw'ũ, ũla ũsyaa matunda ĩvindanĩ yĩla yaĩlĩte, ũla matũ maw'o matavovaa. Mũndũ ũsu nũendeeaa nesa maũndũnĩ onthe ala wĩkaa.

⁴ Ĩndĩ andũ athũku mayĩilyĩ ũu, mailyĩ ta mavuti ala maũlũkaw'a nĩ kĩseve.

⁵ Kwoou ala mekaa naĩ maikalea kũsilĩlwa, o na eki ma naĩ maikalika wũmbanonĩ wa ala alũngalu.

⁶ Nũndũ Mwĩai Ngai nũtongoeasya na kũsũvĩa ala alũngalu, ĩndĩ ala avuku maendete wanangĩkonĩ.