NTHIMO 1 - MBIVILIA ŨVOO MŨSEO

Vata wa Nthimo

¹ Ii nĩ nthimo sya Solomoni mwana wa Ndeviti, mũsumbĩ wa Ĩsilaeli.

² Nthimo ii ninengae andũ ũĩ na mwĩkalo mũseo; nitumaa mamanya ndeto sya ũĩ.

³ Nimanyĩasya andũ kwĩkala mwĩkalo mũseo, kwĩthĩwa me aĩkĩĩku, kumya ũsili wa katĩ na kwĩthĩwa me na ũw'o.

⁴ Nitumaa andũ ala mate na ũmanyi moĩva, na nimanyĩasya andũ ma mũika kwĩthĩwa na kĩlĩko.

⁵ O ta ũu nthimo ii nĩsyongeleelaa andũ ala oĩ ũmanyi, na nitongoeasya andũ ala me na ũmanyi,

⁶ nĩ kana mamanye nthimo, ngelekany'o, ndeto sya ũĩ, na ndaĩ ila andũ oĩ maneenaa.

⁷ Kũmũkĩa Mwĩai Ngai nĩkw'o wambĩlĩĩlyo wa ũmanyi, ĩndĩ ala atumanu nĩmavũthasya ũĩ na ũmanyĩsyo.

Ũtao kwa Andũ ma Mũika

⁸ Mwana wakwa, ĩthukĩĩsye motao ma ĩthe waku, na ndũkalee ũmanyĩsyo wa inyia waku.

⁹ Nĩkwĩthĩwa momanyĩsyo asu mailyĩ ta ngovia mbanake mũtwenĩ waku, na ta ĩsoa ya kwanakavya ngingo yaku.

¹⁰ Mwana wakwa, ethĩwa eki ma naĩ nĩmeũkũtata, ndũketĩkĩle.

¹¹ Ethĩwa mekwĩa, “Ũka tũendany'e, twoveesye mũndũ tũae; twoveesye vate kĩtumi andũ mate ĩvĩtyo.

¹² Twĩmakwata me thayũ tũmoae, na me aima ta ala malikaa Ĩimanĩ ya kĩkw'ũ.

¹³ Twĩosa syĩndũ syonthe sya thooa mũnene, na kusũsya nyũmba sitũ na mũtavo.

¹⁴ Ũka wĩthĩwe vamwe naitũ, na nĩtũkũaana syĩndũ ila tũkwosa.”

¹⁵ Mwana wakwa, ndũkaendany'e namo, ndũkaatĩĩe nzĩa syoo,

¹⁶ nũndũ masembaa makeke naĩ, na mekalaataa makoae.

¹⁷ Nĩ ũndũ wa mana kũtea kĩtei nyũnyi yene.

¹⁸ Andũ asu moveeasya moawe mo ene, moveeasya makwatye mathayũ moo ene.

¹⁹ Ũsu nĩw'o wĩthĩawa wĩ mũminũkĩlyo wa andũ onthe ala mosaa syĩndũ na vinya. Kwosa syĩndũ na vinya kũminaa thayũ wa ũla wĩkaa ũu.

Ũkany'o nũndũ wa Kũlea Kwĩthĩwa na Ũĩ

²⁰ Ũĩ nũkayaa na wasya mũnene nzĩanĩ, nũneenaa na wasya mũnene wĩ kũla andũ makomanĩaa.

²¹ Nũkayĩaa na wasya mũnene vala andũ mombanĩe, nũneeneaa mĩvĩanĩ ya ndũa ũkasya atĩĩ,

²² “Inyw'ĩ andũ mũte na ũmanyi, mwĩendeea kwĩthĩwa mũte na ũmanyi kũvika ĩndĩĩ? Andũ ala mavũthasya meendeea kũtanĩa kũvũthya kwoo nginya ĩndĩĩ? Ndia syĩendeea kũvũthya ũmanyi nginya ĩndĩĩ?

²³ Ĩthukĩĩsyei ũkany'o wakwa, nĩngũmusũsya mosũanĩo makwa na kũmũmanyĩsya ndeto syakwa.

²⁴ Nĩkwĩthĩwa nĩnĩmwĩtĩte na mũkalea kwĩw'a, nĩnĩtambũũkĩtye kw'oko nĩmũthokye na mũkalea,

²⁵ nĩmũleete kwĩthukĩĩsya ũtao wakwa, na mũkalea ũkany'o wakwa,

²⁶ nakwa ngamũthekeea yĩla mwĩkwatwa nĩ thĩna, ngamũvũĩa ngũĩ yĩla mwĩkwatwa nĩ w'ĩa.

²⁷ Yĩla w'ĩa wĩũka kũla mũĩ ta kĩuutani, na thĩna ũimũkĩa ta kĩlingi, na mũikwatwa nĩ kĩmako na woo,

²⁸ nĩvo ĩndĩ mwĩmbĩkaĩla, nakwa ndikasũngĩa, mũkamantha na kĩthito ĩndĩ mũikambona.

²⁹ Nĩkwĩthĩwa nĩmwaleile ũmanyi, na mwalea kũnyuva kwĩthĩwa na kĩkĩo kya Mwĩai Ngai,

³⁰ na nũndũ nĩmwaleile ũtao wakwa, na mwavũthya mokany'o makwa onthe,

³¹ yu nĩmũkũya matunda ma maũndũ ala mwĩkĩte, nginya musũwe nĩ ũsyao wa mĩvango yenyu mĩthũku.

³² Ala mate na ũmanyi makusaa nũndũ wa kũtia nzĩa, na andũ ala atumanu maminawa nĩ kwĩlekeleelya.

³³ Ĩndĩ ũla ũmbĩthukĩĩasya akekalaa e ũsũvĩonĩ, na athũmũĩte ateũkĩa ũndũ mũthũku.”