Kuma 1 - MBIVILIA ŨVOO MŨSEO

Kũthĩnw'a kwa Andũ ma Ĩsilaeli me Nthĩ ya Misili

¹ Masyĩtwa ma ana ma Yakovo ala maendanisye nake kwĩkala nthĩ ya Misili, kĩla ũmwe e na andũ ma nyũmba yake, nĩmo aa:

² Lũveni, Simioni, Livai na Yuta,

³ Isakali, Nzevuluni na Mbengyameni,

⁴ Ndani, Navutalĩ, Ngandi na Aseli.

⁵ Ũtalo wa nzyawa syonthe sya Yakovo waĩ andũ mĩongo mũonza. Mwana wake Yosevu atwĩe kũu nthĩ ya Misili.

⁶ O maendee kwĩkala kũu, Yosevu, ana-a-ĩthe na andũ ala angĩ onthe maĩ thayũ ĩvinda yĩu nĩmakwie mathela.

⁷ Ĩndĩ nzyawa syoo ila nĩmo andũ ma Ĩsilaeli masyaana maingĩva mũno na meethĩwa na vinya, nginya matũa kĩla vandũ nthĩ ĩsu.

⁸ Nĩvo ĩndĩ mũsumbĩ ũngĩ ũla ũteesĩ maũndũ ma Yosevu wasumbĩkie nthĩ ya Misili.

⁹ Mũsumbĩ ũsu nĩweeie andũ make atĩĩ, “Andũ aa ma Ĩsilaeli nĩ aingĩ na me na vinya kwĩ ithyĩ.

¹⁰ Tũmatũmĩĩei mawũĩ maikaendee kwingĩva, nũndũ kũkesa kwĩthĩwa kaũ, nomakwatane na amaitha maitũ matũkite na maikĩa maume nthĩ ĩno.”

¹¹ Kwoou andũ ma Misili nĩmaiie aũngamĩi nĩ kana mathĩny'e andũ ma Ĩsilaeli kwa kũmathũkũmĩthya wĩa mũito, na maakĩa mũsumbĩ ndũa sya Vithomu na Lamusesi sya kwiaa lĩu na syĩndũ ingĩ.

¹² Ĩndĩ o na kau andũ ma Ĩsilaeli nĩmathĩnaw'a mũno, nĩmaendeeie kwingĩva mbee na mbee, na matũa isionĩ mbingĩ sya nthĩ ĩsu. Andũ ma Misili nĩmambĩĩie kũkĩa andũ ma Ĩsilaeli,

¹³ na kwoou mamathũkũmĩthya wĩa mũito mũno,

¹⁴ na matuma mathayũ moo methĩwa na woo mũnene. Mamanengae wĩa wa mwako na wĩa w'onthe wa mĩũndanĩ; na mawĩanĩ asu onthe maitavĩte ũu, andũ ma Misili mamathũkũmĩthasya vate tei.

¹⁵ Nĩvo ĩndĩ mũsumbĩ wa Misili waneenie na Sivula na Vua, aka ala mesikasya aka ma Aevelania amea atĩĩ,

¹⁶ “Yĩla mũkwĩsikya aka ma Aevelania, mwoona nĩ kavĩsĩ keũsyawa, koaei; ĩndĩ ethĩwa nĩ kelĩtu, ekanai nako kekale thayũ.”

¹⁷ Ĩndĩ esikya asu maĩ na kĩkĩo kya Ngai na kwoou mayaaĩka ũndũ mũsumbĩ wameaĩĩte; vandũ va ũu nĩmaekie twana twa tũvĩsĩ twĩkale thayũ.

¹⁸ Mũsumbĩ nĩwatũmanie esikya asu metwe na amakũlya atĩĩ, “Mwĩĩka ũu nĩkĩ? Mwĩekana na tũvĩsĩ twĩkale thayũ twakĩ?”

¹⁹ Esikya asu nĩmasũngĩie mũsumbĩ atĩĩ, “Aka ma Aevelania mayĩilyĩ ta ma Amisili; nũndũ masyaa mĩtũkĩ vate thĩna mwisikya atanavika vala maĩ.”

²⁰ Kwoou Ngai nĩweekie esikya asu nesa, na andũ ma Ĩsilaeli maendeea kwingĩva na kwĩthĩwa na vinya mwingĩ mũno,

²¹ na nũndũ maĩ na kĩkĩo kyake, nĩwamanengie mĩsyĩ yoo ene.

²² Nĩvo ĩndĩ mũsumbĩ waumisye mwĩao kwa andũ make onthe amea atĩĩ, “Osaai tũvĩsĩ tw'onthe tũla twasyawa nĩ Aevelania na mũitwĩkya ũsĩnĩ wa Naeli, ĩndĩ ekanaai na twĩlĩtu tw'onthe twĩkale thayũ.”