MATHAYO 1 - YÎ NA MAVUKU MA NDIŨTELOKANONI

Aaũmae ma Yesũ

¹ Ũũ nĩw'o ũatĩanĩo wa masyĩtwa ma aaũmae ma Yesũ Klĩsto, nzyawa ya Ndeviti, ũla nake waĩ nzyawa ya Avalaamu:

² Avalaamu asyaie Isaka, na Isaka asyaa Yakovo, na Yakovo asyaa Yuta na ana-a-ĩthe.

³ Yuta asyaie Velesi na Nzela, namo inyia woo aĩ Tamalĩ. Velesi nake asyaie Esiloni, na Esiloni asyaa Lama.

⁴ Lama asyaie Aminatavu, na Aminatavu asyaa Nasoni, na Nasoni asyaa Salimoni.

⁵ Salimoni asyaie Mboasi ũla nyinyia aĩ Laavi, Mboasi nake asyaa Oveti ũla nyinyia aĩ Lũthi. Oveti asyaie Yese,

⁶ Yese nake asyaa Mũsumbĩ Ndeviti. Ndeviti asyaie Solomoni ũla nyinyia aĩ mũka wa Ulia.

⁷ Solomoni nake asyaie Leovoamu, nake Leovoamu asyaa Aviya. Aviya asyaie Asa,

⁸ nake Asa asyaa Yeosavati. Yeosavati asyaie Yeolamu, nake Yeolamu asyaa Usia.

⁹ Usia asyaie Yothamu, Yothamu asyaa Aasu, na Aasu asyaa Esekia.

¹⁰ Esekia asyaie Manase, nake Manase asyaa Amoni, na Amoni asyaa Yosia.

¹¹ Yosia asyaie Yekonia na ana-a-inyia. Ĩvindanĩ yĩu Ayuti nĩmataviwe matwawa nthĩ ya Mbavilonĩ.

¹² Ĩtina wa Ayuti kũtavwa na kũtwawa Mbavilonĩ, Yekonia nĩwasyaie Sealitieli, nake Sealitieli asyaa Nzelũvaveli.

¹³ Nzelũvaveli asyaie Aviũti, nake Aviũti asyaa Eliakimu, na Eliakimu asyaa Asoli.

¹⁴ Asoli asyaie Nzatoki, nake Nzatoki asyaa Akimu, na Akimu asyaa Eliũti.

¹⁵ Eliũti asyaie Eleasali, nake Eleasali asyaa Mathani, na Mathani asyaa Yakovo.

¹⁶ Yakovo asyaie Yosevu ũla nĩ mũũme wa Meli, inyia wa Yesũ ũla wĩtawa Klĩsto.

¹⁷ Kwoou ve nzyawa ĩkũmi na inya kuma Avalaamu kũvika Ndeviti, na ingĩ ĩkũmi na inya kuma Ndeviti kũvika ĩvinda yĩla Ayuti mataviwe matwawa Mbavilonĩ. O ta ũu ve nzyawa ĩkũmi na inya kuma Ayuti matavwa na kũtwawa Mbavilonĩ, kũka kũvika kũsyawa kwa Klĩsto.

Kũsyawa Kwa Yesũ Klĩsto

¹⁸ Kũsyawa kwa Yesũ Klĩsto kwailyĩ ta ũũ: Mwĩĩtu weetawa Meli nĩweevaĩtw'e nĩ mũndũ weetawa Yosevu, ĩndĩ matanamba kũtwaana, eethĩa nĩ mũito kwa vinya wa Veva Mũtheu.

¹⁹ Ĩndĩ nĩkwĩthĩwa Yosevu aĩ mũndũ mũlũngalu, ndaaenda kwĩkĩĩthya Meli nthoni mbee wa andũ, na kwoou avanga kũmũeka avindĩtye.

²⁰ Aendee na kũsũanĩa ũu, mũlaĩka wa Mwĩai nĩwamumĩlĩĩle ndotonĩ amwĩa atĩĩ, “Yosevu, nzyawa ya Ndeviti, ndũkakĩe kũmwosa Meli atw'ĩke mũka waku. Ĩvu yĩla wĩ nayo yumanĩte na ũtonyi wa Veva Mũtheu.

²¹ Akasyaa kavĩsĩ, na ũkaketa Yesũ, nũndũ nĩwe ũkatangĩĩa andũ kuma naĩnĩ syoo.”

²² Ũu w'onthe weekĩkie nĩ kana wĩanĩsye kĩla kyaneeniwe nĩ Mwĩai kwĩsĩla kwa Mwathani ayasya atĩĩ,

²³ “Kwa sisyai, mwĩĩtu ũtaamanyana kĩ-mwĩĩ na mũndũ-ũme akaitava na aisyaa kavĩsĩ, na kakeetwa Ĩmanueli,” ũalyũlo wayo nĩ, “Ngai e vamwe naitũ.”

²⁴ Yĩla Yosevu waamũkie nĩwamũtwaie Meli o ũndũ mũlaĩka wamwĩaĩĩte eke.

²⁵ Ĩndĩ Yosevu ndaamanyana kĩ-mwĩĩ na Meli mbee wa kũsyaa kavĩsĩ, nake Yosevu aketa Yesũ.