YAHAYA 1 - Na Huratu Matua

¹ Na mbuku yiana na-ihingu panau - panaungu rukuna na Yahunda dàngu na Yeruhali na pa-pabowa-na i Ala lai Yahaya, anana i Amuhu, la rehi ba jiaya i Uhia, i Yotàmu, i Ahàhu dàngu i Hihikia ma-pareta la Yahunda.

I Ala ba nahàngga-nya na banjaru-na

² Ronguwa ha, awangu, eti wànyawa ha, pinu tana! Napanii i MIRI, “Da ana da pambàda radanggu da-kawutaru palawa-ngga.

³ Da hapi datanda-ya na mamangu-nja, tàka da kalandai datanda-ya na ngia patuna-nja uhuda paraï mirida. Tàka na banjaru-nggu i Ihirailu ndia-a; nyuda nda da-jàngapu-aya,” wàna.

⁴ Pàda pàku-minyaka ha banjaru manjala, ha tau ma-kabularu dàngu ma-akatu! Nyimi hanjubulu-minyaka paraï ruku njalami. Nyimi mi-jukaru-nyaka dàngu mituu kajia-yaka i MIRI Ala Mahupu-matua làti na pa-marubuku-mi.

⁵ Nggikina nyimi hi mi-parukangu bia papanda-ya? Màta ka hili pambotu-nggama hukungu wàmi? Na katiku-mu mapongu jua-yaka, na etimu dàngu na kanandingu-mu hidu-nanyaka.

⁶ Piti welingu la katiku-mu lundu la tàbalu wihimu nda ningu ndoku mahàmu la ihimu. Nyimi mambinu wàngu mambua, ma-kalimbihu dàngu ma-manua. Da ma-manua-mu ndedi pa-paili-aha dàngu ndedi pa-kamburu-anja. Ndedi patungu-mbuha muru lonahu.

⁷ Na tanamu na-làjaru-ka; da parai - paraingu-mu patunu pa-kàrangu-haka. La hangga matamu na tau hangàdangu napiti-yaka na tanamu dàngu na-pakabu hàla-yaka.

⁸ Jia-kiyaka la Yeruhali na maninya, ba tuna beri hama tuna paraingu pa-nggupulu-yaka ba nda nggikina wàna, hama tuna na uma dai la woka angguru jàka ndia hama tuna na maü la woka kariri.

⁹ Làti duna i MIRI na Mahupu-mbiha jàka nda na-pamara-ha ba tau mapira-ha lai nyuta mbàda molungu ailulu-ndàka, hama tuna na ngerana la Hondumu dàngu la Nggomora.

¹⁰ Ha Yeruhali, da ngara ma-pairungu dàngu na banjaru-mu hama tu-manaka na tau Hondumu dàngu Nggomora. Ronguya jàka nggàra wànanggau i MIRI, kanandinya jàka nggàraya na pa-ajaru-nanda na Alanda.

¹¹ Na liina i MIRI, “Bai kakaya Nyungga yia kumbuha-nja mbuu ndàbada da kameti maraku da pawotu panua-naimi lai Nyungga? Ku-mahobi-njaka da mbimbi kameti maraku patunu-mi dàngu da mboka ana hapimi. Nda kumbuha-anja da wai ria hapi mini, dàngu mbimbi dàngu kamàmbi-mi.

¹² Nggamu na ma-paràha-nggai pangàndi hàlaha da maraku la rehi maimi palumu-ngga Nyungga? Nggamu na ma-paràha-nggai palanggungguru la Uma Matua-nggu?

^13-14 Kahewa-ana nu bai ngàndi maraku. Nyungga nalabu-ka na etinggu la wauna. Na karaü na etinggu dàngu nda ku-torungu ba kuita-kai bai reminya na Bidi Wulangu, da lodu Hangahu dàngu da lodu - lodu bokulu hamanai na pauhi - pauhi bai lumungu pa-lumungu. Nuda mbuu ndàbada mi-pairaku wànja da njala - njalami dàngu pabuku-mingga mambotu-ka duku Nyungga, Nyungga kunjili-ka patanggu-nja.

¹⁵ Era wulaku-minja da limami la pa-hamayangu, nda kueti wa-anyapa duku. Nda kungguma-anyapa jiapa nda pirada da hamayangu-mi, nda ku-patingi wa-anjapa, nadu ba jiaha da limami nuda-maka hi nadangu na pa-pameti-mi.

¹⁶ Baha bàdi wikimi ka lupa mi-yahangu. Pànja hàlanja da ma-akatu pawunda-mi. Màla, màtangu àmbi hili tuudupa ma-akatu,

¹⁷ papekangu-wa la patuu mahàmu. Pa-ndolaku-ya na ma-deningu, pa-munanya na pa-kapidihu; wua-manja da manguda duda da ana mila dàngu kahiri-ha da kawini meti lei,” wàna.

¹⁸ Na liina i MIRI, “Màlawa ka ta-palànyapu-nya na palakara yiana. Jiapa kai rara atu-kadu ruku njalami, ba tuna, napa Nyungga kubaha-kai hi lupa mibara burahu hama na ihi kamba. Jiapa ka dadangu dàngu ka dambotu-kadu da njalami napa kujàma ailulu-nggai.

¹⁹ Nyimi jàka ni-madunya na-mbuhangu-mi pa-manundu lai Nyungga, napa nyimi milàda hàlaya na mahàmu na ihi tana paraimi.

²⁰ Tàka jàka milawa-ngga, ndai màtangu-a pameti la pabera. Nyungga MIRI mambàda pinii,” wàna.

Na kotaku katadaku

²¹ Na paraingu na ma-tuturu làti, nàhu hama tuna tau pahunda-ya! Àmangu na mangia-nya namola dàngu na-patutungu ndàba, tàka na maninya nàhu ma-pameti tau-kia-yaka.

²² Yeruhali, àmangu nyumu beri àmahu barakau, tàka nàhu nda ningu-apa wilimu. Àmangu nyumu beri hama wolu anggoru làngga-kau, tàka nàhu wai jua-makia-kauka.

²³ Da ngora ma-pairungu-mu bai tau kawutaru-haka dàngu wihi lima ma-manganga-haka; nyuda da-mbuhangu pakei pawua juangu dàngu àmahu li kajia. Nyuda nda da-mbuhangu pa-kahiri ana mamila la ma-timbangu; dàngu nda dabihu parongu-ha da kawini meti lei da mangàndi palakara-da.

²⁴ Ba tuna, napanii i MIRI na Mahupu-mbiha, na Ala Ihirailu, “Ha muhunggu-ka, napa Nyungga kutungu hilu pa-umbingu-nggu lai nyimi, hi nda peku hili pa-handuka-mingga.

²⁵ Nyungga napa ku-kukutu-nggami nyimi. Hama tuna na mahiri bàhi, nyimi napa kuhiri-kai; mbuu ndàba da ma-iraku napa kuàli-nja welingu lai nyimu.

²⁶ Napa Nyungga kuhili wuanggai da manda pirada da hakimu dàngu da ma-panaungu hama tuna àmangu. Napa la Yeruhali na paraingu pa-deningu dàngu na paraingu tuturu wàna-nyaka tamuna,” wàna.

²⁷ I MIRI namola, napa Nyuna na-pamàna-nya la Yeruhali dàngu mbuu ndàbana na tau lai nu da mapeka halaera.

²⁸ Tàka da tau njala da ma-kawutaru hanggangu lai Nyuna napa na-pamànji-ha, dàngu mbuu ndàbana na tau na madunjaku-nya Nyuna, napa na-pameti-ya.

²⁹ Napa da-makia rukuna ba da-lumungu pingi ai dàngu ba da-kahaungu woka ndumada da marapu.

³⁰ Napa nyuda beri pingi ai bokulu ma-malaï runa, dàngu beri woka panda palingu wai.

³¹ Beri rembi ma-mutungu ba na-kapuruku-nya wàla epi, tuna numbu na tau na ma-katangu kuaha napa da làjaru ruku akatu wikida, dàngu ba nda ningu ma-padira-nya na làjaru-na.