MIKA 1 - Na Huratu Matua

¹ I Mika welina la hau parai kudu ma-tamungu Morehitu. La rehi pareta pandàki - pandàkingu-da la Yahunda i Hanganji Yotàmu, i Ahàhu dàngu i Hihikia. I Mika na-ngalangu lii languna lai MIRI rukuna na Hamaria dàngu na Yeruhali.

Na padudurungu nduma Hamaria dàngu Yeruhali

² Patingingu-wa, ha dimi banjaru! Katàna-wa ha ma-mandapu-nya na pinu tana! I MIRI Hupu Majangga nàmunya ba hakahii-ya la papapa ndàbanggai nyimi! Ronguya ba na-kareuku welingu la uma matua-na la awangu.

³ Na puruya welingu la pangia matua-na hi na-njàlapu-nja da pinu palindi la pinu tana.

⁴ Dalui da palindi la wawa tàbalu wihina hama tuna epi lilingu la epi maroka; na-tamburi na tanana hi nanjungu-nja da lolangu, hama tuna wai la tandula ma-lulungu hu wawa.

⁵ Mbuu ndàbada nuda danjadi, rukuna ba nanjala na tau Ihirailu dàngu ba na-patula ngganggangu lai Ala. Nggamu ma-pawiti-nya hi nanjala na Ihirailu? Ka nda jiaya na Hamaria-a, na parai puhu pareta wikina? Nggamu ma-pawiti-nya hi na-lumungu marapu na Yahunda? Ka nda jiaya na Yeruhali wikia?

⁶ Tuna nuduka hi kiri paniina i MIRI, “Napa kutuya pabundu watu tanyungguru la maràda na Hamaria; dàngu ngia pa-pamula-na angguru na tau. Na pabundu tanyungguru-na na paraingu nuna napa kuwàru-nya la lolangu, hi ku-nyànggaru-ha da latana.

⁷ Da kahala hada pawilingu-na napa pa-pamija-ha, mbuu ndàba da pawua-nja da kawini maràma la uma marapu patunu-ha, dàngu mbuu ndàba da marapu-na pa-patàlaru-ha. Na Hamaria na ngalanja nuda da malanja mbuu ndàbada wunda lumungu-na la marapu kamboka. Mbuu ndàbada nuda napa nadanda-nja muhu hi dangàndi-ha nduma tanda maraku pamalangungu la marapu - marapu-da,” wàna.

⁸ Rukuna nuna nyungga, Mika, ku-hawina dàngu ku-padudurungu. Napa ku palaku njarangu dàngu nda kutua halapa ba ku-paloha-nya nggi tuna na hawina-na na etinggu. Napa ku-kaladaku hama tuna ahu rumba maulu dàngu ku-padudurungu hama pini ota pawulu kàpangu.

⁹ Da manua-na na Hamaria nda peku pahàmu-aha, dàngu na Yahunda na nggànaya ura dedi ma-hamangu. Na ura mila mbàda tàka-naka la Yeruhali, na pindu bokulu-na na tana paraingu-na na banjaru-nggu.

Na-mareni tàkana na muhu la Yeruhali

¹⁰ Àmbu panii-dunja da muhunda la Nggàta rukuna na ura dedinda; àmbu da ita-dukai bai hii. Ha dimi ma-mandapu-nya la Mbetu-Li-Àpura nggilungu-wa la tana tanda mbota monungu!

¹¹ Nyimi ma-mandapu la Hapiru, palaku njarangu-wa la ngia pa-tanawangu wàngu makia-mi! Da tau Haanàngu nda datoru mbenia paluhu welingu la paraida. Na kaladaku-da da ma-mandapu-nya la Mbetu-Haihilu na-parongu-nggainya ba nda ningua ngia pa-handera lai nu.

¹² Na ura mila welingu lai MIRI mbàda tàka-naka la hangga pindu bokulu Yeruhali! Jia ba tuna nda peku-anapa ka na-monungu pa-ndulangu na tau Marutu.

¹³ Nyimi ma-mandapu-nya la Lakihu pa-kànangu-wa kareta pabera la njara! Nyimi ikikunja da njala pawunda la Ihirailu hi kiri njala-mbuna na Yeruhali.

¹⁴ Nàhu oi tau Yahunda, napa iyàmihu-ya na paraingu Morehitu-Nggàtu. Da hanganji Ihirailu nda da-ngalangu-apa napa pa-ndulangu welingu la paraingu Àkahipu.

¹⁵ Oi tau Mareha, napa i MIRI nawua-kai la muhu na ma-ehingu la pabera-ya na paraingu-mi. Da liku uru Ihirailu napa da-kawiningu la liangu la Andulàmu.

¹⁶ Oi tau Yahunda, kàtahu-wa lunggimi tanda ringu langu-minja da ana pambuha-mi. Kikiru pabulu-wa katiku-mi hama tuna ma-hawurungu mangangu meti banda, rukuna ba ngàndiha da anami napa la tanawangu.