EPIHU 1 - Na Huratu Matua

¹ Na banjaru-na i Ala la Epihu, na ma-tuturu lai Karitu Yehu!

² Nyungga Paulu, pa-pahuru-na i Karitu Yehu, ruku pawuku-na i Ala, ku-monungu mili àru i Ala Amanda dàngu i Miri Yehu Karitu ka nawua àrunggai kanyuru dàngu mànjaku lai nyimi mbuu ndàbami.

Na kanyuru pangahu ruku li padua-na i Karitu

³ Pa-wotungu-ya i Ala, na Amana na Mirinda i Yehu Karitu! Nyuna na-pakanyuru-ndanja mbuu ndàbada da kanyuru pangahu la awangu, nadu ba ta-pambulungu dàngu i Karitu.

⁴ Ndedimbu pa-padika-nya yiana na pinu tana, i Ala mbàda pindi-nandaka rukuna i Karitu, màta nyuta ka namangu paihiku-nda dàngu nda ningu nyuranda la hanggana i Ala. Ruku mbuhangu-na i Ala,

⁵ Nyuna mbàda tiki haha-mana-ndaka rukuna i Yehu Karitu, napa ba wotu-nandaka hi hama ana wikinanda. Dàngu tubana ba jia-mayaka nuna na paora-na la pa-palaku-ya.

⁶ Pa-wotungu-ya i Ala na ma-bokulu, nadu ba rukuna na Ana pambuha-na Nyuna lalu mbana namu-nanda nyuta.

⁷ Nadu, ruku metina i Karitu na-pahàla-ta nyuta paraïna i Ala, nu jia-duyaka ba jàma-nandaka welingu la nja - njalanda.

⁸ Nyuna hi tuna nu nadu ba lalu mbuha-nanda nyuta, dàngu na mbuhangu nuna na-huburu-ndanya ba nawàngu kaminaku manggàna-na.

⁹ Tundunya na orangu wikina, i Ala napeka-ndanya na pa-kàpingu la pa-pakaka-na; mbàda bota-nanyaka nuna na pa-pakaka-na napa na-palundu-nya rukuna i Karitu.

¹⁰ Nuna na pa-pakaka-na, ka pekuna mbuu ndàbana, na maninya la awangu hamanai na maninya la pinu tana, ka na-pambulungu dàngu i Karitu, na kapala-na. Dàngu na ngerana nuna napa na-palundu-nya paraïna i Ala jàka jia-yaka na rehina.

¹¹ I Ala na-patumbu-ya mbuu ndàbana tundunya na patiki etina dàngu na pabota wikina. Piti weli mulangu mbàda pindi-mana-ndaka, nadu na pambuha-na ka pekuna nyuta ka banjaru-nanda ba ta-pambulungu dàngu i Karitu.

¹² Màtawa nyuta, makawunga monungu lai Karitu, ka tawotu-nya i Ala paraï ruku bokulu-na!

¹³ Nyimimbu banjaru-na i Ala-makaika ba jiaya na rongu-minya na hupu liina i Ala, na Lii Mànangu na mawua-nggai nyimi pamàna wàngu. Nyimi mipawai lai Yehu Karitu, jia-duya i Ala hi nawua-nggai tanda mangu-nanggai, nu na Ngahuna na paràndi-na.

¹⁴ Na Ngahu nuna-maka na mapakawàndi-ya ba ngala-ndanyaka napa na pambàda ràndina i Ala la banjaru-na. Nuna jia-yaka na ma-pakaràngi-ndanya ba pahàla-nanyaka napa i Ala na banjaru-na. Pawotunguya i Ala ruku bokulu-na!

Na hamayangu-na i Paulu

¹⁵ Jia-duya, piti welingu ba kurongu-kai bai pawai lai Miri Yehu, dàngu bai mbuha hàlanja da banjaru-na i Ala,

¹⁶ nyungga nda ninya na pànjangu-nggu la pamalangu-nya i Ala lumumi nyimi. Naingu-mana na tiki-nggunya na tamumi jàka ku-hamayangu.

¹⁷ Ku-kamahingu ka pekuna na Alana na Mirinda i Yehu Karitu, na Ama na mamangarangu, ka na-wuangu-ya na Ngahuna lai nyimi. Na Ngahu nuna napa napamanggàna-kai nyimi, dàngu napa Nyuna na-pawuwa-ya i Ala lai nyimi hi lupa mitanda-ya.

¹⁸ Ku-kamahingu ka pekuna i Ala ka na-bunggahu-ya na kanandingu-mi ka nahabola; ka peku hanggàlu-minya na ràka pamonumi welingu lai Ala na ma-paau-nggai nyimi. Dàngumbu kai pinya jàka nggiki hama pa-bundungu-da da kanyuru manandangu da pa-payema-nanya na banjaru-na paraïna i Ala;

¹⁹ dàngu jàka nggiki hama mbangatuna i Ala la paràma ba nawàngu mbinu kuaha-na lai nyuta mapawai. Na kuaha-na i Ala hama kuaha panda hamangu-ya

²⁰ na pawàna ba na-paluri beliya i Karitu welingu la meti dàngu ba nawua-nya ngia pamandapu marihi jangga ma-pahama dàngu i Ala la awangu.

²¹ Na mandapu-na i Karitu narihi raunyapa welingu la ngia pa-mandapu-da mbuu ndàbada da ma-pareta, mbuu ndàbada da maningu kuahangu, mbuu ndàbada da liku uru, mbuu ndàbada da pa-miringu dàngu jiapa ka nggamuya-kadu na pambàda wuana ngia pa-mandapu majangga; ka maluri la rehi nàhuya, ka maluri la rehi na manàmu-nyakai.

²² I Ala na-panyàku hàlaya la lumbu kuaha-na i Karitu, dàngu hi wuanya i Karitu la kabungguru, na ma-kapala-nya mbuu ndàbana.

²³ Na kabungguru tauna i Karitu-ya na-pamalundu-nya paraïna Nyuna na ma-pamalundu hàlanya mbuu ndàbana jiapa ka la nggiya-kadu.