DEDI 1 - Na Huratu Matua

Rukuna na padikangu pa-nggubulu awangu

¹ La kawunga, i Ala ba na-pakiringu pa-padika-nya na pa-nggubulu awangu,

² na pinu tana ndedi ningu hadana, na pakili kiwarungu-pa. Na tehiku na manggibu nggabuna, na ma-palumburu hàlanya mbutana, na-panggumu-nya kapàta yuru yila, didi-aya na mbihana i Ala na mahiri la pinu wai.

³ I Ala natuu liina, “Dediwa harii!” wàna. Nimanya na harii.

⁴ Nahàmu na etina i Ala ba naita-ya nuna. Hàla na-kawàri-ya na harii welingu la kapàtangu,

⁵ na harii, “Lodu” wànanya, tàka na kapàtangu “Rudungu” wànanya. Ba na-làpahu-ka na rudungu, mbaru-nanyaka. Nu, kawunga lodu-yaka.

^6-7 Tunaka nu natuu liina i Ala, “Dediwa hau hanggurungu ka naberi nduaya na wai, ka napàtu-ya la dàmbu pangia ma-pamaraungu,” wàna. Ka tu-madua-naka. Tuna nu ba na-pandoi-ya paraïna i Ala na hanggurungu na ma-kawàri-ya na wai la wawa hanggurungu welingu la wai na ma-ngiangu la dita hanggurungu.

⁸ Na hanggurungu “awangu,” wànanya. Ba na-làpahu-ka na-rudungu, mbaru-nanyaka. Nu, lodu padua wànanya.

⁹ Tunaka nu natuu liina i Ala, “Màlawa na wai na maninya la lumbu awangu ka na-lulungu la hau pa-ngiangu, ka nawuwa na mamàdu,” wàna. Ka tu-madua-naka.

¹⁰ Na mamàdu “mamara” wànanya dàngu na wai ma-kahaungu “tehiku” wànanya paraïna i Ala. Dàngu nahàmu na etina i Ala ba naita-ya nu.

¹¹ Nahili tuu liina i Ala, “Màlawa na tana ka na-paluhu hàlaha da ma - màtu matumbu, nu da maningu wua daluda dàngu nu da maningu wuada,” wàna. Ka tu-madua-naka.

¹² Tuna nu na tana hi na-paluhu hàlaha da ma - màtu matumbu. Dàngu nahàmu na etina i Ala ba naita-ya nu.

¹³ Ba na-làpahu-ka na rudungu, mbaru-nanyaka. Nu lodu patailu wànanya.

^14-15 Tunaka nu natuu liina i Ala, “Màlawa ka ningu maharii la awangu ka naharii-nya na pinu tana, ka kawàri wànya na lodu dàngu na rudungu, dàngu ka tanda wànya na rehi pakiringu-na, na lodu dàngu na ndaungu, dàngu na lodu bokulu anggama,” wàna. Ka tu-madua-naka.

¹⁶ Tuna nuduka i Ala ba nawulu-ha da maharii bokulu da madàmbu-da, na matalodu na manduma-nya la lodu dàngu na wulangu na manduma-nya la rudungu, hinggilu-da nuda nawulu-mbuha da kandunu.

¹⁷ I Ala natuha nuda da maharii la awangu ka da-hambila-nya na pinu tana,

¹⁸ ka da-kuaha-ya na lodu dàngu na rudungu, dàngu ka na-kawàri-ya na hambila dàngu na kapàtangu. Dàngu na hàmu na etina i Ala ba naita-ya nu.

¹⁹ Ba na-làpahu-ka na rudungu, mbaru-nanyaka. Nu, lodu papatu wànanya.

²⁰ Tunaka nu i Ala natuu liina, “Màlawa daa la wai ka ningu ma-kanggàdaku ma - màtu dika maluri, dàngu ka ningu ma-hawurungu dangu ma-hawuru-nya na lumbu awangu,” wàna.

²¹ Ka padika-nanjaka i Ala da banda bokulu la tehiku, dàngu mbuu ndàbada da ma-kayidi yadaku da maluri la wai, dàngu mbuu ndàbada da ma - màtu dika ma-hawurungu. Dàngu nahàmu na etina i Ala ba naita-ya nu.

²² I Ala na-pakanyuru-nja mbuu ndàbada ba nawua-nja pareta da pa-padikangu da maluri la wai ka daworu bàba ka dapinu-ya na tehiku, dàngu da ma-hawurungu ka da-bonjangu padangu.

²³ Ba na-làpahu-ka na rudungu, mbaru-nanyaka. Nu lodu palima wànanya.

²⁴ Tunaka nu natungu liina i Ala, “Màlawa na tana ka na-paluhu-ha mbuu ndàbada da dika banda la mamara, da mamopu dàngu da ma-matàmba, da ma-bokulu dàngu da makudu,” wàna. Hàla ka tu-madua-naka.

²⁵ Tuna nuduka i Ala ba nawulu hàlaya dàngu nahàmu na etina Nyuna ba naita-ya nu.

²⁶ Tunaka nu natuu liina i Ala, “Nahu màlawa ka tawulu tau napa na mahama tuna Nyuta dàngu na mahama hadanda Nyuta. Nyudaka napa da ma-kuaha-ha da iyangu, da ma-hawurungu, dàngu mbuu ndàbada da banda hawiangu, da mamopu dàngumbu da ma-matàmba, da ma-bokulu màlambu da makudu,” wàna.

²⁷ Tuna nuduka i Ala ba na-padikangu tau, dàngu ba nawulu-ha hama-mana na wikina Nyuna. Na-padika-nja mini kawini.

²⁸ Hàlaka pa-kanyuru-nanjaka, ba napanii-nja, “Ipaana umbuku padangu-wa ka pekuna da wàla wuami ka dangia-nya na pinu tana nggubulu-na dàngu ka da-kuaha-ya. Nyimi ku-patanggu-nggai pa-tanara-ha da iyangu, da ma-hawurungu, dàngu mbuu ndàbada da banda hawiangu da ma-matàmba.

²⁹ Na nduma pangami kuwua-nggainja mbuu ndàbada da ngara matumbu da maningu wua dalungu dàngu da maningu wuangu.

³⁰ Tàka na ndumada da ma-hawurungu lupa da banda matàmba hawiangu, kuwua-nja rumba dàngu pingi ai ma-parungu ka dangangu,” wàna. Ka tu-madua-naka.

³¹ I Ala na-panau-ha mbuu ndàbada da pambàda wuluna, kanjupu hàmu-aya na etina Nyuna. Ba na-làpahu-ka na rudungu, mbaru-nanyaka. Nu, lodu panomu wànanya.