Matei 1 - E Nevi Viasta o Psalmo 2004 (Maximoff - Kalderaš)

Katar avela o Jesus

¹ Vitsa katar o Jesus Kristo, šiav katar o David, šiav katar o Abraham.

² Katar o Abraham avilo o Isak; katar o Isak avilo o Jakob; katar o Jakob avilo o Juda ai leske phral;

³ katar o Juda avilo o Fares ai o Zara, lengi dei sas e Tamara; katar o Fares avilo o Esrom; katar o Esrom avilo o Ram;

⁴ katar o Ram avilo o Aminadab; katar o Aminadab avilo o Nason; katar o Nason avilo o Salmon;

⁵ katar o Salmon avilo o Boaz, leski dei sas e Rahab; katar o Boaz avilo o Obed, leski dei sas e Rut;

⁶ katar o Obed avilo o Jesai; katar o Jesai avilo o amperato David. O David avilo lestar o Salomon, leski dei sas e phivli le Urieski.

⁷ Katar o Salomon avilo o Roboam; katar o Roboam avilo o Abia; katar o Abia avilo o Asa;

⁸ katar o Asa avilo o Josafat; katar o Josafat avilo o Joram; katar o Joram avilo o Ozias;

⁹ katar o Ozias avilo o Joatam; katar o Joatam avilo o Ahaz; katar o Ahaz avilo o Ezekias;

¹⁰ katar o Ezekias avilo o Manase; katar o Manase avilo o Amos; katar o Amos avilo o Josias;

¹¹ katar o Josias avilo o Jekonias ai leske phral ande e vramia kai ningerde le Židovon ande o Babilon.

¹² Mai pale kana ningerde le ande o Babilon, katar o Jekonias avilo o Salatiel, katar o Salatiel avilo o Zorobabel;

¹³ katar o Zorobabel avilo o Abiud; katar o Abiud avilo o Eliakim; katar o Eliakim avilo o Azor;

¹⁴ katar o Azor avilo o Sadok; katar o Sadok avilo o Akim; katar o Akim avilo o Eliud;

¹⁵ katar o Eliud avilo o Eleazar; katar o Eleazar avilo o Matan; katar o Matan avilo o Jakob;

¹⁶ katar o Jakob avilo o Josef, o řom la Mariako, kastar arakhadilo o Jesus, kai akharen les o Kristo.

¹⁷ Si ande sa deš-u-štar vitsi de katar o Abraham ži ka o David, deš-u-štar vitsi de katar o David žikin či ningerde le Židovon ande o Babilon, ai deš-u-štar vitsi de katar ningerde le ande o Babilon ži ka o Kristo.

Sar arakhadilo o Jesus

¹⁸ Eta sar areslias te arakhadiol o Jesus Kristo. E Maria, leski dei, sas tomnime pala o Josef, sas phari katar o Svinto Duxo, angla savořende te bešen ande jekh than.

¹⁹ O Josef, lako řom, kai sas jekh manuš lašio ai kai či kamelas te del la pe o lažiav, manglias te del pe rigate latar čorořal.

²⁰ Sar vo delas pe godji, eta, jekh andželo le Baresko avilo leste ande o suno, ai phenel: Josef, šiav katar o David, na dara te les tusa la Maria, tjiri řomni, ke o šiavořo kai si t'avel la avel katar o Svinto Duxo;

²¹ La avela la jekh šiav, ai tu desa les o anav o Jesus; vo skipila pesko narodo anda le bezexa.

²² Sa kudia areslias te kerdiol so o Baro phendiasas katar o profeto:

²³ Eta, e šei pativali avela phari, la avela la jekh šiav, Ai dena les o anav o Emanuel, so si kudia «o Del amensa».

²⁴ O Josef uštilo, kerdias so o andželo le Baresko dias les ordina, vo lias peska řomnia pesa.

²⁵ Numa vo či hamisailo late žikin či arakhadilo lake jekh šiav, kaske dias o anav o Jesus.