Apostoli 1 - E Nevi Viasta o Psalmo 2004 (Maximoff - Kalderaš)

O Svinto Duxo dena les le apostolonge

¹ Teofilo, me dem duma, ande muři mai angluno kliška, anda sa sogodi o Jesus lias pe te kerel ai te sikiarel de anda o gor,

² ži ka o dies kai sas lino ande o čeri, pala kudia kai dias peske ordini, pa o Svinto Duxo, ka le apostoli kai vo alosardias.

³ Pala ke vo kjinuisardias, vo sikadilo lenge živindo, ai vo dias len but semnuri te hatiaren, sikadilo lenge pašte štar-var-deš dies, ai delas lensa duma pa le dieli katar e amperetsia le Devleski.

⁴ Sar vo sas lensa, vo dias len poronka te na durion katar o Jerusalem, numa t'ažiukeren so o Dad phendias ke kerel, so me phendem tumenge phenel lenge vo;

⁵ ke o Jono boldias le paiesa, numa tume, ande tsiřa dies, tume avena bolde ande o Svinto Duxo.

O Jesus anklel ande o čeri

⁶ Atunči le apostoli ande jekh than pušen les: Baria, avela ande kudia vramia ke tu thosa e amperetsia ande o Israel?

⁷ Vo del len palpale: Nai ke tume te žianen kana avela e vramia vai o tsaito kai o Dad vo thodias sar vo kamlias.

⁸ Numa tume lena jekh zor, o Svinto Duxo avela pe tumende, ai tume avena muře martururi ande o Jerusalem, ande sa e Judea, anda e Samaria, ai ži ande o gor la lumiako.

⁹ Pala ke phendias kudo, vo sas lino žikin von dikhenas pe leske ai jekh nuvero garadias les ka lenge jakha.

¹⁰ Ai žikin sar lenge dikhimata thodine karing o čeri žikin vo žialatar, eta, dui manuš ande o parno sikadile lenge,

¹¹ ai phenenas: Manuš anda e Galilea, sostar terdion tume te dikhen pe o čeri? Kudo Jesus, kai sas lino ande o čeri maškar tumende, vo avela palpale sa jekh fialo sar tume dikhlian les te žial ande o čeri.

Ande o than le Judasko

¹² Atunči von gele palpale ande o Jerusalem, katar o plai kai akharen les le Maslinengo, kai si paše o Jerusalem, jekh kilometro katar o foro.

¹³ Kana von aresle, von ankliste ande e soba opre kai von sas sikade te bešen; sas o Petri, o Jono, o Jakob, o Andreas, o Filipo, o Tomas, o Bartelemi, o Matei, o Jakob, šiav katar o Alfeo, o Simon o Zeloto, ai o Jud, šiav katar o Jakob.

¹⁴ Sa ande jekh than thonas pe te řudjin pe, le žiuvliansa, ai e Maria, dei le Jesusoski, ai le phralensa katar o Jesus.

¹⁵ Ande kudo dies, o Petri uštilo maškar le phral, sas kothe pašte jekh šel ai biš žene. Ai vo phenel:

¹⁶ Manušale phralale, trubulas t'aresel so o Svinto Duxo, ande o Ramomos, phendias angla savořende, pa o mui le Davidosko, pa o Juda, kai ningerdias kudalen kai line le Jesus.

¹⁷ Vo sas gjindo maškar amende, ai sas leski partia ande amari butji.

¹⁸ Kudo manuš, kjindias jekh kimpo le lovensa katar o čořimos, pelo, phagilo lesko stato, ai sa leske pořa pele tele.

¹⁹ E diela žianen la sa o narodo ande o Jerusalem ke kudo kimpo si akhardo ande lengi šib Akeldama, kudia si o kimpo le Ratesko.

²⁰ Eta, si ramome ande e kliška katar o Psalmo: Ke lesko kher avela pusto, Ai ke khonik či bešela andre! Ai si ramome: Ke jekh kaver te lel so sas lesko!

²¹ Kadia trubul ke, maškar kudala kai avile amensa sa e vramia kai o Baro traisardias amensa,

²² de katar o bolimos le Jonosko ži ka o dies kai vo sas lino maškar amende, t'avel jekh t'avel amensa sar marturo ke o Rai Jesus si živindo.

²³ Von sikaven don: O Josef akharen les Barsabas, vai Justus, ai o Matias.

²⁴ Porme von řudjisarde kadia: Baria, tu kai žianes o ilo savořengo, sikav savo anda le dui tu alosardian,

²⁵ eta t'avel les partia ka kadi ministeria ai ka kado apostolato, kai o Juda muklias te žial ande pesko than.

²⁶ Von tsirde pe kaste te perel, ai pelias pe o Matias, ai thodine les le deš-u-donsa.