Yahuda 1 - Jju

¹ Nyyai di Yahuda, a̱kwwa Yesu Kristi, n bo n yet a̱wumba Yakubu. Naat di ba̱nyet ba Ka̱za A̱tyyi njit ka yei a̱ bo ba̱ cat ni, mba Yesu na̱ bo cam.

² Ka̱za ya wwon nda, a̱ hok dizot nyin yi swrang ka̱yat gwai wityak.

Ba̱malam dira

³ Ba̱rywai nzuk, n ka̱n kwan zwang ya jem i n ya tyyei ka̱sak ka Ka̱za kan za san ni. Ma dolet n shei rya nzuk a n ya jem i yi gin tyyi ka̱ssi ka̱yat nzwang rot ka̱ryong, ka̱nying ka Ka̱za ka ka̱n wrak ba̱nyet nka ni, di nka ka bo ni shei ba.

⁴ Rot ba̱ka̱tuk ba̱nyet a̱n shyi a̱ bang a̱ nwa ka̱yat nyin da̱ nyin ba bvwo ba. Ba̱nyet bani a̱ shei ba̱ryat tazwa ka̱nu-a̱tan Ka̱za ka a̱ ga shya na̱ta̱ryen ya ka̱son ba̱ a̱ka̱tuk swat mba nu, a̱ rak yet a Yesu Kristi na̱ yet A̱ntyok ka̱ryi njit u ba̱ A̱gwam njit u ni. Ba̱ryat Ka̱za wa ka̱n tyyei nyyai gba̱gbang ka̱sak ka ntaka̱i ba̱nyet iya ba nin sswa ka̱bvung i.

⁵ N bvwo yi bvwo kyang a n ni ya tyyei ni, ma n cat n bo ya yring i ka̱sak ka Ka̱za ka yin tun na̱won Isreila na a̱ wwon nyyai i ka̱byen Masar ka, ma a̱ si bo brak a̱ hywaai ba̱nyet ba a̱ yin wi wrak ka̱ryong i.

⁶ Yi bu yring ka̱sak ka ba̱pfong Ka̱za ba̱yaan ba yin dak ka̱ hok i a̱ byyan pfong mba na, ba̱nyying ba shyi i rop ka̱yat ndyin di ba byyi nom byyik ba, ka̱bvwa ka Ka̱za kan ba̱ sak a̱n tot a̱gba̱dang Nom u ka nin ba̱ tyyi i ka̱bvung ni.

⁷ A̱mi brak Saduma bu Gamurata bu na̱nkrang a yin ba̱ hywot i ba yin dak hok Ka̱za ka a nwa kan-a̱naan a̱ bo nwa cat hok ansham ndwam mba. Ka̱za a̱ ba̱ krok rong wityak, ba̱nyet a̱ ga ryi a̱ hok ka̱wun.

⁸ Ku bu yet bu ryen yring ba̱ka̱tuk ba̱nyet ba a̱ nwai ka̱yat nyin ni, ba̱nyet ba ni a̱ tssup ba̱zzak mba ba a̱ byyan ndwam mba di ba̱zzak ba a̱ rak hok cet Ka̱za na, a̱ bo ryat a̱ka̱tuk ba̱ryat tazwa ba̱nyet Tazwa ba.

⁹ Ko ka̱ram ka ma Mikailu, a̱gba̱dang a̱pfong Ka̱za, na̱ yin sseng a̱gagak ba̱ a̱gwam a̱ka̱tuk tswa tazwa kom Musa, a̱ maai a̱ ku byyan ba̱ryat ba ma a̱ hywa da̱ nu, “A̱gwam nTazwa a̱ na̱ kam.”

¹⁰ Ma ba̱nyet bani a̱ byyan ba̱ryat a̱ pfwei sa̱rei nkyang a mba di ba bvwo ni ba, da̱ni di nyam ni ba yya kyang a ka̱kpeyang mba ka ka cat i, nkyang iya na ba̱ hywaai.

¹¹ Ba ni sswa ka̱bvung! Ba sook ryen Kayinu; ba ywap a̱ sook ryen Balama rot ba cat krum; ba yya wipfong ni di Kuraha ni, a̱mi meyang ban ba̱ byyan di Kuraha ni.

¹² Mba ba̱nyet sang nsum a̱ ryi di a̱dindying nkyang ni ka̱yat ka̱tung nyin ka ka̱ram ka yi nan tung ya nkyangya ni. Ba cam ba̱ a̱ccu mba. Ba ryi da̱ a̱ninyyan na wun ku hywap i, nna ni di ku cong di za ni ba. Ba ryi di na̱kon na a̱ wi tyei disum zikpabyen ni, na̱kon na ba ka̱n tun a̱nan mba na ba kwi ba̱sa̱rei ni.

¹³ Ba ryi di a̱rakumi ba̱shekwot i, nkyang nsum mba na ryi di a̱dindying fwi ba̱shekwot i. Ba ryi di ba̱ra̱ntong na̱ta̱ngwat i, ba̱nyet ba naat ka̱bvwa ndyin wityak i, ka̱bvwa ka Ka̱za ka ba̱ sak i ni.

¹⁴ Anuhu nu a̱ yin yet a̱ba̱yinkitat an byin A̱damu na ni na̱ yin dyat ma a̱wwon tazwa ba̱nyet kani a̱ hywa, “Yi cyang, A̱gwam Tazwa a̱ bai bu ba̱pfong nu ba̱gingang,

¹⁵ a̱ bu tyyi koyan an shirya, a̱ tyyi ba̱nyet ba a̱ rak tssup Ka̱za ni ka̱bvung, nta̱mak ba̱ a̱ka̱tuk nkyang u ba ryat Ka̱za mi ni!”

¹⁶ Ntaka̱i ba̱nyet ani mba a̱ yet ba̱nyet a̱dyying bu ba̱nyet wi pfong ansham. Ba tssup a̱ka̱tuk nkyang u ba cat a ndya mba ni. Ba na ya cin a̱ bo dyep ba̱nyet a̱ ga shya kyang a ba cat i.

Nkyang a yi ni ta̱rwam ba̱na ni bu nkyang a yi ni tyyi ka̱ssi ni

¹⁷ Ba̱rywai nzuk, yi yring kyang a ba̱pfong A̱gwam njit ba Yesu Kristi ba yin hywa ni.

¹⁸ Ba yin hywa, “A a̱ngbom nom u ba̱yanyet a̱ ni ba a̱ mai ba̱nyet, a̱ bo rak tssup Ka̱za a̱ yya nkyang a ba cat a ndya mba ni.”

¹⁹ Ntaka̱i ba̱nyet iya mba a̱ byyan swat a, a̱ si yya nkyang a ndwam ba na cat i, di ba byyi Tswa Ka̱za ba.

²⁰ Ma nyin ba̱rywai nzuk, yi ya ka̱son bu ya nok ka̱yat ka̱ryong ka yi tssup i, yi ya ka̱son ba̱ a̱duwa ka̱yat ncet Tswa Ka̱za.

²¹ Yi sseng ka̱yat cat ka Ka̱za ka za cat i, n tot ka̱ram ka A̱gwam njit u Yesu Kristi na̱ nin brek i. Nu a̱mi a̱ ni za ryi sucet wityak.

²² Yi hok dizot ba̱nyet ti a̱ byyi a̱bibyek ndya ni.

²³ Yi ni kwak ba̱yanyet wwut i an dong. Ba̱yanyet yi hok dizot nkyyai bu ka̱wun, i byyi a̱shishyi ba̱tro mba ba a̱ ka̱n kon a̱ka̱tukyya mba nu ni.

Didyep ba̱ a̱duwa

²⁴ Da̱ a̱yin nu a̱ maai a̱ za ta̱yik i dikpak i, a̱ bu za neyak a̱ta̱ssi nu ka̱yat sai rya bu sang hywak ni,

²⁵ nu a̱mi shii, bu cet, bu cet, bu dityok na yet nying Ka̱za A̱ntyok za san rot Yesu A̱gwam njit, nyyai ndoson bu naani bu har a̱ba̱da! Amin!