Titut 1 - Jju

¹ Nzuk a̱mi Bulut a̱kwwa Ka̱za ba̱ a̱pfong Yesu Kristi. Nzuk ba yin tssa, a̱ tom n si brang ba̱nyet ba Ka̱za ka tssa ba ka̱ tyyi ndya mba na ni, n ga ba̱ brak n tyyi i ka̱ryong ka tssup njit a ku zzek ni.

² Ku hyok i breng ndya bu bvwo njit a i sucet cong bai a byyi tyak ni ba. Ka̱za ka di ka bvei diraa ni ba a̱mi a̱ yin dyat ba̱ryat sucet ba a̱ wwon nyyai ndoson,

³ ba bu tat ka̱ram ka na̱ sak ni na̱ yrang ba̱ryat nu ba. A̱ n tyyi da̱ mba bvak n ga tyyei kyang a Ka̱za A̱ntyok zasan ka ni n tyyi ni.

⁴ Titut, n na̱ jem mi rot tssup a za mon ni, da̱ni di ka̱won ka̱hwa nzuk ni. N naai Ka̱za A̱tyyi bu Yesu Kristi A̱ntyok zasan, ba na̱ ryi a̱liheri nu, a̱ na̱ wwon nda.

Pfong Titut ka̱byen Karita

⁵ N yi na̱ wwon Karita a gi jyi nkyang a n yin wi jyi ntyak a ni, i tssa ba̱nekwo a̱bat tssup a kozan ka̱nkrang. Ryok bring nkyang a n yi na̱ tyyei ni ba:

⁶ Dolet a̱nekwo a̱ yet a̱ntyok sang hywak, a̱ byyi a̱mbyring a̱yring, na̱won nu na brak a̱ yet ba̱nyet tssup, a̱ byyi a̱tsatsak shaida, ba ba̱kaat ba ko ba̱nyet wipfong ba.

⁷ Da̱ni di a̱ntyok breng pfong Ka̱za ni dolet na̱ yet a̱ntyok sang hywak. A̱ ryok ya gba ba, ko gwai diryen, ko na̱ rot ka̱nu a nkwwa ba, ko cat jyi, a̱ ryok cat a̱ka̱tuk ka̱ssok ba.

⁸ A̱ ni gwai ba̱yecen, a̱ cat kyang a yet i. A̱ bvwo breng diccu nu nta̱mak ba̱ a̱zizrak ka̱cyet a̱ bo ya tot.

⁹ Dolet na̱ breng zzek ka̱ryong a kpunkpam, da̱ni ba yin kpo zzek ni. A̱mi na̱ nin brang ba̱nyet ba di zzek ka̱ryong a, a̱ si bo tyyei ba̱nyet ba a̱ kpo rak ni ka̱ywap mba ka.

¹⁰ Rot ba̱yanyet ba̱gingang a̱n shyi a̱ kwot a̱ hywop a̱ bo shyi i raai ba̱yanyet di ba̱ryat nwun, tun ba ba̱nyet ba a̱ brak nyyai i tssup ba̱nyet Yahuda na ni ba.

¹¹ Dolet a ba̱ muk na̱nu mba na, rot ba hwwei na̱sa ba̱gingang bu taka̱i zzek a di ku myim ni ba. Ba kyang yaan ban cat ba, seko ba ga shya bu krum i ryen diraa.

¹² A̱ntyok cyang a̱yaan mba a̱ ka̱n hywa, “Karitawa ba̱jyem ba̱nyet diraa a̱mi, ba̱ka̱tuk nyam ka̱yit, bu ba̱nyet ndan, bu ba̱nyet ka̱hwa a̱dyying.”

¹³ Kyang a na̱ hywa ni brak i yet ka̱ryong, rot a̱mi se a ba̱ ta̱twang ka̱ta̱hrung, ba ga jyi tssup mba na ku tyyi a̱zizrak,

¹⁴ ba ga pfwi tssup tashikum ba̱nyet Yahuda nu, bu truwang ba̱neywu ji yet zzek ba̱nyet a a̱ ka̱n dak ka̱ryong ka ni.

¹⁵ Kozan nkyang yet a̱zizrak di ba̱nyet ba ndya mba na yet a̱zizrak ni; ma ba kyang a ryi zizrak di ba̱nyet ba ndya mba na na bwi, di ba tssup ka̱ryong ka ni ba, rot ndya mba na ba̱ a̱huhwa mba nu a̱ ka̱n bwi.

¹⁶ Ba ya yei ba̱nyet tssup Ka̱za, ma ka̱cyet mba ka a̱ ton. Ba yet kyang tyong, ba̱nyet wipfong, di ba byyi kyang a ba maai yya ku yet ni ba.