Luka 1 - Jju

¹ A̱ntyok ka̱ryi Tiyofalat, ba̱nyet ba̱gingang a̱ ka̱n kwan a̱ jem nkyang ani ba yya ka̱yat njit i.

² Ba jem nkyang a ba̱nyet ba a̱n shyi nyyai dityin ti ba yin dyi a̱ za tyyei ni, mba a̱ bo za yya wa'azi ba̱ryat ji.

³ Nzuk ma n ka̱n tssup nkwwan ba̱ryat a sa̱rei n shya ka̱hyok mba ka; rot a̱mi n dyi ku myim n ma̱ na̱ jem kyang a n hok ni ba̱zizrak,

⁴ rot n cat a bvwo nkyang a a pfong ni bu nkyang a ba na̱ zzek tazwa ba̱ryat kani ni yet ka̱ryong.

Ba tyyei byin Yohana A̱yya Baptisma

⁵ Ka̱ram iya Hirudut na̱ yet a̱gwam ka̱byen ba̱nyet Yahuda nu, a̱yanyet a̱n shyi a̱ yet gado Ka̱za i ka̱srong ba̱nyet A̱biya an sot ba̱gado Ka̱za ji, ba ku yei Zakariya. Ba yin yei a̱mbyring nu nu Alisabatu. Nu meyang a̱ ma̱ yin nyyai an sot ba̱gado Ka̱za ji.

⁶ Assi Ka̱za ba yin byyi hywak ba, rot ba yin pfong ka̱wun A̱gwam Ka̱za ba̱t a̱ tssup truwang nu ji di rya yring.

⁷ Ba yin byyi ka̱won ba, rot Alisabatu a̱ yin yet a̱na̱kwu; nu Alisabatu bu Zakariya ba yin kop ba̱gingang.

⁸ Ka̱tuk ka̱yaan, ka̱ram iya ka̱srong ba̱nyet Zakariya ka mba a̱ yin byyi pfong a i bat Ka̱za na.

⁹ Ba bo ta gyai di tada ba̱gado Ka̱za ji ni, zi kpa a̱za̱ nu. Na̱ nwa ka̱yat bat Ka̱za ka a̱ si hwwi turare ji a̱ta̱ssi Ka̱za ka. Na̱ nwa a̱ nat bu ba̱hyum ba,

¹⁰ a̱ wwon ba̱nyet ba ba sseng a̱ta̱sa a̱ yya a̱duwa ka̱ram ka na̱n shyi hwwi turare ba̱hyum ji ni.

¹¹ A̱pfong Ka̱za a̱ nyyai a̱ bu sseng bvuk yak ka̱bvwa ka ban hwwi turare ji ni.

¹² Ka̱ram ka Zakariya na̱n dyi a̱pfong Ka̱za nu ni, ka̱wun a̱ ku pyyem na̱ nwa trim.

¹³ Ma a̱pfong Ka̱za nu a̱ hywa da̱ nu, “Zakariya, ryok hok ka̱wun ba. Ka̱za a̱ hok ka̱nak nwan ka; rot a̱mi, Alisabatu a̱ ni na̱ byin ka̱won. A ni ka̱ yei Yohana.

¹⁴ Nyin yi ni hok ansham ba̱gingang, ba̱yanyet ba̱gingang a̱ ma̱ ni hok ansham bu ku byin na.

¹⁵ A̱ ni yet a̱gba̱dang a̱yin a̱ta̱ssi Ka̱za. Di a̱ ni sswa nkwwa ko a̱ka̱tuk kyang hyong ba. Nyyai ka̱tuk ku byin ka Tswa Ka̱za ni ku nwa.

¹⁶ A̱ ni brak ba̱nyet Isreila ba̱gingang a̱ ba mi ka̱rek Ka̱za A̱gwam mba ka.

¹⁷ A̱ ni kwwat ka̱son a̱ta̱ssi Ka̱za ka̱yat Tswa bu cet taka̱i Iliya na, a̱ ga brak ndya ba̱tyyi a̱ tyyi i cat na̱won mba, a̱ bo brak ndya ba̱nyet a̱ wi pfong ni a̱ tyyi a a̱za̱ncyi ba̱nyet a a̱ yya kyang a myim ni, a̱ tung ba̱nyet A̱gwam Ka̱za ba a̱ tyyi ba ku tot.”

¹⁸ Zakariya a̱ hywa da̱ nu, “N ni yya ni n bvwo ku yet ka̱ryong? Nzuk a̱nu n yet a̱kukwo a̱yin, a̱mbyring nzuk a̱nu ni a̱ kop.”

¹⁹ A̱pfong Ka̱za nu a̱ hywa, “Nzuk a̱mi n yet Jibrelu, n sseng a̱ta̱ssi Ka̱za ka n tom n bu na̱ tyyei Ka̱sham Ba̱ryat kani.

²⁰ Ma nwan ba rak shim ba̱ryat nzuk ba ba̱ mba ni a̱ ni yet ka̱ryong a a̱tsatsak ka̱ram ni; rot a̱mi a byyi yrang ka̱nu ba, se ka̱ram ka ba̱ryat bani ban ba ba̱cicrak ni.”

²¹ Ka̱ram iya ba̱nyet ba a̱ yin shyi i tot Zakariya ni a̱ nwa hwa kyang a n byyi na̱n da̱de a̱mi i bat Ka̱za na ni.

²² Ka̱ram ka na̱n wruk ni a̱ maai a̱ krang ba̱ mba ba, a̱ ryat ba̱ mba bu di bvak, ba ryi a̱ bvwong Ka̱za a̱ si ku tyyei kyang ka̱yat bat ka.

²³ Ka̱ram pfong Zakariya ka ka bu tyak, na̱ brek a̱ nat ka̱ryi.

²⁴ Ba bvwa nnom ba̱cincong, a̱mbyring nu nu Alisabatu a̱ shya ka̱hwa, a̱ swat bu ka̱ryi a̱n yya hywan pfon.

²⁵ A̱ hywa, “A̱mi Ka̱za ka ni n brang a̱ n tun nsum ka̱yat ba̱nyet.”

Ba tyyei byin Yesu

²⁶ Ka̱ram ka Alisabatu na̱n shyi an hywan a̱kitat bu shya ka̱hwa ka ni, Ka̱za a̱ tom a̱pfong Ka̱za Jibrelu i ka̱nkrang ka̱yaan i ka̱byen Galili ban yei Nazarat.

²⁷ A̱ yin ku tom di ka̱neyang ka̱yaan ban yei Maryamu. A̱yanyet ba ku yei Yusufu a̱ yin ka̱ cat di nyreng. Nu Yusufu nu a̱ yin nyyai an byin a̱gwam Dawuda.

²⁸ A̱pfong Ka̱za nu a̱ ba a̱ bu hywa da̱ nu, “Ka̱za a̱ na̱ ryi myyi rya; A̱gwam Ka̱za a̱ shyi ba̱ nwan, a̱ na̱ ryi ka̱nu-a̱tan ba̱gingang.”

²⁹ Rya Maryamu na i pfut ba̱gingang, rot kyang a a̱pfong Ka̱za nu na̱ hywa ni. Na̱ nwa a̱huhwa, “A̱nzan a̱ yet taka̱i byet ani?”

³⁰ A̱pfong Ka̱za nu a̱ hywa da̱ nu, “Maryamu! Ryok hok ka̱wun ba. Ka̱za a̱ na̱ ryi ka̱nu-a̱tan.

³¹ A ni shya ka̱hwa byin ka̱won i ka̱ yei Yesu.

³² A̱ ni yet a̱gba̱dang a̱yin ba ku yei ka̱won A̱gba̱dang A̱gwam Ka̱za. Ka̱za a̱ ni ku ryi dityok da̱ a̱tyyi a̱kwop nu nu Dawuda ni,

³³ a̱ bo yet a̱gwam na̱mbvon Yakubu na, Dityok nu ti ti byyi tyak ba.”

³⁴ Maryamu a̱ hywa di a̱pfong Ka̱za nu, “Ku ni cong ni n dyi a̱mi? Nzuk nuni n yet bu ka̱neyang, ba a̱ra̱ntyok u a̱ ka̱n ba shishrek ba̱ nzuk ni ba.”

³⁵ A̱pfong Ka̱za nu a̱ hywa, “Tswa Ka̱za a̱mi ni na̱ nwa, a shya cet Ka̱za. Rot a̱mi a̱zizrak ka̱won nu a ni byin ni ba ni ku yei Ka̱won Ka̱za.

³⁶ Cyang a̱wumba nwan nu Alisabatu, ba ka̱n dyat da̱ a̱ yet a̱na̱kwu, ko na̱n kop ni, na̱ yemi bu ka̱hwa nhywan a̱kitat.

³⁷ Kyang n shyi kaat Ka̱za yya ba.”

³⁸ Maryamu a̱ hywa, “To, ryok ku ryi di ka̱sak ka an hywa ni, n yet a̱kwwa Ka̱za.” A̱pfong Ka̱za nu a̱ drok a̱ ku wwon.

Maryamu a̱ nat byyek Alisabatu

³⁹ Ba bvwa nnom ba, Maryamu a̱ rop nat byyek Alisabatu ka̱yat ka̱nkrang ka̱yaan a tsutsok ka̱byen Yahudiya.

⁴⁰ A̱ si nwa a gbang Zakariya ka a̱ byyek Alisabatu.

⁴¹ Ka̱ram ka Alisabatu na̱n hok byyek Maryamu na ni, ka̱won ka a̱ shek ka̱hwa nu ka. Tswa Ka̱za n nwa Alisabatu,

⁴² na̱ yrek diwan nu ti a̱ hywa, “Ka̱za a̱ na̱ ryi ka̱nu-a̱tan a̱ ra̱u kozan a̱rembyring. Ka̱won ka a ni byin ni ma ka̱nying ka̱nu-a̱tan a̱mi.

⁴³ A̱nzan a̱n byyi n nin shya ka̱nu-a̱tan a̱ni a̱naa a̱gwam nzuk a̱ ba n byyek.

⁴⁴ Rot ka̱ram ka a bu n nin byyek ni ba̱gwai a̱ tyyi ka̱won ka a̱ shyi ka̱hwa nzuk ka ni a̱ rop a̱ hruk.

⁴⁵ A shyi bu ba̱gwai rot a shim pfong a Ka̱za ka na̱ tom i ni ku yet ka̱ryong.”

Gwai Maryamu na

⁴⁶ Maryamu a̱ hywa, “Pfwa nzuk a dyep Ka̱za;

⁴⁷ rya nzuk sai rot Ka̱za a̱ n san,

⁴⁸ rot a̱ n yring, a̱kwwa nu, bu rat nzuk a. Nyyai ka̱pfun koyan a̱ ni n yei a̱ntyok hok ansham

⁴⁹ rot a̱cecet nkyang u A̱gba̱dang A̱gwam Ka̱za na̱ n yya mi ni. Ba ku yei A̱zizrak,

⁵⁰ a̱ pfong dizot ba̱nyet ti a̱ ku tyong ni, di na̱ gang cei a̱ wwon ba.

⁵¹ Bvak nu na byyi cet ba̱t; cyang ka̱sak ka na̱n wop sa̱rei ba̱nyet ba a̱ yet a̱ccu ka̱yat a̱ccu mba ni.

⁵² A̱ na kyrek a̱cecet ba̱gwam a a̱tityok mba na, ba̱nyet ba a̱ yet kyang ni ba na̱ ba̱ yrek tazwa.

⁵³ Ba̱nyet ba a̱ pfong cihywat i a̱ ba̱ jyet a̱tsatsak nkyang ba ya a̱ swei, ba̱nyet nzwa na̱ ba̱ tun mbvak kwot.

⁵⁴ A̱ breng kyang a na̱ yin dop a̱ sak bu ba̱tyyi a̱kwop njit ba ni; a̱ brang ba̱kwwa nu ba ba̱nyet Isreila.

⁵⁵ A̱ yring a̱ bo hok dizot Ibrahim bu na̱mbvon nu na bam bu tyak.”

⁵⁶ Maryamu a̱ swat bu Alisabatu a̱ tyak hywan tat a̱ si brek a̱ nat ka̱ryi.

Byin Yohana A̱yya Baptisma

⁵⁷ Ka̱ram mbyin Alisabatu ka a̱ bu yya, na̱ byin ka̱won ka̱seyang.

⁵⁸ Sa̱rei ba̱wumbeyang bu ba̱nyet ba a̱ swat a̱ ba̱ hywot i a̱ hok ka̱sham kyang ka Ka̱za ka ku yya mi ni, a̱ ku brang gwai a.

⁵⁹ Ka̱bawon ka ka bu tyak sati yring, ba̱nyet a̱ tung a̱ ba a̱ ni ka̱ tyyi ncen a̱ bo ka̱ tun diyrek. Ba cat ka̱ yei Zakariya, diyrek a̱tyyi nka ti.

⁶⁰ Ma a̱naa nu a̱ hywa, “Kaai, ba ni ka̱ yei Yohana.”

⁶¹ Ba hywa da̱ a̱naa nu, “Sa̱rei ka̱ryi nyin ka a̱yin a̱n shyi a̱ byyi diyrek iya ba.”

⁶² Ba ryat ba̱ a̱tyyi ka̱won nu di bvak a̱ ku zzim kyang a na̱ cat ba yei ka̱won ka ni.

⁶³ Zakariya a̱ tyyi ba ku ryi nkyang jem, na̱n jem “Ba ka̱ yei Yohana.” Sa̱rei mba ba yya ka̱hat.

⁶⁴ Bu i ka̱baram iya Zakariya a̱ nwa ba̱ryat, a̱ nwa dyep Ka̱za.

⁶⁵ Sa̱rei ba̱nyet ba a̱ ku hywot i a̱ hok ka̱wun ba̱gingang. Nkhang a i nwa sa̱rei tsutsok ka̱byen Yahudiya ji.

⁶⁶ Sa̱rei ba̱nyet ba a̱ hok ni a̱ yya a̱huhwa a̱ zzim, “Ka̱won kani a̱ ni yet a̱nzan taka̱i a̱yin?” Rot koyan a̱ yin bvwo A̱gwam Ka̱za a̱ shyi ba̱ nka.

A̱bvom Zakariya

⁶⁷ Tswa Ka̱za nwa Zakariya a̱tyyi ka̱won nu na̱ ryat da̱ a̱ntyok tyyei ba̱ryat Ka̱za ni a̱ hywa,

⁶⁸ “Zi dyep A̱gwam njit, Ka̱za na̱won Isreila! A̱ ba a̱ bu brang ba̱nyet nu a̱ ba̱ san a̱ kaai a̱ wwon.

⁶⁹ A̱ za shya a̱ntyok ncet u a̱ za san ni. A̱tuba a̱ywu a̱ yet ka̱mbvon a̱kwwa Ka̱za nu ban yei Dawuda ni.

⁷⁰ Nyyai gba̱gbang na̱ yin dyat ka̱nu ba̱nyet tyyei ba̱ryat nu ka a̱ hywa,

⁷¹ ‘A̱ ka̱n dop a̱wwon a̱ ni za san a mbvak ba̱ra̱ndwan njit a bu cet ba̱nyet a rak za ryi ni.’

⁷² A̱ hywa di a̱ ni hok dizot ba̱tyyi a̱kwop njit ti a̱ bo yring rop-wwon nu nu.

^73-74 A̱ yin dyat a̱wwon ba̱ a̱tyyi a̱kwop njit u Ibrahim, a̱ sswa nak di a̱ ni za tun a mbvak ba̱ra̱ndwan njit a, a̱ za wwon zi ku yya dikwwa n byyi ka̱wun nkyang ba,

⁷⁵ i cong a̱zizrak ka̱cyet a̱ta̱ssi nu i yya nkyang a ku myim ni kozan ka̱tuk i swat njit a.

⁷⁶ Nwan ka̱won nzuk, ba ni na̱ yei a̱ntyok tyyei ba̱ryat A̱gba̱dang A̱gwam Ka̱za. A ni sook ka̱son A̱gwam njit ka i ku jyi ryen na.

⁷⁷ A ni tyyei ba̱nyet nu ba ka̱sak ka ba nin shya sucet i rot Ka̱za a̱ ri ba̱ breng i rya tazwa a̱ka̱tukyya mba nu ba,

⁷⁸ rot a̱ pfong dizot bu hakuri. Nka a̱ yet nom ta̱kyek a̱ta̱ntson na ka ni za yrang i nyyai Tazwa ni.

⁷⁹ Ka ni sai nyyai Tazwa a̱zi ba̱nyet ba a̱ swat ka̱yat ndyin dikwu bu ma̱nwwuk nti na ni; a̱ bvan a̱tak njit a a̱ tyei i na̱ta̱ryen hok ansham.”

⁸⁰ Ka̱won ka a̱ rai a̱ tyyi cet i rwam bu tswa. A̱ swat bu ka̱yit a̱ bun tat ka̱ram ka na̱ nin tyyei diccu nu di na̱won Isreila na ni.