Filibi 1 - Jju

¹ Nzuk Bulut bu Timoti, ba̱kwwa Yesu Kristi, naat da̱ nyin ba̱nyet tssup Yesu ba a̱ shyi Filibi ni sa̱rei, bu ba̱pastor bu sa̱rei ba̱nyet ba a̱ brang breng a̱bat ba̱nyet tssup a ni.

² N naai Ka̱za A̱tyyi njit bu A̱gwam njit Yesu Kristi ba ya ryi a̱liheri a̱ ya wwon nda.

A̱duwa Bulut zi ba̱nyet ba na̱ ba̱ jem kpa na ni

³ Kozan ka̱ram n ni ya yring n na dyep Ka̱za mi a̱za̱ nyin.

⁴ Kuma kozan ka̱ram n nin ya yya a̱duwa sa̱rei n na yya bu gwai ka̱yat mpfwa nzuk,

⁵ rot yi n brang i tyyei Ka̱sham Ba̱ryat kani nyyai ka̱ram ka n nin nwa ni har bu tat ka̱ram kani.

⁶ Rot a̱mi n bvwo ba̱zizrak, Ka̱za ka a̱ tup ka̱sham mpfong kani a mpfwa nyin na ni a̱ ni ya ka̱son ba̱ nkpa har tyak nkpa na ka̱tuk ka Yesu Kristi na̱ nin brek ni.

⁷ Kozan ka̱ram yi shyi mpfwa nzuk; rot a̱mi ku myim n hwa nkyang ani a̱za̱ nyin, rot sa̱rei nyin yin byyi bvak ka̱yat mpfong ka Ka̱za ka ni n tyyi ni, ba bu ka̱ram kani n nin shyi a jaru nu ni ba, ma nyyai n ri sseng a̱ta̱ssi ba̱nyet n ta̱gbak Ka̱sham Ba̱ryat Yesu ka, ba ga ka̱ san ansham.

⁸ Ka̱za nka a̱ yet shaida nzuk ji ka̱sak ka cat a n ya cat i nyyai di Yesu diccu nu.

⁹ Ka̱yat a̱duwa nzuk ka, nkyang ani a̱mi n na naai Ka̱za: kan ya brang gwai ba̱yaan, a̱ bon ya brang bvwo, a̱ bo ya ryi cet a yi ni maai cyang nkyang a yet i,

¹⁰ yi gi maai tssa nkyang a yet a̱tsatsak ni. A̱mi yi nin maai sseng ba̱zizrak ka̱tuk ka Yesu na̱ bo nin brek a̱ ba i ka̱sa ka ni, na̱ bu ya shya yi yet ba̱nyet sang hywak,

¹¹ yi gi bu shya a̱tsatsak hali nu a̱ nyyai di Yesu Kristi ni i yya a̱tsatsak nkyang a ba̱nyet ba ni ryi a̱ dyep Ka̱za a̱ bo ka̱ ryi shii ni.

Kristi a̱mi a̱ yet sucet nzuk a

¹² Ba̱wumbeyang, n cat yi bvwo ka̱bvung ka n sswa ni a̱ brang Ka̱sham Ba̱ryat a̱ shya nwa di ba̱nyet ahwa.

¹³ Nkpa n byyi sa̱rei nsoja na shyi ka̱ryi a̱gwam ka ni bu kpikpit ba̱nyet a ba bvwo, a̱zi hywak Yesu Kristi a̱mi ba nin zzop.

¹⁴ Shyi a jaru nzuk u tyyi ba̱wumbeyang ba̱gingang a̱ tyyi ndya mba na yring i tssup A̱gwam njit u a̱ jing ka̱wun a̱ tyyei ba̱nyet ba̱ryat Ka̱za ba di cet.

¹⁵ Ku yet ka̱ryong ba̱yanyet a̱ yya wa'azi Yesu nu rot swam bu dinccok. Ma ba̱yanyet a̱n shyi a̱ yya da̱ a̱tsatsak ka̱ryong

¹⁶ rot ba n cat, rot ba bvwo Ka̱za a̱mi a̱ n dyi pfong ta̱gbak Ka̱sham Ba̱ryat ka.

¹⁷ Ba̱nyet yaan ni a̱ yya wa'azi Yesu di ka̱ryong ba, ma di cat diccu. Ba hwa di ba ni n kwwat ka̱bvung ba̱gingang ka̱ram ka n nin shyi a jaru nu ni.

¹⁸ Ma ku yet kyang ba! A̱kpok nkyang a̱nu: ka̱yat kozan ryen, ko ka̱yat a̱ka̱tuk ko a̱tsatsak a̱huhwa, ban yya wa'azi Yesu. Rot a̱mi n gwai ba̱gingang

¹⁹ rot n bvwo a̱duwa nyin nu bu brang a Tswa Ka̱za ji zi nin brang ni ni tyyi ba n kaai a̱ wwon.

²⁰ Kyang a n cat i n bo n tyyi rya nzuk a ni nkpa yet: i kozan ryen n hok nsum ba, ma n byyi gbung rya na maai ni, ba̱nyying bu kozan ka̱ram Yesu a̱ ga shya shii i rwam nzuk a, ko an sso ko i dikwu.

²¹ Rot da̱ nzuk, sso nji yet Kristi, dikwu ti i yet ka̱ssok.

²² Ma ki sso nzuk ji ni byyi ba̱nyet ba kpungtun, to, n ka̱n bvwo kyang a n ni tssa ni ba.

²³ Nkyang hwa na n tyet tyyi a̱katyyi: nzuk n cat n wwon ka̱sa ka n nat di Kristi, kun dan kozan kyang.

²⁴ Ma ki n bo n cyang ansham, n dyi ku yet dolet bu byyi kpungtun n yen swrang i ka̱sa ka ni sabo ba̱ nyin.

²⁵ N bvwo a̱mi; rot a̱mi n bo n bvwo n sseng. N ni yen swrang ba̱ nyin sa̱rei n ga ya brang yin tyyi ka̱ssi, i gwai ka̱yat wrak Yesu ndya nyin ka,

²⁶ yi gi shya kyang a yi nin dyep Yesu Kristi a̱za̱ nzuk ni ka̱ram ka n nin brek n ba da̱ nyin ni.

²⁷ A̱gba̱dang kyang brak nu a̱ yet: ka̱cyet nyin ka i tssup Ka̱sham Ba̱ryat Kristi ka yi san ni. Rot a̱mi, ko n do bu shya ba da̱ nyin ba, n ga n hok nkhang a yin sseng ka̱nu nyin ka̱yring ba̱ a̱huhwa nyin ba̱ a̱yring kwan ka̱rek ka̱yring, Ka̱sham Ba̱ryat Yesu ka a̱ ga ya ka̱son,

²⁸ i ryok hok ka̱wun ba̱ra̱ndwan nyin ka ba, ba ga bvwo ba ni hwan, ma nyin yi gi bvwo yi ni kaat rot Ka̱za a̱mi a̱ ya san.

²⁹ Ka̱za nka a̱ ya ryi ndya na yin san Kristi ni; ba bu ku san na ba, ma a̱ bo ya nang diwat ti yi nin sswa ka̱bvung ka a̱zi hywak nu na ni.

³⁰ Yi drok i kwan zwang jini ba̱ nzuk. Zwang ji yi yin dyi n kwan nnyyai ka ni, nji a̱mi n ri kwan di nkhang a yi shai pfong ni.