Afisa 1 - Jju

¹ Wasika a̱ni a̱ nyyai da nzuk Bulut, a̱pfong Yesu Kristi ka̱sak ka ku myim Ka̱za ni, naat di ba̱nyet ba a̱ tyyi ndya mba na i tssup Ka̱za ni a Afisa, mba a̱mi a̱ yet ba̱nyet ka̱ryong ka̱yat Yesu Kristi.

² Ka̱za A̱tyyi njit, bu A̱gwam njit Yesu Kristi a̱ ya wwon nda bu myyi rya.

Ka̱nu-a̱tan Kristi

³ Se zi dyep Ka̱za bu A̱tyyi A̱gwam njit Yesu Kristi. Nu a̱mi a̱ za krok kozan taka̱i ka̱nu-a̱tan a̱nying tswa nu a̱ nyyai Tazwa ni rot ka̱mon njit bu Yesu.

⁴ Nyyai ba ka̱n yya ka̱sa ka ba, Ka̱za ka za tssa zi yet ba̱nkaa rot ka̱mon njit bu Yesu Kristi, i gi yet ba̱zizrak ba̱nyet, ba̱nyet sang hywak a̱ta̱ssi nka. Ka̱yat za cat nu ka

⁵ kan za tssa a̱ tun, a̱ za sook zi yet na̱won nka rot pfong a Yesu Kristi na̱ yya ni, ka̱yat hok ansham nka bu kyang a ka̱ myim ni,

⁶ zi gi dyep Ka̱za rot a̱gba̱dang a̱liheri nu ka za ryi ka̱yat a̱tuba ka ka cat i.

⁷ Ba̱sok Kristi ba a̱mi a̱ tyyi zin shya shot a, wato ba za tssu a̱ka̱tukyya njit u. Yi cyang taka̱i a̱gba̱dang za̱nang Ka̱za na ni.

⁸ Ka̱yat sa̱rei, ka za nang a̱za̱ncyi bu bvwo,

⁹ rot ka ka̱n za tyyi zi bvwo a̱ bo za tyyei nkyang a shyi ka̱nrang ka̱yat kyang a ka sak i hok ansham nu ni, kyang a ka sak a̱ ni yya ka̱yat Yesu ni, a̱ ga tyyi ku yya pfong ki ka̱ram ka a̱ bu yya.

¹⁰ Yya ka̱ram a̱ ni ba bu sa̱rei nkyang a shyi ka̱yat Tazwa bu ka̱byen ni, sa̱rei an bvak a̱neyring, nu a̱mi a̱ yet Yesu.

¹¹ Ka̱za, ba̱ a̱huhwa nka nu, ka za tssa njit ba̱nyet nka ka̱yat mon a̱ccu njit bu Yesu rot kyang a ka cat i bu kyang a ka shirya nyyai ndoson ni,

¹² njit u yin tason sak rya a Kristi ni, zi gi dyep shii Ka̱za na.

¹³ To, nyin meyang nwap nzaan na yi mon a̱ccu bu Kristi ka̱ram ka yin hok ba̱ryat ka̱ryong ba ni, Ka̱sham Ba̱ryat ka a̱ ya ba di sucet nyin a ni. Yi san Kristi tyyi ka̱yat ndya nyin ka. Ka̱za a̱ ma̱ ya ryi Tswa nka ji zi yet a̱lama nu yin yet ba̱nyet nka ni. Nkpa a̱mi na̱ yin dyat a̱wwon.

¹⁴ Ka̱za a̱ za ryi Tswa nka ji, zi yet shaida ka̱sak ka zi nin san kyang a ka ryat a̱wwon a̱ ni za ryi ni. Nji a̱mi bu za tyyei ka̱sak ka zin yet ba̱nyet Ka̱za ni, se ka̱ram ka na̱n za tun a̱ wwon ni. Se zi dyep shii nka na!

A̱duwa Bulut

¹⁵ Nkpa a̱mi n byyi, nyyai ka̱ram ka n nin hok ka̱sak ka yin tyyi ndya nyin na i tssup A̱gwam njit Yesu ni bu ka̱sak ka yin gwai sa̱rei ba̱nyet tssup ba ni,

¹⁶ n dyep Ka̱za a̱zi hywak nyin n byyi pfwi ba. Kozan ka̱ram n nin yya a̱duwa n na ya yring.

¹⁷ N na yya a̱duwa nu n naai Ka̱za A̱gwam njit Yesu Kristi, A̱gba̱dang A̱tyyi, ka ga ya ryi Tswa nka ji zi ya tyyi a̱za̱ncyi i ya tyyei Ka̱za ka, yi gi ka̱ bvwo.

¹⁸ N naai Ka̱za ka ya tat a̱ssi ndya nyin na yi gi ryi ka̱bvwa saai ka, gi bvwo nsak rya na kan ya yei ni, ba̱ a̱duniya ka̱nu-a̱tan nu na̱ sak a̱ ni wrak ba̱zizrak ba̱nyet ba a̱ yet ba̱nuu ba ni,

¹⁹ bu ka̱sak ka a̱gba̱dang cet nu nu na̱n yya pfong ka̱yat njit ba̱nyet ba a̱ wrak ka̱ryong ni. Cet na ni yya pfong bu yring ba̱ a̱gba̱dang cet nu

²⁰ ka yin tyyi a̱n yrek Yesu Kristi nyyai a̱yabyen ka ni, a̱ si ku sak mbvuk yak dityok Tazwa ti.

²¹ Kristi a̱ shyi tazwa a̱ breng kozan dityok; kozan cet bu dityok bu ba̱gwam sa̱rei a̱ shyi mbvak nu. Diyrek nu ti shyi tazwa kozan cet bu dityok i ka̱sa kani bu ka̱sa cong bai.

²² Ka̱za a̱ ka̱n wwon kozan kyang mbvak Kristi, a̱ ku tyyi na̱ yet a̱gba̱dang a̱gwam ba̱nyet tssup u sa̱rei.

²³ Coc ji yet rwam Kristi. Na̱ swat ba̱sa̱rei ka̱yat nji, a̱ si bo swat ka̱yat ka̱sa ka sa̱rei.