१ तिमोथि 1 - जुम्ली1 हामिकन मुक्तिदिन्या परमेसोर र हामिले आस गर्या ख्रिस्ट इसुको आग्या उन्सार ख्रिस्ट इसुको मुख्य चेला मु पावलले यइ चिठिक, 2 बिसासमै मोइले मान्या मेरो स्हाँचो छोरो तिमोथिकन लेख्तैछु। परमेसोर बाबा र हाम्मा प्रभु इसु ख्रिस्टले अनुग्र, दया र सान्ति देउन्। झुटो सिच्छ्यादेखि होसियार 3 मु माकेडोनिया सहरमै जान्या बेला तुमिकन एफिसस सहरमै बस भुनि बिन्ति गर्याछियाँ र झुटो सिछ्या सिकाउन्याहरुकन तेइथो सिछ्या नसिकाउ भुनि स्हारो आग्या दिनु। 4 र तिनुहरु सिलकहरु र कैलै नस्हकिन्या बुंसका बार्यामै नलागुन्, यइथा कुडाले राडो मात्तै बडाउन्छ, बतु बिसासमै गरिन्या परमेसोरको काममै लागुन्। 5 हाम्मो आग्याको उदेस्या माया हो, तेइ स्हुद्दो हिर्दया, राम्मो स्हुचाइ र स्हाँचो बिसासबाट आउन्छ। 6 कोइ कोइ मान्ठहरु यिँ कुडाहरु बिर्स्हेर तस्हैका कुडाहरुमै अल्मलिरया छुन्। 7 तिनुहरु मोसाको अइनका सिच्छ्या दिन्या हुन खोइदाछुन्, तर आपुले गर्या कुडा या आपुले स्हइ हो भुनि भुन्या कुडा आपै बुइदैनुन्। 8 हामिकन थाँ छ यति कोइले मोसाले लेख्या अइन स्हइ तरिकाले मान्नोछ भुन्या तेइ राम्मो छ। 9 हामिकन यइ पुनि थाँ छ मोसाले लेख्या अइन धर्मि मान्ठकन हैन, तर अइन मिइन्याहरु र भुन्या नमान्न्याहरुकन, परमेसोरकन मान नगन्न्या र पापिहरुकन, पबित्त कुडाकन पबित्त नमान्न्या र पबित्त कुडाकन अपबित्त बुनाउन्याहरुकन, आम्ना बाबा आमास्हात पस्हि लाग्न्या र मान्ठकन मार्छु भुन्याहरुकन, 10 बेबिचारिहरुकन, लोक्न्याले लोग्न्या स्हात र स्हैनिले स्हैनि स्हात बेबिचार गन्न्याहरुकन, मान्ठ अपरण गरि किनबेच गन्न्याहरुकन, टोट्टाउन्याहरुकन, बिफरो स्हाँचि दिन्याहरुकन, र स्हाँचो सिच्छ्याको बिरोद्दमै भया अरु यइथै कुडाहरुका बिअ हो। 11 यइ हामिकन असिपात दिन्या परमेसोरले मुकन जुम्मालाया महिमित राम्मो रैबारमै पाइन्छ। पावलकन प्रभुको अनुग्र 12 मुकन तागत दिन्या ख्रिस्ट इसु हाम्मा प्रभुकन धन्याबाद छ, क्यानभुन्या उनुले मुकन बिसासिलो ठराइकन आम्नो काम गन्न छान्या। 13 हुन त मोइले पैला उनुको खिसि गर्याँ, दुख दियाँ र अपमान गर्याँ, तर मोइले थाँ नपाइ र अबिसासमै गर्या हुनाले मोइले दया पायाँ। 14 हाम्मो प्रभुको मथ्थै अनुग्र मोइले पायाँछु, र ख्रिस्ट इसुमै भया बिसास र माया मुकन दिया। 15 ख्रिस्ट इसु पापिहरुकन बचाउन यइ सुन्सारमै आया, यइ बचन स्हबैले ग्रहन गन्न्या लाएकको र स्हाँचो कुडा हो। पापिहरुको म्हजौदो मोइले स्हबै भुन्दा भौति पाप गर्या छु। 16 तर पापिहरुका म्हजौदो मु स्हबै भुन्दा भौति पाप गर्या भया पुनि मोइले दया पायाँ। यइबिअ उनुमै बिसास गरि अजम्बरि जिबन पाउन्याहरुकन ख्रिस्ट इसुको धिर देखाउन उनुले मुकन उदारन बुनाया। 17 जुगौं जुगका राजा, कैले नास नहुन्या र नदेखिन्या एकमात्तै परमेसोरकन स्हुम्मान र महिमा उकुरै भैरओस्। आमेन। 18 मेरो छोरो तिमोथि, मु तुमिकन यइ आग्या गद्दोछु, तुम्मा बार्यामै पैले कया परमेसोरको रैबार उन्सार, ति कुडाबाट आँट पायर बिसास र राम्मो स्हुचाइ राखि झुटो सिछ्या सिकाउन्याहरुको बिरोदमै राम्मो लडाइ लड्न स्हक। 19 बिसास र राम्मो स्हुचाइ राखिराख। कोइ कोइ मान्ठहरुले राम्मो स्हुचाइकन मतलब नदिइ आम्नो बिसास नास गर्याछुन्। 20 तिनुहरुमद्दि हुमेनियस र अलेक्जेन्डर हुन्, परमेसोरकन खिसि नगन्न स्हकुन भुनि मोइले तिनुहरुकन सैतानका हात जुम्मा लायाछु। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.