Filimɔn 1 - Jɔ Biibili ki

Coolinŋ ki

¹ Míŋ Pooli wɔ̀ bo-i nkasu ru Yesu Kirisa tɛ baara ki bira, míŋ fa ńʼtindaŋ Timote, yibɛɛ i ka sɛbɛ ka wɔri ta-a miŋ Filimɔn tɛ, minwɔ̀ i yibɔɔ wɔshuru byii i, niŋ fa yi baara mashi i,

² yi i ǹʼwɔri ta-ri yi narinŋ Afiya tɛ niŋ fa Arisipi, ninwɔ̀ i ye-a yibɛɛ tɛ, nwɔma Kirinŋ wɔ Wulujii ki i ta jɛŋ. Bilinatɔnŋ wɔ̀ri i arì rakɔli-la mɔɔn mani ki ru, yi i ǹʼwɔri ta-ri nini tɛ sɛbɛ.

³ Yi Tiŋ Kirinŋ ki fa yi Ŋuntiŋ Yesu Kirisa ɲaanfɛfili wɔri á tɛ, ŋì i shɔɔrinŋ ma á tɛ.

Pooli Filimɔn wɔ bilinabi ki wulu lama-i

⁴ Mɔ́ɔ́n nafɛ kiri ciiru, míŋ i coolinŋ wɔri-ra Kirinŋ tɛ miŋ Filimɔn bira waarinŋ bataa ru.

⁵ Sɛli ki ra, mɔɔn bilinabi ki Ŋuntiŋ Yesu ra, niŋ fa miŋ Kirinŋ wɔ konanbi ki bidi-i nʼtɛ ɲaan wɔ̀ tɛ, míŋ niŋ bataa rama-i.

⁶ Niŋ ki ra, míŋ Kirinŋ nafɛ-a miŋ tɛ, ńʼtu tindanbi wɔ̀ yibɛɛ fa miŋ faninmwuŋ Yesu Kirisa bilinabi ki baraka ra, ńʼtu Kirinŋ ǹʼbɛɛ bo niŋ sun. Kirinŋ ǹʼbɛɛ bo niŋ sun, nwɔma yibɛɛ i shɔɔrinŋ wɔ̀ bataa kila-a yɔɔ ɲaninkulutɔnbi ki ru Kirisa fan, ŋi i niŋ tɔka shɔ.

⁷ Ńʼtindaŋ Filimɔn, mɔɔn bidintɛbi ki wulu ki míŋ ciirudi-i a sɔbɛ ra, ŋì i tɔnnafurubi wɔri nʼtɛ, sabu miŋ bilinatɔnŋ mwɔɔnna siratu-i.

Onensimu bi ki

⁸ Niŋ ki ra, ŋì i kɛɲɛ yibɔɔ tenbi ki wu Yesu Kirisa baraka ra, hali míŋ ji-a so miŋ karaba-i ńʼtu miŋ bi ma,

⁹ ǹʼdi-i míŋ tɛ, ŋí i miŋ nafɛ bidintɛbi ki baraka ra. Míŋ Pooli i mani wɔ̀ ru jiŋ, míŋ bwuubi so-i, ŋí i ji nkasudaŋ i Yesu Kirisa tɛ cinŋ ki bira.

¹⁰ Míŋ i miŋ nafɛ-a Onensimu bi ki ra. Wú ji-i míŋ daŋ i Yesu Kirisa baraka ra, ŋì i míŋ tu nkasu ki ru.

¹¹ Waaci fwuudemaan kiri ra, shɔ kulu wuru wú ra miŋ gbɛ kì, nka dɔnsaŋ, shɔ kulu la ji wú ra míŋ fa miŋ fɔn gbɛ.

¹² Niŋ ki ra, míŋ i wú bo ta-a miŋ tɛ dɔɔ sɛbɛ, wúfinŋ wɔ̀ ji-i miŋ tu míŋ firi ki bɛɛ.

¹³ Ǹʼwuru-ra di míŋ tɛ, ŋí i wú tu ńʼkankantɛ kwumaŋ waaci wɔ̀ ru, míŋ i nkasu ru Kirinŋ wɔ Wulujii ki bira, wú i ńʼwɔ cinŋ kiri ma-ni miŋ ta ru,

¹⁴ nka míŋ ǹʼtɛ ŋí i bi tɔri tenŋ ma ńʼŋununtɛ, míŋ fa miŋ fubali nwɔ̀ ra kì, nwɔma miŋ fa na shɔɔrinŋ ki ma nʼgbɛ kɔɔsun kì, nka ŋi i ǹʼma ciirudibi wu nʼyɛri tɛ.

¹⁵ Ŋì a so ji-i tu miŋ fa Onensimu, tu ábɛɛ á san-ni ámaŋ na waaci pyaanŋ nu, nwɔma á i so tu-i ámaŋ fan waaci bataa a.

¹⁶ Wú miŋ tu joŋ bantenŋ kili kì, wú fwuu niŋ sun, wú i tindaŋ byii i. Wú bi ki gbɛ-i míŋ gbɛ kusɛbɛ. Wú bi ki kakan-i ŋì i gbɛ miŋ gbɛ ŋì i fwuu mɔ́ɔ́n ki sun sɛbɛ, sabu konanmini yɛ, niŋ fa wú i ji bili-la Ŋuntiŋ ki ra.

¹⁷ Niŋ na, a miŋ ji míŋ ji-a nʼwɔ wɔshuru sɛli ki ra, wú pa miŋ tu míŋ.

¹⁸ A wú ji bi li miŋ gbɛ, walima a mɔɔn kɔni ji wú ra, niŋ ji míŋ na kɔni i, ŋi i niŋ bo míŋ tɛ.

¹⁹ Míŋ Pooli yɛrima ki gbɛ ki i ka wulu kari sɛbɛ-a, ńʼtu míŋ a niŋ kɔni ki bataa sali miŋ gbɛ, nka ǹʼtɔ tu míŋ yɛri ki wɔ kɔni miŋ na, niŋ i miŋ ɲini ki i.

²⁰ Sɛli ki ra, míŋ tindaŋ, ǹʼma Ŋuntiŋ ki bira, ŋi i míŋ ŋununabyɛ ka bi ka ru. Yibɔɔ tenbi ki bira Kirisa ra, ciirudibi wɔri ńʼtɛ.

²¹ Míŋ gbɛ faa-a miŋ nu, tu miŋ koŋ sɔbɛ ɛ, niŋ ki ra míŋ bi ka sɛbɛ wɔri ta-ri miŋ tɛ. Míŋ bili-i ǹʼna, ńʼtu miŋ a ǹʼma ŋi i fwuu mɔ́ɔ́n bimaan ki sun.

²² Ka bataa kɔɔtɛ, ŋi i fudaŋ ki bɛɛ ramɔni míŋ tɛ nmaŋ, sabu Kirinŋ fa ábɔɔ rafɛ kiri baraka ra, ǹʼtu-i pyaanniŋ, kí i míŋ wɔri ábɛɛ tɛ.

Pooli wɔ coolinŋ nakɔɔra ki

²³ Epafirasi wɔ̀ i míŋ fan nkasu ki ru Yesu Kirisa tɔ ki bira, niŋ i miŋ co-a.

²⁴ Míŋ baara mashi wɔ̀ri i Maraka, Arisitariki, Demasi niŋ fa Luki, nini bataa miŋ co-i.

²⁵ Ŋuntiŋ Yesu Kirisa wɔ shɔɔrinŋ ki tu á fan.