Ukan. 1 - Yus Papí: Shuarja̱i̱ Yus Yamaram Chicham Najanamu

Jerusaréṉ emeskamu e̱a̱rma

¹ ¡Maaj, péprunam aents timia untsurí matsamin armia núchak timia niṉki ajasá! ¡Uunt nuṉka mátsatka úuntri̱niauya núchak wáje̱a núnikia! ¡Úunt akupniu nawantri̱nkia kakarmaja̱i̱ iniatai̱ ajasái!

² Káshikia tí waitiak úteak nea̱jkiri̱ṉkia yapiniam wea pujawai. Tura ni ashí anenaitiai̱ri̱ ainia nusha chikichkisha niin atsaṉkratniuka atsawai. Núnisaṉ ashí amikrí̱sha anaṉkawar nemasnaikiarai.

³ Jutaka tí waitkiastinnium tura nukap takamtiksatin achira yajá yaruakma áiniawai. Uunt nuṉka mátsatka ainia nui̱ pujuiniawai túrasha ayampratniunka takakainiatsui. Tura ashí niin apapéna nuka jintia tsérerchinian amaiyánkarai.

⁴ Seuna páasari̱ṉkia kúntuts utma awai. Yaki shiir waratai̱ nampernumsha tati. Warí ashí wáitiri̱sha yumpuntramuiti. Núnisaṉ Yúsnan pujurniusha útainiawai tura ashí nuwa̱ch áishmaṉja̱i̱ tsaniṉcha ainia nusha tí kúntuts wáitias matsatainiawai.

⁵ Ni nemase̱ṉka uunt akupniu uchirí̱ ajasárai tura niin muí̱jiarmia nuka ti núkap takustin súsarai. Warí, nakitiáiniak ti kajen ásarmatai Jiuwak núnaka túrawarai. Tura ni uchirí̱nkia nemasri̱sha iimiainiamunmaṉ achirar yaruakma áiniawai.

⁶ Seúnnumia̱ nuwa̱ natsa shíirmari̱sha aya méṉkakamai tura akupniu uchirí̱sha chipiu yurumkari̱ atsana núnis ajasármai. Túmainiak ni nemasri̱ apapénam kakarmachu ajasár wekainiarmai.

⁷ Jerusaréṉnumia̱ aentska ni nemasri̱ achiram yaki yaiṉkiat. Nui̱ umiktinian nakitrarmia nuna wáitsartin tsawant armia nunasha enentáimtusar tura yaunchu péṉker wakerú ajamnian takaku armia nuna enentáimturarmiayi. Jerusaréṉ iniarmatai ni nemasri̱ iisar wishikrarmiayi.

⁸ Jerusaréṉka tunáa ti yajauchi túraiti tuma asa nuya̱ṉka akankámuiti. Nin shiir enentáimtin armia nusha ashí nakitraruiti misú wáinkiaru ásar tuma asa sukaska mayatar tí úteawai.

⁹ Ni mui̱jmiainian túrak máatraiti, ukunam túrunatniuri̱ncha enentáimtumaschaiti. Tuma asa aya aneachma peṉké emeskamu nuṉkach juakai tura yaaksha nin atsaṉkramniaka atsawai. Ashí winia nemasrusha kakankármatai winia kúntutsruja̱i̱ wáitiamu Jiuwáa iiskia.

¹⁰ Tura nemassha Ame Je̱e̱min ashí shíirmach írunna nuna kasamak yaruakarai. Tura Winia Shiir Awajtai̱ Je̱a̱rui̱ waya̱charti Ame tímiam nui̱ uunt mátsatkamunmaya̱ ainia wáinian Jerusaréṉsha wainkiayi.

¹¹ Maa Jiuwáa, ju̱á tí wáitiajna ju̱ íirsata. Warí Ame shuarumka máyat máyat ajakmaikia yurumkan e̱a̱iniawai. Tura tsukái jáka̱i̱j tusar ni warirí̱ṉkisha shíirmach takakman surukar nuja̱i̱ yurumkan sumarmainiawai.

Jerusaréṉ wáitiak Yusan untsúamu

¹² Átum nu jintianmaani̱ ashí yujarmena nútirmeka ¿itiurchatka peṉké enentáimtsurmek? Émamkesrum íisrum Jiuwá suíran kae̱ kaje̱nturak winia asuttiakui najaimiakmaj tímiatrusar najaimiaktin áwak nu péṉker nekaatarum.

¹³ Yakiya̱ṉ jinia akupkámai tura ukunchruncha amutrawai. Winia nawerui̱ nekan neturtukmai túruta úkumur awaṉtukmiai. Túrutamtai aya jú̱nik atsaku juákmajai nuya̱ṉka takamtsuk tsawant najaimiasan pujusmajai.

¹⁴ Wi nakitiakun ántichu asamtai kijinian neturta Ní uweje̱ja̱i̱ṉ jiṉkiatamai. Chápik jiṉkiarman kuntujrui̱nkia neturtuawarai túman kakarmasha pimpí pimpí ajasárai. Nuya̱ṉka wajakchamnianum chikicha uwejé̱e̱n Uuntka surutak iniaitiusai.

¹⁵ Winia Úuntruka wisha wajai̱ṉ winia aentsur kakaram ainia nunasha najatrarai. Natsancha awakkataj tusa yajaya̱ untsurí aentsun untsumprukai. Uwa chanúa nútikias Jutá nawantri̱n natsach áishmaṉja̱i̱ tsaniṉcha ainia nuna Uuntka najakarai.

¹⁶ Nu túruna asamtai utjai tura winia ji̱rui̱ṉkia nea̱jik papar ajawai. Winia enentái̱run ayamtikiar atsaṉtin ikiurkiyi. Túrutamtai nemasur awaktúkaru ásarmatai winia uchirsha emesnakarai.

¹⁷ Seun uwejé̱n takuimtaisha niin atsaṉkramniaka atsawai. Núnisaṉ Jerusaréṉsha ashí nui̱ pujuiniana nu muí̱jkiamu juákmiayi. Warí Jiuwá Jakupnaka niin ayamach pujuiniana nu nemasnaikiarti tusa tsaṉkatkarmiayi.

¹⁸ Jiuwaka nákak túriniaiti túmanak wikia Ni chichame̱n umiktinian nakitmiajai. Antsu yamaikia ashí aentstiram antuktarum. Ti najaimiakun wáitiajna nu íirsakua. Wini̱ya̱n nuwa̱ch áishmaṉja̱i̱ tsaniṉcha ainia nuna tura áishmaṉ natsach áinia nunasha achirar yarurtukaruiti.

¹⁹ Winia anenaitiai̱r arma nuna untsukarmajai túrasha anaṉkruawarmai. Tura Yúsnan pujurniusha tura ashí uuntri̱ ainia nusha tsukái kaji̱nki̱á̱i̱j tusar péprunam yurumkan e̱a̱k yujasar kaji̱ṉkiáruiti.

²⁰ Jiuwáa íirsakia, kuntuts enentáimsan waittsa pujakun jakamnia nekapeajai. Nakitiakun ti kajeku asamtai winia enentái̱rka najarnarmin ajawai. Tura ai̱ á̱a̱ni̱ṉkia puyá̱a̱ muí̱jmiar awajkáyi antsu ju̱i̱ initiaani̱ṉkia áya jákatniuk awai.

²¹ Wi najaimiakur wáitiamun anturtukarmai túrasha yáakesh winia atsaṉturtin atsumai. Ame emestukam yajauch awajtúkuitmena nuna antukar ashí winia nemasruka warainiawai. Tura Ame túrattajai tu chichakuitme nu tsawant akuptúkarta wi urukaj jú̱nikiarat.

²² Tura wi tí yajauch túrakur umikchamurja̱i̱ winia túrutaitmena nútiksamek nisha ni yajauchiri̱ji̱a̱i̱ métek makurarta. Warí wikia enentái̱rja̱i̱ tí waitiakun jáa jaat ajasan pujajai.