Tîtɛ 1 - Kɑɑ Fí

CɛꞋlɛ

¹ Yɔ ŋwɑꞋnɛ fú mbɔ̌ mɔ Pɔ̂l, ɛ fɑꞋ fɑꞋ-Sɛ́, ḿbɛn ḿbɔ́ ŋɡɑŋntúu-Yɛ́su Kɛlístɔ. Sɛ́ kɑ zɑ́p wɑ́ɑ nɛɡɛ ŋɡɔ pʉɔ pi ɑ kɑ tsɔ́Ꞌnɛ zɑ́p tʉ́m nǔu wɛ́. Ḿbɛn ńjí nu nɛ́nẅín yi pɔ́p ńdɛɛtɛ nǔu ńnɑ́ŋ pɑ́Ꞌ ɛ́ pɔŋnɛ Sɛ́.

² Pɔ́Ꞌɔ, mbɔ pɔ́p ńnɑ́ŋ ḿbɔ́ ńzẅíꞋlɛ luk kɛ́mɛ yi Sɛ́ kɑ lɑ́Ꞌ ḿbɛ́t pɔ kɛ́ puꞋ ŋɡɔŋ, ŋ́kɑꞋ mbɔ̌ pʉɔ pɛ́. Pɛ́ jí ŋɡɔ ɑ lɔ̌ɔ ńcú nu pɛ́ lɔɔ kɛ́kɑ́ŋ pɔ́.

³ A kɑ ńnɑ́ŋ tɛ ŋkɑ́ kuꞋ, ɑ ɡɛ pɛ́ jí sẅiŋɛ yɛ́, ńdɛɛ nǔu ŋkʉʉ ɑ kɑ níꞋnɛ mbɔ̌ mɔ. Mɔ sɛ́ ńcẅi ẅîwɑ́ ŋkʉʉ mbɔ̌ lɑ́Ꞌ mbíꞋŋɡɔ Sɛ́ ẅi ɑ ɡɛnɛ pɛkŋɛ luk kɑ cúnɛ ŋɡɔ ɛ sɑ́Ꞌ.

⁴ Ŋ ŋwɑꞋnɛ yɔ ŋwɑꞋnɛ, ŋ́ɡɑ́ mbɔ̌ ɡu Titɛ. Ɔ kwɑꞋ mɔ́ɔ wɑɑ mbíꞋŋɡɔ pǔu tɛmtɛ ńzɑ́p tʉ́m nǔu Yɛ́su Kɛlístɔ. Mɔ sɛ́ ńdɔ́ɔ mbɔ̌ Tɑ̌ɑ wɛkŋɛ Sɛ́ pɔ́p Yɛ́su Kɛlístɔ, jʉ́ ẅi ɑ ɡɛnɛ pɛkŋɛ luk, ŋɡɔ pɔ́p pɔ́ ḿbɔ́ nɛ́ ɡu, ḿbɔ́ ńníꞋ mɔ́fíitɛ tʉ́m ɡu.

FɑꞋ-Tîtɛ tsɛt ŋɡɔŋ-Kɛlɛ̂t

⁵ Ŋ kɑ nɑ́ wú ŋɡɔŋ-Kɛlɛ̂t nɛpɔ́ yi ɔ ɡʉ ńtsʉ́Ꞌ mɛkŋɛ ńtɛ́ɛ cúꞋlɛ-pʉɔ Kɛlístɔ, ḿbɛn ńzɑ́p pɑcẅɛ́ɛmbi tsɛt mbɑ wɛ́t tʉ́sɔŋ lɑ́, ńtsʉ́Ꞌ nɛzɑ́p, ńzɑ́p pɔ pɑ́Ꞌ ŋ kɑ cúnɛ mbɔ̌ ɡu.

⁶ Ɛ́ píkŋɛ ŋɡɔ ncẅɛ́ɛmbi pɔ́ ŋu ẅí pɛ́ kɑ́ pɔ́ ŋ́kẅíi lík yɛ́ kɛpɔŋ pɔ́. Ɛ́ píkŋɛ ŋɡɔ ɑ ɡẅɛɛ pɔ tɑ́Ꞌ mɑŋɡɛ́ wɛ́mɔ́Ꞌ, mbɔ́ŋkʉ̈ɔ́ pɛ́ zɑ́p tʉ́m yɔ́p nǔu Sɛ́, mɑt wɔp pɔ́ wɛ sʉ́Ꞌnɛ, pɔ́p pɛn ńnɑ́ŋ ńzúꞋ ntsu wɛ́.

⁷ N cú mbíꞋŋɡɔ, Pɑ́Ꞌ ŋu ẅí ɑ fɑꞋnɛ fɑꞋ-Sɛ́ lɑ́, ɛ́ kɑ́ pɔ́ ḿbíkŋɛ ŋɡɔ ŋu ẅí ɑ líŋɛ́nɛ cúꞋlɛ-pʉɔ-Kɛlístɔ pɔ́ ŋu ẅí pɛ́ kẅíinɛ lík yɛ́ kɛpɔŋ pɔ́. Kɔɔ ɑ pɔ́ ŋɡɑŋ nyɛt mbʉʉ, kɔɔ ɑ nɑ́ŋ ńzɑ́ŋ lɔ́ŋ, kɔɔ ɑ mɑꞋ mbʉʉ yɛ nǔu mɛluꞋ, kɔɔ ɑ pɔ́ ŋu ɡɑ́Ꞌlɛ́nɛ, kɔɔ ɑ lɔk ɡɑ́tɛ ńdɔɔ ŋkɑ́p.

⁸ Lɑ́ ɛ́ píkŋɛ pɔ ŋɡɔ ɑ pɔ́ ŋu ẅí ɑ kúkŋɛ́nɛ pɛɡʉʉ sʉ́Ꞌnɛ, ḿbɔ́ ŋu ẅí ɑ nɑŋnɛ ŋ́kɔŋ yɛ́ pɔ mɛnu mi ɛ́ pɔŋnɛ. Ɛ́ píkŋɛ ŋɡɔ ɑ pɔ́ ŋu ẅí ɑ sɑ́ŋnɛ nu lɑ ŋ́ɡɛ, ɑ pɔ́ ŋu ẅí ɑ ɡɛnɛ mɛnu mi ɛ́ tʉ́ʉnɛ ndʉ́ŋndʉŋ, ḿbɔ́ ŋu ẅi mɑt wɛ pɔŋnɛ Sɛ́, ḿbɔ́ ŋu ẅí ɑ jínɛ nɛɡẅɛɛ mbʉʉ yɛ.

⁹ Ɛ́ píkŋɛ ŋɡɔ ɑ niitɛ ŋ́ɡẅɛɛ Ŋkʉʉ ẅí ɛ́ ẅi ḿbɔ́ pɛ́ zɑ́p tʉ́m nǔu, ɛ́ pɔ́ ẅi ɛ́ cẅɛ́Ꞌnɛ́nɛ nǔu ẅi pɛk zíꞋnɛ pʉɔ. Ɛ́ lɛɛ pɔ́Ꞌɔ, ɑ kuꞋ nɛlɔk sẅiŋɛ yi ɛ́ nɛ́nẅín, ńníꞋ mɛtʉʉ-pɛcɔ́ pʉɔ, ŋ́kuꞋ nɛnyɛt mɛlɔꞋ-pʉɔ pi pɔ́p lʉꞋnɛ nu yi ɑ cúnɛ kwɑꞋ mbɔ̌ pɔ́p.

PɑzíꞋ nu yi ɛ́ kɑ́ pɔ́ nu pɔ́

¹⁰ N cú ŋɡɔ ɔ zɑ́p pʉɔ pɑ́Ꞌɑ, mbíꞋŋɡɔ pʉɔ tɛ ńzɑ́ɑ sɛ́ ḿbɔ́ ńtʉʉ tú. Pɔ́p sɛ́ ńzíꞋ pʉɔ nɛ́ mɛnu mí ɛ́ kɑ́ tʉ́ʉ, ńdɔk ɛ́fúklɛ wɔ́p. Nɛzɑ́ɑ pɔ́ pɑyúdɑ pi pɔ́p pɛ́mnɛ nu-Yɛ́su Kɛlístɔ.

¹¹ Ɛ́ píkŋɛ ŋɡɔ ɔ jʉ́ɔꞋ ntsu wɔ́p, mbíꞋŋɡɔ pɔ́p sɛ́ ńdɔk yúu mi pɔ́p zíꞋnɛ pʉɔ, ńtɛplɛ pʉɔ tsʉʉ tsɛt mɛtsɛ́nndɑ́. Ɛ́ pɔ́ yúu mi ɛ́ kɑ́ pɔ́ ḿbíkŋɛ nɛzíꞋ pɔ́, ńdɔk ńdɔɔ ŋkɑ́p.

¹² KwɑꞋ wɛcɔ́ ŋu-ŋɡɔŋ-Kɛlɛ̂t ẅí ɑ mbɔ̌ pɔ́p ḿbɔ́ pɑ́Ꞌ ŋɡɛ́mndʉ̈ɔ́Ꞌ, ɑ kɑ cú ŋɡɔ: «Pʉɔ-Kɛlɛ̂t pɔ́ pɔ ɡɑŋcɔtnu, ḿbɔ́ pɔ pɛpɑ́lɛ́ mɛnɑɑ, ḿbɔ́ pɔ pɛlɔ́ŋ, yɔ́p nu pɔ́ pɔ yúu mi ɛ́ ɡʉ ŋ́kúu nɛpɛm pɔ́p.»

¹³ Nu yi ɑ kɑ cúnɛ lɑɑ, ɛ́ nu nɛ́nẅín. Ɛ́ yɛ́tɛ́ lɑ́ ɛ́ sɛ́ ḿbíkŋɛ ŋɡɔ ɔ lɔk cʉ́ɔk ńcú nu mbɔ̌ pɔ́p, ńjí ŋɡɔ pɔ́p ɡʉ ńtsuŋ ńzɑ́p tʉ́m yɔ́p nǔu Sɛ́,

¹⁴ pɔ́p pɔɔ pɛn ńzúꞋ mɛnu-mɑ́pitsɔꞋ-pɑyúdɑ, ńcʉŋɛ nǔu pɔ́, tɛ mbɑ nɛpʉ́ʉ ni pʉɔ pi pɔ́p tɛ́mnɛ ŋkwɛn nǔu nu yi ɛ́ nɛ́nẅín zɑ́pnɛ.

¹⁵ Kʉ̈ɔ́ lɑ́ kɛ́ lɔ́Ꞌ mbɔ̌ pʉɔ pi pɔ́p ɡẅɛɛnɛ tʉ́m lɛ́ɛnɛ́nɛ mbi Sɛ́. Lɑ́ ŋ́ɡʉ nǔu pʉɔ pi tʉ́m yɔ́p kɑ́ lɛ́ɛnɛ, pɔ́p pɔɔ zɑ́p nǔu Sɛ́ pɔ́, kʉ̈ɔ́ lɑ́ mbɔ̌ pɔ́p ŋ́ɡẅɛɛ pɔ lɔ́Ꞌ. MbíꞋŋɡɔ kwɑŋɛnu yɔ́p nɑ́ŋ ńtʉ́ʉ pɔ nǔu mɛnu kɛpɔŋ, tʉ́m yɔ́p pɔɔ lɛ́ɛnɛ.

¹⁶ Pɔ́p tʉ́ʉ ńcú ŋɡɔ pɔ́p jí Sɛ́, lɑ́ mɛnu mi pɔ́p ɡɛnɛ nyɛt ŋɡɔ pɔ́p kɑ́ jí wɛ́ pɔ́. Pɔ́p ɡɛ yúu mi ɛ́ shẅɛt shẅɛtnɛ, ńtʉʉ tú mbɔ̌ Sɛ́ tɛꞋ, mbɔ pɔ́p zɛɛ mbɔɔ ɡɛ nu sʉ́Ꞌnɛ pɔ́.