Pʉɔ-Lɔ́mɑ 7 - Kɑɑ Fí

FʉꞋ yi ɛ́ fúnɛ nǔu nu-lɑ́ɑndɑ́

¹ Pɔ́ɔpɛ́mɑ́ pɑ́ɑ, pʉʉ pi pʉʉ sɛ́ ńjí yúu mi nɛpʉ́ʉ yɛ́tɛ́, pʉʉ kɑ́ pɔ́ ḿmuŋɛ ŋɡɔ nɛpʉ́ʉ ɡẅɛɛ nu nǔu ŋu pɔ ŋkɑ́ yi ŋɡɑŋ pɛ́tnɛ ntʉʉ pɔ́.

² Pɛkŋɛ pɛ́ɛ fʉꞋ nǔu mɑŋɡɛ́ zɔ́Ꞌnɛ. Ndúu mɛ pɛ́t pɔ́ sʉ́Ꞌnɛ, ɑ kɑ́ ɡẅɛɛ nɛnɑ́ wɛ́ ŋ́ɡʉ ńtsɛ́t wɛcɔ́ ŋu mbɛ́ɛnɛ pɔ́pmɛ́ zɔ́Ꞌ pɔ́, nɛpʉ́ʉ lʉꞋ pɔ́Ꞌɔ. Lɑ́ ndúu mɛ lɑɑ ḿbɔ́ tɛ ḿpfú, nɛpʉ́ʉ pɛ́m ŋɡɔ ḿbɔ́ ɑ ɡʉ ńtsɛ́t wɛcɔ́ ŋu mbɛ́ɛnɛ pɔ́pmɛ́ zɔ́Ꞌ.

³ Pɔ́Ꞌɔ lɑ́ mbɔ yi ndúu mɛ lɑɑ ḿbɛ́t kɛ́ pfú, ɑ zɔ́Ꞌ wɛcɔ́ ŋu mbɛ́ɛnɛ, mbɔ pɛ́ ɡʉ fúŋ wɛ́ ŋɡɔ ŋɡɑŋɡɑ́ɑ mɑŋɡɛ́. Lɑ́ ŋ́kɛ́ ḿbɔ́ yi ndúu mɛ lɑɑ ḿpfú, mbɔ nɛpʉ́ʉ kɑ́ pɛn ńtɔꞋ wɛ́ nɛzɔ́Ꞌ wɛcɔ́ ŋu mbɛ́ɛnɛ pɔ́. A tsʉ́Ꞌ ḿbɔ́ pɔ nzwɛ́ wɛcɔ́ ŋu ŋkɔ̂ɔnɛ, ɛ́ pɔɔ pɔ́ ŋɡɔ ɑ ɡɛ ɡɑp pɔ́.

⁴ Ɛ́ pɛn ḿbɔ́ pɔ ndʉ́ŋndʉŋ pɔ́Ꞌɔ nǔu pʉʉ mbɑ̌ɑ pɔ́ɔpɛ́mɑ́ pɑ́ɑ. Pʉʉ ŋkɔ̂ɔnɛ ḿbɔ́ nǔu nu-nɛpʉ́ʉ ḿbɔ́ pɔ pɛpfú lɑ ńdɔk ŋ́kuꞋ pʉɔ-Sɛ́, mbíꞋŋɡɔ pʉʉ pɛ́ Kɛlístɔ kɑ tɛmtɛ ḿpfú ŋkɑ́ yi ɑ kɑ pfúnɛ, pʉʉ pɛ́ nɛpʉ́ʉ lɔk pɔ́Ꞌɔ, fɑkŋɛ pɑ́Ꞌ pʉʉ ɡʉ ńtsʉ́Ꞌ ḿbɔ́ pɔ pʉɔ wɛcɔ́ ŋu ndɛꞋ, pʉɔ-Yɛ́su Kɛlístɔ ẅí Sɛ́ kɑ ɡɛnɛ ɑ zẅíimɛ nǔu nɛvú. Nɛpɔ́ yi pɛkŋɛ ɡʉ ɛ́fɑꞋ mɛfɑꞋ mi ɛ́ mɛ sʉ́Ꞌnɛ mbɔ̌ Sɛ́.

⁵ Ɛ́ kɑ zɛɛ ḿbɔ́ ŋkɑ́ yi mbʉʉ yɛkŋɛ kɑ pɛ́tnɛ ɛ́sɑ́Ꞌ wɛkŋɛ, nɛtsɑ́ɑ nɛɡɛ nu yi ɛ́ kɑ́ pɔŋ pʉ́Ꞌtɛ mbʉʉ yɛkŋɛ, mbíꞋŋɡɔ nɛpʉ́ʉ tɔꞋ, ḿbɛn ŋ́kẅiꞋ ḿbʉ́Ꞌtɛ wɛkŋɛ, pɛkŋɛ fɑꞋ pɔ mɛfɑꞋ mi ɛ́ ɡʉ ɛ́fúŋ pɔ nɛvú ńníꞋ nǔu pɛkŋɛ.

⁶ Lɑ́ ɛ́ kɛ́ ḿbɔ́ ŋkɔ̂ɔnɛ pɛkŋɛ pɔɔ ḿbɛ́t ńnɛn pɔ nǔu sɛ̂ndúŋ-nɛpʉ́ʉ lɑ ńtsɑ́ɑ nɛpɔ́ ndʉ́ŋndʉŋ pɔ́, mbíꞋŋɡɔ pɛkŋɛ nǔu ẅîwɑ́ sɛ̂ndúŋ ẅi ɛ́ ḿbɔ́ ńdɔk wɛkŋɛ ŋ́ɡɛ ɡɑŋtsɑ́ŋ, ńtsʉ́Ꞌ pɔ pɛpfú. Lɑ́ pɛk ŋkɔ̂ɔnɛ ńtsʉ́Ꞌ ɛ́fɑꞋ mbɔ̌ Sɛ́ pɔ nǔu ntɛ́ yi fí, ńdɔk mɛtʉʉ-Zẅikŋɛ Lɛ́ɛnɛ́nɛ ɛ́fɑꞋ, tɛ pɛk kɑ́ pɛn ɛ́fɑꞋ nǔu ntɛ́ yɛ́ ŋkɑ́mbi, ŋkɑ́ yi pɛk kɑ pɔ́ ńzúꞋ pɔ ntsu-nɛpʉ́ʉ ni pɛ́ kɑ ŋwɑꞋnɛ́nɛ pɔ́.

Nu-nɛpʉ́ʉ pɔ́p nu kɛpɔŋ

⁷ Pɛ́ lɔk pɑ́Ꞌnɛ ńcú ŋɡɔ nɛpʉ́ʉ-Sɛ́ yúu kɛpɔŋ kɛkʉ̈ɔ́? Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́, mbíꞋŋɡɔ ŋ kɑ fú pɔ nǔu nɛpʉ́ʉ ɛ̂nɑ́ lɑ ńjí nu kɛpɔŋ, ɛ́ kɑ pɔ́ pɛ́Ꞌnɛ ɛ́ pɔɔ ńcú ŋɡɔ: «Kɔɔ ɡẅɛɛ kɛ́ɡʉ̈ɔꞋ pɔ́, mbɔ ŋ kɑ́ jí kɛ́ɡʉ̈ɔꞋ pɔ́.»

⁸ Nu kɛpɔŋ yi ɛ́ nǔu mɔ kɑ lɛɛtɛ pɔ nǔu nɛpʉ́ʉ ɛ̂nɑ́, ḿbʉ́Ꞌtɛ wɑ́ɑ, nɛɡɛ yúu kɛpɔŋ yi tʉ́m yɑ́ɑ tsɑ́ɑnɛ tɛ ɛ́ zɑ́ɑ zɑ́ɑnɛ, nɛpʉ́ʉ kɑ zɛɛ pɛ́Ꞌnɛ mbɔɔ ɡú pɔ́, mbɔ nu kɛpɔŋ kɑ́ ɡẅɛɛ tʉʉ pɔ́.

⁹ Ɛ́ kɑ pɔ́ ŋkɑ́ yi ŋ kɑ pɛ́tnɛ kɛ́ jí nɛpʉ́ʉ-Sɛ́, ńzúꞋ ḿbɔ́ pɔ sʉ́Ꞌnɛ, ŋ kɑ pɛn ḿbɔ́ tɛ ńjí, nɛtsɑ́ɑ nɛɡɛ nu kɛpɔŋ kúu nǔu mɔ,

¹⁰ m pfú. Ɛ́ pɔ́ pɔ́Ꞌɔ, mbɔ nɛpʉ́ʉ ni ɛ́ ńzɛɛnɛ ḿbɔ́ ŋ́ɡʉ ŋ́ɡɛ ŋu pɔ́ ɡú, mbɔ ɛ́ tsʉ́Ꞌ ńtɔ́ nǔu mɔ ńcɑklɛ wɑ́ɑ ńníꞋ pɔ nǔu nɛvú.

¹¹ Ŋ kɑ zúꞋ nînɑ́ nɛpʉ́ʉ, nu kɛpɔŋ yi ɛ́ nǔu mɔ jʉ́ɔ shʉ́ ńdɔk nɛpʉ́ʉ ɛ̂nɑ́ ńdẅɑklɛ wɑ́ɑ, ŋ ɡɛ nu kɛpɔŋ, nu kɛpɔŋ lɛɛ nǔu ńjẅí wɑ́ɑ.

¹² Nɛpʉ́ʉ lɔk pɔ́Ꞌɔ, ɛ́fú mbɔ̌ Sɛ́, nu yi ɛ́ cúnɛ ŋɡɔ pɛ́ ɡɛ pɛn ɛ́fú yɛ́ pɔ mbɔ̌ Sɛ́, ḿbɔ́ nu yi ɛ́ ndʉ́ŋndʉŋ, ḿbɔ́ yi ɛ́ pɔŋnɛ.

¹³ Tɛ ɛ́ pɔ́Ꞌɔ pɑ́Ꞌnɛ ńdɔk ńcú ŋɡɔ yúu mi ɛ́ pɔŋnɛ tɔ́ nǔu mɔ ńtsʉ́Ꞌ pɔ nɛvú kíi? Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́. Nu kɛpɔŋ kɑ ɡɛnɛ m pfú, nu kɛpɔŋ kɑ tsuŋ ńnyɛt ŋɡɔ ɛ́ kɑ́ pɔŋ. Ɛ́ kɑ lɛɛtɛ nǔu yúu mi ɛ́ pɔŋnɛ ńdɔk ŋ́ɡɛ m pfú, ńdɔk pɔ́Ꞌɔ, ńdɛɛ nǔu yúu mi Sɛ́ kɑ cúnɛ ŋɡɔ pɛ́ ɡɛ, ńcẅɛt kwɑꞋ mɑ́mɑ́ nu kɛpɔŋ.

Nu kɛpɔŋ kɑ jʉ́ ŋumɛsɔŋ

¹⁴ Pɛkŋɛ zɛɛ ḿbɔ́ ńjí ŋɡɔ nɛpʉ́ʉ fú mbɔ̌ Sɛ́. Lɑ́ ɛ́ kɛ́ ŋ́ɡʉ nǔu mɔ ŋumɛsɔŋ n zɑŋɛ zɑŋɛ́nɛ, mbɔ pɛ́ kɑ fɛn wɑ́ɑ n tsʉ́Ꞌ ŋkwɑɑ-nu kɛpɔŋ.

¹⁵ N zɛɛ ńtsuŋ ḿbɔɔ ńjí yúu mi mɔ ŋ́ɡɛ pɔ́. Yúu mi mɔ sɛ́ ŋ́kɔŋ, m bɔɔ yîyɑ́ ɡɛ, ŋ ɡɛ pɔ yúu mi ŋ kɑ́ pɔ́ ŋ́kɔŋ pɔ́.

¹⁶ Ɛ́ lɑɑ ḿbɔ́ yi ŋ kɑ pɔ́ ŋ́kɔŋ yúu mi mɔ sɛ́ ŋ́ɡɛ pɔ́, mbɔ mɔ ńdɔk pɔ́Ꞌɔ, ḿbɛ́m ŋɡɔ nɛpʉ́ʉ pɔŋ.

¹⁷ Pɔ́Ꞌɔ lɑ́, mɔ kɑ́nɛ pɔ́ ńdɔk ŋ́ɡɛ mîmɑ́ mɛnu pɔ́, nu kɛpɔŋ yi ɛ́ kɑ jʉ́ mɔ́ wɑ́ɑ ɡɛnɛ.

¹⁸ Mɔ sɛ́ ńjí ŋɡɔ nu sʉ́Ꞌnɛ ŋkɑɑnɛ wɑ́ɑ jʉ́, n dɑꞋ mɔ ŋumɛsɔŋ ẅi n zɑŋɛ zɑŋɛ́nɛ. N tsɑ́ɑ nɛɡɛ nu sʉ́Ꞌnɛ ŋkɑ́ tsʉʉ lɑ́ ŋ́kɛ́ mbɔɔ kuꞋ nɛɡɛ pɔ́.

¹⁹ Ŋ kɑ́ pɔ́ ŋ́ɡɛ nu sʉ́Ꞌnɛ yi mɔ sɛ́ ńtsɑ́ɑ nɛɡɛ pɔ́, ŋ ɡɛ pɔ nu kɛpɔŋ yi mɔ sɛ́ ḿbɔɔ ńtsɑ́ɑ pɔ́.

²⁰ Ɛ́ lɑɑ ḿbɔ́ yi mɔ sɛ́ ŋ́ɡɛ yúu mi ŋ kɑ́ pɔ́ ńtsɑ́ɑ nɛɡɛ pɔ́, mbɔ mɔ kɑ́nɛ pɔ́ ŋ́ɡɛ pɔ́, nu kɛpɔŋ yi ɛ́ kɑ jʉ́ mɔ́ wɑ́ɑ ɡɛnɛ.

²¹ N dɔk pɔ́Ꞌɔ, ńjʉ́ɔ ŋɡɔ ŋɡɔŋ ŋkɑ́ tsʉʉ, ŋ ɡɔ mɔ ŋ́ɡɛ nu sʉ́Ꞌnɛ, nɑ́ɑ nɛpʉ́ʉ pɔ́ ŋɡɔ ŋ ɡɛ pɔ nu kɛpɔŋ.

²² Mɔ kwɑꞋ tsɛt tʉ́m mɔ, nɛpʉ́ʉ-Sɛ́ pɔŋ wɑ́ɑ tɛꞋ.

²³ Lɑ́ ɛ́ ɡʉ tsɛt mbʉʉ yɑɑ, n jʉ́ɔ nɛcɔ́ nɛpʉ́ʉ pɔ́ ɡú, ni ɛ́ nɑ́ŋnɛ ńdɔk ntsɔ ḿmɑꞋ nɛpʉ́ʉ ni jínu yɑ́ɑ tsuŋnɛ ḿbɛ́m, ŋ́ɡɛ n tsʉ́Ꞌ ŋɡɑŋtsɑ́ŋ-nɛpʉ́ʉ nu kɛpɔŋ ni ɛ́ kɑ jʉ́ mɔ́ wɑ́ɑ.

²⁴ Ŋ kɑ́ pɔ́ pɑ́Ꞌnɛ ḿbɔ́ pɔ pʉ́ktú pɔ́, wɔ́ ɡʉnɛ ńdɑ́Ꞌ ɛ́fú tsɛt yɔ mbʉʉ yi ɛ́ fúŋnɛ nɛvú ńníꞋ nǔu mɔ ńcẅɛɛtɛ wɑ́ɑ?

²⁵ Sɛ́ ɡʉnɛ ńtɔ́ tsɛtú ńcẅɛɛtɛ wɑ́ɑ. Ńdɛɛtɛ nǔu Tsɑpʉɔ wɛkŋɛ Yɛ́su Kɛlístɔ, ɡúꞌlɛ pɔ́ mbɔ̌ wɛ́. Ɛ́ pɔ́Ꞌɔ, jínu yɑ́ɑ pɔ́ ɛ́sẅíi wɑ́ɑ ŋɡɔ mɔ ɡẅɛɛnɛ nɛpʉ́ʉ-Sɛ́, lɑ́ mbɑp-mbʉʉ-ŋumɛsɔŋ yi ŋ ɡẅɛɛnɛ pɔ́ ńtsʉ́ʉnɛ wɑ́ɑ ŋ kúꞋlɛ pɔ nɛpʉ́ʉ-nu kɛpɔŋ.