Pʉɔ-Lɔ́mɑ 5 - Kɑɑ Fí

Pɛkŋɛ pɛ Sɛ́ nɑ́ŋ sʉ́Ꞌnɛ

¹ Pɑ́Ꞌ ɛ́ kɑ lɛɛnɛ nǔu nɛzɑ́p tʉ́m nǔu Yɛ́su Kɛlístɔ, Sɛ́ tsʉ́Ꞌ ńdíŋɛ wɛkŋɛ pɛkŋɛ pɔ́ pɔ ndʉ́ŋndʉŋ mbi yɛ́ lɑ́, pɛkŋɛ pɛ Sɛ́ ŋkɔ̂ɔnɛ ńnɑ́ŋ sʉ́Ꞌnɛ, mbíꞋ Tsɑpʉɔ wɛkŋɛ Yɛ́su Kɛlístɔ.

² Jʉ́ Yɛ́su kɑ tsɔ́Ꞌnɛ sɛ̂ndúŋ lɑ Sɛ́ ɡɑ́ fuꞋ níinɛ yɛkŋɛ pɑ́Ꞌɑ, tɛ ɛ́ tsʉ́Ꞌ ŋ́ɡɔ́ ḿbɔ́ pɔ mbɔ̌ pɛkŋɛ pɔ́Ꞌɔ ɛ́fú nǔu pɑ́Ꞌ pɛkŋɛ zɑ́pnɛ tʉ́m nǔu jʉ́ Yɛ́su. Pɛkŋɛ pɑ́Ꞌɑ tsɑ́ɑtɛ pɔ́ tʉ́m pɛkŋɛ tɛꞋ, mbíꞋŋɡɔ pɛkŋɛ nɑ́ŋ ḿbɔ́ ńzẅíꞋlɛ pɑ́Ꞌ Sɛ́ ɡʉ ŋ́ɡɛ ŋ́ɡɑp yúu mi ɛ́ nǔu nɛɡúꞋ wɛ, ŋ́ɡɑ́ yɛkŋɛ.

³ Ɛ́ kɑ́ pɔ́ pɔ ndɑꞋ pɔ́Ꞌɔ pɔ́, pɛk pɛn ŋ́ɡẅɛɛ tsɑ́ɑtɛ tɛ mbɑ ŋkɑ́ yi pɛk sɛ́ ńjʉ́ɔ ŋɡʉ̈ɔ́Ꞌ, ḿbɔ́ ńjí ŋɡɔ ŋɡʉ̈ɔ́Ꞌ ɡʉ ŋ́ɡɛ pɛk sʉk.

⁴ Nɛsʉk ɡɛ pɛkŋɛ tɛntɛ. Ɛ́ lɛɛ pɔ́Ꞌɔ, pɛkŋɛ nɑ́ŋ ḿbɔ́ ńzẅíꞋlɛ ŋɡɔ yúu mi sẅiŋɛ-Sɛ́ sɛ́ ńcú, jʉ́ Sɛ́ ŋ́ɡɛ ŋ́ɡɛ ɛ́ puutɛ nǔu pɛkŋɛ.

⁵ Pɛkŋɛ kɛ́ ḿbɔɔ ńzẅíꞋlɛ pɔ́Ꞌɔ pɔ zʉꞋ níinɛ pɔ́, mbíꞋŋɡɔ Sɛ́ ɛ́fú nǔu Zẅikŋɛ yɛ́ yi ɑ kɑ ɡɑ́nɛ mbɔ̌ pɛkŋɛ, ńnyɛt wɛkŋɛ pɑ́ꞋtɛꞋ ŋɡɔ ɑ kɔŋ wɛkŋɛ.

⁶ Ɛ́ pɔ́ pɑ́Ꞌ ɛ́ kɑ pɔ́nɛ ŋkɑ́ yi pɛkŋɛ kɑ zɛɛnɛ ḿbɛ́t pɔ pɑ kɛ́ ɡẅɛɛ mɛtʉʉ, Kɛlístɔ tɔ́ nǔu ŋkɑ́ yi Sɛ́ kɑ zɑ́pnɛ, ḿpfú nǔu tú-pʉɔ kɛpɔŋ.

⁷ Ɛ́ zɛɛ ńtɛn tɛꞋ lɑ ŋumɛsɔŋ pɛ́m nɛpfú nǔu tú wɛcɔ́, tɛ mbɑ pɑ́Ꞌ ẅîwɑ́ ŋu lɑɑ ḿbɔ́ pɔ ŋu ẅí ɑ kɑ́ kúꞋlɛ nɛpʉ́ʉ pɔ́. Líkcɔ́ mbɔ ŋu pɛ́m nɛpfú mbíꞋ ŋu ẅi ɑ ɡɛnɛ mɛnu sʉ́Ꞌnɛ.

⁸ Lɑ́ pʉʉ jʉ́ɔ ntɛ́ yi Sɛ́ kɑ lɔknɛ ńnyɛt pɑ́Ꞌ ɑ kɔŋnɛ wɛkŋɛ pɔ́Ꞌɔ, ɛ́ pɑ́Ꞌ Kɛlístɔ kɑ tɔ́nɛ ḿpfú nǔu tú yɛkŋɛ tɛ pɛkŋɛ zɛɛ ḿbɛ́t ḿbɔ́ pɔ pʉɔ kɛpɔŋ.

⁹ Ɛ́ nǔu ŋkɔ̂ɔnɛ, mbɔ mɛci mɛ́ ɡɛ Sɛ́ tsʉ́Ꞌ ńdíŋɛ wɛkŋɛ pɛkŋɛ pɔ́ ndʉ́ŋndʉŋ mbi yɛ́, mbɔ kʉ̈ɔ́ pɛn ŋ́ɡɛ tɛ Kɛlístɔ lɑ́Ꞌ ńnɑ́ kɛ́ ɡɛ pɛkŋɛ luk ŋɡʉ̈ɔ́Ꞌ yi ɛ́ ɡʉ ńdɑ́Ꞌ ɛ́fú nǔu pɑ́Ꞌ Sɛ́ sɛ́ ńzɑ́ŋ lɔ́ŋ?

¹⁰ Pɛkŋɛ pɛ Sɛ́ kɑ zɛɛ ḿbɔ́ pɔ ɡɑŋmbuu, lɑ Sɛ́ lɔk pɑ́Ꞌ Mɔ́ɔ nɛ pfúnɛ, ḿmɛk mbuu yɛkŋɛ pɛpɔ́p. Ɛ́ ɡʉ ḿbɛn ḿbɔ́ nǔu ŋkɔ̂ɔnɛ, ɑ lɔk pɑ́Ꞌ Mɔ́ɔ nɛ pɔ́ pɔ ɡú, ŋ́ɡɛ pɛkŋɛ luk ŋɡʉ̈ɔ́Ꞌ luknɛ.

¹¹ Pɛkŋɛ kɛ́ ḿbɔɔ ńdɔk pɔ ndɑꞋ yîyɑ́ nu tsɑ́ɑtɛ pɔ́, pɛkŋɛ pɛn ńtsɑ́ɑtɛ ntɛ́ pɑ́Ꞌ Sɛ́ lɛɛnɛ nǔu nu-Tsɑpʉɔ wɛkŋɛ Yɛ́su Kɛlístɔ ŋ́ɡɛ mbuu yi ɛ́ kɑ pɔ́nɛ tsɛtsɛt pɛkŋɛ pɛ Sɛ́ mɛ.

Nu-Ádɑm pɔ́p Kɛlístɔ

¹² Nu kɛpɔŋ kɑ ɡɔ́ kúu ndǔmbí, ńdɛɛ pɔ nǔu tɑ́Ꞌ ŋumɛsɔŋ wɛ́mɔ́Ꞌ, ẅi ɑ kɑ fɑɑnɛ́nɛ nu, lík yɛ́ pɔ́ ŋɡɔ Ádɑm. Nu kɛpɔŋ kɑ lɔk nɛvú ńtɔ́. Nɛvú kúu nǔu njẅɛt-ŋumɛsɔŋ tsʉʉ, mbíꞋŋɡɔ pʉɔ pɛtsʉʉ kɑ pɔ́ pɔ́Ꞌɔ, ńdɔk ɛ́fɑɑnɛ nu.

¹³ Sɛ́ kɑ zɛɛ ŋ́ɡɔ́ ŋ́ɡɑ́ nɛpʉ́ʉ mbɔ̌ Mɔ̌sɛ̂ɛ, mbɔ nu kɛpɔŋ kɑ lɑ́Ꞌmɔ́ ŋ́kúu ndǔmbí. Ɛ́ kɑ pɔ́ ŋkɑ́ yi nɛpʉ́ʉ kɑ pɛ́t kɛ́ pɔ́ ɡú, Sɛ́ pɔɔ sɑ́ŋ nu kɛpɔŋ-pʉɔmɛsɔŋ pɔ́.

¹⁴ Tɛ mbɑ pɔ́Ꞌɔ, ɛ́fú nǔu ŋkɑ́-Adɑm ŋ́ɡʉ ŋ́kúu nǔu ŋkɑ́-Mɔ̌sɛ̂ɛ, nɛvú ɡẅɛɛ pʉɔmɛsɔŋ ŋ́ɡẅɛɛ mbɑ pi pɔ́p ŋkɑɑ ɡɛ nu kɛpɔŋ pɑ́Ꞌ Ádɑm ẅí ɑ kɑ fɑɑnɛ́nɛ nɛpʉ́ʉ ni Sɛ́ kɑ ɡɑ́nɛ mbɔ̌ wɛ́ pɔ́. Nu-Ádɑm fí yɛ́ ŋu ẅí ɑ kɑ pɔ́ ŋ́ɡʉ lɑ ńdɑ́Ꞌ ńtɔ́.

¹⁵ Lɑ́ ɛ́ lɑɑ ḿbɔ́ pɛ́ pɔɔ lɔk yúu mi ɛ́ fúnɛ nǔu mɛfɑɑnɛ-Adɑm ḿbɛ́ɛ fʉꞋ nǔu ndɛn fuꞋ yi Sɛ́ sɛ́ ŋ́ɡɑp mbɔ̌ pʉɔ pɔ níinɛ pɔ́, mɛfɑɑnɛ-tɑ́Ꞌ ŋu wɛ́mɔ́Ꞌ kɑ ɡɛ nɛvú kúu nǔu pʉɔ tsʉʉ tsʉʉ lɑ́, ntɛ́ yi Sɛ́ kɑ tsɑ́ɑnɛ pʉɔ ŋ́ɡɑ́ fuꞋ níinɛ yɔ́p pɔ́Ꞌɔ, pɛn ŋ́ɡɔ́ɔ ŋ́ɡúꞋ ńdɛɛ ẅîwɑ́ nɛpɔ́ tɛꞋ. FuꞋ yi ɛ́ kɑ fúnɛ nǔu tɑ́Ꞌ ŋu ẅi ɑ Yɛ́su Kɛlístɔ, Sɛ́ lɔk ŋ́ɡɑ́ fuꞋ níinɛ-pʉɔ tɛ ńzɑ́ɑ ɛ́ ɡẅɛɛ ndɛn tɛꞋ.

¹⁶ Yúu mi Sɛ́ ɡɑ́nɛ, kɑ fɑꞋ fɑꞋ sʉ́Ꞌnɛ. Yɛ́ fɑꞋ kɑ́ pɔ́ pɑ́Ꞌ yɛ́ nu kɛpɔŋ pɔ́. Nu kɛpɔŋ yi wɔ tɑ́Ꞌ ŋu wɛ́mɔ́Ꞌ kɑ fɑɑnɛ́nɛ, kɑ ɡɛ pʉɔ tsʉʉ vu ntsɑŋ. Lɑ́ Sɛ́ pɔ́ tɛ ŋ́ɡɑ́ fuꞋ níinɛ-pʉɔ, ɛ́ ɡɔ́ ḿbɔ́, mbɔ pɔ́p zɛɛ ɛ́fɑɑnɛ mɛnu tɛꞋ lɑ́, jʉ́ Sɛ́ tsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́, ntsɑŋ pɔɔ pɛn ŋ́ɡẅɛɛ wɔ́p pɔ́,

¹⁷ pɑ́Ꞌ tɑ́Ꞌ ŋumɛsɔŋ wɛ́mɔ́Ꞌ kɑ fɑɑnɛ́nɛ nu, nɛvú fú nǔu wɛ́ ŋ́ɡẅɛɛ ŋumɛsɔŋ pɔ kɛ́ vuꞋ wɛcɔ́, lɑ́ wɛcɔ́ ŋu ẅi ɑ Yɛ́su Kɛlístɔ, yɛ́ fɑꞋ pɔ́ ndɛꞋ. Pʉɔ pi Sɛ́ tsɑ́ɑnɛ mɛjʉ́ŋ mɔ́p tɛꞋ ŋ́ɡɑ́ fuꞋ níinɛ yɔ́p, ɑ tsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́. Pɔ́p ɡʉ ńdɛɛtɛ nǔu Yɛ́su ḿbɔ́ ɡú, ḿbɛn ḿbɔ́ pɑ́Ꞌ pɛfɔɔ lɑ́ mbíꞋ Kɛlístɔ.

¹⁸ Pɑ́Ꞌ pɛkŋɛ jʉ́ɔnɛ ŋɡɔ ɛ́ kɑ fú nǔu nu yi tɑ́Ꞌ ŋu fɑɑnɛ́nɛ, Ádɑm, pʉɔ pɛtsʉʉ pfútɛ pfútɛ́nɛ lɑ́, ɛ́ pɛn ḿbɔ́ pɔ ndʉ́ŋndʉŋ pɑ́Ꞌ tɑ́Ꞌ ŋu wɛ́mɔ́Ꞌ, Yɛ́su Kɛlístɔ kɑ ɡɛnɛ yúu mi Sɛ́ sɛ́ ŋ́kɔŋ, pʉɔ tɛ ńzɑ́ɑ nɑ́ŋ ńdɛɛ nǔu ńduk ntsɑŋ, ŋ́ɡẅɛɛ luk kɛ́mɛ.

¹⁹ Ndʉ́ŋndʉŋ pɑ́Ꞌ tɑ́Ꞌ ŋumɛsɔŋ kɑ lʉꞋnɛ nɛzúꞋ ntsu-Sɛ́, nɔɔ-lɑ́Ꞌ fú nǔu ńtsʉ́Ꞌ ɡɑŋmɛfɑɑnɛ lɑ́, tɑ́Ꞌ ŋu wɛ́mɔ́Ꞌ kɑ zúꞋ ntsu-Sɛ́, ɛ́fú nǔu nɔɔ-mɛlɑ́Ꞌ mɛlɑ́Ꞌ tsʉ́Ꞌ pʉɔ pi Sɛ́ líŋɛ́nɛ wɔ́p pɔ́p pɔ́ ndʉ́ŋndʉŋ mbi yɛ́.

²⁰ Lɑ́ ɛ́ pɛn ŋ́ɡʉ nǔu nɛpʉ́ʉ-Mɔ̌sɛ̂ɛ, mbɔ Sɛ́ kɑ pɔ́ ńzɑ́p nɛpɔ́ yi pʉɔ ɡʉ ŋ́ɡɛ ɛ́fú nǔu ńjʉ́ɔ ndɛn ẅi pɔ́p lɔknɛ ŋ́ɡɛ nu kɛpɔŋ pɔ́Ꞌɔ. Pɑ́Ꞌ mɛnu kɛpɔŋ sɛ́ ńzɑ́ɑ ŋɡɔ́ku lɑ́ Sɛ́ pɔ́ ńtsɑ́ɑ mɛjʉ́ŋ pʉɔ ŋ́ɡɑ́ fuꞋ níinɛ yɔ́p tɛ ńdɛɛ ntɛ́.

²¹ Ɛ́ lɛɛ pɔ́Ꞌɔ, Sɛ́ lɔk pɑ́Ꞌ ɑ tsɑ́ɑnɛ mɛjʉ́ŋ mɔ́p, jʉ́ tsʉ́Ꞌnɛ ŋ́ɡẅɛɛ wɔ́p, ŋ́ɡɛ pɔ́p tsʉ́Ꞌ pʉɔ pi pɔ́p ndʉ́ŋndʉŋ mbi yɛ́, ɛ́ lɔk ɛ́fí pɑ́Ꞌ nu kɛpɔŋ kɑ ɡɛnɛ nɛvú ɡẅɛɛ pʉɔmɛsɔŋ, ńjẅítɛ wɔ́p. Sɛ́ tsɑ́ɑ mɛjʉ́ŋ mɛkŋɛ ŋ́ɡɑ́ fuꞋ níinɛ yɛkŋɛ pɔ́Ꞌɔ, pɛkŋɛ lúꞋnɛ Tsɑpʉɔ Yɛ́su Kɛlístɔ lɑ ŋ́ɡẅɛɛ luk kɛ́mɛ.