Pʉɔ-Lɔ́mɑ 2 - Kɑɑ Fí

Ntɛ́ yi Sɛ́ ɡʉ ńdɑ́Ꞌ ńdɔk ńzɑ́Ꞌ ntsɑŋ-pʉɔmɛsɔŋ

¹ Mbɔ ŋu zɛ nɛtɔ́ lɔ́Ꞌ-pʉɔ pi pɔ́p ɡɛnɛ yîyɑ́ ntɛ́ mɛnu, ɡu ẅí mbɔ ɔ tɔ́, jí ŋɡɔ mbɔ ɔ pɔɔ nɑ́ kɛ́ vu yú ntsɑŋ vunɛ pɔ́, tɛ pɑ́Ꞌ ɔ lɑɑ ńzɛɛ ḿbɔ́ pɔ wɔ̌ lɑ́. Pɔ́Ꞌɔ mbíꞋŋɡɔ ɔ sɛ́ ńtɔ́ lɔ́Ꞌ-pʉɔ lɑ́ ḿbɛn ḿbɔ́ ŋ́ɡɛ yú pɔ pɑ́Ꞌ pɔ́p ńdɔk ɛ́shɔtnɛ ńtɔ́k pɔ lʉɔ ńdɔk ŋ́kút mbʉʉ yu.

² Pɛkŋɛ zɛɛ ńjí ŋɡɔ Sɛ́ pɔ́ tɛ ḿbɔ́ ŋ́ŋɑk pʉɔ pi pɔ́p ɡɛnɛ yîyɑ́ ntɛ́ mɛnu, ŋ́ŋɑk wɔ́p pɔ pɑ́Ꞌ mɛnu mɔ́p sɛ́ ḿbíkŋɛ.

³ Gu ẅí ɔ tɔ́nɛ mɛlɔ́Ꞌ-pʉɔ pi pɔ́p ɡɛnɛ yîyɑ́ ntɛ́ mɛnu, ḿbɛn ḿbɔ́ ŋ́ɡɛ yú pɔ́Ꞌɔ, ɔ kwɑŋɛ ŋɡɔ ɔ ɡʉ ŋ́ɡɛ pɑ́Ꞌ tɛ ńduk tɛ Sɛ́ pɔɔ níꞋ ŋɡʉ̈ɔ́Ꞌ tú ɡu pɔ́ ɔɔ?

⁴ Ɔ sɛ́ ŋ́ɡɛ pɔ́Ꞌɔ, ńtsʉ́Ꞌ ńdɔk ŋ́ɡwɑ́k Sɛ́ ɡwɑ́knɛ, ḿbɔ́ ńcú ŋɡɔ ɑ ɡẅɛɛ pɔŋtʉ́m, ɑ kɑ́ ɡɔ́ɔ fɛ́Ꞌnɛ cɔ́k pɔ́, ɑ ɡẅɛɛ kɔkmbʉʉ. Pɔ́Ꞌɔ, ɔ kɑ́ pɔ́ ńjí ŋɡɔ ɑ ɡẅɛɛ pɔŋtʉ́m nzʉʉ ɡu pɔ́Ꞌɔ, pɔ nɛlɔk ŋ́ɡɛ ɔ kúpmɛ mɑt pɔ́ ɔɔ?

⁵ Ɔ sɛ́ ńdʉꞋ nɛzúꞋ nu, ɔ kɑ́ pɔ́ ŋ́kɔŋ nɛkúpmɛ mɑt wu pɔ́, ɔ lɔk pɔ́Ꞌɔ, ɛ́fúŋ mɑ́mɑ́ ŋɡʉ̈ɔ́Ꞌ yi Sɛ́ ɡʉ ŋ́ɡɛ ńníꞋ tú ɡu, nǔu lɛ́Ꞌ yi ɑ ɡʉ ńdɑ́Ꞌ ḿbɔ́ ńníꞋ ŋɡʉ̈ɔ́Ꞌ tú-pʉɔ. Ɛ́ ɡʉ ńdɑ́Ꞌ ḿbɔ́ lɛ́Ꞌ ɛ̂yɑ́ pɛ́ jʉ́ɔ pɑ́Ꞌ Sɛ́ ŋɑknɛ mɛnu mi ɛ́ sɛ́ ḿbíkŋɛ.

⁶ Ńtsɔ́Ꞌ fɑꞋ mbɑ wɔ̌ lɑ́ pɔ́ nǔu pɑꞋ ŋɡɑŋ kɑ lɔknɛ ɛ́fɑꞋ pɔ́Ꞌɔ,

⁷ ŋ́ɡɑ́ luk kɛ́mɛ mbɔ̌ pʉɔ pi pɔ́p kɑ lɔknɛ nɛɡɛ nu sʉ́Ꞌnɛ kɛ́ kɑ́ɑ, ḿbɔ́ ńtsɑ́ɑ ŋɡɔ Sɛ́ ɡɑ́nɛ wɔ́p nɛɡúꞋ, ŋ́ɡɑ́ mɔ́p mɛkuꞋ, ŋ́ɡɛ pɔ́p pɔ́ tsɛt luk yí pɛ́ kɛ́ pɛn ḿpfú nǔu pɔ́.

⁸ Lɑ́ ŋ́kɛ́ ŋ́ɡʉ nǔu pʉɔ pi pɔ́p tʉʉ tú mbɔ̌ Sɛ́, ńdʉꞋ nu yi ɛ́ nɛ́nẅín, ńnɛn pɔ nǔu sɛ̂ndúŋ ẅi Sɛ́ kɑ́ pɔ́ ŋ́kɔŋ pɔ́, pɔ́p jʉ́ɔ pɑ́Ꞌ Sɛ́ zɑ́ŋnɛ lɔ́ŋ nǔu pɔ́p, mbɑ pɑ́Ꞌ nu yɔ́p pʉ́knɛ Sɛ́.

⁹ Ŋɡʉ̈ɔ́Ꞌ ɡʉ ńdɑ́Ꞌ ŋ́kúu mbɑ wɛ́tɛ́ ŋumɛsɔŋ lɑ́ ẅi ɑ ɡɛnɛ nu kɛpɔŋ. Pɔ́Ꞌɔ ɛ́ zɛ nǔu ŋu-Pɑyúdɑ ḿbɑ́ɑtɛ ŋ́kúu nǔu ŋu ẅi ɑ kɑ́ pɔ́ ŋu-Pɑyúdɑ pɔ́.

¹⁰ Ŋ́kɛ́ ŋ́ɡʉ nǔu ŋu ẅí ɑ ɡɛnɛ nu sʉ́Ꞌnɛ, mbɔ Sɛ́ ŋ́ɡɑ́ nɛɡúꞋ mbɔ̌ wɛ́, ŋ́ɡɑ́ mɛkuꞋ mbɔ̌ wɛ́, ḿbɛn ŋ́ɡɑ́ mbɔ́tnɛ, ńtsʉ́Ꞌ nɛɡɑ́, ńzɛ nǔu ŋu-Pɑyúdɑ ḿbɑ́ɑtɛ ŋ́ɡɑ́ mbɔ̌ ŋu ẅí ɑ kɑ́ pɔ́ ŋu-Pɑyúdɑ pɔ́,

¹¹ mbíꞋŋɡɔ Sɛ́ kɑ́ ɡẅɛɛ tɔŋ tsɛtsɛt pʉɔmɛsɔŋ pɔ́.

¹² Pʉɔ pi pɔ́p kɑ́ pɔ́ pɑyúdɑ pɔ́, ŋ́kɛ́ mbɔɔ nɛpʉ́ʉ-Mɔ̌sɛ̂ɛ jí. Lɑ́ ŋ́kɛ́ ŋ́ɡɛ nu kɛpɔŋ, ḿvu pɔ ntsɑŋ, tɛ mbɑ pɑ́Ꞌ nu nɛpʉ́ʉ kɛ́ lɛɛ nǔu pɔ́. Lɑ́ ŋ́kɛ́ ŋ́ɡʉ nǔu pʉɔ pi pɔ́p ɡɔ́ ŋ́ɡɛ nu kɛpɔŋ, ḿbɔ́ ńjí nɛpʉ́ʉ, pɔ́p vu ntsɑŋ, ntɛ́ mîmɑ́ mbʉ́ʉ.

¹³ MbíꞋŋɡɔ ŋu zɛɛ mbɔɔ zúꞋ nɛpʉ́ʉ-Sɛ́ zúꞋnɛ ndɑꞋ ńtsʉ́Ꞌ ŋu ẅi ɑ mbi Sɛ́ ḿbɔ́ ndʉ́ŋndʉŋ pɔ́. Ŋu zúꞋ ḿbɛn ŋ́ɡɛ pɑ́Ꞌ ɛ́ píkŋɛ́nɛ lɑ ńtsʉ́Ꞌ kwɑꞋ wɛ́tɛ́.

¹⁴ Pʉɔ pi pɔ́p kɑ́ pɔ́ pɑyúdɑ pɔ́, ḿbɛn ŋ́kɛ́ ḿbɔɔ nɛpʉ́ʉ-Mɔ̌sɛ̂ɛ jí, ɡɛ pɔ yúu mi nînɑ́ nɛpʉ́ʉ-Mɔ̌sɛ̂ɛ sɛ́ ḿbíkŋɛ, tɛ ŋ́ɡɛ pɔ́ kɛ́ pɔ́ yi pɛ́ zíꞋ wɔ́p. Mbʉʉ yɔ́p lɔk pɔ́Ꞌɔ, ńzíꞋ wɔ́p nɛ́ mɛnu mi ɛ́ nǔu nɛpʉ́ʉ mbɑ pɑ́Ꞌ pɔ́p kɑ́ ɡẅɛɛ nɛpʉ́ʉ-Mɔ̌sɛ̂ɛ pɔ́.

¹⁵ Pɔ́p lɔk pɔ́Ꞌɔ, ńnyɛt ŋɡɔ mɛfɑꞋ mi nɛpʉ́ʉ sɛ́ ḿbíkŋɛ ŋɡɔ pɛ́ fɑꞋ, Sɛ́ kɑ ŋwɑꞋnɛ tsɛt tʉ́m pɔ́p, tɛ mbʉʉ yɔp pɔ́ ḿbɛ́m ŋɡɔ ɛ́ nu nɛ́nẅín. Kwɑŋɛ yɔ́p ɡʉ ŋkɑ́ yi ɛ́ ɡʉ ŋ́ŋɑk wɔ́p, ńdɔk pɔ mɛfɑꞋ ɛ̂mɑ́ ŋ́ŋɑk wɔ́p, ŋ́ɡʉ ŋkɑ́ yi ɛ́ ḿbɛꞋ mɛlɑꞋ mɔ́p ḿbɛn ŋ́ɡɛ pɔ pɔ́Ꞌɔ.

¹⁶ Yɔ pɑ́Ꞌ Ŋkʉʉ Sʉ́Ꞌnɛ-Sɛ́ ẅí mɔ sɛ́ ńdɛꞋlɛ ńcúnɛ pɑ́Ꞌ Sɛ́ ɡʉ ńdɑ́Ꞌ ńzɑ́Ꞌ ntsɑŋ mbɑ wɔ̌ lɑ́. Ɛ́ ɡʉ ńdɑ́Ꞌ ḿbɔ́ yîyɑ́ lɛ́Ꞌ, Sɛ́ cú mbɔ̌ Yɛ́su Kɛlístɔ, ɑ ŋɑk pʉɔ nǔu kʉ̈ɔ́ lɑ́ yi ɛ́ lʉɔmɛ́nɛ tsɛt tʉ́m pɔ́p.

Pɑyúdɑ ɡẅɛɛ nɛpʉ́ʉ-Mɔ̌sɛ̂ɛ lɑ́ ḿbɛn ḿvu nǔu nɛpʉ́ʉ vunɛ

¹⁷ Ɛ́ ɡʉ nǔu ɡu, ɔ sɛ́ ńniitɛ ńcú ŋɡɔ ɔ ŋu-Pɑyúdɑ, ŋɡɔ ɔ fú nǔu pɑ́Ꞌ ɔ kúꞋlɛ́nɛ nɛpʉ́ʉ pɔ́Ꞌɔ, ḿbɔ́ ŋu-Sɛ́,

¹⁸ ńjí yúu mi Sɛ́ sɛ́ ŋ́kɔŋ, mbɔ ɛ́ kɑ fú nǔu pɑ́Ꞌ pɛ́ kɑ zíꞋnɛ wú nɛ́ nɛpʉ́ʉ ɔ jí yúu mi ɛ́ pɔŋnɛ.

¹⁹ Ɔ tsuŋ ḿbɔ́ ńjí nǔu yú tú ŋɡɔ ɔ ŋu ẅí ɑ ɡẅɛɛnɛ pɔ́-fʉmík, ḿbɔ́ ŋ́kyɛꞋ pʉɔ pi pɔ́p tsɛt nzɛ́nzʉ́ʉ,

²⁰ ḿbɔ́ ńzíꞋ yúu mbɔ̌ pɔ́p pɛɡɛɡʉʉ nǔu nu-Sɛ́, ḿbɔ́ cícɑ pɛcʉcʉŋ nǔu nu yi ɛ́ nɛ́nẅín, mbíꞋŋɡɔ ɔ sɛ́ ńjí, ɔ lɔk pɑ́Ꞌ ɔ jínɛ nɛpʉ́ʉ, ŋ́ɡẅɛɛ jínu yi ɛ́ nɛ́nẅín.

²¹ Ɛ́ pʉ́ɔlɑ́ tɛ ḿbɔŋ. Lɑ́ mɛlɑ́Ꞌ kʉ̈ɔ́ ɡu ẅi ɔ sɛ́ ńzíꞋ pɛcɔ́ pʉɔ nɛ́ yúu, ɔ kɛ́ mbɔɔ ɡɛ pɑ́Ꞌ yîyɑ́ yúu sɛ́ ḿbíkŋɛ pɔ́ ɔɔ? Ɔ sɛ́ ɛ́sɑ́Ꞌ mbɔ̌ lɑ́Ꞌ ŋɡɔ kɔɔ pɛ́ jʉ̈ɔ, ḿbɛn ḿbɔ́ ńjʉɔ.

²² Ɔ sɛ́ ḿbʉ́ʉ ŋɡɔ kɔɔ pɛ́ ɡɛ ɡɑp, ḿbɛn ḿbɔ́ ŋɡɛɡɑp, ḿbɔ́ ŋɡɔ kɔɔ pɛ́ ɡúꞋlɛ mɛsɛ́, ḿbɛn ḿbɔ́ ŋ́ɡʉ nǔu mɛzʉꞋ mi pɛ́ ɡúꞋlɛ́nɛ wɔ́p zúꞋu, ńjʉ́ yúu mi pɛ́ lɔknɛ ŋ́ɡúꞋlɛ wɔ́p.

²³ Gu ẅi ɔ sɛ́ ŋ́ŋɑ́Ꞌtɛ tɛꞋ ŋɡɔ ɔ jí nɛpʉ́ʉ-Sɛ́, ḿbɛn ɛ́fɑɑnɛ nɛpʉ́ʉ ɛ̂nɑ́, ɔ lɔk pɔ́Ꞌɔ, ńzɔɔtɛ Sɛ́.

²⁴ Pɛ́ kɑ zɛɛ ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: «Pʉɔ pi pɔ́p kɑ́ pɔ́ pɑyúdɑ pɔ́ ńzɔɔtɛ lík-Sɛ́, ɛ́ kɛ́ ɛ́fú pɔ mbɔ̌ pʉʉ.»

²⁵ Ɛ́ nɛ́nẅín ŋɡɔ ɔ lɑɑ ńnɛn nǔu pɑ́Ꞌ nɛpʉ́ʉ sɛ́ ḿbíkŋɛ, mbɑ nɛpɔ́ ẅí pɛ́ kɑ púꞋnɛ wú pɑ́Ꞌ ɔ ɡʉ ḿbɔ́ ŋu-Sɛ́ ɑ ɡɛ cẅɛ́lɛ́. Lɑ́ ŋ́kɛ́ mbɔɔ nɛn nǔu pɑ́Ꞌ nɛpʉ́ʉ sɛ́ ḿbíkŋɛ pɔ́, mbɔ pɛ́ kɑ zɛɛ ḿbúꞋ mbɑ wú lɑ́, ɔ ɡʉ ńtsʉ́Ꞌ ḿbɔ́ ŋu ẅi pɛ́ ŋkɑɑ wɛ́ púꞋ pɔ́,

²⁶ ḿbɛn ḿbɔ́ yi pʉɔ pi pɛ́ ŋ́kɑɑ wɔ́p púꞋ, nɛn nǔu pɑ́Ꞌ nɛpʉ́ʉ píkŋɛ́nɛ, mbɔ Sɛ́ kɛ́ tsʉ́Ꞌ ńdíŋɛ wɔ́p ẅi pɛ́ ŋkɑɑ wɔ́p púꞋ pɔ pɑ́Ꞌ pʉɔ pi pɛ́ púꞋnɛ wɔ́p pɔ́ kɛ?

²⁷ Pʉɔ pi pɛ́ kɑ pínɛ wɔ́p mbɔɔ wɔ́p púꞋ, pɔ́p pɛn ḿbɔ́ ŋ́ɡɛ yúu mi nɛpʉ́ʉ-Mɔ̌sɛ̂ɛ sɛ́ ḿbíkŋɛ, pɔ́p ɡʉ́ ńdɑ́Ꞌ tɔ́ mɛlɔ́Ꞌ mʉ́ʉ, pʉʉ pi pʉʉ fɑɑnɛ mîmɑ́ mbʉ́ʉ, lɑ́ mbɔ pɛ́ kɑ ŋwɑꞋnɛ ŋ́ɡɑ́ mbɔ̌ pʉʉ, pʉʉ pɛn ḿbɔ́ pʉɔ pi pɛ́ kɑ púꞋnɛ wɔ́p.

²⁸ Pɛ́ zɛɛ mbɔɔ pɔ́ ńjí kwɑꞋ ŋu-pɑyúdɑ, ŋu-Sɛ́, ńdɔk pɔ yúu mi pɛ́ sɛ́ ńjʉ́ɔ nǔu wɛ́ nzɛmpíi pɔ́, nɛjí ŋu ẅí pɛ́ kɑ púꞋnɛ wɛ́ ɛ́ kɑ́ pɔ́ pɔ ndɑꞋ nɛjʉ́ɔ pɑ́Ꞌ pɛ́ kɑ zɑ́Ꞌnɛ zʉꞋ-mbʉʉ yɛ́ pɔ́.

²⁹ Lɑ́ kwɑꞋ ŋu-Pɑyúdɑ, ŋu-Sɛ́, ɑ pɔ́ pɔ ŋu ẅí pɛ́ kɑ púꞋnɛ wɛ́ pɔ tsɛt tʉ́m yɛ́. Ɛ́ pɔ́ nɛpúꞋ ẅí Zẅikŋɛ-Sɛ́ ɡɛnɛ, tɛ ɛ́ pɔɔ pɔ́ pɔ ẅí ɛ́ fúnɛ nǔu pɑ́Ꞌ pɛ́ kɑ ŋwɑꞋnɛ́nɛ tsɛt nɛpʉ́ʉ pɔ́. Jʉ́ pɔ́nɛ ŋu ẅí Sɛ́ ɡɑ́nɛ mɛkuꞋ mɛ́ tɛ pʉɔmɛsɔŋ pɔɔnɛ ɡɑ́.