Pʉɔ-Lɔ́mɑ 15 - Kɑɑ Fí

Ŋu tsɑ́ɑ pɔ nu-mɔ́ɔmɑ́ wɛ

¹ Yúu mi pɛkŋɛ ɡẅɛɛ nɛɡɛ ɛ́ ŋɡɔ pʉɔ pi pɔ́p lɔk nu-Sɛ́ ńjí yúu mi pɔ́p ɡʉ ŋ́ɡɛ, ɡẅɛɛ nɛlɔk tʉ́m sʉ́Ꞌnɛ ńcẅɛ́lɛ pʉɔ pi pɔ́p kɑ́ pɔ́ ńjí pɑ́Ꞌ pɔ́p pɔ́. Ŋu kɑ́ ɡẅɛɛ nɛɡɛ yúu mi ɛ́ pɔŋnɛ pɔ wɛ́ pɔ́.

² Ɛ́ píkŋɛ ŋɡɔ mbɑ wɔ̌ lɑ́ tsɛtsɛt pɛkŋɛ lɔɔ pɑ́Ꞌ ɑ ɡʉ ŋ́ɡɛ yúu mi ɛ́ ḿbɔŋ pɛcɔ́ pʉɔ, pɔ́Ꞌɔ ńdɔk ńtsɑ́ɑ nu sʉ́Ꞌnɛ nǔu pɔ́p, ɛ́ lɔk cẅɛ́lɛ́ wɔ́p pɔ́p kẅiꞋ ńzɑ́p tʉ́m nǔu Sɛ́.

³ Kɛlístɔ kɑ zɛɛ ḿbɔɔ lɔɔ pɔ yúu mi ɛ́ pɔŋnɛ pɔ ndɑꞋ wɛ́ pɔ́. Tɛ ńtsʉ́Ꞌ pɔ́Ꞌɔ, mbɔ ɑ kɑ pɛ́m yúu mi pɛ́ cúnɛ tsɛt ŋwɑꞋnɛ-Sɛ́ ŋɡɔ: «Nzɔɔmɛ-pɑzɔɔtɛ wú kɑ vu tú mɔ».

⁴ Ɛ́ zɛɛ ŋ́ɡɔ ḿbɔ́, mbɔ mbɑ kʉ̈ɔ́ lɑ́ yi pɛ́ kɑ lɑ́Ꞌnɛ ńzɑ́Ꞌ njí ŋ́ŋwɑꞋnɛ tsɛt ŋwɑꞋnɛ-Sɛ́, pɛ́ kɑ pɔ́ ŋ́ŋwɑꞋnɛ pɔ nɛlɔk ńnɑ́ŋ ńzíꞋ wɛkŋɛ nɛ́ yúu, nɛpɔ́ yi ɛ́ ɡʉ ńdɔk pɑ́Ꞌ ɛ́ sɛ́ ńníꞋ mɛtʉʉ mɛkŋɛ, ḿbɛn ḿbɔ́ ŋ́ɡɛ ŋɡɔ kɔɔ pɛkŋɛ kɑ́ɑ, pɛkŋɛ jí ŋɡɔ pɛkŋɛ ɡẅɛɛ yúu mi Sɛ́ kɑ kɑꞋnɛ mbɔ̌ pɛkŋɛ.

⁵ Mɔ sɛ́ ńdɔ́ɔ mbɔ̌ Sɛ́ ŋɡɔ jʉ́ ẅí ɑ níꞋnɛ mɛtʉʉ mɛkŋɛ, ɡɛ ŋɡɔ kɔɔ pɛkŋɛ kɑ́ɑ, ɑ ɡɛ pʉʉ ɡẅɛɛ tɑ́Ꞌ kwɑŋɛ tsɛtsɛt pʉʉ, ɛ́ lɔk pɔ́Ꞌɔ, ḿbɔ́ yúu mi Yɛ́su Kɛlístɔ kɑ zíꞋnɛ wʉ́ʉ.

⁶ Ɛ́ lɛɛ pɔ́Ꞌɔ, pʉʉ lɔk tɑ́Ꞌ ntsu, ńdɔk tɑ́Ꞌ ŋɡi ŋ́ɡúꞋlɛ Sɛ́ Tɑ́t mbɑ Tsɑpʉɔ wɛkŋɛ Yɛ́su Kɛlístɔ.

Nu-Kɛlístɔ yɛ́ mɛlɑ́Ꞌ tsʉʉ

⁷ Pɔ́Ꞌɔ lɑ́, mbɑ wɔ̌ lɑ́ tsɛtsɛt pʉʉ pɛ́m pɛcɔ́ pʉɔ nɛjɔ́ŋ wɛ́, ndʉ́ŋndʉŋ pɑ́Ꞌ Kɛlístɔ kɑ pɛ́mnɛ wʉ́ʉ nɛjɔ́ŋ wɛ́, pʉʉ ɡɛ pɔ́Ꞌɔ, pʉɔ jʉ́ɔ ŋ́ɡúꞋlɛ Sɛ́.

⁸ Ɛ́ yúu mi ɛ́ kɑ ɡɛnɛ Kɛlístɔ tɔ́ ɛ́fɑꞋ mbɔ̌ pɑyúdɑ, nɛɡɛ mɛnu mi Sɛ́ kɑ kɑꞋnɛ mbɔ̌ pɛmɑ̂ɑŋɡɑpnjẅɛt pɔ́p puutɛ. Ndʉ́ŋndʉŋ pɑ́Ꞌ mbɑ kʉ̈ɔ́ lɑ́ yi Sɛ́ cúnɛ ŋ́kɛ́ ḿbuutɛ puutɛ́nɛ.

⁹ Kɛlístɔ kɑ pɔ́ ḿbɛn ńtɔ́ nɛpɔ́ yi pʉɔ pi pɔ́p kɑ́ pɔ́ pɑyúdɑ pɔ́ ɡʉ ŋ́ɡúꞋlɛ Sɛ́ mbíꞋ pɔŋtʉ́m yɛ́ nǔu pɔ́p. Ɛ́ zɛɛ ŋ́ɡɔ ḿbɔ́ ŋwɑꞋnɛ-Sɛ́ cú ŋɡɔ: «Ɛ́ yúu mi ɛ́ ɡʉ ŋ́ɡɛ n tʉ́ʉ tsɛtsɛt pʉɔ pi pɔ́p kɑ́ pɔ́ pɑyúdɑ pɔ́ ŋ́ɡúꞋlɛ wú ḿbɛn ńzɔp ŋ́ɡúꞋlɛ lík yú.»

¹⁰ ŊwɑꞋnɛ-Sɛ́ pɛn ńcú ŋɡɔ: «Pʉʉ pʉɔ pi pɔ́p kɑ́ pɔ́ pɑyúdɑ pɔ́, pʉʉ tsɑ́ɑtɛ. Pʉʉ pɛ́ pʉɔ-Tsɑpʉɔ tɛmtɛ ńtsɑ́ɑtɛ.»

¹¹ Ɛ́ pɛn ńcú ŋɡɔ: «Pʉʉ mɛlɑ́Ꞌ mi ɛ́ kɑ́ pɔ́ pɑyúdɑ pɔ́, pʉʉ ɡúꞋlɛ Tsɑpʉɔ. Ɛ́ pɔŋ ŋɡɔ pʉɔ mɛlɑ́Ꞌ tsʉʉ kɑꞋ lík-Tsɑpʉɔ ŋ́ɡɑ́ tʉ́.»

¹² Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ ŋwɑꞋnɛ yɛ́ ŋɡɔ: «Ŋu nǔu njẅɛtndɑ́-Jɛsɛ́ ɡʉ ńdɑ́Ꞌ ńtɔ́. Ḿbɔ́ ŋu ẅí ɑ ɡʉ ɛ́sɑ́Ꞌ pʉɔ pi pɔ́p kɑ́ pɔ́ pɑyúdɑ pɔ́. Pɔ́p tík mík mɔ́p pɔ nǔu wɛ́, ḿbɔ́ ńzẅíꞋlɛ ŋɡɔ ɑ ɡɛ pɔ́p pɔ́ ɡú.»

¹³ Pɔ́Ꞌɔ, mɔ sɛ́ ńtsɑ́ɑ ŋɡɔ Sɛ́ ẅí jʉ́ ɡɛnɛ lɑ pɛ́ nɑ́ŋ ḿbɔ́ ńzẅíꞋlɛ yúu, ɑ lɛɛ nǔu pɑ́Ꞌ pʉʉ zɑ́pnɛ tʉ́m nǔu wɛ́, ŋ́ɡɛ tsɑ́ɑtɛ pɔ́p mɔ́fíitɛ jʉ́ tʉ́m yʉ́ʉ, ńjí ŋɡɔ Zẅikŋɛ Lɛ́ɛnɛ́nɛ ɡʉ ńdɔk mɛtʉʉ mɛ́ ŋ́ɡɛ pʉʉ pɔ́ kwɑꞋ pɑnɑ́ŋ ńzẅíꞋlɛ yúu mi Sɛ́ kɑ kɑ́Ꞌnɛ.

Pɔ̂l kɑ ɡẅɛɛ nɛŋwɑꞋnɛ yɔ ŋwɑꞋnɛ

¹⁴ Pɔ́ɔpɛ́mɑ́ pɑ́ɑ, kwɑꞋ mɔ sɛ́ ńjí ŋɡɔ pʉʉ ɡẅɛɛ pɔŋtʉ́m tɛꞋ, ḿbɔ́ ńniitɛ ńjí yúu mi ɛ́ píkŋɛ́nɛ ŋɡɔ pɛ́ jí, ḿbɛn ŋ́kuꞋ nɛtík mɛmbʉʉ mʉ́ʉ pʉʉ nɛ́ pʉʉ.

¹⁵ Mɔ sɛ́ ńjí pɔ́Ꞌɔ lɑ́, ŋ ɡʉ nǔu mɛcɔ́ mɛzʉꞋ tsɛt yɔ ŋwɑꞋnɛ, ńjʉ́ɔ ŋɡɔ ŋ ɡʉ niitɛ ńcú mɛcɔ́ mɛnu, nɛlɔk ŋ́kẅíitɛ wʉ́ʉ nɛ́ mɛnu mi pɛ́ kɑ zíꞋnɛ wʉ́ʉ. N cú pɔ́Ꞌɔ, ńdɛɛ nǔu pɑ́Ꞌ Sɛ́ kɑ ɡɑ́nɛ fuꞋ níinɛ yɑ́ɑ,

¹⁶ ńdɔk wɑ́ɑ ŋ́ɡɛ ŋu ẅí ɑ ɡʉ ḿbɔ́ ɛ́fɑꞋ fɑꞋ-Yɛ́su Kɛlístɔ tsɛtsɛt pʉɔ pi pɔ́p kɑ́ pɔ́ pɑyúdɑ pɔ́. A kɑ tsɔ́Ꞌnɛ wɑ́ɑ nɛpɔ́ yi ŋ ɡʉ ńtsʉ́Ꞌ ńcẅi pɔ Ŋkʉʉ Sʉ́Ꞌnɛ mbɔ̌ pɔ́p, Zẅikŋɛ Lɛ́ɛnɛ́nɛ lɔk wɔ́p ŋ́ɡɛ pʉɔ-Sɛ́, mɔ ŋ́ɡɑ́ wɔ́p mbɔ̌ Sɛ́, pɔ́p pɔ́ pɑ́Ꞌ yúu pɔꞋ yi ɛ́ pɔŋnɛ Sɛ́.

¹⁷ N dɔk pɑ́Ꞌ dɑtnɛ mbʉʉ nǔu Yɛ́su Kɛlístɔ, ŋ́kuꞋ nɛlɔk fɑꞋ-Sɛ́ yi mɔ sɛ́ ɛ́fɑꞋ ŋ́kɑꞋmɛ.

¹⁸ MbíꞋŋɡɔ n dɑɑ ńcú kʉ̈ɔ́ lɑ́ yi ŋ kɑ ɡɛnɛ nǔu fɑꞋ-Sɛ́, mbɔ ɛ́ pɔ́ pɔ yi Kɛlístɔ kɑ lɔknɛ wɑ́ɑ ŋ́ɡɛ. Pɔ́Ꞌɔ, nɛɡɛ pʉɔ pi pɔ́p kɑ́ pɔ́ pɑyúdɑ pɔ́ zúꞋ ntsu-Sɛ́, ɛ́ lɛɛ nǔu sẅiŋɛ yi n cúnɛ mbɑ nǔu mɛfɑꞋ mi ɛ fɑꞋnɛ,

¹⁹ ńdɛɛ nǔu mɛlii-mɛnu pɔ́p mɛnu mɑ̌ɑmɑɑnɛ, ḿbɛn ńdɛɛ nǔu mɛtʉʉ-Zẅikŋɛ-Sɛ́. Yɔ ntɛ́ yi ŋ kɑ lɔknɛ ńniitɛ ńcẅi Ŋkʉʉ Sʉ́Ꞌnɛ-Kɛlístɔ zʉꞋ tsʉʉ, nɛfú Yɛlúsɑlɛm ŋ́ɡʉ ŋ́kúu Ilylî.

²⁰ Lɑ́, ŋ kɑ sɑ́Ꞌ tʉʉ nɛ́ kɛ́ ńcẅi Ŋkʉʉ Sʉ́Ꞌnɛ pɔ zʉꞋ yi pɛ́ zɛɛ mbɔɔ Kɛlístɔ zúꞋu kẅii, ḿbɔ́k nɛkút ndɑ́ nǔu cʉ́ndɑ́ yi wɛcɔ́ ŋu ndɛꞋ kɑ nɔŋnɛ.

²¹ Ŋ kɑ pɔ́ ńdɔk pɔ́Ꞌɔ, ŋ́ɡɛ pɑ́Ꞌ ŋwɑꞋnɛ-Sɛ́ sɛ́ ńcú ŋɡɔ: Pʉɔ pi pɛ́ ŋkɑɑ sẅíi wɔ́p nɛ́ nu nǔu wɛ́ pɔ́ pɔ́p ɡʉ ńzɑ́p lík nǔu wɛ́. Pʉɔ pi pɔ́p ŋkɑɑ zúꞋ yɛcɔ́ nu nǔu wɛ́ pɔ́, ɡʉ ŋ́ɡɛ ńzúꞋ.

Pɔ̂l sɛ́ ŋ́kwɑŋɛ nɛɡʉ Lɔ́mɑ

²² Nɛkɑ́t ńnɛn ńcẅi Ŋkʉʉ Sʉ́Ꞌnɛ ɛ́ yúu mi ɛ́ kɑ tɔꞋnɛ wɑ́ɑ mɛku tɛ ńzɑ́ɑ nɛtɔ́ ńjʉ́ɔ wʉ́ʉ.

²³ Lɑ́ ɛ́ kɛ́ ḿbɔ́ nǔu ŋkɔ̂ɔnɛ, mbɔ m mik mɔ́ fɑꞋ yɑ́ɑ nǔu mɔnɛ mɛpɑk-ŋɡɔŋ pɑ́Ꞌ mɔ sɛ́ ńtsɑ́ɑ nɛtɔ́ ńjʉ́ɔ wʉʉ.

²⁴ Mɔ sɛ́ ńjʉ́ɔ ŋkɔ̂ɔnɛ ŋɡɔ mɔ ŋ́ɡɔ́ ŋ́ɡʉ Ɛspɑ̂nɛ, ńtɔ́ lɑ́Ꞌ pʉʉ. Mɔ sɛ́ ńzɛɛ ńtsɑ́ɑ nɛɡɔ́ ńdɛɛ, ńjʉ́ɔ wʉ́ʉ, pʉʉ cẅɛ́lɛ́ wɑ́ɑ nɛɡʉ zúꞋu. Ɛ́ ɡʉ ŋ́ɡɛ ḿbɔ́ ŋɡɔ́ku ɔɔ pɛkŋɛ ɡɛ ńtɛmtɛ ńnɑ́Ꞌ ńnɑ́ŋ mɔ́zʉꞋ.

²⁵ Lɑ́ ɛ́ nǔu ŋkɔ̂ɔnɛ m bɔ́ ŋ́ɡʉ nɛ́ Yɛlúsɑlɛm nɛɡɑ́ ŋkɑ́p mbɔ̌ pʉɔ-Sɛ́ pi pɔ́p tsɛt wîwɑ́ tʉ́sɔŋ.

²⁶ MbíꞋŋɡɔ pʉɔ-Kɛlístɔ pi pɔ́p Mɑsɛndwɑn mbɑ pɛ́ Akɑ̂y kɑ jʉ́ɔnɛ ŋɡɔ pɔ́p ɡʉ ḿmɑꞋ ŋkɑ́p ńdɔk cẅɛ́lɛ́ pʉɔ-Kɛlístɔ pi pɔ́p Yɛlúsɑlɛm, ḿbɔ́ pɛpúŋ.

²⁷ Pɔ́p kɑ jʉ́ɔnɛ pɔ́Ꞌɔ lɑ́, ɛ́ zɛɛ ḿbɔ́ pɔ nzɔ́ yi pɔ́p ɡẅɛɛnɛ nɛtɔŋɛ mbɔ̌ pɔ́p. MbíꞋŋɡɔ ɛ́ lɑɑ ḿbɔ́ yi pʉɔ pi pɔ́p kɑ́ pɔ́ pɑyúdɑ pɔ́ ɡẅɛɛ yɔ́p yúu nǔu yúu mi Sɛ́ kɑ niitɛ́nɛ, mbɔ pîpɑ́ pʉɔ ɡẅɛɛ pɑ́Ꞌ pɔ́p ŋ́ɡʉ nǔu yúu mi ɛ́ yɔ́p, ḿbɛ́ɛ yɛcɔ́ nǔu pɛ́ lɔk ńcẅɛ́lɛ pɑyúdɑ.

²⁸ Mɔ ŋ́ɡɛ ḿbɔ́ tɛ ŋ́ɡʉ ŋ́ɡɑ́ yɔ ŋkɑ́p yi pɛ́ kɑ mɑꞋnɛ lɑɑ, ŋ́ɡʉ Ɛspɑ̂nɛ, ŋɡɔ ŋ́ɡʉ ńdɛɛ wɛ́ lɑ́Ꞌ pʉʉ.

²⁹ M bɛn ḿbɔ́ ńjí ŋɡɔ mɔ ŋ́ɡɛ ńtɔ́, Sɛ́ lɛɛ nǔu mɔ, ńníꞋ mbɔ́tnɛ nǔu pʉʉ tɛꞋ.

³⁰ Pɔ́ɔpɛ́mɑ́ pɑ́ɑ, ɛ́ lɛɛ nǔu Tsɑpʉɔ wɛkŋɛ Yɛ́su Kɛlístɔ mbɑ nǔu pɑ́Ꞌ Zẅikŋɛ Lɛ́ɛnɛ́nɛ sɛ́ ŋ́ɡɛ pɛkŋɛ ɡẅɛɛ ŋkɔŋɛ tsɛtsɛt pɛkŋɛ lɑ́, mɔ ḿbúꞋ mbɔ́ mbɔ̌ pʉʉ ŋɡɔ pʉʉ lɔk nɛcɛꞋlɛ Sɛ́ ńcẅɛ́lɛ́ wɑ́ɑ. Pʉʉ cɛꞋlɛ Sɛ́ nǔu tú yɑ́ɑ, ńtsʉ́Ꞌ nɛcɛꞋlɛ, ḿbúꞋ mbɔ́ nɛ́ ŋɡɔŋ tʉ́m yʉ́ʉ tsʉʉ,

³¹ nɛpɔ́ yi ŋ kɛ́ vu nǔu mbɔ́-pʉɔ-Judɛ̂ pi pɔ́p kɑ́ pɔ́ ńzɑ́p tʉ́m nǔu Kɛlístɔ pɔ́ pɔ́, ḿbɛn ḿbúꞋ mbɔ́ mbɔ̌ Sɛ́ ŋɡɔ ɑ ɡɛ pʉɔ-Kɛlístɔ pi pɔ́p Yɛlúsɑlɛm lɔk tʉ́m sʉ́Ꞌnɛ ńcẅɛ́ɛ yúu mi n dɔknɛ ŋ́ɡʉ nɛ́ zúꞋu nɛcẅɛ́lɛ wɔ́p.

³² Pɔ́Ꞌɔ, ŋ ɡɔ́ ńtɔ́ lɑ́Ꞌ pʉʉ, tʉ́m yɑ́ɑ pɔ́ ńtsɑ́ɑtɛ, Sɛ́ pɛ́m, mbɔ ŋ ɡʉ ńnɑ́ŋ tsɛtsɛt pʉʉ, ńnɑꞋ ńjẅiitɛ.

³³ Ɛ́ pɔŋ ŋɡɔ Sɛ́ ẅí ɑ ɡɑ́nɛ mɔ́fíitɛ pɔ́ ḿbɔ́ nɛ́ pʉʉ pɛtsʉʉ. Ɛ́ pɔ́Ꞌɔ.