Jɑ̂ŋ 11 - Kɑɑ FíYɛ́su ɡɛ Lɑzɑ̂ɑ zẅíimɛ nǔu nɛvú 1 Wɛcɔ́ ŋu ɡɛ ḿvu ɡɔɔ, lík yɛ́ pɔ́ ŋɡɔ Lɑzɑ̂ɑ. Pɔ́p pɔ́ɔpɛ́mɑ́ pɛ́ pɛ́ pɑŋɡɛ́ pɛ́pɑ́, Mɑ́ktɑ pɔ́p Mɑlíyɑ pɔ́ ńtswɛ́ tsɛt lɑ́Ꞌ-Mbɛtɑni. 2 Wɔ Mɑlíyɑ pɔ́ ẅi ɑ kɑ lɑ́Ꞌnɛ ńdɔk lɑmɛ́ndɑɑ, ńzɔ́Ꞌ Ndɛ tɛ ɛ́ kuꞋ, ɑ pɛn ńdɔk mɛnuk-tú mɛ́ ńtuk mɛku mɛ́ lɑ́. Mɔ́ɔmɑ́ wɛ Lɑzɑ̂ɑ vu ɡɔɔ pɑ́Ꞌɑ, 3 pɑŋɡɛ́ ɛ̂pɑ́ pɛ́pɑ́ túu ńcú mbɔ̌ Yɛ́su ŋɡɔ: «Ndɛ, súu nɛpɛ wu sɛ́ ŋ́ɡɔɔ tɛꞋ.» 4 Yɛ́su zúꞋ pɔ́Ꞌɔ, ńcú ŋɡɔ: «Yɔ ɡɔɔ kɑ́ pɔ́ yi ɛ́ ɡʉ ńdɔk wɛ́ pɔ́. Pɛ́ ɡʉ ńdɛɛ nǔu ńjʉ́ɔ mɛtʉʉ-Sɛ́, ḿbɛn ńdɛɛ nǔu ŋ́ɡɑ́ mɛkuꞋ mbɔ̌ mɔ́ɔ-Sɛ́.» 5 Yɛ́su kɑ pɔ́ ŋ́kɔŋ Mɑ́ktɑ, pɔ́p Mɑlíyɑ mbɑ Lɑzɑ̂ɑ. 6 Ŋ́kɛ́ ńzúꞋ ɡɔɔ pɑ́Ꞌɑ, ḿbɛn ńnɑ́ŋ zʉꞋ yí ɑ m̄bɔ́nɛ zúꞋu lɛ́Ꞌ pɛ́pɑ́. 7 Ɛ́ ɡɛ pɔ́Ꞌɔ, ɑ cú mbɔ̌ ɡɑŋku pɛ́ ŋɡɔ: «Pɛkŋɛ pɛn nɛ Judɛ̂.» 8 Gɑŋku pɛ́ pʉ̈ɔt ŋɡɔ: «Cícɑ, ntí kɑ́ sɑk pɑ́Ꞌ pɑyúdɑ kɑ pɔ́ ńdɔɔ nɛlɔk mɛŋɡɔꞋ ńtɛ́m wú ńjẅí pɔ́. Ɔ ɡʉ ḿbɛn ḿbɛn zúꞋu ɔɔ?» 9 Yɛ́su cú ŋɡɔ: «Tɑ́Ꞌ lɛ́Ꞌlɑ́Ꞌ kɑ́ ɡẅɛɛ nɛm ntsɔ̌ppɑ́ nɛ́ nɛɡɛ́m pɔ́ ɔɔ? Ŋu lɑɑ ńnɛn nɛnɛm, mbɔ ɑ kɛ́ kɔɔtɛ pɔ́, mbíꞋŋɡɔ kyɛꞌ njí sɛ́ ŋ́ɡɛ pɛ́ jʉ́ɔ zʉꞋ. 10 Ŋu lɑɑ ŋ́kɛ́ ḿbɔ́ ńnɛn nɛtúꞋ, mbɔ ɑ ɡʉ kɔɔtɛ, mbíꞋŋɡɔ yúu mi ɛ́ ɡʉ ŋ́kyɛꞋ zʉꞋ ŋ́ɡɑ́ mbɔ̌ wɛ́ kɑ́ pɔ́ ɡú pɔ́.» 11 Yɛ́su cú yɔ nu, ḿbɛn ŋɡɔ: Súu wɛkŋɛ Lɑzɑ̂ɑ sɛ ńdɛ́, lɑ́ ŋ ɡʉ ŋ́ɡʉ jʉɔmɛ wɛ́. 12 Gɑŋku pɛ́ ńcú mbɔ̌ wɛ́ ŋɡɔ: «Ndɛ, ɛ́ lɑɑ ḿbɔ́ yi ɑ lɛ́, mbɔ ɑ ɡʉ ɛ́fíitɛ.» 13 Ŋ́ɡɔ́ ḿbɔ́ pɔ́Ꞌɔ, Yɛ́su pɔ́ ɛ́sẅíi wɔ́p ŋɡɔ Lɑzɑ̂ɑ pfú. Lɑ́ pɔ́p pɔ́ ŋ́kwɑŋɛ yɔ́p pɔ ŋɡɔ ɑ cú ŋɡɔ ɑ sɛ́ ńdɛ́ lɛ́nɛ. 14 Pɔ́Ꞌɔ lɑ́, Yɛ́su sɑ́ɑnɛ sɑ́ɑnɛ́nɛ, ńcú mbɔ̌ pɔ́p ŋɡɔ: «Lɑzɑ̂ɑ pfú. 15 Ɛ́ pɛn ḿbɔŋ wɑ́ɑ tɛꞋ pɑ́Ꞌ ɑ ɡɔ́ ḿpfú, m bɔɔ sɛ́ pɔ́. Sɛ́ ɡɛnɛ ŋɡɔ ɛ́ pɔ́ pɔ́Ꞌɔ, ntɛ́ wʉ́ʉ, ńjí ŋɡɔ pʉʉ ɡʉ ɛ́fú nǔu, niitɛ ńzɑ́p tʉ́m nǔu mɔ. Lɑ́ pɛkŋɛ ɡʉ ŋkɔ̂ɔnɛ tɛ ŋ́kúu zúꞋu.» 16 Tɔ́mɑ́shi ẅí pɛ́ kɑ pɔ́ ḿbɛn ɛ́fúŋ wɛ́ ŋɡɔ mɔ́ɔnɛfɑ́k, cú mbɔ̌ pɛcɔ́ ɡɑŋku-Yɛ́su ŋɡɔ: «Pʉʉ tɔ́ pɛkŋɛ pɔ́p ɡʉ, ńtɛmtɛ ḿpfú.» Yɛ́su ɡɛ ŋu zẅíimɛ, ḿbɛn ŋ́ɡɛ ɑ pɔ́ ɡú 17 Yɛ́su ɡʉ tɛ ŋ́kúu zúꞋu, ńjʉ́ɔ, mbɔ Lɑzɑ̂ɑ nɔɔ tsɛt nɛshi lɛ́Ꞌ pɛ́nɛ́kwɑ. 18 Pɑ́Ꞌ nɛfú Yɛlúsɑlɛm ŋ́ɡʉ Mbɛtɑni kɑ pɔ́ pɔ yúu pɛkílu pɛ́tɑ́t lɑ́, 19 nɛzɑ́ɑ pɑyúdɑ ɡɔ́ ḿbɔ́, mbɔ pɔ́p tɔ́ njɛ́Ꞌ-Mɑ́ktɑ pɔ́p Mɑlíyɑ, nɛzíi ŋki-mík mɔ́p, ntɛ́ mɔ́ɔmɑ́ wɔp ẅí ɑ kɑ pfúnɛ. 20 Mɑ́ktɑ pɔ́ tɛ ńzúꞋ ŋɡɔ Yɛ́su sɛ́ ńtɔ́, ŋ́ɡɔ́ɔ ńdɔ sɛ́ ŋ́ɡʉ ńzɑ́Ꞌ wɛ́, Mɑlíyɑ tsʉ́Ꞌ ńnɑ́ŋ pɔ ndɑ́. 21 Mɑ́ktɑ tɔ́ ńcú mbɔ̌ Yɛ́su ŋɡɔ: «Ndɛ, ɔ kɑ pɔ́ pɛ́Ꞌnɛ ḿbɔ́ zɑꞋnɛ, mbɔ mɔ́ɔmɑ́ mɔ ŋkɑɑ pfú. 22 Lɑ́ tɛ mbɑ ŋkɔ̂ɔnɛ, n jí ŋɡɔ ɔ lɑɑ ḿbíkŋɛ kʉ̈ɔ́ mbɔ̌ Sɛ́ lɑ́, mbɔ ɑ ɡʉ ŋ́ɡɑ́ ɡɑ́nɛ.» 23 Yɛ́su pʉ̈ɔt ŋɡɔ: «Mɔ́ɔmɑ́ wu ɡʉ ŋ́ɡɛ ńzẅíimɛ nǔu nɛvú.» 24 Mɑ́ktɑ pʉ̈ɔt ŋɡɔ: «N jí ŋɡɔ ɑ ɡʉ ŋ́ɡɛ ńzẅíimɛ nǔu ndẅiknzʉʉ lɛ́Ꞌlɑ́Ꞌ pɑ́Ꞌ pɛpfú ɡʉ ńdɑ́Ꞌ ḿbɔ́ ńzẅíimɛ.» 25 Yɛ́su pʉ̈ɔt mbɔ̌ wɛ́ ŋɡɔ: «Mɔ ŋu ẅí ɑ ɡɛnɛ pɛ́ zẅíimɛ nǔu nɛvú, ḿbɔ́ ŋu ẅí ɑ ɡɛnɛ pɛ́ pɔ́ ɡú. Ŋu lɑɑ ńzɑ́p tʉ́m nǔu mɔ ḿpfú mbɑ pfúnɛ, mbɔ ɑ ɡʉ ŋ́ɡɛ ḿbɔ́ ɡú. 26 Ŋu ẅí ɑ pɛ́tnɛ ntʉʉ, ńzɑ́p tʉ́m yɛ́ nǔu mɔ, ɑ kíi ńdɑ́Ꞌ ḿpfú pɔ́. Tɛ ɔ pɛ́m yɔ nu?» 27 A cú ŋɡɔ: «Ɔ́ɔŋ mbɑ̌ɑ Tsɑpʉɔ. Mɔ, m bɛ́m ŋɡɔ ɔ Nzɑ́Ꞌŋkʉ ẅi Sɛ́ kɑ kɑꞋnɛ, ḿbɔ́ mɔ́ɔ-Sɛ́ ẅi pɛ́ kɑ pɔ́ ńzẅíꞋlɛ ŋɡɔ ɑ ńtɔ́ ndǔmbí.» Yɛ́su pɔ́ ńdɑɑ 28 Mɑ́ktɑ cú pɑ́Ꞌɑ, ŋ́ɡʉ ɛ́fúŋ mɔ́ɔmɑ́ wɛ Mɑlíyɑ, tsɔ́Ꞌnɛ ntsɛm mbɔ̌ wɛ́ ŋɡɔ: «Cícɑ píi ḿbɔ́ ŋɡɔ ɔ tɔ́.» 29 Mɑlíyɑ zúꞋ pɔ́Ꞌɔ, ŋ́ɡɔ́ɔ ńdɔ sɛ́ nɛ́ tʉʉ nɛɡʉ ńjʉ́ɔ wɛ́. 30 Yɛ́su kɑ pɛ́t pɔ zʉꞋ pɔ́p Mɑ́ktɑ lɑ́Ꞌnɛ ńtʉ́ʉ zúꞋu ɛ́sẅíŋɛ, tɛ mbɔ ɑ kɑ́ tɔ́k tɛ ŋ́kúu tsɛt lɑ́Ꞌ pɔ́. 31 Pɑyúdɑ pinɛ pɔ́p lɑ́Ꞌnɛ ḿbɔ́ ndɑ́ nɛzíi ŋki-mík Mɑlíyɑ, jʉ́ɔ pɑ́Ꞌ ɑ fúnɛ ndɑ́ ńcẅɛt nɛ́ tʉʉ, ńcʉ́ɔ yɔ́p nzʉʉ wɛ́, ḿbɔ́ ŋ́kwɑŋɛ ŋɡɔ ɑ ɡʉ tú-nɛshi ńnɑ́ŋ zúꞋu lɑ́ ńdɑɑ. 32 Mɑlíyɑ ɡʉ tɛ ŋ́kúu zʉꞋ yí Yɛ́su kɑ pɔ́nɛ zúꞋu, ḿbɔ́ tɛ ńjʉ́ɔ wɛ́, ŋ́kẅíꞋlɛ sɛ́ mbi yɛ́, ńcú ŋɡɔ: «Ndɛ, ɔ kɑ pɔ́ pɛ́Ꞌnɛ ḿbɔ́ zɑꞋnɛ, mbɔ mɔ́ɔmɑ́ mɔ ŋkɑɑ pfú.» 33 Yɛ́su jʉ́ɔ pɑ́Ꞌ ɑ sɛ́ ńdɑɑ, pɑyúdɑ pínɛ pɔ́p pɛ́ pɔ́p tɛmtɛnɛ ńtɔ́ pɛn ḿbɔ́ ńdɑɑ yɔ́p, ńjẅi, mbʉʉ yɛ kẅiꞋ citɛ. 34 A cú ŋɡɔ: «Pʉʉ kɑ lẅɛꞋ pfú yɛ́ ɡɔ́?» Pɔ́p pʉ̈ɔt mbɔ̌ wɛ́ ŋɡɔ: «Ndɛ, tɔ́ ńjʉ́ɔ.» 35 Yɛ́su lɑɑ. 36 Pɑyúdɑ cú ŋɡɔ, pʉʉ jʉ́ɔ pɑ́Ꞌ ɑ kɑ pɔ́ ŋ́kɔŋ wɛ́. 37 Pɛcɔ́ ntɑ́Ꞌ pʉɔ tsɛtsɛt pɔ́p pɔ́ ńcú yɔ́p pɔ ŋɡɔ: «Jʉ́ ẅi ɑ kɑ ŋíɛꞋnɛ mík-pɛfʉ, kʉ̈ɔ́ kɑ ɡɛnɛ, ɑ pɔɔ kuꞋ nɛɡɛ wɔ ŋu pɔɔ pfú pɔ́ ɔɔ?» Lɑzɑ̂ɑ zẅíimɛ nǔu nɛvú 38 Yɛ́su pɛn ńjẅi, ŋ́ɡʉ zʉꞋ-nɛshi, ɛ́ pɔ́ yɛcɔ́ mvuꞋ zʉꞋ, mbɔ pɛ́ kɑ lɔk ŋɡɔꞋ ńjʉ́ɔꞋ ntsu wɛ́. 39 Yɛ́su cú ŋɡɔ: «Pʉʉ kẅɛ́Ꞌlɛ ŋɡɔꞋ yɑ́.» Mɑ́ktɑ, fɛ́ pfú, ḿbʉ̈ɔt ŋɡɔ: «Ndɛ, ɑ ɡʉ ḿbɔ́ ŋkɔ̂ɔnɛ ńtsʉ́Ꞌ ńdɛm lɛmnɛ. MbíꞋŋɡɔ ɛ́ ŋkɔ̂ɔnɛ ḿbɔ́ lɛ́Ꞌ pɛ́nɛ́kwɑ pɑ́Ꞌ ɑ kɑ pfúnɛ. 40 Yɛ́su tsɔ́Ꞌ mbɔ̌ wɛ́ ŋɡɔ: N dɑ́Ꞌ mbɔɔ cú mbɔ̌ ɡu ŋɡɔ ɔ lɑɑ ńzɑ́p tʉ́m nǔu mɔ, mbɔ ɔ ɡʉ ńjʉ́ɔ nɛɡúꞋ-Sɛ́ pɔ́ ɔɔ?» 41 Pɛ́ pɔ́ tɛ kẅɛ́Ꞌlɛ ŋɡɔꞋ, Yɛ́su pʉꞋ tú yɛ́, ńdíŋɛ tʉ́, ńcú ŋɡɔ: «Tɑ̌ɑ mɔ, ŋ ɡɑ́ pɑꞋlɑ́ pɑ́Ꞌ n cɛꞋlɛ́nɛ wú, ɔ zúꞋ.» 42 Mɔ sɛ́ ńjí ŋɡɔ, n cú nu ŋkɑ́ kʉ̈ɔ́ lɑ́, ɔ zúꞋ ŋɡi yɑɑ. Lɑ́ n cú pɑ́Ꞌɑ ntɛ́ pɔ pʉɔ pínɛ pɔ́p tʉ́ʉnɛ nɛjɔ́ŋ mɔ lɑɑ, ŋɡɔ pɔ́p pɛ́m ŋɡɔ ɡu kɑ túunɛ wɑ́ɑ. 43 Ńcú pɔ́Ꞌɔ, ńdɔk ŋɡi tɛnnɛ ŋɡɔ: «Lɑzɑ̂ɑ, cẅɛt.» 44 Mpfú cẅɛt. Mbɔ pɛ́ kɑ lɔk yúu-ndẅí ńzʉ́ʉ mɛku mɛ́ mbɑ mbɔ́ mɛ́, pɔ́p shʉ́ wɛ́. Yɛ́su cú mbɔ̌ pɔ́p ŋɡɔ: «Pʉʉ kíɛꞋ wɛ́, ŋ́kíɛꞋ wɛ́ ńnɑ́ ɑ ɡʉ.» Pɛ́ sɛ́ ńtɑ́ɑ mɛnɑŋ nzʉʉ Yɛ́su 45 Nɛzɑ́ɑ pɑyúdɑ pí pɔ́p lɑ́Ꞌnɛ ńtɔ́ njɛ́Ꞌ pɛ́ Mɑlíyɑ, pínɛ pɔ́p jʉ́ɔnɛ yúu mi Yɛ́su ɡɛnɛ, zɑ́p tʉ́m yɔ́p nǔu Yɛ́su. 46 Lɑ́ pɛcɔ́ ntɑ́Ꞌ pʉɔ tsɛtsɛt pɔ́p ɡʉ ḿbɛ́ɛtɛ yúu mi Yɛ́su ɡɛnɛ, ɛ́sẅíi pɑfɑlísɑy. 47 Pɛtɑ́tndɑ́-pɑnɔŋpɔꞋ, pɔ́p pɑfɑlísɑy ɡɔ́ɔ ɛ́fúŋ cúꞋlɛ-pɑsɑ́Ꞌ ŋɡɔŋ, ńtɔ́ tsɛtú ńcú ŋɡɔ: «Pɛkŋɛ ɡʉ ŋ́ɡɛ ŋɡɔ́ku? Ŋu wɔ sɛ́ ŋ́ɡɛ mɛnu mɑ̌ɑmɑɑnɛ tɛꞋ. 48 Pɛkŋɛ lɑɑ ńnɑ́ wɛ́ ɑ lɔk ŋ́ɡʉ mbi, mbɔ pʉɔtsʉʉ ɡʉ ńzɑ́p tʉ́m nǔu wɛ́. Pɑlɔ́mɑ tɔ́, ńtɑ́k ndɑ́-nɔŋpɔꞋ Yɛlúsɑlɛm, mbɑ ŋɡɔŋ wɛkŋɛ.» 49 Wɛcɔ́ tɑ́Ꞌ ŋu kɑ pɔ́ tsɛtsɛt pɔ́p, lík yɛ́ pɔ́ Kɑyífɑ. A pɔ́ tɑ́tndɑ́-pɑnɔŋpɔꞋ nǔu yîyɑ́ ŋɡuꞋ. A cú ŋɡɔ: «Pʉk yɛcɔ́ yúu nǔu nu yí pʉʉ cúnɛ lɑɑ kɑ́ zúꞋ! 50 Pʉʉ kɑ́ jʉ́ɔ ŋɡɔ ɛ́ pɔŋ mbɔ̌ pʉʉ pɑ́Ꞌ ɛ́ lɑɑ ḿbɔ́ tɑ́Ꞌ ŋu wɛ́mɔ́Ꞌ pfú nǔu tú-lɑ́Ꞌ, ńtsɑ lɑ́Ꞌ tsʉʉ nɛpuu tɑ́kŋɛ pɔ́ kɛ?» 51 A kɑ pɔ́ ńcú pɔ́Ꞌɔ, jʉ́ pɔɔnɛ ńcú pɔ́, pɑ́Ꞌ ɛ́ kɑ ɡɔ́ ḿbɔ́ jʉ́ pɔ́nɛ tɑ́tndɑ́-pɑnɔŋpɔꞋ nǔu yîyɑ́ ŋɡuꞋ lɑ́, ɑ cẅi Ŋkʉʉ-Sɛ́ ŋɡɔ Yɛ́su ɡʉ mpfú nǔu tú-lɑ́Ꞌ-pɑyúdɑ. 52 Ɛ́ pɔɔ pɔ́ pɔ ndɑꞋ nǔu tú-pɑyúdɑ zɛ́nɛ pɔ́p pɔ́, ɛ́ pɛn ḿbɔ́ nɛlɔk ńtɛmtɛ pʉɔ-Sɛ́ pi pɔ́p zʉꞋ tsʉʉ, pɔ́p tsʉ́Ꞌ tɑ́Ꞌ ku. 53 Ɛ́ fú lɛ́Ꞌ ɛ̂yɑ́, pɛkɛ́m-pɑyúdɑ zɑ́p ŋɡɔ pɔ́p ɡʉ ńdɔɔ shʉ́ tɛ ńjẅí Yɛ́su. 54 Yɛ́su fú ŋkɑ́ yîyɑ́ mbɔɔ pɛn sɑ́ɑnɛ sɑ́ɑnɛ́nɛ ńdɛɛ tsɛtsɛt pɑyúdɑ pɔ́. A lɔk yɛcɔ́ lɑ́Ꞌ yi ɛ́ lʉɔmɛ́nɛ, shʉ́ kɔ̂ŋtɛt, ŋ́ɡʉ tsɛt yɛcɔ́ tʉ́sɔŋ yi pɛ́ fúŋnɛ ŋɡɔ Ɛ́fɛlɑyim, pɔ́p ɡɑŋku pɛ́ nɑ́ŋ zúꞋu. 55 Ndíinɑ-Pɑ́skɑ-pɑyúdɑ kɑ pɔ́ ńtɔ́, nɛzɑ́ɑ pɑyúdɑ pɔ́ ɛ́fú tsɛt lɑ́Ꞌ ńzɑ́Ꞌ njí ḿbiitɛ Yɛlúsɑlɛm, nɛpʉʉtɛ mbʉʉ yɔp. 56 Pɔ́p pɔ́ ńdɔɔ Yɛ́su, ḿbɛn ŋ́ɡɔ ńcúꞋlɛ tsɛt ndɑ́-nɔŋpɔꞋ Yɛlúsɑlɛm, ḿbɔ́ ɛ́shɔtnɛ ḿbíkŋɛ tsɛtsɛt pɔ́p ŋɡɔ: «Pʉʉ kwɑŋɛ ŋɡɔ ɑ ɡʉ ńtɔ́ ndínɑ wɔ? Mbɔ ɑ zɛɛ ḿbɔɔ tɔ́.» 57 Ɛ́ kɑ ɡɔ́ ḿbɔ́, mbɔ pɛtɑ́tndɑ́-pɑnɔŋpɔꞋ, pɔ́p pɑfɑlísɑy kɑ cú ŋɡɔ, ŋu lɑɑ ḿbɔ́ ńjí zʉꞋ yí Yɛ́su zúꞋu, ɑ kíɛꞋ, pɛ́ ɡʉ ŋ́ɡẅɛɛ wɛ́. |
CABTAL, 2017