Ɛ́bɛlʉʉ 4 - Kɑɑ Fí

¹ Lɑ́ nɛpɔ́ ẅi Sɛ́ kɑ kɑꞋnɛ mɔ́fíitɛ ẅi ḿbɔ́ pʉɔ kúu tsɛtú pɛ́t pɔ ɡú. Pɑ́Ꞌ ẅîwɑ́ ŋkʉʉ pɛn ḿbɔ́ wɛkŋɛ lɑ́, pʉʉ pɑ́ɑ pɑ́Ꞌ ḿbɔ́ wɛcɔ́ tɑ́Ꞌ ŋu tsɛtsɛt pʉʉ lɑ́Ꞌ ḿbɔɔ tsɛtú kúu.

² Pɛkŋɛ kɑ zɛɛ ḿbɛn ńzúꞋ yɛkŋɛ Ŋkʉʉ Sʉ́Ꞌnɛ ɛ̂wɑ́ pɔ pɑ́Ꞌ pʉɔ pi pɔ́p kɑ pɔ́ kɔ̂ŋtɛt kɑ zúꞋnɛ yɔ́p. Lɑ́ pɔ́p kɑ kɛ́ ńzúꞋ yɔ́p ɛ́ pɔɔ wɔ́p cẅɛ́lɛ́, mbíꞋŋɡɔ pɔ́p ŋ́kɑɑ zɑ́p tʉ́m yɔ́p nǔu pɔ́.

³ Ɛ́ ɡʉ nǔu pɛkŋɛ pi pɛkŋɛ kɑ zúꞋnɛ tɛ ńzɑ́p tʉ́m nǔu, pɛkŋɛ ŋ́ɡɛ ŋ́kúu tsɛt ẅîwɑ́ mɔ́fíitɛ. Ɛ́ pɔ́ wi Sɛ́ kɑ cúnɛ nu nǔu, pɑ́Ꞌ ɑ kɑ cúnɛ ŋɡɔ: «Mɔ sɛ́ ńdɔk zɑ́ŋlɔ́ŋ ŋ́kɑɑ ŋɡɔ: Pɔ́p kɛ́ lɑ́Ꞌ ŋ́kúu tsɛt mɔ́fíitɛ ẅi ŋ kɑ niitɛ́nɛ mbíꞋ wɔ́p pɔ́.» Sɛ́ kɑ ɡɔ́ cú pɑ́Ꞌɑ, mbɔ ɑ kɑ lɑ́Ꞌ ɛ́fɑꞋ mɛfɑꞋ mɛ́ ŋkɑ́ yi ɑ kɑ niitɛ́nɛ ndǔmbí tɛ ɛ́ mɛ.

⁴ Pɛ́ kɑ cú nu tsɛt yɛcɔ́ zʉꞋ-ŋwɑꞋnɛ yɛ́, ntɛ́ lɛ́Ꞌlɑ́Ꞌ mbɑ́ɑtɛ sɑɑmbɑ́ ŋɡɔ: «Sɛ́ kɑ fɑꞋ mɛfɑꞋ mɛ́ tsʉʉ, ńjẅiitɛ nǔu lɛ́Ꞌlɑ́Ꞌ mbɑ́ɑtɛ sɑɑmbɑ́.»

⁵ Ɛ́ pɛn ńtɔ́ nǔu yɔ zʉꞋ-ŋwɑꞋnɛ ńcú ŋɡɔ: «Pɔ́p kɛ́ lɑ́Ꞌ ŋ́kúu tsɛt mɔ́fíitɛ ẅi ŋ kɑ niitɛ́nɛ mbíꞋ wɔ́p pɔ́.»

⁶ Sɛ́ kɑ zɑ́p ŋɡɔ pɛcɔ́ pʉɔ ɡʉ ŋ́ɡɛ ŋ́kúu tsɛtú, lɑ́ pɛluŋmbi pʉɔ pɔɔ zúꞋ Ŋkʉʉ Sʉ́Ꞌnɛ lɑ ḿbɛn ŋ́kɛ́ mbɔɔ tsɛtú kúu pɔ́ pɔ́, mbíꞋŋɡɔ pɔ́p kɑ zúꞋ mbɔɔ pɛ́m pɔ́.

⁷ Ɛ́ lɛɛ pɔ́Ꞌɔ, Sɛ́ pɛn ńzɑ́p yɛcɔ́ lɛ́Ꞌ yi fí ɛ́ pɔ́ ŋɡɔ: Ɛ́ pɔ́ pɔ lɔ́Ꞌnɛ. Mbɔ yîyɑ́ nu kɑ lɛɛ mɔ́, ɑ kɑ lɔk ntsu-fɔɔ Ndɑvît ńcú yúu mi pɛkŋɛ ńdɑ́Ꞌmɔ́ ńcú ŋɡɔ: Pʉʉ lɑɑ ńzúꞋ ŋɡi-Sɛ́ lɔ́Ꞌnɛ kɔɔ pʉʉ zʉʉnɛ mɛtúutɛ mʉ́ʉ.

⁸ Ɛ́ kɑ lɑɑ ńzɛɛ ḿbɔ́ yi Yɛ́shuɑ kɑ lɔknɛ pʉɔ ŋ́ɡʉ tɛ pɔ́p kúu tsɛt wîwɑ́ mɔ́fíitɛ, mbɔ ɛ́ lɑɑ ḿbɔ́ Sɛ́ pɔɔ pɛn ŋ́kẅíi yɛcɔ́ lɛ́Ꞌ ndɛꞋ pɔ́.

⁹ Ɛ́ lɔk pɔ́Ꞌɔ, ńcú ŋɡɔ: Mɔ́fíitɛ ẅi Sɛ́ kɑ fɑꞋnɛ mɛfɑꞋ mɛ́ tɛ ŋ́ɡẅɛɛ nǔu lɛ́Ꞌlɑ́Ꞌ mbɑ́ɑtɛ sɑɑmbɑ́, pɛn ńtʉ́ʉ tʉ́ʉnɛ ḿbɔ́ ńzẅíꞋlɛ pʉɔ-Sɛ́.

¹⁰ MbíꞋŋɡɔ ŋu ẅí ɑ kúunɛ tsɛt mɔ́fíitɛ ẅi Sɛ́ kɑ niitɛ́nɛ mbíꞋ wɛ́, ɑ pɛn ńjẅiitɛ yɛ́ nǔu mɛfɑꞋ mɛ́ pɑ́Ꞌ Sɛ́ kɑ fɑꞋnɛ mɛ́ ɡúu lɑ ńjẅiitɛ lɑ́.

¹¹ Pɔ́Ꞌɔ lɑ́, pɛkŋɛ sɑ́Ꞌ tʉʉ, ŋ́kúu tsɛt wîwɑ́ mɔ́fíitɛ, pɛkŋɛ ɡɛ nǔu ntɛ́ yi wɛcɔ́ tɑ́Ꞌ ŋu nǔu pɛkŋɛ kɛ́ pɔ́ ŋ́ɡɛ tʉʉtú pɑ́Ꞌ pɛtɑ́t pɛkŋɛ, ɛ́sɑ́ɑ pɔ́.

¹² Sẅiŋɛ-sɛ́ tɛntɛ sʉ́Ꞌnɛ lɑ ńtsuŋ ɛ́fɑꞋ mɛfɑꞋ, tú yɛ́ shẅítnɛ tɛ ńdɛɛ mbɑ yɛ́ mbɑ yɛ́tɛ́ ntɛ́ níi-ntsɔ lɑ́ yi ɛ́ ɡẅɛɛnɛ mɛɡʉ́ŋ mɛ́mbɑ́, ɛ́ sɔ́ ŋ́kúu nǔu ŋu kúunɛ tɛ ńdɛɛ nǔu zʉꞋ yi zẅikŋɛ-ŋɡɑŋ pɔ́p tʉ́m yɛ́, zʉꞋ kwɑŋɛ yɛ́ zúꞋu, tɛmtɛ́nɛ, tɛ ńdɛɛ nǔu zʉꞋ yi mɛzuŋ-mbʉʉ-ŋɡɑŋ pɔ́p mɛfɔ́ɔ mi ɛ́ tsɛt mɛtsẅíi mɛ́ zúꞋu. Ɛ́ ŋɑk ŋu nǔu yúu mi ŋɡɑŋ sɛ́ ńtsɑ́ɑ mbɑ nǔu yi ɑ sɛ́ ŋ́kwɑŋɛ tʉ́m wɛ́.

¹³ Ɛ́ mbi Sɛ́ yɛcɔ́ yúu pɔɔ yi lʉɔmɛ́nɛ pɔ́, tsɛt yɔ ndǔmbí yi ɑ kɑ niitɛ́nɛ. A jʉ́ɔ yúu tsʉʉ, ɑ mɑꞋ mík ńjʉ́ɔ mbɑ kʉ̈ɔ́lɑ́ pɑ́Ꞌ ɛ́ pɔ́nɛ. Pɛkŋɛ ɡʉ ŋ́ɡɛ ńtɛmtɛ tʉ́ʉ mbi yɛ́ ḿbɛ́ɛtɛ ntsu wɛkŋɛ.

Yɛ́su kuꞋ nɛpɔ́ kwɑꞋ NɔŋpɔꞋ wɛ ɡwɛ́

¹⁴ Pɑ́Ꞌ pɛkŋɛ ɡẅɛɛnɛ tɑ́Ꞌ NɔŋpɔꞋ wɛ ɡwɛ́ ẅí ɑ kwɑꞋ ẅîwɑ́ lɑ́, ẅi ɑ kɑ ɡʉnɛ tɛ ŋ́kúu nɛjɔ́ŋ Sɛ́ ntɛ́ wɛkŋɛ lɑ́, ɑ pɔ́ Yɛ́su, ḿbɔ́ mɔ́ɔ-Sɛ́ lɑ́, pɛkŋɛ kúꞋlɛ nu yi pɛ́ kɑ sẅíinɛ wɛkŋɛ, pɛkŋɛ zɑ́p tʉ́m nǔu, ḿbɛn ḿbɔ́ ɛ́sẅíi yîyɑ́ nu mbɔ̌ pɛcɔ́ pʉɔ.

¹⁵ Wɛkŋɛ NɔŋpɔꞋ wɛ ɡwɛ́ ɛ̂wɑ́ zɛɛ ńjí ntɛ́ yi mɛnu kúunɛ wɛkŋɛ pɔ́Ꞌɔ, mɛnu kɑ kúu wɛ́, ŋkwɑꞋnɛ mɛntɛ́ mɛntɛ́ kúu wɛ́ ɡúu pɑ́Ꞌ pɛkŋɛ, lɑ́ ɑ kɛ́ ńdɑ́Ꞌ mbɔɔ yɛcɔ́ nu fɑɑnɛ.

¹⁶ Pɔ́Ꞌɔ lɑ́, kɔɔ pɛkŋɛ mʉꞋlɛ nɛkẅɛ́Ꞌlɛ ŋ́ɡʉ nɛ́ zʉꞋ yi kɔꞋ-nɛfɔɔ-Sɛ́ zúꞋu, nɛlɔk pɔ́Ꞌɔ, ḿbɔ́ nɛjɔ́ŋ jʉ́ Sɛ́ ẅí ɑ ɡẅɛɛnɛ pɔŋtʉ́m. Pɛkŋɛ kẅɛ́Ꞌlɛ pɔ́Ꞌɔ, lɑ Sɛ́ tsɑ́ɑ mɛjʉ́ŋ mɛkŋɛ, ńnyɛt wɛkŋɛ nɛ́ pɔŋtʉ́m yɛ́, ḿbɔ́ ńcẅɛ́lɛ wɛkŋɛ nǔu ŋkɑ́ yi pɛkŋɛ jɑ́knɛ nɛɡɛ.