Ɛ́bɛlʉʉ 3 - Kɑɑ Fí

Yɛ́su tsɑ Mɔ̌sɛ̂ɛ

¹ Pɔ́Ꞌɔ lɑ, pɔ́ɔpɛ́mɑ́ pɑ́ɑ pʉɔ-Kɛlístɔ, Sɛ́ wi kwɑꞋ jʉ́ kɑ fúŋnɛ wʉ́ʉ nǔu nu yɛ́, mbɑ wɔ̌ lɑ́ tɔ́ nǔu yɛ́ yúu. Pʉʉ sɑ́ŋ nu nǔu ŋu ẅí Yɛ́su jʉ́, ɑ jʉ́ ẅí Sɛ́ kɑ túunɛ ŋɡɔ ɑ pɔ́ wɛkŋɛ nɔŋpɔꞋ wɛ ɡwɛ́ nǔu nu-Sɛ́ ẅi pɛkŋɛ tʉ́ʉnɛ nǔu.

² A kɑ ɡɛ mbɑ kʉ̈ɔ́lɑ́ yi Sɛ́ kɑ tsɔ́Ꞌnɛ wɛ́ nɛpɔ́ yi ɑ ɡʉ ŋ́ɡɛ, ndʉ́ŋndʉŋ pɑ́Ꞌ Mɔ̌sɛ̂ɛ kɑ pɛnnɛ ŋ́ɡɛ yɛ́ pɔ́Ꞌɔ, nǔu ŋkɑ́ yi ɑ kɑ pɔ́ ńdíŋɛ pʉɔ-Sɛ́.

³ Ɛ́ zɛɛ ŋ́ɡɔ ḿbɔ́ wɛ nɛɡúꞋ ẅí pɛ́ kɑ ɡɑ́nɛ lɛɛ wɛ Mɔ̌sɛ̂ɛ, mbíꞋŋɡɔ ŋu kút ndɑ́ pɛ́ ɡʉ̈ɔꞋtɛ ŋɡɑŋ ńdɛɛ ndɑ́ yi ɑ kútnɛ.

⁴ Mbɑ yɛ́tɛ́ ndɑ́ lɑ́ zɛɛ ŋ́ɡẅɛɛ ŋu ẅí ɑ kɑ kútnɛ, lɑ́ ŋu ẅí ɑ kɑ ɡɛnɛ yúu tsʉʉ ɑ Sɛ́.

⁵ Ɛ́ kɛ́ ŋ́ɡʉ nǔu Mɔ̌sɛ̂ɛ, mbɔ ɛ́ kɑ pɔ́ ŋkɑ́ yi ɑ kɑ pɔ́ ńdíŋɛ pʉɔ-Sɛ́, ńjí yɛ́ pɔ ndɑꞋ yúu mi Sɛ́ kɑ cúnɛ ŋɡɔ ɑ ɡɛ, ḿbɔ́ pɔ ŋɡɑŋfɑꞋ, mbɑ kʉ̈ɔ́lɑ́ yi ɑ kɑ pɔ́ ŋ́ɡɛ nyɛt yúu nǔu mɛnu mi Sɛ́ kɑ pɔ́ ŋ́ɡʉ ńdɑ́Ꞌ ŋ́ɡɛ cẅɛt.

⁶ Lɑ́ ɛ́ ɡʉ nǔu Kɛlístɔ, ɑ jí yɛ́ pɔ ndɑꞋ yúu mi Sɛ́ kɑ cúnɛ ŋɡɔ ɛ́ ŋ́ɡɛ mbɔ́ ɡú, ḿbɔ́ mɔ́ɔ-ndɑ́, ẅí pɛ́ kɑ tíknɛ wɛ́ pɑ́Ꞌ ɑ ɡʉ ɛ́sɑ́Ꞌ pʉɔ-Sɛ́. Pʉɔ-Sɛ́ lɔk ḿbɔ́ pɔ wɛkŋɛ, pɑ́Ꞌ pɛkŋɛ lɑɑ ŋ́kúꞋlɛ yúu mi pɛkŋɛ kɑ pɛ́mnɛ tɛ pɛkŋɛ pɔɔ ḿmʉꞋlɛ, ḿbɛn ńnɑ́ŋ ḿbɔ́ ńdɔk pɔ kɑꞋmɛ ńzẅíꞋlɛ yúu mi Sɛ́ kɑ kɑꞋnɛ mbɔ̌ pɛkŋɛ.

Mɔ́fíitɛ ẅi Sɛ́ kɑ kɑꞋnɛ mbɔ̌ pʉɔ pɛ́

⁷ Ɛ́ yúu mi ɛ́ ɡɛnɛ Zẅikŋɛ Lɛ́ɛnɛ́nɛ cú ŋɡɔ: Pʉʉ lɑɑ ńzúꞋ ŋɡi-Sɛ́ lɔ́Ꞌnɛ

⁸ kɔɔ pʉʉ zʉʉnɛ mɛtúutɛ mʉ́ʉ pɑ́Ꞌ pɛ mɑ̂ɑŋɡɑpnjẅɛt pʉ́ʉ kɑ zʉʉnɛnɛ nǔu lɛ́Ꞌ yi pɔ́p kɑ pɔ́ ńtʉʉ tú mbɔ̌ wɛ́. Lɛ́Ꞌ yi pɔ́p kɑ tsʉ́ʉnɛ́nɛ wɛ́ kɔ̂ŋtɛt ŋɡɔ ɑ ɡɛ yúu mbɔ̌ pɔ́p.

⁹ Sɛ́ cú ŋɡɔ: «Pɛ́ mɑ̂ɑŋɡɑpnjẅɛt pʉʉ kɑ tsʉ́ʉnɛ wɑ́ɑ kɔ̂ŋtɛt, ŋɡɔ ŋ ɡɛ yúu mbɔ̌ pɔ́p ńdɔk ńdɔɔ nɛjʉ́ɔ pɑ́Ꞌ ŋ ɡʉ ŋ́ɡɛ, ńtsʉ́ʉnɛ wɑ́ɑ pɑ́Ꞌɑ tɛ mbɑ pɑ́Ꞌ pɔ́p jʉ́ɔnɛ yúu mi mɔ ŋ́ɡɛ ńjʉ́ɔ nǔu ŋɡuꞋlɑ́Ꞌ mɛɡɛ́mɛ́nɛ́kwɑ.»

¹⁰ Ɛ́ yúu mi ɛ́ kɑ ɡɛnɛ nu yîyɑ́ ɡɑŋku-pʉɔmɛsɔŋ pʉ́k wɑ́ɑ. Lɑ́ n cú ŋɡɔ: Pɔ́p ŋkɑ́ tsʉʉ tʉ́m yɔ́p ɛ́fú nǔu mɔ ńjɛ́pmɛ jɛ́pmɛ́nɛ. Pɔ́p ŋkɑɑ lɑ́Ꞌ kɛ́ ńdɔk yɛcɔ́ tɑ́Ꞌ nǔu mɛnu mi ŋ kɑ pɔ́ ńcú mbɔ̌ pɔ́p, ɛ́fúŋ yɛcɔ́ nu pɔ́.

¹¹ Ɛ́ yúu mi ɛ́ kɑ ɡɛnɛ n dɔk zɑ́ŋlɔ́ŋ ŋ́kɑɑ ŋɡɔ: «Pɔ́p kɛ́ lɑ́Ꞌ ŋ́kúu tsɛt mɔ́fíitɛ ẅi ŋ kɑ kɑꞋnɛ mbɔ̌ pɔ́p pɔ́.»

¹² Pɔ́Ꞌɔ lɑ́, mbɑ̌ɑ pɔ́ɔpɛ́mɑ́ pɑ́ɑ, pʉʉ lɑk tú yʉ́ʉ, kɔɔ tʉ́m wɛcɔ́ ŋu wʉ́ʉ tɛn ndʉꞋ tɛ ɛ́fú nǔu Sɛ́ ẅí ɑ pɔ́ pɔ ɡú ńjɛ́p tʉ́m yɛ́.

¹³ Lɑ́, pʉʉ pɔ́ ńníꞋ mɛtʉʉ-mɛmbʉʉ mʉ́ʉ pʉʉ nɛ́ pʉʉ, pɔ́Ꞌɔ ńjí ŋɡɔ nu kɛpɔŋ kɛ́ ɡɛ ɛ́fúklɛ wɛcɔ́ ŋu wʉ́ʉ, tɛ tʉ́m yɛ́ tɛn, ɑ pɔɔ pɛn ńzúꞋ ŋɡi-Sɛ́ pɔ́ pɔ́. Pʉʉ ɡɛ pɔ́Ꞌɔ, lɛ́Ꞌ tsʉʉ, mbíꞋŋɡɔ yɔ lɛ́Ꞌ yi pɛ́ tsɛt ŋwɑꞋnɛ-Sɛ́ ɛ́fúŋ ŋɡɔ ɛ́ lɔ́Ꞌnɛ. Yɔ pɔ́nɛ lɛ́Ꞌ yi ḿbɔ́ pɛ́ zúꞋ ŋɡi-Sɛ́.

¹⁴ Pɛkŋɛ pɛ́ Kɛlístɔ zɛɛ ńtsʉ́Ꞌ ńtɛmtɛ ḿbɔ́ pɔ nǔu tɑ́Ꞌ nu, lɑ́ ɛ́ sɛ́ ḿbíkŋɛ tɑ́Ꞌ yúu wɛ́mɔ́Ꞌ, ɛ́ pɔ́ nɛkúꞋlɛ yúu mi pɛ́ kɑ sẅíinɛ wɛkŋɛ lɑ́ pɛkŋɛ zɑ́p tʉ́m nǔu Sɛ́, ŋ́kúꞋlɛ kúꞋlɛ́nɛ tɛ ńdɑ́Ꞌ ŋ́kúu nǔu ndẅiknzʉʉ lɛ́Ꞌ.

¹⁵ Pɑ́Ꞌ ŋwɑꞋnɛ-Sɛ́ cúnɛ ŋɡɔ: Pʉʉ lɑɑ ńzúꞋ ŋɡi-Sɛ́ lɔ́Ꞌnɛ, kɔɔ pʉʉ zʉʉnɛ mɛtúutɛ mʉ́ʉ pɑ́Ꞌ pʉʉ kɑ zʉʉnɛ́nɛ nǔu lɛ́Ꞌ yi pʉʉ kɑ pɔ́ ńtʉʉ tú mbɔ̌ wɛ́ lɑ́.

¹⁶ Pʉɔ pinɛ pɔ́p kɑ zɛɛnɛ ńzúꞋ ŋɡi-Sɛ́, ńtʉʉ tú mbɔ̌ wɛ́, ɛ́ kɑ pɔ́ pɛ wɔ̌? Pɔ́p kɑ pɔ́ pʉɔ tsʉʉ pi Mɔ̌sɛ̂ɛ kɑ lɔknɛ wɔ́p ɛ́fú tsɛt ŋɡɔŋ-Ɛ́ɡíptɔ ńcẅɛt.

¹⁷ Nu pɛ wɔ̌ pɛnnɛ ńdɑ́Ꞌ ḿbʉ́k Sɛ́ pʉ́knɛ ŋɡuꞋ mɛɡɛ́mɛ́nɛ́kwɑ? Ɛ́ kɑ pɔ́ nu-pʉɔ pi pɔ́p kɑ púunɛ ɛ́fɑɑnɛ mɛnu, lɑ ḿvutɛ kɔ̂ŋtɛt ḿpfútɛ, mɛpfú mɔ́p sɑt zʉꞋ.

¹⁸ A pɛn ŋ́kɑɑ nǔu nu pɛ́ wɔ̌ tɛ ńcú ŋɡɔ pɔ́p kɛ́ lɑ́Ꞌ ŋ́kúu tsɛt mɔ́fíitɛ ẅi ɑ kɑ kɑꞋnɛ mbɔ̌ pɔ́p pɔ́ ɔɔ? Ɛ́ kɑ pɔ́ nǔu nu pʉɔ pi pɔ́p kɑ tʉʉnɛ tú mbɔ̌ wɛ́.

¹⁹ Pɛkŋɛ lɔk ńjʉ́ɔ ŋɡɔ pɔ́p ŋ́kɑɑ ŋ́kúu tsɛt mɔ́fíitɛ ẅi Sɛ́ kɑ kɑꞋnɛ mbɔ̌ pɔ́p pɔ́, mbíꞋŋɡɔ pɔ́p ŋkɑɑ zúꞋ nu yi ɑ kɑ cúnɛ, tɛ ḿbɛ́m pɔ́.