Ɛ́bɛlʉʉ 11 - Kɑɑ Fí

Nɛzɑ́p tʉ́m nǔu Sɛ́

¹ Nɛzɑ́p tʉ́m nǔu Sɛ́, ɛ́ nɛtsuŋ ńjí sʉ́Ꞌnɛ ŋɡɔ, yúu mi pɛ́ sɛ́ ńzẅíꞋlɛ ŋɡɔ Sɛ́ ɡɑ́, ɑ ɡʉ ńdɑ́Ꞌ ŋ́ɡɑ́, ḿbɛn ḿbɔ́ nɛtsuŋ ńjí ŋɡɔ, yúu mi pɛ́ kɑ́ pɔ́ ńdɔk mík ńjʉ́ɔ pɔ́ ńtsuŋ ḿbɔ́ ɡú.

² Sɛ́ kɑ cú nǔu pɛcɔ́ pʉɔ pɛ́ pɛ́ ŋkɑ́mbi ŋɡɔ, pɔ́p kwɑꞋ pʉɔ, ɛ́ fú pɔ nǔu yɔp ntɛ́ nɛzɑ́p tʉ́m nǔu wɛ́.

³ Pɛkŋɛ fú pɔ nǔu pɑ́Ꞌ pɛkŋɛ zɑ́pnɛ tʉ́m nǔu Sɛ́ lɑ ńzúꞋ ŋɡɔ Sɛ́ kɑ lɔk sẅiŋɛ yɛ́ ńniitɛ ndǔmbí, ɛ́fú nǔu ńjí ŋɡɔ yúu mi pɛkŋɛ jʉ́ɔnɛ nɛ́ mík, fú nǔu yúu mi pɛ́ kɑ́ pɔ́ jʉ́ɔ nɛ́ mík pɔ́.

⁴ Ɛ́ kɑ fú pɔ nǔu pɑ́Ꞌ Ábɛɛ kɑ zɑ́pnɛ tʉ́m yɛ́ nǔu Sɛ́, lɑ ńnɔŋ wɛ́ pɔꞋ, ɛ́ pɔŋ mbɔ̌ Sɛ́ ńdɛɛ wɛ Kɑyin. A kɑ fú pɔ nǔu, Sɛ́ líŋɛ wɛ́ tɛ ńcú ŋɡɔ, ɑ ndʉ́ŋndʉŋ mbi yɛ́, mbɔ ɑ kɑ tsʉ́Ꞌ nɛnyɛt, ḿbɛ́m yúu mi Ábɛɛ lɔknɛ ńtɔ́ mbi yɛ́. Ɛ́ kɑ fú pɔ nǔu pɑ́Ꞌ Ábɛɛ kɑ zɑ́pnɛ tʉ́m yɛ́ nǔu Sɛ́, ɛ́ pɛ́t lɔ́Ꞌnɛ ńcú nu mbɔ̌ pɛkŋɛ cúnɛ, lɑ́ mbɔ ɑ kɑ pfú mɔ́.

⁵ Ɛ́ kɑ fú pɔ nǔu pɑ́Ꞌ Ɛnɔk kɑ zɑ́pnɛ tʉ́m yɛ́ nǔu Sɛ́, lɑ Sɛ́ lɔk wɛ́ ŋ́ɡʉ ɡʉnɛ tɛ ɑ pɔɔ pfú. Pɛ́ lɔɔ wɛ́ mbɔɔ pɛn ńjʉ́ɔ wɛ́ pɔ́, mbíꞋŋɡɔ ɛ́ kɑ ɡɔ́ ḿbɔ́, mbɔ Sɛ́ lɔk wɛ́ ŋ́ɡʉ. ŊwɑꞋnɛ-Sɛ́ cú ŋɡɔ Sɛ́ kɑ ɡɔ́ ńdɔk wɛ́ ŋ́ɡʉ, mbɔ nu yɛ́ pɔŋ wɛ́.

⁶ Pɛ́ lɔk ńjʉ́ɔ ŋɡɔ ŋu lɑɑ mbɔɔ zɑ́p tʉ́m nǔu Sɛ́ pɔ́, mbɔ shʉ́ pɑ́Ꞌ ḿbɔ́ nu yɛ́ pɔŋ Sɛ́ kɑ́ pɔ́ ɡú pɔ́. Ŋu lɑɑ ḿbɔ́ kẅɛ́Ꞌlɛ mbʉʉ nɛ́ nɛjɔ́ŋ Sɛ́ ɑ ɡẅɛɛ nɛzɛɛ ḿbiitɛ ḿbɛ́m ŋɡɔ Sɛ́ ɡú, ḿbɛn ḿbɔ́ ńtsɔ́Ꞌ fɑꞋ pʉɔ pi pɔ́p sɛ́ ńdɔɔ wɛ́.

⁷ Ɛ́ kɑ fú pɔ nǔu pɑ́Ꞌ Nɔwɛ zɑ́pnɛ tʉ́m yɛ́ nǔu Sɛ́, ɑ pɔɔ lɔk yúu mi Sɛ́ zɑ́Ꞌ njí nyɛt wɛ́, ńdɔk ḿmɑꞋ kwɑŋɛ pɔ́. Ɛ́ pɛn ḿbɔ́ yúu mi pɛ́ kɑ pɛ́t kɛ́ jʉ́ɔ. Ɛ́ yɛ́tɛ́ Nɔwɛ kɔ́ɔ mɑ́mɑ́ kɑnúꞋ, nɛlɔk ŋ́ɡɛ ŋɡɔ njẅɛt yɛ́ kúu tsɛtú ńduk, ńdɔk pɔ́Ꞌɔ, ńnyɛt ŋɡɔ ntsɑŋ tú pɛcɔ́ pʉɔ, lɑ́ mbɔ ɛ́ ɡʉ nǔu wɛ́, ɛ́ fú nǔu pɑ́Ꞌ ɑ zɑ́pnɛ tʉ́m yɛ́ nǔu Sɛ́, Sɛ́ tsʉ́Ꞌ ńdíŋɛ wɛ́ ɑ pɔ́ ŋu ẅí ɑ ndʉ́ŋndʉŋ mbi wɛ́.

⁸ Ɛ́ kɑ fú pɔ nǔu pɑ́Ꞌ Ábɛlɛhɑ̂m kɑ zɑ́pnɛ tʉ́m yɛ́ nǔu Sɛ́, lɑ Sɛ́ fúŋ wɛ́ ɑ zúꞋ ntsu wɛ́, ŋ́ɡʉ nɛ́ tsɛt wɛcɔ́ ŋɡɔŋ ẅí ɛ́ kɑ pɔ́ ŋ́ɡʉ ŋ́ɡɛ tsʉ́Ꞌ ḿbɔ́ pɔ wɛ́, ńdɔ sɛ́ ŋ́ɡʉ kɛ́ jí zʉꞋ yi ɑ ɡʉnɛ tɛ ŋ́kúu zúꞋu.

⁹ Ɛ́ kɑ fú pɔ nǔu pɑ́Ꞌ ɑ zɑ́pnɛ tʉ́m yɛ́ nǔu Sɛ́ lɑ ɑ tɔ́ ńnɑ́ŋ tsɛt ŋɡɔŋ ẅí Sɛ́ kɑ kɑꞋnɛ mbɔ̌ wɛ́, ńnɑ́ŋ zúꞋu pɔ pɑ́Ꞌ ŋɡʉʉ lɑ́, pɔ́p pʉɔ pɛ́ tsẅɛ́ tsɛt mɛntɑp, Ɛ́sɑk pɔ́p pɛ́ pʉɔ lɑ́Ꞌ ńtswɛ́ pɔ zúꞋu tsɛt mɛntɑp, Yɑkɔp pɔ́p pɛ́ pʉɔ lɑ́Ꞌ ńtswɛ́ pɔ zúꞋu tsɛt mɛntɑp, pɔ́p yɔ́p pɛn ḿbɔ́ pʉɔ pi pɛ́ kɑ kɑꞋnɛ nɛɡɑ́ wɔ ŋɡɔŋ mbɔ̌ pɔ́p.

¹⁰ Ábɛlɛhɑ̂m kɑ ɡɛ pɔ́Ꞌɔ, mbíꞋŋɡɔ ɑ kɑ pɔ́ ńzẅíꞋlɛ tʉ́sɔŋ yi ɛ́ ɡẅɛɛ cʉ́ yi ɛ́ tɛn tɛnnɛ. Sɛ́ nɛ́ túmbʉʉ yɛ́ jínɛ pɑ́Ꞌ yîyɑ́ tʉ́sɔŋ ɡʉ ŋ́ɡɛ ḿbɔ́, jʉ́ nɛ́ túmbʉʉ yɛ́ pɛnnɛ ŋ́kút.

¹¹ Ɛ́ kɑ fú pɔ nǔu pɑ́Ꞌ Sɑɑlɑ́ kɑ zɑ́pnɛ tʉ́m yɛ́ nǔu Sɛ́ ɡúu, ńzɛɛ ńtsʉ́Ꞌ ḿbɔ́ pɔ ndʉ́m tɛꞋ lɑ́, Sɛ́ kɛ́ ŋ́ɡɛ jʉ́ ẅi ɑ ŋkɑɑ pí pɔ́ shuŋ, ŋ́ɡɛ ḿbí mɔ́ɔ mbíꞋŋɡɔ ɑ kɑ pɔ́ ńtsuŋ ńjí ŋɡɔ Sɛ́ kɑꞋ yúu mbɔ̌ ŋu ńdɑ́Ꞌ ŋ́ɡɑ́.

¹² Ɛ́ yúu mi ɛ́ kɑ ɡɛ Ábɛlɛhɑ̂m, tɑ́Ꞌ mɑ̂ɑŋɡɑpnjẅɛt wɛ́mɔ́Ꞌ, ẅí ɑ kɑ tsʉ́Ꞌ ḿbɔ́ ḿpfú pfúnɛ, ɡɑp njẅɛt tɑ́Ꞌ mɑ́mɑ́ tsɛ́nndɑ́. Pʉɔmɛsɔŋ pi pɔ́p fúnɛ nǔu yîyɑ́ tsɛ́nndɑ́, zɑ́ɑ pɑ́Ꞌ pɛcʉ̈ɔ́Ꞌ-sɑŋ pi ɛ́ tʉ́nɛfɑŋ mbɑ pɑ́Ꞌ mɛmbɑŋ-sɑŋsɑŋ mi ɛ́ sɑtnɛ́nɛ ŋkɑŋ ŋki kɛ́ nɛpɑt, ḿbɔ́ pɛ́ pɔɔ sɑ́ŋ tɛ ńjí ndɛn pɔ́.

¹³ Pɔ́p pɛtsʉʉ kɑ ɡɔ́ ḿpfútɛ ḿbɔ́ ńzɑ́p tʉ́m yɔ́p pɔ nǔu Sɛ́, ŋ́kɛ́ ḿbɛ́t pɔ kɛ́ ɡẅɛɛ yúu mi Sɛ́ kɑ kɑꞋnɛ mbɔ̌ pɔ́p. Lɑ́ pɔ́p kɑ kɛ́ ńtʉ́ʉ ńjʉ́ɔ ɛ́ pɛ́t ŋɡɑ sɛsɑ, nu pɔŋ wɔ́p tɛꞋ, pɔ́p sɑ́ɑnɛ sɑ́ɑnɛ́nɛ ńcú ŋɡɔ pɔ́p ndǔ tsɛ́tsɑ́Ꞌ ḿbɔ́ pɔ pɛɡʉʉ, ḿbɛn ḿbɔ́ pɔ nɛɡwɑ́.

¹⁴ Pɔ́p kɑ cú pɔ́Ꞌɔ, ńdɔk ńtsuŋ ńnyɛt ŋɡɔ pɔ́p pɛ́t lɑ́ ḿbɔ́ ŋ́kɑ́t ńdɔɔ zʉꞋ yi kwɑꞋ lɑ́Ꞌ yɔ́p zúꞋu.

¹⁵ Pɔ́p kɑ pɔ́ pɛ́Ꞌnɛ ńnɑ́ŋ ŋ́kwɑŋɛ nu nǔu lɑ́Ꞌ yi pɔ́p kɑ lɔnɛ sɛ́ ɛ́fú zúꞋu ŋ́ɡʉ, mbɔ pɔ́p ŋkɑɑ jɑ́k shʉ́ nɛɡɛ lɑ ḿbɛn zúꞋu pɔ́.

¹⁶ Wɛcɔ́ nɛɡɛ pɔ́Ꞌɔ ŋkɑɑ kɛ́ ḿbɛn ḿbɔ́ ɡú mbɔ̌ pɔ́p pɔ́, mbíꞋŋɡɔ pɔ́p kɑ tsʉ́Ꞌ ńtsɑ́ɑ pɔ yɛcɔ́ lɑ́Ꞌ yi ɛ́ pɔŋnɛ ńdɛɛ yîyɑ́, lɑ́Ꞌ yi ɛ́ tʉ́nɛ́pú. Ɛ́ yúu mi ɛ́ ɡɛnɛ Sɛ́ lɔk pɔ tsɑ́ɑtɛ ḿbɛ́m ŋɡɔ pɔ́p fúŋ wɛ́ ŋɡɔ Sɛ́ yɔp. A kɑ zɛɛ ńniitɛ tɑ́Ꞌ tʉ́sɔŋ ḿbɔ́ ńdɔk ńzẅíꞋlɛ wɔ́p.

¹⁷ Ɛ́ kɑ fú pɔ nǔu pɑ́Ꞌ Ábɛlɛhɑ̂m kɑ zɑ́pnɛ tʉ́m yɛ́ nǔu Sɛ́, lɑ́ ńtʉ́ʉ nɛlɔk Ɛ́sɑk ńnɔŋ pɔꞋ mbɔ̌ Sɛ́ nɔŋnɛ, nǔu ŋkɑ́ yi Sɛ́ kɑ lʉŋtɛ́nɛ wɛ́, ńtʉ́ʉ nɛlɔk Ɛ́sɑk ńnɔŋ pɔꞋ pɔ́Ꞌɔ, ɑ pɔ́ mbɔ̌ wɛ́ ḿbɔ́ ndɑꞋ mɔ́ɔ, ḿbɔ́ ŋu mbɛ́ɛnɛ, mbɔ Sɛ́ kɑ lɑ́Ꞌ ŋ́kɑꞋ nu mbɔ̌ wɛ́ mbíꞋ Ɛ́sɑk.

¹⁸ Ɛ́ pɔ́ pɑ́Ꞌ Sɛ́ kɑ cúnɛ nu mbɔ̌ Ábɛlɛhɑ̂m ŋɡɔ: «Ɔ ɡʉ ńdɑ́Ꞌ ńdɛɛtɛ pɔ nǔu Ɛ́sɑk lɑ́ ŋ́ɡẅɛɛ njẅɛt yi ŋ kɑ kɑꞋnɛ mbɔ̌ ɡu».

¹⁹ Lɑ́ Ábɛlɛhɑ̂m tʉ́ʉ nɛlɔk wɛ́ ńnɔŋ pɔꞋ, mbíꞋŋɡɔ ɑ kɑ pɔ́ ńjí tsɛt tʉ́m yɛ́ ŋɡɔ, Sɛ́ kuꞋ mbɑ nɛzẅíimɛ ŋu ẅí ɑ pfúnɛ. Ɛ́ yúu mi ɛ́ kɑ ɡɛnɛ Sɛ́ pɛn mɔ́ɔ nɛ mbɔ̌ wɛ́, tɛ ɛ́ tsʉ́Ꞌ ḿbɔ́ pɔ pɑ́Ꞌ ŋkɑ́ yi mɔ́ɔ zẅíimɛ nǔu nɛvú lɑ́, ńdɔk pɔ́Ꞌɔ, ńzɑ́Ꞌ njí ńnyɛt fʉꞋ nu.

²⁰ Ɛ́ kɑ fú pɔ nǔu pɑ́Ꞌ Ɛ́sɑk kɑ zɑ́pnɛ tʉ́m yɛ́ nǔu Sɛ́ lɑ ɑ níꞋ mbɔ́tnɛ nǔu Yɑkɔ̂p mbɑ nǔu Ɛsɑẅi, ḿbɔ́ ńzɑ́Ꞌ njí ɛ́sẅíi wɔ́p nɛ́ mɛnu nǔu pɔ́p, ɛ́ pɔ́ mi pɔ́p ɡʉ ńdɑ́Ꞌ lɑ́ ńjʉ́ɔ.

²¹ Ɛ́ kɑ fú pɔ nǔu pɑ́Ꞌ Yɑkɔ̂p kɑ zɑ́pnɛ tʉ́m yɛ́ nǔu Sɛ́, lɑ́ ɑ pɔ́ tɛ ńtsʉ́Ꞌ nɛpfú, ńníꞋ mbɔ́tnɛ nǔu mbɔ́ŋkʉ̈ɔ́ Yɔsɛ̂p pɛtɑ́Ꞌ pɛtɑ́Ꞌ, ḿbɔ́ ńtɔ́ɔtɛ tú yɛ́, ŋ́ɡúꞋlɛ Sɛ́.

²² Ɛ́ kɑ fú pɔ nǔu pɑ́Ꞌ Yɔsɛ̂p kɑ zɑ́pnɛ tʉ́m yɛ́ nǔu Sɛ́, lɑ ɑ pɔ́ tɛ ńtsʉ́Ꞌ ŋ́ɡʉ ɡʉnɛ, ŋ́kẅíi ŋɡɔ pɔ́ɔ-Íslɑyɛ̂l ɡʉ ńdɑ́Ꞌ fú Ɛ́ɡíptɔ ńcẅɛt, ḿbɛn ńcú pɑ́Ꞌ ɑ ɡʉ ńdɑ́Ꞌ ḿbɔ́ tɛ ḿpfú, pɛ́ tsʉ́Ꞌ ŋ́ɡɛ nǔu mɛtsẅíi mɛ́.

²³ Ɛ́ kɑ fú pɔ nǔu pɑ́Ꞌ tɑ́t pɛ Mɔ̌sɛ̂ɛ pɔ́p mɑ́ wɛ kɑ zɑ́pnɛ tʉ́m yɔ́p nǔu Sɛ́, lɑ́ pɔ́p pɔ́ tɛ ḿbí wɛ́, ńdʉɔ wɛ́ lʉɔmɛ́nɛ nǔu pɛsɑŋ pɛtɑ́t. Pɔ́p kɑ jʉ́ɔ ɑ pɔŋ nǔu shʉ́ tɛꞋ, pɔ́p zɛɛ mbɔɔ pɔ́k nɛfɑɑnɛ nɛpʉ́ʉ-fɔɔ pɔ́.

²⁴ Ɛ́ kɑ fú pɔ nǔu pɑ́Ꞌ Mɔ̌sɛ̂ɛ kɑ zɑ́pnɛ tʉ́m yɛ́ nǔu Sɛ́, lɑ ɑ pɔ́ tɛ ḿbɔ́ ndʉ́m, ńdʉꞋ mɛkuꞋ ŋu ẅí mɑ́ wɛ mɔ́ɔ-fɔɔ Fɑlɑhɔŋ.

²⁵ A kɑ jʉ́ɔ yɛ́, ɛ́ pɔŋ mbɔ̌ wɛ́ nɛkúu tsɛtsɛt pʉɔ-Sɛ́ pɔ́p pɛpɔ́p tɛmtɛ ńjʉ́ɔ ŋɡʉ̈ɔ́Ꞌ, ńdɛɛ nɛzúꞋ sʉ́Ꞌnɛ nǔu mɔ́ɔ mɔ́ŋkɑ́ lɑ́ ŋ́kɛ́ ḿbɔ́ pɔ tsɛt mɛfɑɑnɛ.

²⁶ A kɑ pɔ́ ńjʉ́ɔ ŋɡɔ pɛ́ lɑɑ ŋ́ɡwɑ́k wɛ́ pɑ́Ꞌ pɛ́ kɑ ɡɛnɛ ŋ́ɡwɑ́k Nzɑ́Ꞌŋkʉ, mbɔ ɛ́ ɡʉ ḿbɔ́ mbɔ̌ wɛ́ ḿbɔŋ ńdɛɛ fuꞋ yi ɛ́ Ɛ́ɡíptɔ, mbíꞋŋɡɔ mík mɛ́ kɑ tʉ́ʉ pɔ nǔu tsɔ́Ꞌ fɑꞋ yi ɑ ɡʉ ńdɑ́Ꞌ ŋ́ɡẅɛɛ.

²⁷ Ɛ́ kɑ fú pɔ nǔu pɑ́Ꞌ ɑ kɑ zɑ́pnɛ tʉ́m yɛ́ nǔu Sɛ́, lɑ́ fɔɔ Ɛ́ɡíptɔ zɛ nɛzɑ́ŋ lɔ́ŋ, ɑ fú zúꞋu ńcẅɛt ŋ́ɡʉ kɛ́ pɔ́k yúu mi ḿbɔ́ ɑ ɡɛ nǔu wɛ́. Tʉ́m yɛ́ tɛntɛ tɛntɛnɛ, mbíꞋŋɡɔ ɛ́ kɑ pɔ́ ŋkɑ́ yi ɑ sɛ́ ńdɔk mík ńjʉ́ɔ Sɛ́ ẅi ḿbɔ́ ŋu pɔɔ wɛ́ jʉ́ɔ.

²⁸ Ɛ́ kɑ fú pɔ nǔu pɑ́Ꞌ ɑ kɑ zɑ́pnɛ tʉ́m yɛ́ nǔu Sɛ́, lɑ ɑ zɛ nu-Pɑ́skɑ. Ɛ́ pɔ́ pɑ́Ꞌ ɑ kɑ cúnɛ pɛ́ lɔk mɛci-mɛnjinjɔ ńzɔ́Ꞌ mɛzɛ́Ꞌ-ndɑ́, ńjí ŋɡɔ Cʉ̈ɔꞋ-Sɛ́ ẅí ɑ tɔ́nɛ ḿbík ŋɡɑŋmbuu-Sɛ́, ɑ kɛ́ kuu pɔ́ɔ-nɛtú pʉɔ-Íslɑyɛ̂l pɔ́.

²⁹ Ɛ́ kɑ fú pɔ nǔu pɑ́Ꞌ Pɑíslɑyɛ̂l kɑ zɑ́pnɛ tʉ́m yɔ́p nǔu Sɛ́, lɑ pɔ́p jɛ́Ꞌ mɑ́mɑ́ ŋki ẅi pɛ́ fúŋnɛ ŋɡɔ ŋki pɛpɑŋ, ŋ́ɡɔ ńjɛ́Ꞌ ḿbɔ́ ńnɛn nǔu tsɛ́tsɑ́Ꞌ zúplɛ́nɛ. Pʉɔ Ɛ́ɡíptɔ jʉ́ɔ ɛ́fʉꞋnɛ, ŋki tíi wɔ́p.

³⁰ Ɛ́ kɑ fú pɔ nǔu pɑ́Ꞌ pʉɔ-Íslɑyɛ̂l kɑ zɑ́pnɛ tʉ́m yɔ́p nǔu Sɛ́, pɔ́p zɛmɛ tʉ́sɔŋ-Yɛ́líkɔ́ zɛmɛnɛ lɛ́Ꞌ sɑɑmbɑ́, lɑ ŋkɑ́Ꞌ ẅi pɛ́ kɑ pɔ́ɔnɛ ńdɔk ńzɛmɛ tʉ́sɔŋ kɛ́mɛ ḿbʉ̈ɔtnɛ sɛ́.

³¹ Ɛ́ kɑ fú pɔ nǔu pɑ́Ꞌ Lɑ̌ɑp ŋɡɑŋɡɑ́ɑ mɑŋɡɛ́ kɑ zɑ́pnɛ tʉ́m yɛ́ nǔu Sɛ́, lɑ pɑtʉ́ʉ tú mbɔ̌ Sɛ́ pɔɔ puu ńdɑ́kŋɛ pɔ́. Pɛ́ ŋ́kɑɑ wɛ́ jẅí mbíꞋŋɡɔ ɑ kɑ kúkŋɛ pɛmɑ́nɑ́ŋ-pɑíslɑyɛ̂l sʉ́Ꞌnɛ, nǔu ŋkɑ́ yi pɛ́ kɑ túunɛ wɔ́p.

³² N ɡʉ ŋ́kẅíi wɔ̌, ńnɑ́ wɔ̌? N dɑɑ ŋɡɔ ŋ ɡʉ ńcú nu nǔu Jɛdɛɔŋ, ńcú nǔu Bɑlɑk, ńcú nǔu Sɑmsɔŋ, ńcú nǔu Jɛftɛ, ńcú nǔu fɔɔ Ndɑvît, ńcú nǔu Sɑmîɛ mbɑ nǔu pɛcɔ́ pɑcẅi Ŋkʉʉ-Sɛ́, mbɔ ŋ kɛ́ ɡẅɛɛ ŋkɑ́ nɛlɔk ńcú pɔ́.

³³ Pɔ́p pʉɔ pi pɔ́p kɑ fú pɔ nǔu pɑ́Ꞌ pɔ́p kɑ zɑ́pnɛ tʉ́m yɔ́p nǔu Sɛ́, ḿmɑꞋ ntsɔ ńjʉ́ túu nɛtúu, ɛ́sɑ́Ꞌ lɑ́Ꞌ pɔ ndʉ́ŋndʉŋ, pɔ́p zẅíꞋlɛ yúu mi Sɛ́ kɑ kɑꞋnɛ mbɔ̌ pɔ́p tɛ ŋ́ɡẅɛɛ, ńjʉ́ɔꞋ ntsu-pɛpúꞋntʉʉ,

³⁴ ḿbík mɛtʉʉ-ntʉʉ múk, ńduk níi-ntsɔ tɛ pɛ́ pɔɔ lɔk ńjẅí wɔ́p pɔ́, ŋ́ɡɔɔ ḿbɛn fíitɛ tɛ ḿbɔŋ, ńtʉ́ʉ tɛt-ntsɔ, ḿbɔ́ pɑlʉ̈ɔ́Ꞌ ŋ́ɡwɑt, ńzuŋ ɡɑŋntsɔ pi pɔ́p fúnɛ mɛntsɔ́ mɛntsɔ́ tsɛt mɛlɑ́Ꞌ ndɛꞋ.

³⁵ Ɛ́ kɑ fú pɔ nǔu pɑ́Ꞌ pɛcɔ́ pɑŋɡɛ́ kɑ zɑ́pnɛ tʉ́m yɔ́p nǔu Sɛ́, pʉɔ pɔ́p pi pɔ́p kɑ pfúnɛ, zẅímɛ tɛ pɔ́p pɛpɔ́p pɛn ńnɑ́ŋ. Lɑ́ ɛ́ ɡʉ nǔu pɛcɔ́ pʉɔ, pɛ́ ɡɛ pɔ ŋɡɔ́ku nǔu pɔ́p ɔɔ, pɔ́p pɔɔ ńnɑ́ nɛzɑ́p tʉ́m nǔu Sɛ́ pɔ́, ńjí ŋɡɔ pɛ́ ŋ́ɡɛ ńnɑ́. Ɛ́ kɑ pɔ́ mbɔ̌ pɔ́p, mbii pɔ́ pɑ́Ꞌ pɔ́p ɡʉ ḿpfú, ńjí ŋɡɔ Sɛ́ ɡʉ ŋ́ɡɛ zẅíimɛ wɔ́p,

³⁶ ḿbɛn ŋ́ɡʉ nǔu pɛcɔ́ pʉɔ, pɛ́ tɛ́m sʉ́ʉ nǔu pɔ́p, ńdɔk ŋɡwɑɑ ńtswɑ́ɑ wɔ́p, ńtɔ́ nǔu pɛcɔ́ pʉɔ pɛ́ pɔɔ ɡɛ pɔ ndɑꞋ pɔ́Ꞌɔ pɔ́, ḿbɛn ŋ́kút wɔ́p nɛ́ mɛcɛ̂n, ḿmɑꞋ wɔ́p ndɑ́tsɑ́ŋ,

³⁷ ńtɔ́ nǔu pɛcɔ́ pʉɔ pɛ́ lɔk mɛŋɡɔꞋ ńtɛ́mtɛ wɔ́p ńjẅí, ńtɔ́ nǔu pɛcɔ́ pʉɔ, ńdɔk sɔ̌ɔ ɛ́shʉ̈ɔ́k wɔ́p ńzɑ́Ꞌtɛ, ńtɔ́ nǔu pɛcɔ́ pʉɔ, ńdɔk níi-ntsɔ ŋ́ɡwɑt wɔ́p. Pɛcɔ́ pʉɔ tsʉ́Ꞌ pɛ kɛ́ ndɑ́, ḿmɑꞋ mɛŋɡup njinjɔ pɔ́p mɛŋɡup mbí, pɛcɔ́ jɑ́k yúu kɛ́ vuꞋ yɛcɔ́, pɛ́ nɔt wɔ́p, ńnyɛt wɔ́p nɛ́ ŋɡʉ̈ɔ́Ꞌ.

³⁸ Pɔ́p kɑ pɔ́ ńjúk ḿbúunɛ pɛkɔŋtɛt, mbɑ ndǔ mɛŋkɔ́Ꞌ, ŋ́kúu tsɛt mɛmvuꞋ-mɛŋɡɔꞋ, mbɑ tsɛt yɛ́tɛ́ mvuꞋ-mɛŋɡɔꞋ lɑ́. Pɔ́p kɑ pɔ́ pʉɔ, mɑt wɔp pɔŋ pɔŋnɛ tɛ ndǔmbí yɔ pɔɔ kuꞋ zʉꞋ yi ḿbɔ́ pɔ ńnɑ́ŋ zúꞋu pɔ́.

³⁹ Ɛ́ kɑ fú nǔu pɑ́Ꞌ pʉɔ ɛ̂pɑ́ pɛ́tsʉʉ kɑ zɑ́pnɛ tʉ́m yɔ́p nǔu Sɛ́, nu yɔ́p pɔŋ Sɛ́, lɑ́ sɑ̌ɑ ŋu wɔp pɔɔ síi ńzɑ́p lík nǔu nɛpɔŋ ẅí Sɛ́ kɑ kɑꞋnɛ mbɔ̌ pɔ́p pɔ́.

⁴⁰ Pɔ́Ꞌɔ mbíꞋŋɡɔ Sɛ́ kɑ kwɑŋɛ yɛcɔ́ nu ńzɑ́p, ɛ́ pɔ́ yi sʉ́Ꞌnɛ mbɔ̌ pɛkŋɛ tɛꞋ. A kɑ pɔ́ ŋ́kɔŋ ŋɡɔ pɛkŋɛ pɛpɔ́p tɛmtɛ ḿbɔ́ pɛ́tsʉʉ, lɑ ɑ ɡɛ pɛkŋɛ pɛpɔ́p kuꞋ pʉɔ pɛ́ pɔ tɑ́Ꞌ ŋkɑ́.