Kɔlɔsíyɛ̂ŋ 4 - Kɑɑ Fí

¹ Pʉʉ pɛtɑ́t-puꞋ, pʉʉ pɔ́ ndʉ́ŋndʉŋ mbi pɛkwɑɑ pʉ́ʉ, ḿbɛn ŋ́ɡɛ pɔ yúu mi ɛ́ píkŋɛ́nɛ ŋɡɔ pɛ́ ɡɛ, ḿbɔ́ ŋ́kẅíitɛ ŋɡɔ pʉʉ yʉ́ʉ ɡẅɛɛ wʉ́ʉ Tɑ́fɑꞋ tʉ́nɛ́pú.

Yúu mi Pɔ̂l sɛ́ ńníꞋ mɛtʉʉ pʉɔ-Kɛlístɔ nǔu

² Pʉʉ kɛ́ ḿbɔ́ ḿbúꞋ mbɔ́ mbɔ̌ Sɛ́ cɛꞋlɛ́nɛ, kɔɔ pʉʉ lɛ́, pʉʉ pɔ́ ŋ́ɡɛ pɔ́Ꞌɔ, ḿbɔ́ ŋ́ɡɑ́ pɑ́Ꞌlɑ́ mbɔ̌ Sɛ́,

³ ḿbɛn ḿbɔ́ ḿbúꞋ mbɔ́ mbɔ̌ Sɛ́ nǔu yɛ́k tú, nǔu ntɛ́ yi pɛk ńdɔk ɛ́sẅíi nu yɛ́. Ɛ́ fu pɔ́Ꞌɔ, ŋ kyɛ́Ꞌtɛ nu-Kɛlístɔ yi ɛ́ kɑ zɛɛ ńdʉ̈ɔmɛ mík-pʉɔ lʉɔmɛ́nɛ, mɔ ndɑ́tsɑ́ŋ pɑ́Ꞌɑ mbíꞋ pɔ yɛ́tɛ́.

⁴ Pʉʉ tsuŋ ḿbúꞋ mbɔ́ mbɔ̌ Sɛ́ ńjí ŋɡɔ ŋ ɡʉ ɛ́sɑ́ɑnɛ sɑ́ɑnɛ́nɛ ńcú nu yɛ́ pɑ́Ꞌ ɛ́ sɛ́ ḿbíkŋɛ ŋɡɔ n cú.

⁵ Ɛ́ ɡʉ nǔu pʉɔ pi pɔ́p kɑ́ pɔ́ pʉɔ-Kɛlístɔ pɔ́, pʉʉ jí ntɛ́ yi pʉʉ ɡʉ ńdɔk ńnɑ́ŋ tsɛtsɛt pɔ́p. Sɛ́ ɡɑ́ ndúŋ nɛcẅi Ŋkʉʉ Sʉ́Ꞌnɛ mbɔ̌ pɔ́p, kɔɔ pʉʉ pɛ́m yîyɑ́ ŋkɑ́ lɛɛ.

⁶ Pʉʉ pɔ́ ŋkɑ́ tsʉʉ ŋ́ɡẅɛɛ pɔ ntsu-ŋɡwɑ́ŋ, ńcú pɔ nu yi ɛ́ ɡʉ ńcẅɛ́lɛ́, ńtsɔ́Ꞌ nu mbɔ̌ ŋu pɔ pɑ́Ꞌ ɛ́ zɛɛ ḿbɔŋ ŋɡɔ pɛ́ tsɔ́Ꞌ.

CɛꞋlɛ lɔk ńdẅiklɛ

⁷ Tʉʉndɛn mɔ́ɔmɑ́ wɛkŋɛ Tishik, ẅí pɛkŋɛ pɛpɔ́p tɛmtɛnɛ ɛ́fɑꞋ mbɔ̌ Tsɑpʉɔ ɡʉ ńtɔ́ ɛ́sẅíi wʉ́ʉ pɑ́Ꞌ mɔ zɑꞋnɛ ńnɑ́ŋ pɔ́Ꞌɔ. A ŋɡɑŋfɑꞋ tɛꞋ, ɑ jí pɔ nu-Tsɑpʉɔ.

⁸ N tsuŋ ńtúu wɛ́ ŋɡɔ ɑ tɔ́ ɛ́sẅíi wʉ́ʉ pɑ́Ꞌ pɛk lɔknɛ ńnɑ́ŋ zɑꞋnɛ pɔ́Ꞌɔ, ḿbɛn ńtɔ́ ńníꞋ mɛtʉʉ mʉ́ʉ.

⁹ Tishik pɔ́p Ɔnɛzim ɡʉ ŋ́ɡɛ ńtɔ́. Ɔnɛzim ɑ wɛcɔ́ tɑ́Ꞌ ŋu wʉʉ, ḿbɔ́ tʉʉndɛn mɔ́ɔmɑ́ wɛkŋɛ, ńjí yɛ́ pɔ ndɑꞋ nu-Tsɑpʉɔ. Pɔ́p ɡʉ ńtɔ́, ɛ́sẅíi wʉ́ʉ mbɑ kʉ̈ɔ́ lɑ́ yi ɛ́ sɛ́ ńdɛɛtɛ zɑꞋnɛ.

¹⁰ Alistɑk ẅí pɛknɛ tɛmtɛ́nɛ ḿbɔ́ ndɑ́tsɑ́ŋ cɛꞋlɛ wʉ́ʉ. Mɑ́lɛ́kúshi ẅí ɑ mɔ́ɔmɑ́-Pɑnɛpɑ́ɑshi pɛn ḿbúꞋ mbɔ́ mbɔ̌ pʉʉ ɡúu. Ŋ kɑ zɛɛ ŋ́kẅíi wɛ́ mbɔ̌ pʉʉ. A lɑɑ ŋ́kúu zɑ́Ꞌɑ, pʉʉ kúkŋɛ wɛ́ sʉ́Ꞌnɛ.

¹¹ Yɛ́su ẅí pɛ́ pɛnnɛ ɛ́fúŋ wɛ́ ŋɡɔ Jẅistẅis cɛꞋlɛ wʉ́ʉ ɡúu. Ɛ́ ɡʉ tsɛtsɛt pɑyúdɑ pi pɔ́p kɑ pɛ́mnɛ nu-Kɛlístɔ, ɑ ndɑꞋ pɔ́p pɔnɛ pɛtɑ́t pi pɛk pɛpɔ́p zɑꞋnɛ, ɛ́fɑꞋ mbíꞋ nu-nɛfɔɔ-Sɛ́. Pɔ́p kɑ pɔ́ ńníꞋ tʉ́m yɑ́ɑ.

¹² Ɛpɑfɑlɑs ẅí ɑ ŋu lɑ́Ꞌ wʉʉ, cɛꞋlɛ wʉ́ʉ. Yɔ ŋu ẅí ɑ fɑꞋnɛ fɑꞋ-Yɛ́su Kɛlístɔ, ńnɑ́ŋ ŋɡɔŋ ŋkɑ́ tsʉʉ ḿbɔ́ ńdɔk nɛcɛꞋlɛ Sɛ́, ḿmɑꞋ ntsɔ nǔu tú yʉ́ʉ. A ɡɛ pɔ́Ꞌɔ, nɛpɔ́ yi pʉʉ ɡʉ tɛntɛ nǔu nu-Yɛ́su, yɛcɔ́ yúu pɔɔ pɛn ńjɑ́k nǔu pʉʉ pɔ́, pʉʉ ńnɑ́ŋ ŋɡɔŋ ŋkɑ́ tsʉʉ, ḿbɛ́m pɔ nɛɡɛ yúu mi Sɛ́ sɛ́ ŋ́kɔŋ ŋɡɔ pʉʉ ɡɛ.

¹³ N dɔk mík mɑ́ɑ ńjʉ́ɔ pɑ́Ꞌ ɑ jʉ́ɔnɛ ŋɡʉ̈ɔ́Ꞌ, ɛ́fɑꞋ mbíꞋ wʉ́ʉ, ɛ́fɑꞋ mbíꞋ mbɑ pʉɔ-Sɛ́ pi pɔ́p Lɑɔdisɛ́ mbɑ pi pɔ́p Hiyɛlɑpɔlîs.

¹⁴ Súu wɛkŋɛ Lúkɑ́shi, ndɔ́ktɑ ɡwɛ́, mbɑ Ndɛmɑs cɛꞋlɛ wʉ́ʉ.

¹⁵ Pʉʉ cɛꞋlɛ pɔ́ɔpɛ́mɑ́ pi pɔ́p tʉ́sɔŋ-Lɑwɔdisɛ̂, ńcɛꞋlɛ Nimfɑ mbɑ cúꞋlɛ-pʉɔ-Kɛlístɔ yi ɛ́ ndɑ́ yɛ́.

¹⁶ Pʉʉ ɡʉ ɛ́fúŋ yɔ ŋwɑꞋnɛ tɛ ɛ́ mɛ, ńdɔɔ shʉ́ ńtúu ŋ́ɡɑ́ mbɔ̌ pʉɔ-Kɛlístɔ pi pɔ́p Lɑɔdisɛ́, pɔ́p fúŋ yɔ́p. Yi ŋwɑꞋnɛ n túunɛ, pɔ́p ŋ́ɡɑ́ pʉʉ pɛn ɛ́fúŋ yʉ́ʉ.

¹⁷ Pʉʉ cú mbɔ̌ Alɛshipɛ ŋɡɔ, kɔɔ ɑ lɔk fɑꞋ yi Tsɑpʉɔ kɑ ɡɑ́nɛ mbɔ̌ wɛ́ ŋ́ɡɛ mɛɡɑɑ, ŋɡɔ ɑ fɑꞋ sʉ́Ꞌnɛ.

¹⁸ Pʉʉ jʉ́ɔ cɛꞋlɛ yi mɔ Pɔ̂l, n dɔknɛ kwɑꞋ pɔ́ yɑ́ɑ ŋ́ŋwɑꞋnɛ. Kɔɔ pʉʉ likŋɛ ŋɡɔ mɔ ndɑ́tsɑ́ŋ. Mbɔtnɛ-Sɛ́ pɔ́ nɛ́ pʉʉ pɛtsʉʉ!