ŊwɑꞋnɛ-Gɑŋntúu Yɛ́su Kɛlístɔ 7 - Kɑɑ FíSẅiŋɛ-Ɛtiyɛ̂n 1 Tɑ́tndɑ́-pɑnɔŋpɔꞋ píkŋɛ Ɛtiyɛ̂n ŋɡɔ: «Nu yi n zúꞋnɛ pɛ́ cú nǔu ɡu lɑɑ nu?» 2 Ɛtiyɛ̂n pʉ̈ɔt ŋɡɔ: «Pɛtɑ́t pɑ́ɑ, pɔ́ɔpɛ́mɑ́ pɑ́ɑ, pʉʉ zúꞋ nu yi ŋ ɡʉ ńcú lɑɑ. Ɛ́ m̄bɔ́ ŋkɑ́ yi mɑ̂ɑŋɡɑpnjẅɛt wɛkŋɛ Ábɛlɛhɑ̂m kɑ pɛ́t Mɛzɔpɔtɑmîi, lɑ ŋ́ɡɛ ŋ́ɡʉ ńnɑ́ŋ Hɑlɑŋ, Sɛ́ ẅi ɑ ɡẅɛɛnɛ vuvuk nyɛt mbʉʉ yɛ mbɔ̌ wɛ́, 3 ńcú mbɔ̌ wɛ́ ŋɡɔ: Nɑ́ tsɛ́nndɑ́ yʉ́ʉ, ɛ́fú tsɛt ŋɡɔŋ wʉ́ʉ ńcẅɛt, ŋ́ɡʉ nɛ́ yɛcɔ́ lɑ́Ꞌ yi ŋ ɡʉ ńnyɛt wú. 4 Ábɛlɛhɑ̂m ɡɔ́ɔ ŋ́kɛ́ ɛ́fú ŋɡɔŋ-Shɑldɛ́ɛ zʉꞋ ɑ ḿbɔ́ ńnɑ́ŋ, ŋ́ɡʉ ńnɑ́ŋ Hɑlɑŋ, ńnɑ́ŋ zúꞋu tɛ tɑ́t wɛ́ lɑ́Ꞌ ḿpfú. Sɛ́ ɡɛ ɑ fú tɛ Hɑlɑŋ ńtɔ́ nɛ́ tsɛt wɔ ŋɡɔŋ ẅi pʉʉ tswɛ́nɛ zúꞋu ŋkɔ̂ɔnɛ lɑɑ. 5 A kɑ kúu zɑꞋnɛ, Sɛ́ pɔɔ ŋkɑ́Ꞌ wɛ́ ɡɑ́, tɛ mbɑ ntíknɛ-ku. Lɑ́ ŋ́kɛ́ ŋ́kɑꞋ mbɔ̌ wɛ́ ŋɡɔ ɑ ɡʉ ńdɑ́Ꞌ ŋ́ɡɑ́ wɔ ŋɡɔŋ mbɔ̌ wɛ́, ɛ́ tsʉ́Ꞌ wɛ́, mbɑ wɛ́ mbɔ́ŋkʉ̈ɔ́ pɛ́ ŋkɑ́ yi ɑ ŋ́ɡʉ ńdɑ́Ꞌ ḿbɛ́t ḿbɔ́ ɡú pɔ́, ŋ́kɛ́ ŋ́ɡɔ ŋ́kɑꞋ pɔ́Ꞌɔ, Ábɛlɛhɑ̂m pɔɔ mɔ́ɔ ɡẅɛɛ. 6 Sɛ́ ŋ́kɛ́ ńcú mbɔ̌ wɛ́ ŋɡɔ: Mbɔ́ŋkʉ̈ɔ́ pú ɡʉ ńdɑ́Ꞌ ŋ́ɡʉ yɛcɔ́ túu ńtswɛ́. Ŋ́kúu zúꞋu pɛ́ lɔk wɔ́p ŋ́ɡɛ pɛkwɑɑ, ńnyɛt wɔ́p nɛ́ ŋɡʉ̈ɔ́Ꞌ nyɛtnɛ nǔu ŋɡuꞋlɑ́Ꞌ ŋkʉ yɛ́nɛ́kwɑ. 7 Lɑ́ mɔ Sɛ́, ŋ kɛ́ ŋɑk ẅîwɑ́ ŋɡɔŋ, ńzɑ́p ŋɡʉ̈ɔ́Ꞌ tú pîpɑ́ pʉɔ pinɛ pɔ́p lɔknɛ wɔ́p ŋ́ɡɛ pɛkwɑɑ lɑ́. Lɑ́ njẅɛtndɑ́ yu fú zúꞋu ńcẅɛt ńtɔ́, ńnɑ́ŋ ŋ́ɡúꞋlɛ wɑ́ɑ zɑꞋnɛ. 8 Sɛ́ cú pɔ́Ꞌɔ, pɔ́p Ábɛlɛhɑ̂m pɛn ŋ́ɡwɑt mbɑ kɑɑ, lii yîyɑ́ kɑɑ pɔ́ nɛpúꞋ mɔ́ɔ mbɛ́ɛnɛ. Ɛ́ lɛɛ pɔ́Ꞌɔ, lɑ́ Ábɛlɛhɑ̂m tɑ́ɑ ḿbúꞋ Ɛsɑk pɑ́Ꞌ pɛ́ kɑ pínɛ wɛ́ tɛ ɛ́ pɔ́ lɛ́Ꞌ pɛ́nɛ́fɔ́m. Ɛsɑk tɑ́ɑ ḿbúꞋ mɔ́ɔ nɛ Yɑkɔ̂p. Yɑkɔ̂p tɑ́ɑ ḿbúꞋ pɔ́ɔ pɛ́ pɛ́ mbɛ́ɛnɛ pinɛ ɛ́ pɛmɑ́ŋɡɑpnjẅɛt pɛkŋɛ ntsɔ̌ppɑ́ nɛ́ nɛɡɛ́m lɑ́.» 9 «Pɛmɑ̂ɑŋɡɑpnjẅɛt pɛkŋɛ ɡɛ ńdíŋɛ mɔ́ɔmɑ́ wɔp Yɔsɛ̂p ŋ́kɛ́n wɛ́ tɛ ɛ́fɛn wɛ́. A tsʉ́Ꞌ ŋkwɑɑ tsɛt ŋɡɔŋ-Ɛɡíptɔ.» Lɑ́ Sɛ́ kɛ́ ḿbɔ́ nɛ́ jʉ́, 10 ńcẅɛɛtɛ wɛ́ tsɛt ŋɡʉ̈ɔ́Ꞌ tsʉʉ yi ɛ́ kɑ kúunɛ wɛ́, ḿbɛn ŋ́ɡɑ́ wɛ́ nɛ́ jínu tɛ Fɑlɑhɔ̂ŋ fɔɔ-Pʉɔ-Ɛɡíptɔ, kɔŋ wɛ́, ńdɔk wɛ́ ŋ́ɡɛ ŋútlɑ́Ꞌ túmbʉ́ʉ pɑ́Ꞌ ɑ ɡʉ ńdíŋɛ ŋɡɔŋ-Ɛɡíptɔ tɛ mbɑ mɛnu mi ɛ́ tsɛnntɔ́Ꞌ. 11 Wɛcɔ́ cʉ́ ɡɛ ḿvu tsɛt ŋɡɔŋ-Ɛɡíptɔ mbɑ tsɛt lɑ́Ꞌ-Kɑ̌nɑhɑ̂n tsʉʉ. Pʉɔmɛsɔŋ jʉ́ɔ ŋɡʉ̈ɔ́Ꞌ tɛꞋ. Pɛmɑ́ŋɡɑpnjẅɛt pɛkŋɛ jɑ́k yúupɛjʉ́. 12 Yɑkɔ̂p zúꞋ pɛ́ ɡɔ́ yúupɛjʉ́ tsɛt ŋɡɔŋ-Ɛɡíptɔ. A túu pɛmɑ́ŋɡɑpnjẅɛt pɛkŋɛ zúꞋu nǔu nduŋmbi nɛɡʉ. 13 Pɔ́p tɑ́ɑ ḿbɛn ŋ́ɡʉ zúꞋu nǔu mbɑ́ɑtɛ yɛ́pɑ́, Yɔsɛ̂p pʉ́ mbʉʉ yɛ mbɔ̌ pɔ́ɔpɛ́mɑ́ pɛ́. Fɔɔ Fɑlɑhɔ̂ŋ lɔk ɛ́fú pɔ́Ꞌɔ, ńjí tsɛ́nndɑ́ pɛ́ Yɔsɛ̂p. 14 Yɔsɛ̂p túu ŋɡɔ pɛ́ ɡʉ ńdɔɔ tɑ́t wɛ́ Yɑkɔ̂p, ɑ lɔk njẅɛt yɛ tsʉʉ ńtɔ́. Pɔ́p pɔ́ ŋkɑ́ yîyɑ́ ńcúꞋlɛ ḿbɔ́ pʉɔmɛsɔŋ ntsɔ̌pɛ́tɑɑ nɛ́ mɛɡɛ́msɑɑmbɑ́. 15 Yɑkɔ̂p ɡʉ Ɛɡíptɔ, ńnɑ́ŋ zúꞋu tɛ ńdɑ́Ꞌ ḿpfú. Pɛmɑ́ŋɡɑpnjẅɛt pɛkŋɛ ɡɛ ḿbɛn ńtɑ́ɑ ḿpfútɛ yɔ́p. 16 Pɛ́ ɡɛ ńtíi mɛtsẅíi mɔ́p, ŋ́ɡʉ Sishɛ̂m ńníꞋ tsɛt nɛshi ni Ábɛlɛhɑ̂m kɑ lɔknɛ ŋkɑ́p yɛ ńzúu mbɔ̌ pɔ́ɔ-Amɔ̂l. Ɛ́ pɔ́ zʉꞋ-nɛlẅɛꞋ pɛpfú. 17 «Ŋkɑ́ yi Sɛ́ kɑ pɔ́ ŋ́ɡʉ ŋ́ɡɛ yúu mi ɑ kɑ kɑꞋnɛ mbɔ̌ Ábɛlɛhɑ̂m kɑ pɔ́ tɛ ḿbɔ́ ŋ́kuꞋ, pʉɔ pɛkŋɛ sɑ́ɑ njẅɛt yɔp tsɛt ŋɡɔŋ-Ɛɡíptɔ yi pɔ́p ḿbɔ́ zúꞋu pɑ́Ꞌɑ tɛꞋ.» 18 Wɛcɔ́ fɔɔ ɡɛ ńtɑ́ɑ ḿbɔ́ ɛ́sɑ́Ꞌ pʉɔ-Ɛɡíptɔ, ḿbɔ́ ẅi ɑ ŋ́kɑɑ Yɔsɛ̂p jí, 19 ɛ́fúklɛ pʉɔ-lɑ́Ꞌ pɛkŋɛ, ŋ́ɡɛ nu kɛpɔŋ nǔu pɛmɑ́ŋɡɑpnjẅɛt pɛkŋɛ, tɛ ńcú mbɔ̌ pɔ́p ŋɡɔ pɔ́p ɡʉ tsɛt nɛɡíi ḿmɛꞋ pɔ́ɔ mbɔ́t pɔ́p, pɔ́p pfútɛ. 20 Ɛ́ pɔ́ ŋkɑ́ yîyɑ́, pɛ́ pí Mɔ̌sɛ̂ɛ, ɑ pɔ́ mɔ́ɔ, kwɑ́ŋshʉ́ wɛ lɛɛnɛ tɛꞋ. Pɛ́ ńtsɑ́p wɛ́ pɔ ndɑ́-tɑ́t wɛ nǔu pɛsɑŋ pɛtɑ́t, 21 ŋ́ɡɛ ŋ́ɡʉ ḿmɛꞋ wɛ́. Mɔ́ɔ-fɔɔ Fɑlɑhɔ̂ŋ wɛ mɑŋɡɛ́ cẅɛt nǔu wɛ́ ńtíi wɛ́ ńdɔk ŋ́ɡʉ nɛ́ njɛ́Ꞌ yɛ́, ńtsɑ́p wɛ́ ńdɔk ŋ́ɡɛ mɔ́ɔ nɛ. 22 Mɔ̌sɛ̂ɛ tswɛ́ zúꞋu, pɛ́ zíꞋ wɛ́ nɛ́ jínu-pʉɔ-Ɛɡíptɔ, ŋ́ɡúꞋ tɛ ḿbɔ́ ŋu, ńtsʉ́Ꞌ nɛcú nu kɛ nɛɡɛ ɔɔ, ŋ́ɡɛ pɑ́Ꞌ ŋu ẅí ɑ jínɛ yúu mi ɑ ɡɛnɛ. 23 A ɡɛ ḿbɔ́ tɛ ŋ́ɡẅɛɛ ŋɡuꞋlɑ́Ꞌ mɛɡɛ́mɛ́nɛ́kwɑ, kwɑŋɛ nɛjʉ́ɔ pɔ́ɔpɛ́mɑ́ pɛ́ pɑíslɑyɛ̂l tɔ́ tú yɛ́. 24 A kúu nɛjɔ́ŋ pɔ́p, ńjʉ́ɔ wɛcɔ́ ŋu-Ɛɡíptɔ pɔ́ ńtswɑ́ɑ ŋu-Íslɑyɛ̂l. A tʉ́ʉ nzʉʉ-ŋu-Íslɑyɛ̂l, ńjẅí ŋu-Ɛɡíptɔ. 25 Mbɔ jínu yɛ́ sẅíi wɛ́ ŋɡɔ pɔ́ɔpɛ́mɑ́ pɛ́ ɡʉ ńjʉ́ɔ wɛ́, ńjí ŋɡɔ Sɛ́ túunɛ wɛ́ ŋɡɔ ɑ ɡʉ ńcẅɛɛtɛ wɔ́p tsɛt ŋɡʉ̈ɔ́Ꞌ. Lɑ́ ŋu wɔp pɔɔ jí. 26 Njí ɡɛ ŋ́kiɛ, ɑ pɛn ḿbɛn zúꞋu, ḿbɔ́ ńtɔ́, pʉɔ-Íslɑyɛ̂l pɛ́pɑ́ pɔ́ ńtswɑ́ɑnɛ ŋkɔt. A pɔ́ ɛ́fɑk wɔ́p, ńcú mbɔ̌ pɔ́p ŋɡɔ: «Pɛsúu pɑ́ɑ, pʉʉ pɔ́ɔpɛ́mɑ́, ḿbɛn ɛ́shɔtnɛ ńtswɑ́ɑnɛ ŋkɔt tsɛtsɛt pʉʉ mɛlɑ́Ꞌ kʉ̈ɔ́?» 27 Lɑ́ ŋu ẅí ɑ lɑ́Ꞌnɛ ńzɛ mɛlɑ́Ꞌ pɑꞋnɛ Mɔ̌sɛ̂ɛ ńcú mbɔ̌ wɛ́ ŋɡɔ: «KwɑꞋ wɔ̌ kɑ lɔknɛ wú ŋ́ɡɛ fɔɔ pɑ́Ꞌ ɔ ɡʉ ŋ́ŋɑk mɛntsɑŋ mɛ́k? 28 Ɔ lɔɔ nɛjẅí wɑ́ɑ pɑ́Ꞌ ɔ ǹjẅínɛ ŋu-Ɛɡíptɔ zɔ́n lɑ́ kɛkʉ̈ɔ́?» 29 Mɔ̌sɛ̂ɛ zúꞋ pɔ́Ꞌɔ, ŋ́kʉɔ ŋ́ɡʉ nɛ́ túu, tsɛt ŋɡɔŋ-Mɑdíyɑŋ, ńnɑ́ŋ zúꞋu, ŋ́ɡɛ ḿbí pɔ́ɔ mbɛ́ɛnɛ pɛ́pɑ́. 30 «Ɛ́ ɡɛ ńdɛɛ ŋɡuꞋlɑ́Ꞌ mɛɡɛ́mɛ́nɛ́kwɑ, Mɔ̌sɛ̂ɛ ɡʉ mbʉʉ nɛŋkɔ́Ꞌ Sinɑyi, kɔ̂ŋtɛt, ńtɔ́ zúꞋu ńjʉ́ɔ Cʉ̈ɔꞋ-Sɛ́, ɑ pɔ́ tsɛt múk, ẅi ɛ́ kɑ pɔ́ ŋ́kʉ́ nǔu yɛcɔ́ mɔ́ɔmɔ tʉ́.» 31 Mɔ̌sɛ̂ɛ jʉ́ɔ ẅîwɑ́ múk, ɛ́ kʉꞋnɛ wɛ́. A kẅɛ́Ꞌlɛ nɛ́ mbi ḿbɔ́ ńdíŋɛ, ńzúꞋ ŋɡi-Tsɑpʉɔ cú mbɔ̌ wɛ́ ŋɡɔ: 32 «A mɔ Sɛ́-pɛmɑ̂ɑŋɡɑpnjẅɛt pʉ́ʉ, Sɛ́-Ábɛlɛhɑ̂m, Sɛ́-Ɛ́sɑk, ḿbɛn ḿbɔ́ Sɛ́-Yɑkɔ̂p.» Mɔ̌sɛ̂ɛ zúꞋ ḿbɔ́k, ńzɛ nɛɡwɛt. Mbɔɔ pɛn ŋ́kɔŋ nɛlíŋɛ zʉꞋ ɛ̂yɑ́ pɔ́. 33 Tsɑpʉɔ cú mbɔ̌ wɛ́ ŋɡɔ: Sɔt mɛtɑp mí ɛ́ mɛku wu lɑ́, mbíꞌŋɡɔ zʉꞋ yi ɔ tʉ́ʉnɛ zúꞋu lɑ́, ɛ́ zʉꞋ yɑ́ɑ yi mɔ Sɛ́. 34 N jʉ́ɔ ŋɡʉ̈ɔ́Ꞌ pʉɔ pɑ́ɑ tsɛt ŋɡɔŋ-Ɛɡíptɔ, ḿbɛn ńzúꞋ pɑ́Ꞌ pɔ́p kíinɛ. N cúŋ ńtɔ́ nɛɡɛ pɔ́p fú tsɛt ŋɡʉ̈ɔ́Ꞌ ńcẅɛt. Nǔu ŋkɔ̂ɔnɛ lɑ́, mɔ ńtúu wú ŋɡɔŋ-Ɛɡíptɔ. 35 Sɛ́ cú pɔ́Ꞌɔ, ŋ́ɡɔ́ɔ ŋ́kɛ́ ńtúu pɔ Mɔ̌sɛ̂ɛ wɑ́ pɑ́Ꞌ ɑ ɡʉ ŋ́ɡʉ ńcẅɛɛtɛ pɑíslɑyɛ̂l tsɛt ŋɡʉ̈ɔ́Ꞌ yi pɔ́p kɑ pɔ́ ńjʉ́ɔ. Cʉ̈ɔꞋ-Sɛ́ ẅi Mɔ̌sɛ̂ɛ kɑ jʉ́ɔnɛ wɛ́ tsɛt pɔ́ɔ-mɛtʉ́ lɑ́ pɔ́ ńtɔ́ɔtɛ wɛ́. A pɔ́ ɛ́sɑ́Ꞌ Pɑíslɑyɛ̂l. Lɑ́ mbɔ pɔ́p kɑ lʉꞋ Mɔ̌sɛ̂ɛ, tɛ ḿbíkŋɛ wɛ́ ŋɡɔ wɔ̌ kɑ zɑ́pnɛ wɛ́ ŋɡɔ ɑ ńtsʉ́Ꞌ fɔɔ wɔp, ŋ́ŋɑk mɛntsɑŋ mɔ́p ɔɔ? 36 Mɔ̌sɛ̂ɛ ɛ̂wɑ́ kɑ ɡʉ tɛ ŋ́kúu ŋɡɔŋ-Ɛɡíptɔ, ŋ́ɡɛ mɛŋkʉꞋnɛ nu, pɔ́p mɛnu mɑ̌ɑmɑɑnɛ. Jʉ́ ɡɔ́ɔnɛ ŋ́kɛ́ ŋ́ɡɛ ɛ́fú zúꞋu ńcẅɛɛtɛ wɔ́p, ḿbɛn ŋ́ɡɛ mɛcɔ́ mɛnu mɑ̌ɑmɑɑnɛ mbʉʉ pɑŋ ŋki, ńtɔ́ kɔ̂ŋtɛt, ŋ́ɡɛ yúu ŋɡuꞋ mɛɡɛ́mɛ́nɛ́kwɑ. 37 Jʉ́ Mɔ̌sɛ̂ɛ kɑ pɛnnɛ ńcú mbɔ̌ pɔ́ɔ-pɑíslɑyɛ̂l ŋɡɔ: «Sɛ́ ɡʉ ńdɑ́Ꞌ ḿbɛn ńtúu wɛcɔ́ Ŋɡɛ́mdʉ̈ɔ́Ꞌ-Sɛ́ mbɔ̌ pʉʉ. A pɔ́ pɑ́Ꞌ mɔ. A ɡʉ ńdɑ́Ꞌ ńcẅɛt pɔ tsɛtsɛt pʉʉ.» 38 Mɔ̌sɛ̂ɛ pɛnnɛ ḿbɔ́ ŋu ẅí ɑ ḿbɔ́nɛ ŋkɑ́ yi pɛmɑ́ŋɡɑpnjẅɛt pɛkŋɛ kɑ cúꞋlɛ́nɛ kɔ̂ŋtɛt m̄bɔ́ ńtʉ́ʉ tsɛtsɛt Cʉ̈ɔꞋ-Sɛ́ pɔ́p mɑ̂ɑŋɡɑpnjẅɛt wɛkŋɛ. Cʉ̈ɔꞋ-Sɛ́ sẅiŋɛ mbɔ̌ wɛ ḿbɔ́ ńníꞋ nu mbɔ̌ wɛ́ ndǔ nɛŋkɔ́Ꞌ Sinɑyi. KwɑꞋ jʉ́ Mɔ̌sɛ̂ɛ kɑ cẅɛ́ɛ sẅiŋɛ ɛ̂yɑ́ yi ɛ́ ɡɛnɛ pɛ́ pɔ́ ɡú nɛɡɑ́ mbɔ̌ pɛkŋɛ. 39 Lɑ́ pɛmɑ́ŋɡɑpnjẅɛt pɛkŋɛ pîpɑ́, ŋ́kɑɑ kɔŋ nɛzúꞋ ntsu-Mɔ̌sɛ̂ɛ pɔ́, ḿbɑꞋnɛ wɛ́ pɑꞋnɛnɛ. Tɛ ńtsɑ́ɑ nɛpɛn ḿbɛn ŋɡɔŋ-Ɛɡíptɔ, 40 ńcú mbɔ̌ Álɔŋ ŋɡɔ: «Pɛk kɑ́ zɛɛ ḿbɔ́ ńjí yúu mi ɛ́ ɡɛnɛ Mɔ̌sɛ̂ɛ ɛ̂wɑ́ cẅɛɛtɛ wɛk tsɛt ŋɡɔŋ-Ɛɡíptɔ pɔ́. Niitɛ mɛcɔ́ mɛsɛ́, ɛ́ pɔ́ mbi pɛkŋɛ ńnyɛt wɛkŋɛ nɛ́ ndúŋ.» 41 Pɔ́p pɛ́ pɔ́p niitɛ tɛ́tɔ́k. A pɔ́ pɑ́Ꞌ mɔ́ɔ-fɔŋ lɑ́. Pɔ́p ɡwɑt mɛyúumɛku ńdɔk ńnɔŋ pɔꞋ mbɔ̌ wɛ́. Nu yîyɑ́ pɔŋ wɔ́p nǔu yúu mi pɔ́p lɔknɛ mbɔ́ mɔ́p ńniitɛ tɛ ńjʉ́ ndínɑ nǔu. 42 Pɔ́p kɑ ɡɛ pɔ́Ꞌɔ, Sɛ́ tɛ́m ŋkwɛn yɛ, ńnɑ́ wɔ́p. Pɔ́p zɛ nɛɡúꞋlɛ yúu mi ɛ́ nɛpú. Ndʉ́ŋndʉŋ pɑ́Ꞌ pɛŋɡɛ́mndʉ̈ɔꞋ-Sɛ́ kɑ pɔ́ ŋ́ɡʉ ńtɑ́ɑ ńdɛꞋlɛ nu yɔ́p ŋɡɔ: «Pɔ́ɔ-pɑíslɑyɛ̂l, pʉʉ kɑ nɛn kɔ̂ŋtɛt ŋɡuꞋlɑ́Ꞌ mɛɡɛ́mɛ́nɛ́kwɑ pɛ́Ꞌɛ, ŋ́ɡwɑt mɛyúumɛku ŋ́ɡɑ́ yúujʉ́ ńdɔk ŋ́ɡúꞋlɛ mɔ Sɛ́ wɔ?» 43 Ŋɡɑŋ! Lɑ́ pʉʉ ŋ́kɑɑ kɛ́ ńtíi pɔ ntɑp-sɛ́-Mɔlɔk ḿbɛn ńtíi cʉ̈ɔ́Ꞌ-sɑŋ ŋkɔ̂ɔnɛ, ẅi pɛ́ fúŋnɛ ŋɡɔ Lɛfɑŋ ɛ́ pɔ́ yúu mi pʉʉ kɑ niitɛ́nɛ pɑ́Ꞌ pʉʉ ɡʉ ŋ́ɡúꞋlɛ. Ɛ́ yúu mi ɛ́ ɡʉ ŋ́ɡɛ ɛ fú lɑ́Ꞌ ńzuŋ wʉ́ʉ pʉʉ ɡʉ tɛ ńdut ŋɡɔŋ-Mbɑbilɔ̂nɛ. 44 «Pɛmɑ́ŋɡɑpnjẅɛt pɛkŋɛ m̄bɔ́ kɔ̂ŋtɛt pɔ́Ꞌɔ, ŋ́ɡẅɛɛ ntɑp ẅi ɛ́ nyɛtnɛ ŋɡɔ Sɛ́ tsɛtsɛt pɔ́p. Sɛ́ kɑ nyɛtnɛ Mɔ̌sɛ̂ɛ nɛ́ ntɛ́ yi ɑ ɡʉ ńdɔk niitɛ ẅîwɑ́ ntɑp pɔ́Ꞌɔ, ńcú mbɔ̌ wɛ́ ŋɡɔ ɑ kɛ́ ńniitɛ pɔ ndʉ́ŋndʉŋ pɑ́Ꞌ ɑ sɛ́ ńjʉ́ɔ ɛ́ pɔ́.» 45 Pɔ́ɔ-pɛmɑɑŋɡɑpnjẅɛt pɛkŋɛ kɑ ɡẅɛɛ yɔ́p wɔ ntɑp ńdɔk ńtɔ́ tɛ ŋ́kúu zɑꞋnɛ. Ɛ́ pɔ́ nǔu ŋkɑ́ yi Yɔ̌súɑ kɑ pɔ́ ɛ́sɑ́Ꞌ wɔ́p, Sɛ́ pɔ́ ńzuŋ pʉɔ tsɛt mɛlɑ́Ꞌ lɑ́ pɔ́p nɑ́ŋ, ẅîwɑ́ ntɑp kɑ lɑ́Ꞌ ḿbɔ́ pɔ zɑꞋnɛ tɛ ŋ́kúu nǔu ŋkɑ́ yi fɔɔ Ndɑvît kɑ pɔ́ ɛ́sɑ́Ꞌ lɑ́Ꞌ. 46 Sɛ́ kɑ ŋ́kɔŋ fɔɔ Ndɑvît tɛꞋ. A púꞋ mbɔ́ mbɔ̌ wɛ́ ŋɡɔ ɑ pɛ́m ɑ kút ndɑ́-nɔŋpɔꞋ yɛ́ jʉ́ ẅi ɑ Sɛ́-Yɑkɔ̂p. 47 Lɑ́ mɔ́ɔ nɛ fɔɔ Sɑlɛ́mɔ kɑ lɑ́Ꞌnɛ ńtsʉ́Ꞌ lɑ ŋ́kút ndɑ́-nɔŋpɔꞋ ŋ́ɡɑ́ mbɔ̌ Sɛ́. 48 Ɛ́ kɛ́ ḿbɔɔ ńdɔk ńcú ŋɡɔ Sɛ́ ẅi ɑ piꞋnɛ mbɑ kʉ̈ɔ́ lɑ́ lɑɑ ḿbɔ́ ɑ nɑ́ŋ tsɛt zʉꞋ yi pʉɔmɛsɔŋ kútnɛ pɔ́. Wɛcɔ́ Ncẅiŋkʉʉ wɛ kɑ zɛɛ ńcú ŋɡɔ: 49 Tsɑpʉɔ cú ŋɡɔ: «Tʉ́nɛpú kɔꞋ-nɛfɔɔ nɑ́ɑ tsɛ́tsɑ́ꞌ pɔ́ ńtíknɛ mɛku mɑ́ɑ pʉʉ ɡʉ ŋ́kút zʉꞋ yɑ́ɑ ḿmɛꞋ? ZʉꞋ yi ɛ́ lɑɑ ḿbɔ́ n tswɛ́ zúꞋu zɛɛ ḿbɔ́ ɡú?» 50 Mɔ ŋkɑɑnɛ niitɛ yúu tsʉʉ pɔ? 51 Ɛtiyɛ̂n kɑ pɛ́ɛtɛ tɛ ɛ́ kuꞋ, ɑ cú mbɔ̌ pɑsɑ́Ꞌlɑ́Ꞌ ŋɡɔ: «Pʉʉ tʉʉ tú tɛꞋ. Tʉ́m yʉ́ʉ pɔ́p kwɑŋɛ nu yʉ́ʉ pɔ́ pɔ wɛ pʉɔ pi pɔ́p kɑ́ jí Sɛ́ pɔ́. Pʉʉ pɛn mɔ́ ńdʉꞋ nu yí Zẅikŋɛ-Sɛ́ cúnɛ, ńdɔk ŋ́ɡɛ pɔ pɑ́Ꞌ pɛmɑ́ŋɡɑpnjẅɛt pʉ́ʉ. 52 Sẅíinɛ wɑ́ɑ nɛ lík-Ŋɡɛ́mndʉ̈ɔ́Ꞌ-Sɛ́ ẅi pɛtɑ̌ɑ ŋkɑɑ wɛ́ kʉʉnɛ. Pɔ́p kɑ jẅítɛ pʉɔ pi pɔ́p kɑ zɑ́Ꞌnɛ njí ḿbɔ́ ḿbʉ́ ŋɡɔ ŋu ẅí ɑ ndʉ́ŋndʉŋ zɛ́nɛjʉ́ ɡʉnɛ ŋ́ɡɛ ńtɔ́. Ŋu ndʉ́ŋndʉŋ ɛ̂wɑ́ ɑ Yɛ́su, ɑ kɑ kɛ́ mɔ́ ńtɔ́, pʉʉ wɔ jẅí wɛ́. 53 N cú pʉʉ wɔ ẅí Cʉ̈ɔꞋ-Sɛ́ kɑ lɔknɛ nɛpʉ́ʉ-Sɛ́ ńtɔ́ ŋ́ɡɑ́ mbɔ̌ pʉʉ, pʉʉ kɛ́ ḿbɔɔ nǔu nɛn.» Pɛ́ jẅí Ɛtiyɛ̂n 54 Pɑsɑ́Ꞌlɑ́Ꞌ kɑ zúꞋ pɔ́Ꞌɔ, ŋ́kwɛ́t mɛsɔŋ mɔ́p. Pɔ́p lɔ sɛ́ nzʉʉ Ɛtiyɛ̂n. 55 Zẅikŋɛ-Sɛ́ jʉ́ Ɛtiyɛ̂n. A pʉꞋ tú yɛ́ ńdíŋɛ tʉ́nɛ́pú, ńjʉ́ɔ nɛɡúꞋ-Sɛ́, ḿbɛn ńjʉ́ɔ Yɛ́su, ɑ tʉ́ʉ nǔu ɡúŋ-pɔ́-Sɛ́ yi tʉʉ. 56 Ɛtiyɛ̂n cú ŋɡɔ: «Mɔ sɛ́ ńjʉ́ɔ pɑ́Ꞌ ntsu-tʉ́nɛ́pú tsɔ́Ꞌnɛnɛ ńtʉ́ʉ. Mɔ́ɔ-Ŋu tʉ́ʉ nǔu ɡúŋ-pɔ́-Sɛ́ yi tʉʉ.» 57 Pɔ́p zúꞋ pɔ́Ꞌɔ, ńzʉʉnɛ mɛtúutɛ́ mɔ́p, ŋ́ɡíɛt nɛ́ tʉʉ, ńjɛ́Ꞌ ḿbʉ̈ɔtnɛ nǔu wɛ́, 58 ɛ́shuŋ wɛ́, ńdɔk wɛ́ ɛ́fú tʉ́sɔŋ ńcẅɛt, ńzɛ nɛlɔk mɛŋɡɔꞋ ńtɛ́mtɛ wɛ́ nɛjẅí wɛ́. Ɛ́ ɡɔ́ ḿbɔ́, mbɔ pʉɔ pi pɔ́p lɑ́Ꞌnɛ ńzúꞋ sẅiŋɛ-Ɛtiyɛ̂n, lɑ́Ꞌ ɛ́sɔt mɛndẅí-fɑ́k mɔ́p, ńdẅɛꞋ mbɔ̌ wɛcɔ́ mɔ́ɔsuu ẅí pɛ́ fúŋnɛ wɛ́ ŋɡɔ Sɔ̂l. 59 Pɔ́p kɑ ɡɔ́ ḿbɔ́ ńdɔk mɛŋɡɔꞋ ńtɛ́mtɛ Ɛtiyɛ̂n, ɑ cɛꞋlɛ Sɛ́ ńcú ŋɡɔ: «Tsɑpʉɔ Yɛ́su, zẅikŋɛ yɑ́ɑ pʉ́ɔlɑ́ nǔu mbɔ́ mú.» 60 A kɑ cú pɔ́Ꞌɔ, ḿvu sɛ́ nɛ́ mɛkẅíꞋlɛ mɛ́, ŋ́ɡíɛt nɛ́ tʉʉ ŋɡɔ: «Tsɑpʉɔ, kɔɔ sɑ́ŋ yúu mi pʉɔ pɔnɛ ɡɛnɛ» ńcú pɔ́Ꞌɔ, ḿpfú. |
CABTAL, 2017