ŊwɑꞋnɛ-Gɑŋntúu Yɛ́su Kɛlístɔ 5 - Kɑɑ Fí

Cɔtnu-Anɑníyɑs pɔ́p nzwɛ́ wɛ Sɑfílɑ

¹ Lɑ́ wɛcɔ́ ŋu ẅí pɛ́ kɑ pɔ́ ɛ́fúŋ wɛ́ ŋɡɔ Anɑníyɑs pɔ́p nzwɛ́ wɛ Sɑfílɑ ɡʉ ɛ́fɛn zʉꞋ-ŋkɑ́Ꞌ wɔ́p,

² ŋ́kwɑŋɛ, ńzɑ́Ꞌ yɛcɔ́ ɡúŋ-ŋkɑ́p ńdẅɛꞋ, ŋ́ɡʉ ńnɔŋ pfuꞋ mɛku-ɡɑŋntúu-Yɛ́su.

³ Pyɛ̂ píkŋɛ wɛ́ ŋɡɔ: «Anɑníyɑs, mɛlɑ́Ꞌ kʉ̈ɔ́ ɔ pɛ́m Sɑ́ttɑ jʉ́ wú tɛ ɔ fu Zẅikŋɛ-Sɛ́? Mɛlɑ́Ꞌ kʉ̈ɔ́ ɔ fɛn ŋkɑ́Ꞌ wú, ŋ́ɡẅɛɛ yɛcɔ́ ɡúŋ-ŋkɑ́p?

⁴ Ŋkɑ́Ꞌ ḿbɔ́ pɔ wú, lɑ ɔ fɛn. Ɔ pɛn ɛ́fɛn, ŋkɑ́p pɔ́ pɔ yú. Ɔ pɛn ŋ́ɡɛ ŋɡɔ́ku ŋ́ɡẅɛɛ yɔ ntɛ́ kwɑŋɛ tsɛt tʉ́m yú? Ɔ kɑ́ cɔtnu pɔ mbɔ̌ pʉɔmɛsɔŋ pɔ́. Ɔ cɔtnu pɔ mbɔ̌ Sɛ́.»

⁵ Anɑníyɑs zúꞋ yɔ sẅiŋɛ, ŋ́ɡɔ́ɔ ḿvu sɛ́ zẅikŋɛ yɛ́ tʉ́ʉ. Pʉɔ pɛtsʉʉ pi pɔ́p kɑ zúꞋnɛ yɔ nu pɔ́k.

⁶ Ɛ́ ɡɔ́ ḿbɔ́, mbɔ ɑ lɑ́Ꞌ ḿpfú pɔ́Ꞌɔ, pɔ́ɔsuu lɔ sɛ́ ńdɔk pɔ́-ndẅí ŋ́kɑ́tɛ pfú yɛ́, ńtíi wɛ́ ŋ́ɡʉ ńtẅí.

⁷ Ɛ́ ɡɔ́ ńdɛɛ yúu nɛm yɛ́tɑ́t, nzwɛ́ wɛ tɔ́ ńjɛ́Ꞌ ŋ́kúu ndɑ́. Ḿbɔɔ ḿbɔ́ ńjí yúu mi ɛ́ lɛɛnɛ pɔ́.

⁸ Pyɛ̂ píkŋɛ wɛ́ ŋɡɔ: «Sẅíi wɑ́ɑ, pʉʉ lɑ́Ꞌ ɛ́fɛn ŋkɑ́Ꞌ pɔ pɑꞋnɛ?» A cú ŋɡɔ: «Ɔ́ɔŋ, pɛk lɑ́Ꞌ ɛ́fɛn pɔ pɑ́Ꞌɑ.»

⁹ Pyɛ̂ cú mbɔ̌ wɛ́ ŋɡɔ: «Pʉʉ lɔk yɛ́tɛ́ sʉktʉ́m lɑ ńtɔ́ ŋ́kwɑꞋlɛ Zẅikŋɛ-Tsɑpʉɔ? ZúꞋ pɑ́Ꞌ pʉɔ ntsundɑ́ ńnɛntɛ, pɔ́p fú nɛtẅíi ndúu mu. Lɑ́ pɔ́p ɡʉ ńtíi wú ɡúu ńdɔk ŋ́ɡʉ ńtẅíi nǔu.»

¹⁰ A ɡɔ́ɔ ḿvu sɛ́ mbi Pyɛ̂, ḿpfú. Pɔ́ɔsuu kúu ndɑ́, ńjʉ́ɔ pɑ́Ꞌ ɑ pfúnɛ, ńtíi pfú yɛ́ ńdɔk ŋ́ɡʉ ńtẅíi nɛjɔ́ŋ yɛ́ ndúu mɛ.

¹¹ Yɔ nu lɛɛ cúlɛ-pʉɔ-Kɛlístɔ mbɑ pɛcɔ́ pʉɔ pí pɔ́p kɑ zúꞋnɛ yɔ nu pɔ́k tɛꞋ.

Gɑŋntúu sɛ́ ŋ́ɡɛ mɛnu mɑ̌ɑmɑɑnɛ

¹² Gɑŋntúu kɑ pɔ́ ŋ́ɡɛ mɛnu mɑ̌ɑmɑɑnɛ pɔ́p mɛŋkʉꞋnɛ mɛnu mɛntɛ́ mɛntɛ́ tsɛtsɛt lɑ́Ꞌ. Pɔ́p pʉɔ-Kɛlístɔ pɛtsʉʉ kɑ pɔ́ ńtɔ́ ńcúꞋlɛ nǔu zʉꞋ yí pɛ́ kɑ pɔ́ ɛ́fúŋ ŋɡɔ tɛtɑ́ɑ-Sɑlɛmɔ.

¹³ Ŋu ndɛꞋ kɛ́ ḿbɔɔ fʉꞋ nɛkúu tsɛtsɛt pɔ́p pɔ́, lɑ́ pʉɔ tsʉʉ kɛ́ ḿbɔ́ ŋ́ɡʉ̈ɔꞋtɛ ŋɡɛnɛ mɛnu mɔ́p tɛꞋ.

¹⁴ Mbɛ́ɛnɛ tɛ ńzɑ́ɑ pɔ́p pɑŋɡɛ́ kɑ pɔ́ ńzɑ́p tʉ́m nǔu Tsɑpʉɔ ŋ́kúu tsɛt nɔɔ yɔ́p. Ɛ́ pɔ́ lɛ́Ꞌ tsʉʉ ndɛn wɔ́p pɔ́ ŋ́kẅiꞋ.

¹⁵ Pɛ́ kɑ ɡʉɔꞋlɛ nu yɔ́p ɡʉɔꞋlɛnɛ tɛ pɛ́ lɔk mɛkúu pɔ́p pɛmɑ́tɑ ńtíi pɛŋɡɔɔ ńnɔŋ wɔ́p ŋkɑŋ-sɛ̂ndúŋ nɛpɔ́ yi Pyɛ̂ ɡʉ ŋ́ɡɔ ńdɛɛ, mɔ́jíjʉŋ wɛ tɛ́mɛ nǔu wɛcɔ́.

¹⁶ Pʉɔ tɛ ńzɑ́ɑ kɑ pɔ́ ḿbɛn ɛ́fú tsɛt mɛlɑ́Ꞌ mi ɛ́ mbʉʉ Yɛlúsɑlɛm ńdɔk pɛŋɡɔɔ mbɑ pʉɔ pí mɛzẅikŋɛ kɛpɔŋ kɑ pɔ́ ḿbúunɛ wɔ́p, ńtɔ́ ńjʉ́ɔ ɡɑŋntúu. Pɔ́p ɡɛ pɔ́p pɛtsʉʉ fíitɛ.

Pɛlʉ́m tsɛt lɑ́Ꞌ sɛ́ ńnyɛt ɡɑŋntúu nɛ́ ŋɡʉ̈ɔ́Ꞌ

¹⁷ Tɑ́tndɑ́-pɑnɔŋpɔꞋ pɔ́p pʉɔ pí pɔ́p kɑ pɔ́ ńtɔ́ɔtɛ nu yɛ́ zɛ nɛkɔ́Ꞌ lɔ́ŋ ntɛ́ ɡɑŋntúu. Pɑtɔ́ɔtɛ nu yɛ́ yîyɑ́ pɔ́ nǔu nɔɔ yi pɛ́ kɑ pɔ́ ɛ́fúŋ ŋɡɔ yɛ́ pɑsɑdukɑy.

¹⁸ Pɔ́p pɛpɔ́p túu pʉɔ, pɔ́p ɡẅɛɛ ɡɑŋntúu ńníꞋ wɔ́p ndɑ́tsɑ́ŋ yi pɛ́ kɑ pɔ́ ńníꞋ ɡɑŋtsɑ́ŋ tsʉʉ zúꞋu.

¹⁹ Lɑ́ ɛ́ ɡɛ ḿbɔ́ nɛtúꞋ, wɛcɔ́ cʉ̈ɔ́Ꞌ-Tsɑpʉɔ tɔ́, ńtsɔ́Ꞌ ndɑ́tsɑ́ŋ, ŋ́ɡɛ ɡɑŋntúu cẅɛt, ɑ cú mbɔ̌ pɔ́p ŋɡɔ:

²⁰ «Pʉʉ ɡʉ ńtʉ́ʉ ndǔ zɑ́n yi ɛ́ tsɛt ZʉꞋ-nɔŋpɔꞋ ɛ́sẅíi lɑ́Ꞌ nɛ́ mɛnu mi ɛ́ líŋɛ́nɛ luk fí.»

²¹ Pɔ́p zúꞋ ntsu wɛ́. Njí kiɛ, pɔ́p mʉ́ʉ ŋ́ɡʉ ZʉꞋ-nɔŋpɔꞋ, ńzɛ nɛzíꞋ nu-Sɛ́ mbɔ̌ lɑ́Ꞌ. Ŋ́ɡɔ́ ḿbɔ́ mbɔ tɑ́tndɑ́-pɑnɔŋpɔꞋ pɔ́p Pɑsɑdukɑy nɑ́ŋ tɛ ńcúꞋlɛ pɑsɑ́Ꞌlɑ́Ꞌ-Íslɑyɛ̂l nǔu nu nɛzɑ́Ꞌ ntsɑŋ. Pɔ́p pɛpɔ́p túu ɡɑŋfɑꞋ ŋɡɔ pɔ́p ɡʉ ndɑ́tsɑ́ŋ ńdɔɔ ɡɑŋntúu-Yɛ́su ńdɔk wɔ́p ńtɔ́.

²² Lɑ́ ɡɑŋfɑꞋ ɡʉ ŋ́kúu ndɑ́tsɑ́ŋ, mbɔɔ wɔ́p jʉ́ɔ, ḿbɛn nzʉʉ ɛ́sẅíi pʉɔ pi pɔ́p lɑ́Ꞌnɛ ńtúu wɔ́p ŋɡɔ:

²³ «Pɛk ɡʉ tɛ ŋ́kúu zúꞋu, ńjʉ́ɔ mɛtsu-ndɑ́tsɑ́ŋ tsuŋ ḿbɔ́ mɛ́ jʉ́ɔꞋnɛ. Pɑpyɛ́p zʉꞋ kɛ́ ńtʉ́ʉ pɔ ntsundɑ́. Pɛk tsɔ́Ꞌ mɛtsundɑ́, ŋ́kúu tsɛtú, ŋ́kɛ́ mbɔɔ ŋu tsɛt ndɑ́ jʉ́ɔ.»

²⁴ Tɑ́tndɑ́-pɑpyɛ́p ZʉꞋ-nɔŋpɔꞋ pɔ́p pɛtɑ́tndɑ́-pɑnɔŋpɔꞋ zúꞋ yɔ nu ɛ́ kʉꞋnɛ wɔ́p. Pɔ́p pɔɔ jí yúu mi ɛ́ lɑ́Ꞌnɛ ŋ́ɡɛ ɡɑŋntúu-Yɛ́su pɔ́.

²⁵ Wɛcɔ́ tɑ́Ꞌ ŋu ɡɔ́ɔ ńjɛ́Ꞌ ŋ́kúu ndɑ́, ńcú ŋɡɔ: «Pʉɔ pɑ́ pi pʉʉ kɑ níꞋnɛ wɔ́p ndɑ́tsɑ́ŋ lɑ́, pʉʉ jí ŋɡɔ pɔ́p ndǔ zɑ́n ZʉꞋ-nɔŋpɔꞋ, ḿbɔ́ ńzíꞋ lɑ́Ꞌ nɛ́ yúu.»

²⁶ Tɑ́tndɑ́-pɑpyɛ́p zʉꞋ pɔ́p pʉɔ pɛ́ ɡʉ nɛlɔk wɔ́p ńtɔ́. Lɑ́ ŋ́kɛ́ ḿbɔɔ lɔk tʉʉ ŋ́ɡẅɛɛ wɔ́p pɔ́. MbíꞋŋɡɔ lɑ́Ꞌ kɑ pɔ́ zúꞋu tɛꞋ. Pɔ́p pɔ́ ḿbɔ́k pɑ́Ꞌ pɛ́ ɡʉ ńdɔk mɛŋɡɔꞋ ńtɛ́mtɛ wɔ́p ńjẅítɛ.

²⁷ Pɔ́p lɔk pɑpɛ́m Yɛ́su ńtɔ́, ńtík wɔ́p mbi pɑsɑ́Ꞌlɑ́Ꞌ. Tɑ́tndɑ́-pɑnɔŋpɔꞋ píkŋɛ wɔ́p ŋɡɔ:

²⁸ «Pɛk ŋkɑɑ tɔꞋ wʉ́ʉ nɛpɛn ńzíꞋ nu-ŋu wɑ́ mbɔ̌ pʉɔ pɔɔ? Pʉʉ pɛn ńdɔk nu yɛ́ ɛ́sɑt Yɛlúsɑlɛm tsʉʉ. Pʉʉ kɑ lɔɔ pɑꞋnɛ ŋɡɔ pɛ́ ɡɔ́ pɛk jí nu nǔu nɛvú wɛ pɔ́ ɔɔ?»

²⁹ Lɑ́ Pyɛ̂ pɔ́p pɛcɔ́ ɡɑnŋtúu pʉ̈ɔt ŋɡɔ: «Ɛ́ píkŋɛ ŋɡɔ pɛ́ zúꞋ ntsu-Sɛ́, ńtsɑ nɛzúꞋ ntsu-pʉɔmɛsɔŋ.

³⁰ Sɛ́-pɛmɑ̂ɑŋɡɑpnjẅɛt pɛkŋɛ, kɑ ɡɛ Yɛ́su ẅí pʉʉ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́, zẅíimɛ nǔu nɛvú.

³¹ Sɛ́ kɑ ɡɛ ɑ kɔ́Ꞌ nɛ́ tʉ́nɛpú, ɑ tsẅíkŋɛ wɛ́ nǔu ɡúŋ-pɔ́ yɛ́ yi tʉʉ, pɔ́Ꞌɔ, ńdɔk wɛ́ ŋ́ɡɛ fɔɔ, ḿbɛn ńdɔk wɛ́ ŋ́ɡɛ Nzɑ́Ꞌŋkʉ. Sɛ́ kɑ ɡɛ pɔ́Ꞌɔ, nɛpɔ́ yi pʉɔ-Íslɑyɛ̂l ɡʉ kúpmɛ mɑt wɔp, ɑ likŋɛ mɛnu kɛpɔŋ mɔ́p.

³² Pɛk cú pɑ́Ꞌɑ ḿbɔ́ pɑjʉ́ ńjʉ́ɔ nǔu mɔnɛ mɛnu. Zẅikŋɛ Lɛ́ɛnɛ́nɛ yi Sɛ́ sɛ́ ŋ́ɡɑ́ mbɔ̌ pʉɔ pi pɔ́p sɛ́ ńzúꞋ ntsu wɛ́ tsʉ́ʉnɛ́nɛ wɛk nɛcú.»

³³ Pɛkɛ́m zúꞋ pɑ́Ꞌ pɔ́p cúnɛ pɔ́Ꞌɔ, ńzɑ́ŋ lɔ́ŋ, ńzɛ nɛkwɑŋɛ nɛjẅí ɡɑŋntúu-Yɛ́su.

³⁴ Lɑ́ wɛcɔ́ ŋu wɔp, pɛ́ fúŋnɛ wɛ́ ŋɡɔ Ŋɡɑmɑlíyɛ̂l, lɔ sɛ́ ńcú ŋɡɔ pɛ́ ɡɛ ɡɑŋntúu nɑ́Ꞌ ńcẅɛt píi. Pɔ́Ꞌɔ, ḿbɔ́ ŋu tsɛt nɔɔ-pɑfɑlísɑy, ḿbɔ́ ndʉ́m nǔu nɛkyɛ́Ꞌtɛ nɛpʉ́ʉ-Mɔ̌sɛ̂ɛ, lɑ́Ꞌ ɡɑ́ mɛkuꞋ mɛ́ tɛꞋ.

³⁵ Gɑŋntúu-Yɛ́su cẅɛt, Ŋɡɑmɑlíyɛ̂l cú ŋɡɔ: «Pɑíslɑyɛ̂l, pʉʉ lɑk tú yʉ́ʉ nǔu nu yí pʉʉ lɔɔnɛ nɛɡɛ nǔu pʉɔ pɑ́lɑ́.

³⁶ Pʉʉ kẅíitɛ pɑ́Ꞌ Tɛdɑs kɑ kwɑŋɛ ŋɡɔ ɑ ŋu tɛꞋ ńcẅɛt, ńcúꞋlɛ pʉɔ yúu ŋkʉ yɛ́nɛ́kwɑ nǔu yɛ nɔɔ, pɛ́ jẅí wɛ́, pɔ́p sɑtnɛ tɛ ḿmɛ, ɛ́sɑt zʉꞋ.

³⁷ Ɛ́ lɑ́Ꞌ ḿbɔ́ ŋkɑ́ yi pɛ́ kɑ pɔ́ ɛ́sɑ́ŋ lɑ́Ꞌ, Jẅidɑ ŋu-Ŋɡɑlilɛɛ cẅɛt yɛ́ ɡúu. Pɛ́ cʉ́ɔ nzʉʉ yɛ́ tɛꞋ. Pɛ́ pɛn ńjẅí wɛ́ ɡúu, pʉɔ pɛ́ tɑ́kŋɛ ɛ́sɑt zʉꞋ, Yɔ́p mɛ.

³⁸ N dɔk pɑ́Ꞌɑ ɛ́sẅíi wʉ́ʉ ŋɡɔ, pʉʉ nɑ́ pʉɔ pɑ́lɑ́, pɔ́p ɡʉ, mbíꞋŋɡɔ yúu mi pɔ́p kíɛnɛ ziꞋnɛ nǔu lɑɑ fú pɔ mbɔ̌ pʉɔmɛsɔŋ, ḿbɔ́ yúu mi pɔ́p niitɛ́nɛ, ɡʉ ńdɔk pɔ ndɑ̌ɑ ndɑɑ ḿmɛ.

³⁹ Ŋ́kɛ́ ɛ́fú mbɔ̌ Sɛ́, mbɔ ɛ́ lɑɑ ḿbɔ́ pʉʉ pɔɔ kuꞋ nɛtɑ́k pɔ́. Pʉʉ pɑ́ɑ pɑ́Ꞌ ɛ́ lɑɑ ḿbɔ́ pʉʉ lʉ́ɔꞋ Sɛ́ nɛ́ ntsɔ.» Pɔ́p pɛ́m nu yi Ŋɡɑmɑlíyɛ̂l cúnɛ,

⁴⁰ ɛ́fúŋ ɡɑŋntúu-Yɛ́su, ńcú pɛ́ lɔk ŋɡwɑɑ ńtswɑ́ɑ wɔ́p. Pɔ́p tɔꞋ wɔ́p nɛpɛn ńdɔk lík-Yɛ́su ńcú nu, ŋ́ɡɛ ńnɑ́ wɔ́p pɔ́p ɡʉ.

⁴¹ Pɔ́p ɡɔ́ ɛ́fú tsɛt cúꞋlɛ-pɑsɑ́Ꞌ lɑ́Ꞌ ńcẅɛt, ńnɛn ńtsɑ́ɑtɛ tsɑ́ɑtɛ́nɛ. MbíꞋŋɡɔ Sɛ́ jʉ́ɔ ŋɡɔ pɔ́p kuꞋ nɛjʉ́ɔ ŋɡʉ̈ɔ́Ꞌ ntɛ́ nu-lík-Yɛ́su.

⁴² Pɔ́p ɡʉ pɔ́Ꞌɔ, ḿbɔ́ lɛ́Ꞌ tsʉʉ tsɛt ZʉꞋ-nɔŋpɔꞋ, mbɑ tsɛt mɛndɑ́ mɛndɑ́, ḿbɔ́ ńzíꞋ pʉɔ nɛ́ yúu, ḿbɔ́ ɛ́sɑ́Ꞌ Ŋkʉʉ Sʉ́Ꞌnɛ, ńcú ŋɡɔ Yɛ́su Nzɑ́Ꞌŋkʉ ẅí Sɛ́ kɑ kɑꞋnɛ.