ŊwɑꞋnɛ-Gɑŋntúu Yɛ́su Kɛlístɔ 15 - Kɑɑ Fí

Pɛ́ cúꞋlɛ Yɛlúsɑlɛm nɛlíŋɛ nu nǔu pʉɔ-Kɛlístɔ pi pɔ́p kɑ́ pɔ́ pɑyúdɑ pɔ́

¹ Pɛcɔ́ pʉɔ ɡɛ ɛ́fú Judɛ̂, ńtɔ́ Antíyɔshɛ, ńzɛ nɛzíꞋ pʉɔ-Kɛlístɔ ŋɡɔ Sɛ́ lɑɑ ḿbɔ́ ɑ pɔɔ ɡɛ pɔ́p luk kɛ́ pɔ́ yi pɛ́ púꞋ wɔ́p pɑ́Ꞌ nɛpʉ́ʉ-Mɔ̌sɛ̂ɛ sɛ́ ḿbíkŋɛ pɔ́.

² Pɔ̂l pɔ́p Pɑnɛpɑ́ɑshi lʉꞋ. Pɔ́p pɛ́ pɔ́p zɛ ńzɔŋ, ŋ́kɛ́ mbɔɔ pɔ́ tɑ́Ꞌ ntsu pɔ́. Ɛ́ lɛɛ wɔ́p tɛ pɔ́p ɡɑɑpɛ tsɛtsɛt, pɔ́p tsʉʉ zɑ́p ŋɡɔ, ɛ́ lɑɑ ḿbɔ́ Pɔ̂l pɔ́p Pɑnɛpɑ́ɑshi, ŋ́ɡɛ pɛcɔ́ ntɑ́Ꞌpʉɔ ɡʉ Yɛlúsɑlɛm, ńjʉ́ɔ pɑpɛ́m Yɛ́su pɔ́p pɑcẅɛ́ɛ mbi tsɛt cúlɛ-pʉɔ-Kɛlístɔ nɛpɔ́ yi pɔ́p pɛ́ pɔ́p ɡʉ ɛ́sɑ́ŋ nu ŋ́ɡɑ́ nǔu.

³ Cúlɛ-pʉɔ-Kɛlístɔ yi Antíyɔshɛ ɛ̂wɑ́ ɡɑ́ yúu mi ɛ́ sɛ́ ḿbíkŋɛ mbɔ̌ pɔ́p nɛlɔk ńcʉ́ɔ sɛ̂ndúŋ. Pɔ́p lɛɛ tsɛt pɑk-ŋɡɔŋ-Fɛnisîi, mbɑ tsɛt wɛ Sɑmɑlîi, ńnɛn ḿbɔ́ ńcú mbɔ̌ pʉɔ-Kɛlístɔ pɛ́ zúꞋu ŋɡɔ pʉɔ pi pɔ́p kɑ́ pɔ́ pɑyúdɑ pɔ́ kɑ kɛ́ mɔ́ shɔtnɛ tɛ ńtsʉ́Ꞌ ḿbɔ́ pɔ nzʉʉ Tsɑpʉɔ, pɔ́ɔpɛ́mɑ́ zúꞋ ńtsɑ́ɑtɛ tɛꞋ.

⁴ Pɔ́p ɡʉ tɛ ŋ́kúu Yɛlúsɑlɛm, ɡɑŋntúu-Yɛ́su pɔ́p pɑcẅɛ́ɛ mbi tsɛt cúlɛ-pʉɔ-Kɛlístɔ mbɑ pʉɔ-Kɛlístɔ tsʉʉ kúkŋɛ wɔ́p. Pɔ̂l pɔ́p Pɑnɛ́pɑ́ɑshi pɛ́ɛtɛ mbɑ kʉ̈ɔ́ lɑ́ yi Sɛ́ kɑ lɔknɛ wɔ́p ŋ́ɡɛ, ɛ́sẅíi wɔ́p.

⁵ Lɑ́ pɛcɔ́ ntɑ́Ꞌ pɑfɑlísɑy, pi pɔ́p zɑ́pnɛ tʉ́m yɔ́p nǔu Yɛ́su, pɔ́ ŋ́kẅiꞋ yɔ́p pɔ ŋɡɔ: «Ɛ́ píkŋɛ ŋɡɔ pɛ́ púꞋ pʉɔ pi pɔ́p ɡɔ́ ńzɑ́p tʉ́m yɔ́p nǔu Yɛ́su, ḿbɔɔ pɑyúdɑ pɔ́, ḿbɛn ḿbíkŋɛ ŋɡɔ pɛ́ cú mbɔ̌ pɔ́p ŋɡɔ pɔ́p nɛn pɑ́Ꞌ nɛpʉ́ʉ-Mɔ̌sɛ̂ɛ sɛ́ ḿbíkŋɛ.»

⁶ Pɔ́p cú pɔ́Ꞌɔ, pɑpɛ́m Yɛ́su, pɔ́p pɑcẅɛ́ɛ mbi tsɛt cúlɛ-pʉɔ-Kɛlístɔ nɑ́ŋ sɛ́ nɛlíŋɛ nu ŋ́ɡɑ́ nǔu,

⁷ ńdɑ́Ꞌ ŋ́kwɑŋɛ, ɛ́ tɛn tɛnnɛ. Tɛ Pyɛ̂ lɔ sɛ́ ńcú ŋɡɔ: «Pɔ́ɔpɛ́mɑ́, pʉʉ sɛ́ ńjí yʉ́ʉ pɑ́Ꞌ Sɛ́ kɑ tsɔ́Ꞌnɛ wɑ́ɑ tsɛtsɛt pʉʉ tɛ ntí sɑk ŋɡɔ ŋ ɡʉ ńcẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ mbɔ̌ pʉɔ pí pɔ́p kɑ́ pɔ́ pɑyúdɑ pɔ́ pɑ́Ꞌ pɔ́p ɡʉ ńzúꞋ ńzɑ́p tʉ́m yɔ́p nǔu Yɛ́su.

⁸ Sɛ́ ẅi ɑ jínɛ tʉ́m pʉɔtsʉʉ, lɑ nyɛt ŋɡɔ ɑ pɛ́m ŋɡɔ pɔ́p pʉɔ pɛ́, ńtúu Zẅikŋɛ yɛ́ nǔu pɔ́p ɛ́ jʉ́ wɔ́p ɡúu. Pɔ ndʉ́ŋndʉŋ pɑ́Ꞌ ɑ kɑ túunɛ nǔu pɛkŋɛ ɛ́ jʉ́ wɛkŋɛ.

⁹ Sɛ́ ŋ́kɑɑ kɛ́ ŋ́ɡɛ yɛcɔ́ sɑ̌ɑ tɔŋ tsɛtsɛt pɛk pɛpɔ́p pɔ́. A kɑ lɛɛ nǔu pɑ́Ꞌ pɔ́p zɑ́pnɛ tʉ́m nǔu Yɛ́su, ɛ́suk nu kɛpɔŋ tʉ́m pɔ́p.

¹⁰ Ŋkɔ̂ɔnɛ, pʉʉ pɛn ŋ́ɡɛ ŋɡɔ́ku ḿbɔ́ ŋ́kwɑꞋlɛ Sɛ́? Pʉʉ lɔɔ nɛtíi piꞋ yi pɛtɑ́t pɛkŋɛ ŋ́kɑɑ ŋ́kuꞋ nɛtíi pɔ́, kwɑꞋ pɛkŋɛ pɛn ḿbɔɔ nǔu kuꞋ, ńzɑ́p tú pɔ́p kɛkʉ̈ɔ́?

¹¹ Yúu mi pɛkŋɛ pɛ tsʉʉ sɛ́ ńniitɛ ńjí, ɛ́ pɔ́ pɔ ŋɡɔ pɛkŋɛ kɑ ɡɔ́ ńduk, ńtẅɛꞋ pɔ pɑ́Ꞌ Tsɑpʉɔ Yɛ́su ɡɑ́nɛ fuꞋ níinɛ yɛkŋɛ. Ɛ́ pɔ́ pɔ ndʉ́ŋndʉŋ pɑ́Ꞌ ɛ́ lɛɛnɛ pɔ́Ꞌɔ, lɑ pɔ́p luk yɔ́p.»

¹² Pyɛ̂ cú tɛ ḿbɔ́tnɛ ńnɑ́ŋ, pʉɔ tsʉʉ nɑ́Ꞌ. Pɛ́ tsʉ́Ꞌ ńzẅíꞋlɛ pɔ nu yi Pɑnɛpɑ́ɑshi pɔ́p Pɔ̂l cúnɛ. Pɔ́p pɔ́ ḿbɛ́ɛtɛ mɛnu mɑ̌ɑmɑɑnɛ pɔ́p mɛŋkʉꞋnɛ mɛnu mi Sɛ́ kɑ lɔknɛ wɔ́p ŋ́ɡɛ, tsɛtsɛt pʉɔ pí pɔ́p kɑ́ pɔ́ pɑyúdɑ pɔ́, ɛ́sẅíi wɔ́p.

¹³ Pɔ́p pɛ́ɛtɛ tɛ ḿbɔ́tnɛ ńnɑ́ŋ, Jɑ̂k cú yɛ́ ŋɡɔ: «Pɔ́ɔpɛ́mɑ́ pɑ́ɑ, pʉʉ zẅíꞋlɛ nu yi mɔ ńcú.

¹⁴ Símɔ lɔ sɛ́ nɛkẅíitɛ wɛkŋɛ nɛ́ nu yí Sɛ́ kɑ ɡɛnɛ nǔu pʉɔ pí pɔ́p kɑ́ pɔ́ pɑyúdɑ pɔ́. Yîyɑ́ nu pɔ́ ŋɡɔ tɛ ɛ́fú nzɛnɛ, Sɛ́ zɑ́p ŋɡɔ ɑ ɡʉ ŋ́ɡʉ tsɛtsɛt pʉɔ pí pɔ́p kɑ́ pɔ́ pɑyúdɑ pɔ́, ńtsɔ́Ꞌ pʉɔ ńdɔk ŋ́ɡɛ pʉɔ pí pɔ́p pɛ́.»

¹⁵ Yúu ɛ́ lɛɛnɛ lɔk ńcẅɛ́Ꞌnɛ nɛ́ nu yí Tsɑpʉɔ kɑ lɑ́Ꞌnɛ ńdɔk ntsu-pɛŋɡɛ́mndʉ̈ɔ́Ꞌ pɛ́ ńcú. Pɛ́ kɑ ŋwɑꞋnɛ ŋɡɔ:

¹⁶ Ntí ɡʉ ŋ́ɡɛ sɑk, m bɛn ńtɔ́. Ḿbɛn ŋ́kút ndɑ́-fɔɔ Ndɑvît yi ɛ́ kɑ vunɛ. Mɔ ńdɑ́Ꞌ ḿbɛn ḿbʉꞋ ndɑ́ yɛ yi pɛ́ kɑ kɛmnɛ tɛ ɛ́ tʉ́ʉ tʉ́ʉnɛ.

¹⁷ Pʉɔ pí pɔ́p kɑ́ pɔ́ pɑyúdɑ pɔ jʉ́ɔ pɔ́Ꞌɔ, ńdɔɔ Tsɑpʉɔ. Ɔ́ɔŋ, n cú túu nɛ́ túu yi mɔ ŋ́ɡɛ ɛ́fúŋ wɔ́p ŋɡɔ pɔ́p tsʉ́Ꞌ pʉɔ pɑ́ɑ. Mɔ Tsɑpʉɔ Sɛ́ cúnɛ pɔ́Ꞌɔ. A lɔk pɑ́Ꞌɑ ŋ́ɡɛ mɛnu mí ɑ kɑ zɑ́pnɛ.

¹⁸ Ɛ́ pɔ́ mɛnu mí ɑ kɑ lɑ́Ꞌmɔ́ ŋ́ɡɛ pɛ́ jí.

¹⁹ Jɑ̂k pɛn ńcú ŋɡɔ: «Pɔ́Ꞌɔ lɑ́, Ŋ kwɑŋɛ yɑ́ɑ ŋɡɔ kɔɔ pɛ́ ɡɑ́ɑnɛ pʉɔ pí pɔ́p kɑ́ pɔ́ pɑyúdɑ pɔ́ tɛ ɛ́ tsɑ. N cú pʉɔ pí pɔ́p zɑ́pnɛ tʉ́m yɔ́p nǔu Sɛ́.»

²⁰ Lɑ́, ɛ́ pɔŋ ŋɡɔ pɛkŋɛ ŋwɑꞋnɛ pɔ ndɑꞋ ŋwɑꞋnɛ ńdɔk ńcú mbɔ̌ pɔ́p ŋɡɔ: Pɔ́p pɑ́ɑ nɛkwɛ́t pfuꞋ-mbɑp yi pɛ́ lɔknɛ ńnɔŋ pɔꞋ. Ŋɡɔ pɔ́p pɑ́ɑ nɛkwɛ́t mbɑp-nɑɑ ẅí pɛ́ fɛ́mɛ wɛ́ fɛ́mɛ́nɛ. Ŋɡɔ pɔ́p pɑ́ɑ mbɑ nɛkwɛ́t mɛci nɛ́ɛnɛ. Ŋɡɔ pɔ́p pɑ́ɑ nɛcẅɛꞋnɛ mbɑ wɔ̌ lɑ́ pɔ́p pɛ́pɔ́p nɔɔ nɔɔnɛ.

²¹ KwɑꞋ nɛ́nẅín tɛ ɛ́fú mɛŋɡuꞋ mɛŋɡuꞋ, ŋ́kúu lɔ́Ꞌnɛ, pɛ́ lɔ ńjúk pɔ nɛsɑ́Ꞌ nɛpʉ́ʉ-Mɔ̌sɛ̂ɛ tsɛt mɛtʉ́sɔŋ mbɑ tsɛt ŋɡɔŋ mɛlɛ́Ꞌnji-pɑyúdɑ tsʉʉ. Pɛ́ fúŋ pɔ nînɑ́ nɛpʉ́ʉ tsɛt mɛndɑ́-cúꞋlɛ mɔ́p.

ŊwɑꞋnɛ yí pɛ́ ŋwɑꞋnɛnɛ ŋ́ɡɑ́ mbɔ̌ pʉɔ-Kɛlístɔ pí pɔ́p kɑ́ pɔ́ pɑyúdɑ pɔ́

²² Gɑŋntúu-Yɛ́su, pɔ́p pɑcẅɛ́ɛ mbi ŋ́ɡɛ ŋɡɔŋ mɛcúꞋlɛ-pʉɔ-Kɛlístɔ tsʉʉ mi ɛ́ Yɛlúsɑlɛm ɡɔ́ɔ ŋ́kɛ́ ńzɑ́p ŋɡɔ ɛ́ pɔŋ pɛ́ ɡʉ tsɛtsɛt pɔ́p, ńtsɔ́Ꞌ pɛcɔ́ ntɑ́Ꞌpʉɔ, ńtúu wɔ́p pɛ́ Pɔ̂l pɔ́p Pɑnɛpɑ́ɑshi Antíyɔshɛ. Ŋkwɑŋɛ pɔ́Ꞌɔ ńtsɔ́Ꞌ Jẅidɛ ẅí pɛ́ pɛnnɛ ɛ́fúŋ wɛ́ ŋɡɔ Mbɑlsɑbɑs, ḿbɛn ńtsɔ́Ꞌ Sílɑs. Pʉɔ pɔnɛ pɛ́pɑ́ pɔ́ pʉɔ pi pɔ́p cúnɛ nu pɛ́ zúꞋ.

²³ Pɛ́ ɡɛ ŋwɑꞋnɛ yí pɔ́p ɡʉ ńdɔk ŋ́ɡʉ, ŋ́ŋwɑꞋnɛ tsɛtú ŋɡɔ: «Pɛk pɑpɛ́m Yɛ́su, pɔ́p pɑcẅɛ́ɛ mbi tsɛt cúlɛ-pʉɔ-Kɛlístɔ Yɛlúsɑlɛm, pɛk pɔ́ɔpɛ́mɑ́ pʉ́ʉ pɛk cɛꞋlɛ wʉ́ʉ pɛtsʉʉ, pʉʉ pɔ́ɔpɛ́mɑ́ pi pʉʉ kɑ́ pɔ́ pɑyúdɑ pɔ́, pʉʉ ẅi pʉʉ ńtswɛ́nɛ tʉ́sɔŋ-Antíyɔshɛ, tɛ mbɑ pɛcɔ́ pʉɔ pí pɔ́p nǔu pɑk-ŋɡɔŋ Siliyɑ, tɛ mbɑ pʉɔ pí pɔ́p nǔu pɑk-ŋɡɔŋ-Silísíyɑ.

²⁴ Pɛk kɑ zúꞋ ŋɡɔ pɛcɔ́ ntɑ́Ꞌpʉɔ kɑ fú tsɛtsɛt pɛk, ńtɔ́ ḿmɑꞋ ntɑ́kŋɛ tsɛtsɛt pʉʉ, ńdɔk sẅiŋɛ yɔ́p ŋ́ɡɛ tɛ pʉʉ pɔɔ kíi ńjí tú yʉ́ʉ pɔ́. Lɑ́ pɛk ŋkɑɑ nɛ zɛɛ ńtúu wɔ́p ŋɡɔ pɔ́p ɡʉ ńcú pɔ́Ꞌɔ pɔ́.

²⁵ Ɛ́ yúu mi ɛ́ ɡɛnɛ lɑ pɛk pɛtsʉʉ cúꞋlɛ ńzɑ́p ŋɡɔ pɛ́ tsɔ́Ꞌ pʉɔ, ńtúu wɔ́p mbɔ̌ pʉʉ. Pɔ́p Pɑnɛpɑ́ɑshi ŋ́ɡɛ Pɔ̂l, pɛtʉʉndɛn pɔ́ɔpɛ́mɑ́ pɛkŋɛ, pɔ́p tɔ́ ńjʉ́ɔ wʉ́ʉ,

²⁶ ɛ́ pʉɔ pi pɔ́p kɑ pɛ́mnɛ nɛpfú ntɛ́ nu-Tsɑpʉɔ wɛkŋɛ Yɛ́su Kɛlístɔ.

²⁷ Pɛk lɔk pɑ́Ꞌɑ ńtúu Jẅidɛ pɔ́p Sílɑs. Pɔ́p ɡʉ ńtʉ́ʉ mbi pʉʉ, ɛ́sẅíi wʉ́ʉ nɛ́ yúu mi pɛk ŋwɑꞋnɛnɛ tsɛt yɔ ŋwɑꞋnɛ.

²⁸ Pɛk zɛɛ ŋ́ɡɔ ńzɑ́p yɔ nu, Zẅikŋɛ Lɛ́ɛnɛ́nɛ pɛn ńzɑ́p yɛ́ ŋɡɔ kɔɔ pɛ́ kẅiꞋ piꞋ mbɔ̌ pʉʉ. NdíꞋ ndɑꞋ nɛniitɛ ŋ́kúꞋlɛ nɔnɛ nɛpʉ́ʉ ni pɛk ɡʉ ńcú lɑɑ kwɑꞋ sʉ́Ꞌnɛ.

²⁹ Pʉʉ pɑ́ɑ nɛkwɛ́t pfuꞋ-mbɑp yi pɛ́ lɔknɛ ńnɔŋ pɔꞋ. Pʉʉ pɑ́ɑ nɛkwɛ́t mbɑp-nɑɑ ẅí pɛ́ fɛ́mɛ wɛ́ fɛ́mɛ́nɛ. Pʉʉ pɑ́ɑ mbɑ nɛkwɛ́t mɛci nɛ́ɛnɛ. Pʉʉ pɑ́ɑ nɛcẅɛꞋnɛ mbɑ wɔ̌ lɑ́ pʉʉ pɛpɔ́p nɔɔ nɔɔnɛ. Pʉʉ lɑɑ ńzúꞋ ntsu wɛk nǔu mɔnɛ mɛnu ŋ́kúꞋlɛ, mbɔ pʉʉ ɡɛ sʉ́Ꞌnɛ. Pɛk pɔ́ɔpɛ́mɑ́ pʉ́ʉ, pɛk cɛꞋlɛ wʉ́ʉ.»

³⁰ Pɛ́ ŋwɑꞋnɛ pɑ́Ꞌɑ, ńdɔk ńtúu pʉɔ pɔ. Pɔ́p ɡʉ ŋ́kúu tʉ́sɔŋ-Antíyɔshɛ, ńcúꞋlɛ pʉɔ-Kɛlístɔ pɛtsʉʉ, ŋ́ɡɑ́ ŋwɑꞋnɛ mbɔ̌ pɔ́p.

³¹ Pɔ́p pɔ́ tɛ ɛ́fúŋ yîyɑ́ ŋwɑꞋnɛ, ɛ́ níꞋ mɛtʉʉ mɔ́p. Pɔ́p tsɑ́ɑtɛ pɑ́ꞋtɛꞋ.

³² Pɑ́Ꞌ Jẅidɛ pɔ́p Sílɑs ḿbɔ́nɛ pʉɔ pi pɔ́p nɑ́ŋnɛ ńcẅi Ŋkʉʉ ẅi ɛ́ fúnɛ mbɔ̌ Sɛ́ lɑ́, pɔ́p pɛ́ pɔ́p pɛn sẅiŋɛ pɑ́ꞋtɛꞋ. Pɔ́p niitɛ ńníꞋ mɛtʉʉ mɔ́p, ńtɔ́ɔtɛ wɔ́p pɔ́p tɛntɛ.

³³ Pɔ́p pɛ́ pɔ́p pɛn ńnɑ́Ꞌ ńnɑ́ŋ tʉ́sɔŋ-Antíyɔshɛ. Pɔ́p ɡɛ ŋ́ɡɔ ŋ́ɡʉ, pɔ́ɔpɛ́mɑ́ niitɛ ńdɛɛmɛ wɔ́p. Ŋɡɔ pɔ́p nɛn nɛ́ ku sʉ́Ꞌnɛ, nɛpɛn ŋ́kẅɛ́ɛtɛ pʉɔ pí pɔ́p kɑ túunɛ wɔ́p.

³⁴ [Lɑ́ Sílɑs zɑ́p pɔ ŋɡɔ ɑ ɡʉ ŋ́ɡɔ́ŋ Antíyɔshɛ.]

³⁵ Pɔ̂l pɔ́p Pɑnɛpɑ́ɑshi tsʉ́Ꞌ ńnɑ́ŋ yɔ́p pɔ zúꞋu. Pɔ́p nɛzɑ́ɑ pʉɔ pɔ́ ŋ́kɑ́t ńzíꞋ pʉɔ nɛ́ yúu, ḿbɛn ḿbɔ́ ńcẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ-Tsɑpʉɔ.

Pɔ̂l pɔ́p Pɑnɛpɑ́ɑshi fɑkŋɛ

³⁶ Ɛ́ nɑ́Ꞌ ńnɑ́ŋ mɔ́zʉꞋ, Pɔ̂l cú mbɔ̌ Pɑnɛpɑ́ɑshi ŋɡɔ: «Pûu pɛn nzʉʉ, ńdíŋɛ pɔ́ɔpɛ́mɑ́ pi pɔ́p tsɛt mɛtʉ́sɔŋ mí pûu kɑ lɛɛnɛ zúꞋu ɛ́sẅíi nu-Tsɑpʉɔ, ńdíŋɛ ńjʉ́ɔ pɑ́Ꞌ pɔ́p kɑ tsʉ́Ꞌnɛ ḿbɔ́.»

³⁷ Ŋ́ɡɔ́ ḿbɔ́ mbɔ Pɑnɛpɑ́ɑshi ḿbɔ́ ŋ́kɔŋ ŋɡɔ pɔ́pmɛ lɔk Jɑ̂ŋ ẅí pɛ́ pɛnnɛ ɛ́fúŋ wɛ́ ŋɡɔ Mɑ́lɛ́kúshi lɑ́ ŋ́ɡʉ.

³⁸ Lɑ́ Pɔ̂l pɔɔ ŋ́kɔŋ pɔ́Ꞌɔ pɔ́, mbíꞌŋɡɔ ɑ kɑ lɑ́Ꞌ ḿmɛꞋ wɔ́pmɛ Pɑnfílî. Jɑ̂ŋ Mɑ́lɛ́kúshi ŋkɑɑ pɛn ńcʉ́ɔ nzʉʉ pɔ́p pɔ́p pɛ́pɔ́p fɑꞋ fɑꞋ pɔ́.

³⁹ Pɔ̂l pɔ́p Pɑnɛpɑ́ɑshi zɔŋ zɔŋnɛ, ḿbɔɔ zúꞋnɛ, ɛ́ tɛn ŋ́ɡɔ́ ńdẅiklɛ tsɛtsɛt pɔ́p fɑkŋɛ. Pɑnɛpɑ́ɑshi lɔk Jɑ̂ŋ Mɑ́lɛ́kúshi ŋ́ɡʉ. Pɔ́pmɛ kúu mɑ́mɑ́ kɑnúꞋ ŋ́ɡʉ nɛ́ Shíipɛlɛ.

⁴⁰ Pɔ̂l tsʉ́Ꞌ ńtsɔ́Ꞌ yɛ́ Sílɑs, pɔ́pmɛ ɡɔ́ ŋ́ɡʉ, pɔ́ɔpɛ́mɑ́ fɛ́ɛ wɔ́p mbɔ̌ Tsɑpʉɔ ŋɡɔ ɑ cẅɛ́lɛ́ wɔ́p.

⁴¹ A jɛ́Ꞌ wɛ Siliyɑ pɔ́p Silísî, ńnɛn ńníꞋ mɛtʉʉ mɛndɑ́-cúꞋlɛ nǔu nɛniitɛ ńzɑ́p tʉ́m yɔ́p nǔu Tsɑpʉɔ.