3 Jɑ̂ŋ 1 - Kɑɑ Fí

CɛꞋlɛ

¹ Mɔ ńcẅɛ́ɛmbi tsɛt cúꞋlɛ-pʉɔ-Kɛlístɔ, ŋ ɡɑ́ yɔ ŋwɑꞋnɛ mbɔ̌ ɡu Gɑẅîs, súu wɑ́ɑ wɛ tʉʉndɛn. Ŋ kɔŋ wú mbíꞋŋɡɔ pûu tɛmtɛ ńtʉ́ʉ nǔu nu nɛ́nẅín.

² Súu wɑ́ɑ wɛ tʉʉndɛn, mɔ sɛ́ ńtsɑ́ɑ ŋɡɔ ɔ zúꞋ sʉ́Ꞌnɛ nǔu mbɑ kʉ̈ɔ́ lɑ́, sɔŋ-mbʉʉ wú tɛntɛ pɑ́Ꞌ ɔ sɛ́ ńtɛntɛ nǔu nu-Kɛlístɔ lɑ́.

³ Nu kɑ zɛɛ ḿbɔŋ wɑ́ɑ tɛꞋ, mbíꞋŋɡɔ pɛcɔ́ pɔ́ɔpɛ́mɑ́ pɛkŋɛ kɑ tɔ́ zɑꞋnɛ, ɛ́sẅíi wɑ́ɑ ŋɡɔ ɔ lɑt mɔ́ mbʉʉ yu nǔu nu nɛ́nẅín, ḿbɛn ḿbɔ́ ńnɛn zúꞋu pɔ pɑ́Ꞌ ɛ́ sɛ́ ḿbíkŋɛ.

⁴ Yɑ́ɑ mɑ́mɑ́ tsɑ́ɑtɛ ɛ́ pɔ́ pɔ nɛzúꞋ ŋɡɔ mbɔ́ŋkʉ̈ɔ́ pɑ́ɑ sɛ́ ńnɛn pɔ pɑ́Ꞌ nu nɛ́nẅín sɛ́ ḿbíkŋɛ.

Gɑẅîs jí pɔ ndɑꞋ nu-Yɛ́su

⁵ Súu wɑɑ wɛ tʉʉndɛn, ɔ jí yú pɔ ndɑꞋ Kɛlístɔ, ɔ cẅɛ́lɛ́ pɔ́ɔpɛ́mɑ́ tɛ mbɑ pi pɔ́p pɔ́ pɔ pɛɡʉʉ.

⁶ Pɔ́p kɑ tʉ́ʉ tsɛt cúꞋlɛ-pʉɔ-Kɛlístɔ, ɛ́sẅíi pʉɔ pɑ́Ꞌ ɔ kɑ kɔŋnɛ wɔ́p pɔ́Ꞌɔ, ŋ́ɡɑ́ wɔ́p nɛ́ yúu mi ɛ́ ɡʉ ńcẅɛ́lɛ́ wɔ́p sɛ̂ndúŋ, ńjí ŋɡɔ pɔ́p ɡʉ ńnɛn nǔu ntɛ́ yi ɛ́ sɛ́ ḿbíkŋɛ ŋɡɔ pɑfɑꞋ fɑꞋ-Sɛ́ nɛn pɔ́Ꞌɔ.

⁷ MbíꞋŋɡɔ pɔ́p cʉ́ɔ sɛ̂ndúŋ pɔ nɛlɔɔ fɑꞋ-Kɛlístɔ, ḿbɛn ŋ́kɛ́ mbɔɔ ḿbɔ́ ḿbɛ́m nɛcẅɛ́ɛ yúu mi ɛ́ fúnɛ mbɔ̌ pɑkɛ́jí Sɛ́ pɔ́.

⁸ Pɔ́Ꞌɔ lɑ́, pɛkŋɛ pʉɔ-Kɛlístɔ ɡẅɛɛ nɛcẅɛ́lɛ pɔ́ɔpɛ́mɑ́ pɑ́Ꞌ pîpɑ́, nɛpɔ́ yi pɛkŋɛ pɛpɔ́p ɡʉ ńdɔk ńtɛmtɛ ŋ́ɡɛ nu nɛ́nẅín sɑt zʉꞋ.

⁹ Ŋ kɑ ŋwɑꞋnɛ mɛkɛm-ŋwɑꞋnɛ, ŋ́ɡɑ́ tsɛt yʉ́ʉ cúꞋlɛ-pʉɔ-Kɛlístɔ, lɑ́ Ndyɔtɛlɛ̂f ẅí ɑ kɔŋ nɛzɑ́Ꞌtɛ mbi pʉɔ tsʉʉ lʉꞋ nɛzúꞋ nu yi n cúnɛ tsɛtú.

¹⁰ Ɛ́ yúu mi ɛ́ ɡɛnɛ mɔ ŋ́ɡɛ ńtɔ́ tɛ ŋ́kúu tsɛtsɛt pʉʉ, ŋ́kɛm mɛnu kɛpɔŋ mi ɛ́ ɡɛnɛ, ḿbɛn ɛ́sẅíi pʉɔ nɛ́ sẅiŋɛ kɛpɔŋ mbɑ cɔtnu yi ɑ cúnɛ nǔu pɛk. A kɑ́ ɡɛ pɔ ndɑꞋ pɔ́Ꞌɔ pɔ́, ɑ lʉꞋ nɛkúkŋɛ pɔ́ɔpɛ́mɑ́ pi pɔ́p pɛɡʉʉ, ḿbɛn ńtɔꞋ mbɑ pɛcɔ́ pʉɔ nɛkúkŋɛ wɔ́p, tɛ ɛ́fú tsɛt cúꞋlɛ ńzuŋ pʉɔ pi pɔ́p sɛ́ ńdɔɔ nɛkúkŋɛ wɔ́p.

¹¹ Súu wɑɑ wɛ tʉʉndɛn, pɑ́ɑ nɛpɛ́ɛ fʉꞋ-nu kɛpɔŋ, pɛ́ɛ pɔ fʉꞋ-nu sʉ́Ꞌnɛ. Ŋu ẅí ɑ ɡɛnɛ nu sʉ́Ꞌnɛ ɑ mɔ́ɔ-Sɛ́, ŋu ẅí ɑ ɡɛnɛ nu kɛpɔŋ ɑ kɑ́ jí Sɛ́ pɔ́,

¹² ŋ́ɡʉ nǔu Ndɛlmɛ́tɛ́lẅís, mbɔ mbɑ wɔ̌ lɑ́ kẅíi lík yɛ́ pɔ sʉ́Ꞌnɛ. Ntɛ́ yi ɑ sɛ́ ńdɔk ńnɛn nǔu sɛ̂ndúŋ-nu nɛ́nẅín sɛ́ ńdɛꞋlɛ ŋɡɔ mɛfɑꞋ mɛ́ pɔŋ. Pɛk ɡúu sɛ́ ŋ́kẅíi lík yɛ́ pɔ sʉ́Ꞌnɛ, ɔ pɛn ḿbɔ́ ńjí ŋɡɔ pɛk lɔk ńcú ɛ́sẅíi nu.

CɛꞋlɛ lɔk ndẅiklɛ

¹³ N dɑ́Ꞌ ŋ́ɡẅɛɛ mɛnu tɛ ɛ́ zɑ́ɑ zɑ́ɑnɛ mi m bɔ́ ɛ́sẅíi wú, lɑ́ n jʉ́ɔ ŋɡɔ ŋ kɛ́ ŋwɑꞋnɛ ŋwɑꞋnɛ́nɛ pɔ́.

¹⁴ Mɔ sɛ́ ŋ́kwɑŋɛ nɛtɔ́ ńjʉ́ɔ wú, pûu nɑ́ŋ sɛ́ sẅiŋɛ.

¹⁵ Sɛ́ níꞋ mɔ́fíitɛ tʉ́m ɡu. Pɛsúu pɛkŋɛ pɛ́ zɑꞋnɛ cɛꞋlɛ wú. ŃcɛꞋlɛ pɛsúu pɛkŋɛ pɛ́ zɑ́Ꞌɑ wɛ́mɔ́Ꞌ wɛ́mɔ́Ꞌ.