2 Kɔlɛ̂ŋtɛ 10 - Kɑɑ Fí

Pɔ̂l sɛ́ ńdɛꞋlɛ ŋɡɔ fɑꞋ yɛ́ kɑ́ pɔ́ yɛ́ mɔɔtɛ́nɛ pɔ́

¹ Mɔ Pɔ̂l, ŋ ɡʉ ńdɔk pɑ́Ꞌ Yɛ́su Kɛlístɔ pɔ́tnɛ́nɛ tɛꞋ ḿbɛn ḿbɔ́ ŋɡɑŋ-pɔŋtʉ́m, ɛ́sẅíi wʉ́ʉ nɛ́ tɑ́Ꞌ nu. A kwɑꞋ mɔ pɔ̂l wɑ́ ẅí pɛ́ cúnɛ ŋɡɔ ŋkɑ́ yi mɔ tsɛtsɛt pʉʉ, n nẅɛɛ nẅɛɛnɛ, ŋ́kɛ́ ḿbɔ́ ŋkɑ́ yi ŋ ɡʉnɛ ŋɡɑ sɛsɑ, ńcú nu mbɔ̌ pʉʉ tsɛt ŋwɑꞋnɛ kɛ́ pɔ́k lɑ́.

² M búꞋ mbɔ́ mbɔ̌ pʉʉ ŋɡɔ kɔɔ pʉʉ ɡɛ nǔu ntɛ́ yi mɔ ŋ́ɡɛ ńtɔ́ tsɛtsɛt pʉʉ, ńcú nu pɔ nɛ́ cʉ́ɔk. Mɔ ŋ́ɡɛ ŋ́kɛ́ ńcʉ̈ɔ́k pʉɔ pi pɔ́p sɛ́ ńjʉ́ɔ yɔ́p pɔ ŋɡɔ pɛk ŋ́ɡɛ yɛ́k kʉ̈ɔ́ lɑ́ ńdɔk ńdɔɔ pɔ pii pɑ́Ꞌ mbɑ wɔ̌ lɑ́.

³ Pɛk zɛɛ ḿbɔ́ pɔ pʉɔmɛsɔŋ pɑ́Ꞌ pɛcɔ́ lɑ́, yɛk ntɛ́ nɛmɑꞋ ntsɔ kɑ́ ɡɔ́ɔ ḿbɔ́ pɔ yɛ́ pʉɔmɛsɔŋ pɔ́.

⁴ Yúu mi pɛk lɔknɛ ḿmɑꞋ ntsɔ kɑ́ pɔ́ pɔ yɛ pʉɔmɛsɔŋ pɔ́, mɛtʉʉ mi ɛ́ nǔu fú mbɔ̌ Sɛ́, nɛpɔ́ yi pɛk ɡʉ ńdɔk ɛ́sɑt kʉ̈ɔ́ lɑ́ yi ɛ́ tʉʉnɛ tú. Pɛk sɛ́ ńjɔ́Ꞌ mɛkwɑŋɛ mi ɛ́ pɔ́ pɔ mɛ́ cɔtnu.

⁵ Pɛk sɛ́ ńnyɛt ŋɡɔ mɛsẅíŋɛ mi pʉɔ lɔknɛ ŋ́ŋɑ́Ꞌlɛ, ɛ́ pɔ́ ńtɔꞋ pʉɔ nɛjí nu-Sɛ́, ɛ́ kɑ́ pɔ́ yɛcɔ́ nu pɔ́, ɛ́sɑ́Ꞌ tʉʉ ŋ́kúpmɛ yúu mi pʉɔ ɡẅɛɛnɛ tʉ́m pɔ́p, ŋ́ɡɛ pîpɑ́ pʉɔ tsʉ́Ꞌ ńzúꞋ pɔ ntsu-Kɛlístɔ.

⁶ Pɔ́Ꞌɔ lɑ́, pʉʉ sɑ́Ꞌ tʉʉ, ńtsʉ́Ꞌ ńzúꞋ pɔ ndɑꞋ ntsu-Kɛlístɔ nǔu kʉ̈ɔ́ lɑ́, ḿbɔ́ ńjí ŋɡɔ ŋu lɑɑ ŋ́kɛ́ ńtʉʉ tú tʉʉnɛ, ḿbɔ́ pɔ wɔ̌ lɑ́, mbɔ pɛk tʉ́ʉ nɛníꞋ ŋɡʉ̈ɔ́Ꞌ tú yɛ́.

⁷ Pʉʉ sɛ́ ńjʉ́ɔ kʉ̈ɔ́ lɑ́ pɔ nǔu nzɛmpíi. Pɑ́Ꞌ ɛ́ pɔ́Ꞌɔ, ŋu lɑɑ ŋ́kɛ́ ḿbɔ́ ńcú ŋɡɔ ɑ ŋu-Kɛlístɔ, ɑ tsuŋ ńjí ŋɡɔ ɑ lɑɑ ḿbɔ́ ŋu-Kɛlístɔ, mbɔ pɛk pɛn ḿbɔ́ yɛ́k pʉɔ-Kɛlístɔ pɑ́Ꞌ jʉ́.

⁸ Tsɑpʉɔ kɑ zɑ́pnɛ wɛ́k, nɛtʉ́ʉ mbi ńcú nu mbɔ̌ pʉʉ, nɛlɔk ŋ́ɡɛ cúꞋlɛ yʉ́ʉ kẅiꞋ ŋ́ɡʉ pɔ́p nɛ́ mbi, ɛ́ ŋkɑɑ pɔ́ nɛlɔk ńtɑ́k pɔ́. Ɛ́ lɑɑ ńzɛɛ ḿbɔ́ yi mɔ sɛ́ ńdɔk ẅîwɑ́ nɛpɔ́ ŋ́kɑꞋmɛ tɛ ɛ́ lɛɛ, mbɔ ɛ́ lɑɑ ḿbɔ́ sʉ́ʉ pɔɔ wɑ́ɑ kɔ́.

⁹ Ŋ kɑ́ kɔŋ nɛpɔ́ mbɔ̌ pʉʉ, ḿbɔ́ pɔ pɑ́Ꞌ ŋkɑ́ yi ŋ kuꞋ pɔ nɛtʉ́ʉ ŋɡɑ sɛsɑ ŋ́ŋwɑꞋnɛ ŋwɑꞋnɛ ńdɔk vukŋɛ wʉ́ʉ pɔ́.

¹⁰ Mɔ sɛ́ ńjí ŋɡɔ pɛcɔ́ pʉɔ sɛ́ ńcú ŋɡɔ pɔ̂l túu ŋwɑꞋnɛ ńcʉ̈ɔ́k tsɛtú tɛꞋ, ńcú nu ɛ́ tɛn, ḿbɛn ńtɔ́ tɛ ńtʉ́ʉ sɛ́ ḿbɔ́t, nu yí ɑ cúnɛ pɔɔ pɛn ńcʉ́ʉnɛ pɔ́.

¹¹ Pɛɡɑŋ ɡẅɛɛ nɛjí ŋɡɔ, yúu mi pɛk cúnɛ tsɛt ŋwɑꞋnɛ ŋkɑ́ yi pɛk ŋɡɑ sɛsɑ, pɛk ŋ́ɡɛ ńtɔ́ tɛ ńtʉ́ʉ mbi pʉʉ ŋ́kɛ́ ŋ́ɡɛ pɔ yɛ́tɛ́.

¹² Ɛ́ ɡʉ nǔu pʉɔ pi pɔ́p shɔtnɛ ńdɛꞋlɛ pʉɔ pi pɔ́p pɛ́tɛ, mbɔ pɛk kɑ́ ɡẅɛɛ sʉk nɛcú ŋɡɔ pɛk pɑ́Ꞌ pɔ́p pɔ́, ḿbɔ́ pɛk pɔɔ lʉŋtɛ ntí wɛ́k nǔu ntɛ́ pʉɔ ɛ̂pɑ́ pɔ́. Tú yɔ́p kɑ́ tʉ́ʉ. Pɔ́p pɛ́ɛ fʉꞋ wɔp pɔ nǔu pɔ́p, ńdʉŋtɛ mɛmbʉʉ mɔ́p tsɛtsɛt pɔ́p.

¹³ Ɛ́ ɡʉ nǔu pɛk, mbɔ ḿbɔ́ pɛk pɔɔ kɑꞋmɛ tɛ ńjɛ́Ꞌ ndẅiklɛ pɔ́, ńtsʉ́Ꞌ pɔ́Ꞌɔ, pɛk ɡɔ́ ŋ́kɑꞋtɛ ńdɔk pɔ mɛzʉꞋ mi Sɛ́ kɑ ɡɑ́nɛ mbɔ̌ pɛk pɑ́Ꞌ pɛk ɡʉ ŋ́ɡʉ zúꞋu. A kɑ ɡɛ pɛk ɡʉ tɛ ŋ́kúu mbɑ lɑ́Ꞌ pʉʉ.

¹⁴ Pɛk kɑ́ pɔ́ ŋ́ɡʉ ńjɛ́Ꞌ ndẅiklɛ-fɑꞋ yɛ́k pɔ́ pɑ́Ꞌ ŋkɑ́ yi pɛk ŋ́kɑɑ zɛɛ ŋ́ɡʉ tɛ ŋ́kúu lɑ́Ꞌ pʉʉ pɔ́ pɔ́. Pɛk wɔnɛ kɑ piitɛnɛ mbi ńdɔk Ŋkʉʉ sʉ́Ꞌnɛ-Kɛlístɔ ńtɔ́ lɑ́Ꞌ pʉʉ.

¹⁵ Pɛk kɑ́ pɔ́ ŋ́ɡʉ kɑꞋmɛ tɛ jɛ́Ꞌ wɛ́k ndẅiklɛ fɑꞋ, ńdɔk fɑꞋ-pʉɔ pɛndɛꞋ kɑꞋmɛ pɔ́. Pɑ́Ꞌ pʉʉ nǔu wɛ́k ndẅiklɛ fɑꞋ lɑ́, pɛk sɛ́ ńzẅíꞋlɛ ŋɡɔ wʉʉ nɛzɑ́p tʉ́m nǔu Sɛ́ kẅiꞋ ŋ́ɡʉ pɔ nɛ́ mbi. Nu yi pɛk kɑ cúnɛ ɛ́ cʉŋɛ mɛŋɑŋ tsɛtsɛt pʉʉ pɑ́Ꞌ ɛ́ sɛ́ ḿbíkŋɛ.

¹⁶ Pɛk ɡɔ́ɔ ŋ́kɛ́ fú pɔ́Ꞌɔ, ŋ́ɡʉ ńcẅi Ŋkʉʉ Sʉ́Ꞌnɛ nǔu mɛcɔ́ mɛlɑ́Ꞌ mi pɛ́ lɛɛnɛ lɑ́Ꞌ pʉʉ lɑ́ ŋ́kúu zúꞋu, pɛk pɔɔ lɔk fɑꞋ yi pɛcɔ́ pʉɔ kɑ fɑꞋnɛ nǔu yɔ́p ɡúŋ fɑꞋ ńdɔk ŋ́kɑꞋmɛ pɔ́.

¹⁷ Pɛ́ kɛ́ ŋ́kẅíitɛ pɑ́Ꞌ pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ ŋɡɔ: «Ŋu lɑɑ ḿbɔ́ ŋ́kɔŋ nɛkɑꞋmɛ, ɑ lɔk pɔ yúu mi Tsɑpʉɔ ɡɛnɛ ńdɔk ŋ́kɑꞋmɛ».

¹⁸ Ɛ́ lɔk ḿbɔ́ ŋɡɔ ŋu ẅí pɛ́ pɛ́mnɛ nu wɛ́, ɑ kɑ́ pɔ́ ŋu ẅí jʉ́ lɛꞋlɛ́nɛ yúu mi ɛ́ ɡɛnɛ pɔ́. A pɔ́ pɔ ŋu ẅi Tsɑpʉɔ lɛꞋlɛ́nɛ yúu mi ŋɡɑŋ ɡɛnɛ.