1 Timɔtɛ́ɛ 4 - Kɑɑ Fí

PɑzíꞋ nu-Sɛ́ pɛ́ cɔtnu

¹ Zẅikŋɛ Lɛ́ɛnɛ́nɛ sɛ́ ńniitɛ ńcú ŋɡɔ: Pɛcɔ́ pʉɔ ɡʉ ńdɑ́Ꞌ ḿbɔ́ nǔu mɛndẅiknzʉʉ mɛlɛ́Ꞌlɑ́Ꞌ mbɔɔ pɛn ńzɑ́p tʉ́m nǔu Sɛ́ ẅi pɛkŋɛ sɛ́ ńzɑ́p tʉ́m nǔu wɛ́ lɑɑ pɔ́, jínu yɔ́p tsʉ́Ꞌ ńtʉ́ʉ pɔ nǔu mɛzẅikŋɛ kɛpɔŋ mi ɛ́ fúklɛ́nɛ pʉɔ, ḿbɛn ńtʉ́ʉ pɔ nǔu mɛnu mi mɛzẅikŋɛ kɛpɔŋ zíꞋnɛ pʉɔ.

² Ɛ́ lɔk ḿbɔ́ ŋɡɔ mîmɑ́ mɛnu ɡʉ ńdɑ́Ꞌ cẅɛt ntsu-pʉɔ pi pɔ́p cɔtnɛ nu, ḿbɔ́ pɛŋkɔŋmík, mbɔ pɔ́p kɑ sʉk mɔ́ tɛ mbʉʉ yɔp pɔ ńtswɑ́ɑ wɔ́p pɔ́p pɔɔ ŋkii ńzúꞋ pɔ́.

³ Pîpɑ́ pʉɔ sɛ́ ńzíꞋ pʉɔ ŋɡɔ kɔɔ pɔ́p zɔ́Ꞌ, ŋɡɔ kɔɔ pɔ́p kwɛ́t yɛcɔ́ yúupɛ́jʉ́, lɑ mbɔ Sɛ́ kɑ niitɛ́nɛ mîmɑ́ mɛyúu nɛpɔ́ yi pʉɔ pi pɔ́p zɑ́pnɛ tʉ́m nǔu wɛ́, ḿbɔ́ ńjí nu yi ɛ́ nɛ́nẅín, ɡʉ ḿbɛ́ɛ, ŋ́ɡɑ́ pɑ́Ꞌlɑ́ mbɔ̌ wɛ́ nǔu, ńjʉ́.

⁴ Ɛ́ zɛɛ ŋ́ɡɔ ḿbɔ́, mbɑ kʉ̈ɔ́ lɑ́ yi Sɛ́ kɑ niitɛ́nɛ pɔ́ pɔ sʉ́Ꞌnɛ. Yɛcɔ́ yi ḿbɔ́ pɛ́ ḿmɛꞋ nǔu ɛ́ kɑ́ pɔ́ ɡú pɔ́. Lɑ́ ɛ́ kɛ́ ḿbíkŋɛ ŋɡɔ pɛ́ ɡɔ́ ḿbɔ́ ńjʉ́ mîmɑ́ mɛyúu, ḿbɔ́ ŋ́ɡɑ́ pɑ́Ꞌlɑ́ mbɔ̌ Sɛ́.

⁵ Mɛyúu ɛ̂mɑ́ tsʉʉ pɔŋ mbíꞋŋɡɔ Sɛ́ cúnɛ pɔ́Ꞌɔ, pɛ́ pɛn ḿbɔ́ ŋ́ɡɑ́ pɑ́Ꞌlɑ́ mbɔ̌ wɛ́ nǔu.

ŊɡɑŋfɑꞋ sʉ́Ꞌnɛ nzʉʉ Yɛ́su Kɛlístɔ

⁶ Ɔ lɑɑ ḿbɔ́ ńzíꞋ pɔ́ɔpɛ́mɑ́ nɛ mɔnɛ mɛnu, mbɔ ɔ ɡʉ ḿbɔ́ kwɑꞋ ŋɡɑŋfɑꞋ-Yɛ́su Kɛlístɔ. Ɛ́ ɡʉ nǔu kwɑꞋ ɡu, nu Yɛ́su ɡɛ ɔ tsuŋ ńtɛntɛ pɑ́Ꞌ ɔ kúꞋlɛ mɔ́ nu yi pɛk kɑ zɑ́pnɛ tʉ́m nǔu sʉ́Ꞌnɛ mbɑ pɑ́Ꞌ ɔ kɑ zúꞋ nu nɛ́nẅín yi pɛ́ kɑ zíꞋnɛ wú lɑ́.

⁷ Kɛ́ ḿbɑ́ɑ mɛnu mɑ́pítsɔꞋ mi ɛ́ kɛ́ cẅɛ́lɛ́ pɔ́, tɛ ńtsʉ́Ꞌ pɔ́Ꞌɔ, ɛ́ tɔꞋ pɔ pʉɔ nɛzɑ́p tʉ́m nǔu Yɛ́su. Kɛ́ ḿbɔ́ ńzíꞋ pɔ nɛɡɛ yúu mi ɛ́ ḿbɔŋ Sɛ́.

⁸ Ŋu lɑɑ ŋ́kʉɔ ndʉ́ɔlɛ́, mbɔ ɛ́ ɡʉ ńcẅɛ́lɛ́ ndɑꞋ mbʉʉ yɛ́. Lɑ́ nɛɡɛ yúu mi ɛ́ pɔŋnɛ Sɛ́, cẅɛ́lɛ́ nǔu yúu tsʉʉ. Pɛkŋɛ fú nǔu ńjí ŋɡɔ pɛkŋɛ ɡú ŋkɔ̂ɔnɛ tɛ mbɑ nǔu ŋkɑ́ yi ɛ́ ɡʉ ŋ́ɡɛ lɑ́ ńtɔ́.

⁹ Sẅiŋɛ yɔ kwɑꞋ nɛ́nẅín, ḿbɔ́ yi mbɔ mbɑ wɔ̌ lɑ́ zúꞋ ḿbɛ́m.

¹⁰ Yɔ yúu mi ɛ́ ɡɛnɛ pɛk fɑꞋ fɑꞋ-Sɛ́ tɛ ŋ́kíɛ ziꞋnɛ, ḿmɑꞋ ntsɔ. Pɛk fɑꞋ, ḿbɔ́ ńzẅíꞋlɛ mbɑ kʉ̈ɔ́ lɑ́ pɔ mbɔ̌ Sɛ́ ẅi ɑ ntʉʉ. Jʉ́ ɡɛnɛ pɑ́Ꞌ pʉɔmɛsɔŋ tsʉʉ ɡʉ ńduk, lɑ́ ŋu kɛ́ ŋ́ɡɔ́ ńduk, ɛ́fú pɔ nǔu pɑ́Ꞌ ɑ zɑ́pnɛ tʉ́m nǔu Yɛ́su.

¹¹ Mɔnɛ mɛnu mi ɔ ɡʉ ńcẅi mbɔ̌ pʉɔ, ḿbɛn ḿbɔ́ ńzíꞋ wɔ́p.

¹² Pɛ́ ŋ́ɡʉ ŋ́ɡwɑ́k wú mbíꞋŋɡɔ ɔ mɔ́ɔ pɔ́. Sɑ́Ꞌ tʉʉ tɛ pʉɔ-Kɛlístɔ pɛ́ɛ fʉꞋ nǔu ɡu. Ɛ́ lɛɛ nǔu sẅiŋɛ yú, nǔu nɛnnɛ mú, nǔu yú ntɛ́ nɛkɔŋ ŋumɛsɔŋ, nǔu yú ntɛ́ nɛzɑ́p tʉ́m nǔu Sɛ́, nǔu wu nɛpɑ́ɑ kwɑŋɛ yi ḿbɔ́ ɛ́ pʉ́ʉpɛ wú.

¹³ Pɔ́ ɛ́fúŋ ŋwɑꞋnɛ-Sɛ́ mbi pʉɔ, ḿbɔ́ ńníꞋ mɛtʉʉ-pʉɔ, ḿbɔ́ ńzíꞋ wɔ́p nɛ́ yúu lɑ́ ńdɔk ńzẅíꞋlɛ wɑ́ɑ.

¹⁴ Kɔɔ lɔk yúu mi Sɛ́ kɑ lɔknɛ ŋ́ɡɑ́ fuꞋ yú, ḿmɑꞋ kwɑŋɛ. Nɑ́ŋ ḿbɔ́ ŋ́kẅíitɛ pɑ́Ꞌ pɛ́ kɑ ɡɑ́nɛ yɔ fuꞋ mbɔ̌ ɡu ńdɛɛtɛ nǔu sẅiŋɛ-Sɛ́ yi ɛ́ fúnɛ mbɔ̌ pɛŋɡɛ́mndʉ̈ɔ́Ꞌ, mbɑ pɑ́Ꞌ pɑcẅɛ́ɛmbi tsɛt cúꞋlɛ-pʉɔ-Kɛlístɔ kɑ zɑ́pnɛ mbɔ́ mɔ́p tú ɡu.

¹⁵ Niitɛ ńníꞋ tú nǔu yɔ fɑꞋ kɛ́ citɛ mbʉʉ, ńjí ŋɡɔ pʉɔ pɛtsʉʉ ɡʉ ńjʉ́ɔ pɑ́Ꞌ fɑꞋ yú sɛ́ ńnɛn.

¹⁶ Lɑk tú yú nǔu wu nɛnɑ́ŋ mbɑ nǔu yúu mi ɔ zíꞋnɛ pʉɔ. Kɔɔ lɔk yɛcɔ́ tú ḿmɑꞋ kwɑŋɛ. Ɔ ɡʉ ŋ́ɡɛ pɔ́Ꞌɔ, Sɛ́ fú nǔu ŋ́ɡɛ ɔ lúꞋnɛ wɛ́, ŋ́ɡɔ ńduk, pʉɔ pi pɔ́p zẅíꞋlɛ́nɛ nu yi ɔ cúnɛ pɛn ńduk yɔ́p.