1 Kɔlɛ̂ŋtɛ 8 - Kɑɑ Fí

Nu-pfuꞋ-mbɑp yi pɛ́ ɡɑ́nɛ mbɔ̌ mɛyúu mi pɛ́ ɡúꞋlɛ́nɛ ŋɡɔ ɛ́ mɛsɛ́

¹ Ɛ́ ɡʉ nǔu nu-pfuꞋ-mbɑp yi pɛ́ ɡɑ́nɛ nǔu yúu mi pɛ́ ɡúꞋlɛ́nɛ ŋɡɔ ɛ́ mɛsɛ́, mbɔ ɛ́ nɛ́nẅín ŋɡɔ pʉʉ pɛtsʉʉ júk ńcú ŋɡɔ pʉʉ jínɛ nu nǔu. Lɑ́ yîyɑ́ ntɛ́ jínu ɡɛ ŋu ŋɑ́Ꞌlɛ ŋɑ́Ꞌlɛ́nɛ. Lɑ́ yúu mi ɛ́ ɡɛnɛ pɛ́ kẅiꞋ ńzɑ́p pɔ tʉ́m nǔu Sɛ́, ɑ ŋu nɛpɔ́ ŋ́kɔŋ mɔ́ɔmɑ́ wɛ.

² Ŋu lɑɑ ḿbɔ́ ŋ́kwɑŋɛ ŋɡɔ ɑ sɛ́ ńjí yɛcɔ́ yúu, mbɔ ɑ pɛ́t kɛ́ jí pɑ́Ꞌ ɛ́ lɑ́Ꞌ ḿbɔ́ ḿbíkŋɛ ŋɡɔ ɑ jí.

³ Lɑ́ ḿbɔ́ yi ŋu lɑɑ ḿbɔ́ ŋ́kɔŋ Sɛ́, mbɔ ŋɡɑŋ ŋu ẅí Sɛ́ ńdɑ́Ꞌ mɔ́ ńjí wɛ́.

⁴ Ɛ́ kɛ́ ŋ́ɡʉ nǔu nu pfuꞋ-mbɑp yi pɛ́ ɡɑ́nɛ nǔu yúu mi pɛ́ ɡúꞋlɛ́nɛ ŋɡɔ ɛ́ mɛsɛ́, mbɔ pɛkŋɛ sɛ́ ńjí ŋɡɔ yɛcɔ́ yúu mi ɛ́ lɑɑ ḿbɔ́ pɛ́ ɡúꞋlɛ ŋɡɔ ɛ́ yɛcɔ́ sɛ́ kɑ́ pɔ́ ndǔmbí pɔ́. Pɛkŋɛ sɛ́ ńjí ŋɡɔ Sɛ́ pɔ́ pɔ wɛ́mɔ́Ꞌ.

⁵ Tɛ mbɑ pɑ́Ꞌ mɛyúu-nɛfɑŋ mbɑ ndǔ tsɛ́tsɑ́Ꞌ pɛcɔ́ pʉɔ cú ŋɡɔ ɛ́ mɛsɛ́ lɑ́, lɔk pɔ́Ꞌɔ ŋ́ɡɛ mɛsɛ́ zɑ́ɑ, pɛtsɑpʉɔ pɛn ńzɑ́ɑ yɔ́p,

⁶ lɑ́ ɛ́ kɛ́ ḿbɔ́ mbɔ̌ pɛkŋɛ, tɑ́Ꞌ Sɛ́ wɛ́mɔ́Ꞌ pɔ́nɛ ɡú, ḿbɔ́ Tɑ̌ɑ ẅi kʉ̈ɔ́ lɑ́ fú pɔ mbɔ̌ wɛ́. Pɛkŋɛ pɛn ḿbɔ́ ɡú mbíꞋ pɔ wɛ́. Tɑ́Ꞌ Tsɑpʉɔ pɔ́nɛ ɡú, ḿbɔ́ Yɛ́su Kɛlístɔ, ẅi mbɑ kʉ̈ɔ́ lɑ́ ɡɔ́ ḿbɔ́ ɡú jʉ́ ɡɛnɛ. Pɛkŋɛ pɛn ŋ́ɡɔ ḿbɔ́ ɡú ńdúꞋnɛ pɔ wɛ́.

⁷ Lɑ́ pʉɔ tsʉʉ tsɛtsɛt pɛkŋɛ kɑ́nɛ jí ŋɡɔ mɛsɛ́ zɛɛ mbɔɔ tsuŋ ḿbɔ́ ɡú pɔ́. Ntí kɑ́ sɑk pɑ́Ꞌ yɛcɔ́ ntɑ́Ꞌ pʉɔ kɑ pɔ́ ŋ́ɡʉ zʉꞋ-yúu mi pɛ́ ɡúꞋlɛ́nɛ ŋɡɔ ɛ́ mɛcɔ́ mɛsɛ́ pɔ́. Ɛ́ lɛɛ pɔ́Ꞌɔ, ḿbɔ́ yi pɔ́p kɑ pɔ́ ŋ́kwɛ́t pfuꞋ-mbɑp yi pɛ́ ɡɑ́nɛ nǔu yúu ɛ̂mɑ́ pɛ́Ꞌnɛ, ɛ́ pɔ́ mbɔ̌ pɔ́p, pɔ́p pɔ́ ńjí ŋɡɔ pɛ́ ɡɑ mbɔ̌ kwɑꞋ mɛsɛ́, mbɔ mbʉʉ yɔp ńtswɑ́ɑ wɔ́p. Tʉ́m yɔ́p yí ɛ́ pɛ́t ḿbɔ́t pɔ́tnɛ zúꞋ ńtíi ntsɛ́llɛ́.

⁸ Jínɛ ŋɡɔ yúupɛ́jʉ́ kɑ́ pɔ́nɛ ŋ́ɡɛ lɑ́ Sɛ́ kẅiꞋ ŋ́kɔŋ wɛkŋɛ pɔ́. Pɛkŋɛ lɑɑ mbɔɔ ŋ́kwɛ́t, mbɔ pɛkŋɛ kɑ́ pɛ́ yɛcɔ́ yúu pɔ́, ŋ́kwɛ́t, mbɔ yɛcɔ́ yúu kɑ́ kẅiꞋ nǔu pɛkŋɛ pɔ́.

⁹ Lɑ́, pʉʉ kɛ́ ḿbɑ́ɑ pɑ́Ꞌ mbɔ yʉ́ʉ yúu mi pʉʉ sɛ́ ńjí ŋɡɔ pʉʉ kuꞋ nɛɡɛ, tsʉ́Ꞌ yúu mi pʉɔ pi pɔ́p pɛ́t ḿbɔ́t pɔ́tnɛ ɡʉ ŋ́kɔɔtɛ nǔu ḿvu Sɛ́,

¹⁰ mbíꞋŋɡɔ ŋu lɑɑ ńjʉ́ɔ wú ẅi ɔ ŋu ẅí ɔ jínɛ nu, ɔ nɑ́ŋ sɛ́ ḿbɔ́ ŋ́kwɛ́t yúu, nǔu yɛcɔ́ zʉꞋ-mɛsɛ́ ɛ̂mɑ́, mbɔ ẅîwɑ́ nɛpɔ́ kɛ́ tsʉ́ʉnɛ ŋu ẅí ɑ pɛ́tnɛ ḿbɔ́t pɔ́tnɛ nɛkwɛ́t pfuꞋ-mbɑp yi pɛ́ ɡɑ́nɛ nǔu yúu mi pɛ́ ŋ́ɡúꞋlɛ ŋɡɔ ɛ́ mɛsɛ́ pɔ́ ɔɔ?

¹¹ Pɔ́Ꞌɔ lɑ́, ɛ́ lɛɛ nǔu yúu mi ɔ sɛ́ ńjí, ŋu ẅí ɑ pɛ́t ḿbɔ́t pɔ́tnɛ kúu pɛ́, lɑ́ ḿbɔ́ mɔ́ɔmɑ́ wɛkŋɛ ẅi Kɛlístɔ kɑ pfúnɛ nǔu tú yɛ́.

¹² Pʉʉ lɑɑ ŋ́ɡɛ nu kɛpɔŋ nɛ́ yɔ ntɛ́ nǔu pɔ́ɔpɛ́mɑ́ pʉʉ, nɛɡɛ yúu mi ɛ́ ɡʉ ŋ́ɡɑ́ɑnɛ wɔ́p tsɛt tʉ́m yɔ́p yi ɛ́ pɛ́t ḿbɔ́t pɔ́tnɛ, mbɔ pʉʉ ɡɛ nu kɛpɔŋ pɔ nǔu Kɛlístɔ.

¹³ Ɛ́ pɔ́Ꞌɔ lɑ́ ḿbɔ́ yi n dɑɑ ńjʉ́ yúupɛ́jʉ́, yi mɔ ńjʉ́ ɛ́ ɡɛ mɔ́ɔmɑ́ mɔ vu sɛ́, mbɔ ɛ́ lɑɑ ńtsʉ́Ꞌ yi ŋ ɡɛ pɔ́Ꞌɔ, m bɔɔ lɑ́Ꞌ ḿbɛn ŋ́kwɛ́t mbɑp pɔ́.