1 Kɔlɛ̂ŋtɛ 15 - Kɑɑ Fí

Nu nǔu pɑ́Ꞌ Kɛlístɔ kɑ zẅíimɛ́nɛ tsɛt nɛvú

¹ Pɔ́ɔpɛ́mɑ́ pɑ́ɑ, tsʉ́Ꞌnɛ ŋ kẅíitɛ Ŋkʉʉ Sʉ́Ꞌnɛ ẅí ŋ kɑ cẅinɛ mbɔ̌ pʉʉ, Ŋkʉʉ ẅí pʉʉ kɑ zúꞋnɛ ḿbɛn ḿbɛ́m lɑ́, pʉʉ kɛ ńzɑ́p tʉ́m nǔu zɑ́pnɛ tɛ ŋ́kúu lɔ́Ꞌnɛ.

² Sɛ́ sɛ́ ɛ́fú nǔu Ŋkʉʉ Sʉ́Ꞌnɛ ɛ̂wɑ́ ŋ́ɡɛ pʉʉ luk, pɑ́Ꞌ pʉʉ lɑɑ ŋ́kɛ́ ḿbɔ́ ŋ́kúꞋlɛ kwɑꞋ yúu mi ŋ kɑ cúnɛ mbɔ̌ pʉʉ kúꞋlɛ́nɛ. Tɛ ɛ́ pɔɔ pɔ́Ꞌɔ pɔ́, mbɔ wʉ́ʉ nɛzɑ́p tʉ́m nǔu Sɛ́ pɔ́ pɔ níinɛ.

³ N dyɑkŋɛ yúu mi pɛ́ kɑ zíꞋnɛ wɑ́ɑ ŋ́ɡɑ́ mbɔ̌ pʉʉ. Ɛ́ pɔ́ nǔu Ŋkʉʉ Sʉ́Ꞌnɛ ḿbɔ́ ŋɡút. Yîyɑ́ nu pɔ́ ŋɡɔ Kɛlístɔ kɑ pfú ntɛ́ nu kɛpɔŋ yɛkŋɛ, pɑ́Ꞌ ŋwɑꞋnɛ-Sɛ́ kɑ zɑ́Ꞌnɛ njí ńcú.

⁴ Pɛ́ kɑ ńníꞋ wɛ́ tsɛt nɛshi, ɛ́ ɡɔ́ ḿbɔ́ lɛ́Ꞌ pɛtɑ́t ɑ zẅíimɛ nǔu nɛvú, pɑ́Ꞌ ŋwɑꞋnɛ-Sɛ́ kɑ zɑ́Ꞌnɛ njí ńcú.

⁵ A kɑ nyɛt mbʉʉ yɛ́ mbɔ̌ Pyɛ̂, mbɑ mbɔ̌ pɛcɔ́ ɡɑŋku pɛ́ nǔu pʉɔ ntsɔ̌ppɑ́,

⁶ ḿbɑ́ɑtɛ ńnyɛt mbʉʉ yɛ́ mbɔ̌ pɔ́ɔpɛ́mɑ́ tɛ ɛ́ lɛɛ pʉɔ ŋkʉ yɛ́tɑɑ, pɔ́p tɛmtɛ ńjʉ́ɔ wɛ́. Ɛ́ nǔu pɔ́p nɛlʉ́m pɛ́t pɔ ɡú, lɑ́ mbɔ yɛcɔ́ ntɑ́Ꞌ pfútɛ mɔ́.

⁷ A kɑ ɡɛ ḿbɑ́ɑtɛ ńnyɛt mbʉʉ yɛ́ mbɔ̌ Jɑ̂k ḿbɛn ńnyɛt mbɔ̌ ɡɑŋntúu pɛ́tsʉʉ.

⁸ Ńtsʉ́Ꞌ nɛlẅiklɛ, pɑ́Ꞌ ɑ nyɛtnɛ mbʉʉ yɛ mbɔ̌ pɛcɔ́ pʉɔ lɑ ńnɑ́ŋ lɑ́, ɑ nyɛt mbʉʉ yɛ́ mbɔ̌ mɔ. Mbɑ pɑ́Ꞌ mɔ pɔ mɔ́ɔ pɛ pínɛ kɛ́ kuꞋ lɑ́,

⁹ mbíꞋŋɡɔ mɔ tsɛtsɛt ɡɑŋntúu ḿbɔ́ wɛ nzʉʉ. N zɛɛ ŋ́kɛ́ mbɔɔ kuꞋ nɛpɔ́ yi mbɔ pɛ́ fúŋ wɑ́ɑ nɛ́ ŋɡɑŋntúu pɔ́, mbíꞋŋɡɔ ŋ kɑ nyɛt cúꞋlɛ-pʉɔ Sɛ́ nɛ́ ŋɡʉ̈ɔ́Ꞌ.

¹⁰ Ɛ́ kɑ kɛ́ ńdɛɛ pɔ nǔu pɑ́Ꞌ Sɛ́ ɡɑ́nɛ fuꞋ níinɛ yɑ́ɑ, ńnɑ́ŋ ńcẅɛ́lɛ wɑ́ɑ lɑ́ n tsʉ́Ꞌ yúu mi mɔ yɛ́tɛ́ lɑɑ. Yîyɑ́ ntɛ́ nɛɡɑ́ fuꞋ níinɛ yɑ́ɑ ŋkɑɑ lɛɛ níinɛ pɔ́, ɛ fɑꞋ fɑꞋ ńdɛɛ pɛcɔ́ ɡɑŋntúu, lɑ́ mɔ kɑ́nɛ pɔ́ ńdɔk mɑ́ɑ mɛtʉʉ ɛ́fɑꞋ pɔ́. Sɛ́ cẅɛ́lɛ́nɛ wɑ́ɑ ŋ́ɡɑ́ mɛtʉʉ n dɔk ɛ́fɑꞋ.

¹¹ Pɑ́Ꞌ ɛ́ pɑ́Ꞌnɛ lɑ́, pɔ́p lɑɑnɛ ńcú nu nǔu Ŋkʉʉ Sʉ́Ꞌnɛ, kɛ mɔ ɔɔ, mbɔ pʉʉ zúꞋ yúu mi pɛkŋɛ pɛpɔ́p tɛmtɛ ɛ́sɑ́Ꞌ ɛ́sẅíi pʉɔ. Ɛ́ pɛn ḿbɔ́ yɛ́tɛ́ yi pʉʉ kɑ zɑ́pnɛ tʉ́m nǔu.

Pɑ́Ꞌ Kɛlístɔ kɑ zẅíimɛ nǔu nɛvú lɑ́, pʉɔ pɛ́ ɡʉ ńdɑ́Ꞌ ńzẅíimɛ yɔ́p

¹² Pɛkŋɛ pɛpɔ́p lɑɑ ḿbɛn ḿbɔ́ ɛ́sɑ́Ꞌ ɛ́sẅíi pʉɔ ŋɡɔ Kɛlístɔ kɑ zẅíimɛ nǔu nɛvú, mbɔ ɛ́ ɡʉ ŋ́ɡɛ pɑ́Ꞌ pɛcɔ́ ntɑ́Ꞌ pʉɔ tsɛtsɛt pʉʉ cú ŋɡɔ pɛ́ kɛ́ pfú ḿbɛn ńzẅíimɛ pɔ́ pɔ́ ɔɔ?

¹³ Ɛ́ lɑɑ ḿbɔ́ yi pɛ́ kɛ́ pfú ḿbɛn ńzẅimɛ nǔu nɛvú pɔ́, mbɔ mbɑ Kɛlístɔ ŋkɑɑ kɛ́ ńzẅíimɛ yɛ́ nǔu nɛvú pɔ́.

¹⁴ Ɛ́ lɑɑ ḿbɛn ḿbɔ́ yi Kɛlístɔ ŋkɑɑ kɛ́ zẅíimɛ nǔu nɛvú pɔ́, mbɔ nu yi pɛk sɑ́Ꞌnɛ ɛ́sẅíi pʉɔ ɛ́ pɔ́ pɔ nu níinɛ, mbɑ wʉ́ʉ nɛzɑ́p tʉ́m nǔu Sɛ́ ɛ́ pɔ́ pɔ nu níinɛ.

¹⁵ Ɛ́ lɑɑ ḿbɔ́ yi pɛ́ kɑ́ pfú ḿbɛn ńzẅíimɛ nǔu nɛvú pɔ́, mbɔ pɛk pi pɛk sɛ́ ńcú nu yi pɛk jínɛ nǔu Sɛ́ lɑ́, pɛk lɔk ḿbɔ́ pɔ ɡɑŋcɔtnu, mbíꞋŋɡɔ pɛk cɔt pɔ nu lɑ ńcú ŋɡɔ pɛk sɛ́ ńjí ŋɡɔ Sɛ́ kɑ zẅíimɛ Kɛlístɔ nǔu nɛvú ɛ́ pɔ́ zúꞋu ŋ́kɛ́ mbɔɔ pɔ́Ꞌɔ pɔ́,

¹⁶ mbíꞋŋɡɔ ɛ́ lɑɑ ḿbɔ́ yi pɛ́ kɑ́ pɔ́ ḿpfú ḿbɛn ńzẅíimɛ nǔu nɛvú pɔ́, mbɔ mbɑ Kɛlístɔ ŋkɑɑ zẅíimɛ nǔu nɛvú pɔ́.

¹⁷ Ɛ́ pɛn ḿbɔ́ yi Kɛlístɔ ŋkɑɑ ŋ́kɛ́ zẅíimɛ nǔu nɛvú pɔ́, mbɔ wʉ́ʉ nɛzɑ́p tʉ́m nǔu Sɛ́ ɛ́ pɔ́ pɔ níinɛ, pʉʉ pɛn ḿbɛ́t ḿbɔ́ pɔ tsɛt mɛnu kɛpɔŋ mʉ́ʉ.

¹⁸ Ɛ́ pɛn ńdɔk ḿbɔ́ ŋɡɔ, pʉɔ pi pɔ́p kɑ ɡɔ́ ḿpfú, tʉ́m yɔ́p zɑ́pmɛ nǔu Kɛlístɔ, pɔ́p kɑ pɛ́ mɔ́.

¹⁹ Ɛ́ lɑɑ ḿbɔ́ yi pɛkŋɛ ńzẅíꞋlɛ yúu mi ɛ́ ɡʉ ɛ́fú mbɔ̌ Kɛlístɔ, mbíꞋ pɔ ndɑꞋ ŋkɔ̂ɔnɛ yi pɛkŋɛ pɛ́t ndǔ tsɛ́tsɑ́Ꞌ lɑɑ, mbɔ pɛkŋɛ tsɛtsɛt pʉɔmɛsɔŋ ḿbɔ́ kwɑꞋ pɛɡɑŋ ŋɡʉ̈ɔ́Ꞌ.

²⁰ Lɑ́ ɛ́ kɛ́ mbɔɔ pɔ́Ꞌɔ pɔ́, Kɛlístɔ kɑ tsuŋ ńzẅíimɛ nǔu nɛvú ḿbɔ́ nduŋmbi, ńdɔk ńnyɛt ŋɡɔ pʉɔ pi pɔ́p kɑ pfúnɛ ɡʉ ńdɑ́Ꞌ ḿbɛn ńzẅíimɛ yɔ́p nǔu nɛvú.

²¹ Ɛ́ lɔk ḿbɔ́ ŋɡɔ, pɑ́Ꞌ nɛvú kɑ tsʉ́Ꞌ nɛtɔ́ ndǔmbí, ńdɛɛ nǔu tɑ́Ꞌ ŋu lɑ́, nɛzẅíimɛ nǔu nɛvú kɑ pɛn ńdɛɛ yɛ́ pɔ nǔu tɑ́Ꞌ ŋu lɑ ńtɔ́ ndǔmbí.

²² Ndʉ́ŋndʉŋ pɑ́Ꞌ pʉɔmɛsɔŋ tsʉʉ lɔknɛ pɑ́Ꞌ pɔ́p kɑ lɛɛtɛ nǔu Ádɑm ḿpfútɛ lɑ́, pɔ́p pɛ́tsʉʉ ɡʉ ḿbɛn ńdɔk pɑ́Ꞌ pɔ́p ńdɛɛ nǔu Kɛlístɔ ńzẅíimɛ nǔu nɛvú.

²³ Lɑ́ mbɑ wɔ̌ lɑ́ ńzẅíimɛ pɔ nǔu yɛ́ ŋkɑ́. Kɛlístɔ kɑ piitɛ ńzẅíimɛ. Pʉɔ pɛ́ ɡʉ ńdɑ́Ꞌ ńzẅíimɛ yɔ́p, ŋkɑ́ yi ɑ ɡʉ ńdɑ́Ꞌ ḿbɛn ńtɔ́.

²⁴ Ɛ́ pɑ́ɑtɛ ḿbɔ́ ŋkɑ́ yi ndǔmbí ḿmɛ. Kɛlístɔ ḿbík mbɑ kʉ̈ɔ́ lɑ́ yi ɛ́ sɛ́ ɛ́sɑ́Ꞌ mbí, ḿbík mbɑ tɑ́tndɑ́ wɔ́p, mbɑ kʉ̈ɔ́ lɑ́ yi ɛ́ ɡẅɛɛnɛ tʉʉ ndǔmbí, ḿbík pɔ́Ꞌɔ, ŋ́ɡɔ́ɔ ŋ́kɛ́ ŋ́ɡɑ́ nɛfɔɔ mbɔ̌ Sɛ́ Tɑ́t.

²⁵ Kɛlístɔ zɛɛ ŋ́ɡẅɛɛ nɛpɔ́ ɛ́sɑ́Ꞌ mbí tɛ ŋ́kúu ŋkɑ́ yi Tɑ́t wɛ lɔknɛ pɛɡɑŋ mbuu pɛ́ ŋ́ɡɛ zʉꞋ yi jʉ́ Kɛlístɔ ɡʉ tík mɛku mɛ́ zúꞋu.

²⁶ Ndẅiknzʉʉ ŋɡɑŋmbuu ẅi Sɛ́ ɡʉ ńdɑ́Ꞌ ḿbík wɛ́ ɑ nɛvú ẅi ɑ lɔknɛ pʉɔ.

²⁷ Ɛ́ zɛɛ ḿbɔ́ tsɛt ŋwɑꞋnɛ-Sɛ́, Sɛ́ cú ŋɡɔ: «A lɔk mbɑ kʉ̈ɔ́ lɑ́ ŋ́ɡɛ ntíknɛ mɛku-Kɛlístɔ». Sɛ́ cú pɔ́Ꞌɔ, pɑ́Ꞌɑ, ɛ́ pɔɔ ńdɔk ḿbɔ́ ŋɡɔ jʉ́ Sɛ́ ɡʉ ńdɑ́Ꞌ ḿbɔ́ nǔu mbɔ́-Kɛlístɔ pɔ́, mbíꞋŋɡɔ Sɛ́ zɛɛnɛ ŋ́ɡɑ́ mɛtʉʉ mbɔ̌ Kɛlístɔ lɑ ɑ lɔk ɛ́sɑ́Ꞌ mbɑ kʉ̈ɔ́ lɑ́.

²⁸ Yúu tsʉʉ pɛn ńdɑ́Ꞌ ḿbɔ́ tɛ ńtsʉ́Ꞌ ńzúꞋ pɔ mbɔ̌ jʉ́ Mɔ́ɔ, kwɑꞋ jʉ́ Mɔ́ɔ ńtsʉ́Ꞌ ńzúꞋ pɔ mbɔ̌ Sɛ́ ẅí ɑ kɑ ɡɑ́nɛ wɛ́ nɛ́ mbɑ kʉ̈ɔ́ lɑ́, ńjí ŋɡɔ Sɛ́ ɡʉ ńtsuŋ ɛ́sɑ́Ꞌ yúu tsʉʉ.

²⁹ Ɛ́ lɑɑ ḿbɔ́ yi pɛ́ pfú mbɔɔ pɛn ńzẅíimɛ nǔu nɛvú pɔ́, mbɔ pɛcɔ́ pʉɔ cẅɛ́ɛ ŋki nǔu tú-pɛpfú pi pɔ́p ŋkɑɑ ŋki cẅɛ́ɛ pɛ́Ꞌnɛ ńtsɑ́ɑ kʉ̈ɔ́? Mbɔ mɛlɑ́Ꞌ kʉ̈ɔ́ pîpɑ́ pʉɔ cẅɛ́ɛnɛ ŋki nǔu tú pɛpfú?

³⁰ Mbɔ pɛk pɛ́m nɛnɑ́ŋ ŋkɑ́ tsʉʉ ḿbɔ́ pɔ ntsu-nɛvú mɛlɑ́Ꞌ kʉ̈ɔ́?

³¹ Pɔ́ɔpɛ́mɑ́ pɑ́ɑ, lɛ́Ꞌ tsʉʉ n cẅɛt ntsu-nɛvú cẅɛtnɛ, n cú pɑ́Ꞌɑ, yúu mi n dɔknɛ ńzɑ́Ꞌ ŋkwɑɑ ŋɡɔ ɛ́ nɛ́nẅín, ɛ́ pɔ pɑ́Ꞌ n dɔknɛ wʉ́ʉ ŋ́kɑꞋmɛ tɛꞋ, ńdɛɛ nǔu pɑ́Ꞌ pɛkŋɛ nzʉʉ Tsɑpʉɔ wɛkŋɛ Yɛ́su Kɛlístɔ.

³² Ŋ kɑ tɔ́ Ɛ́fɛ̂zɛ wɔ pɛk pʉɔ mɑꞋ, yɔ́p ntɛ́ pɔ́ tɛ pɔ́p mɛyúu mɛku pɔ́ pɔ tɑ́Ꞌ yúu. Ɛ́ lɑɑ ḿbɔ́ yi pɛkŋɛ pɛpɔ́p kɑ pɔ́ ḿmɑꞋ pɔ́Ꞌɔ, yɑ́ɑ jínu tʉ́ʉ pɔ nǔu yúu mi ɛ́ tsɛt yɔ ndǔmbí, mbɔ pii yi ŋ kɑ jʉ́nɛ nǔu kʉ̈ɔ́? Ɛ́ lɑɑ ḿbɔ́ yi pɛ́ pfú ḿbɛn ḿbɔɔ ńzẅíimɛ nǔu nɛvú pɔ́, mbɔ ɛ́ tsʉ́Ꞌ ḿbíkŋɛ pɔ ŋɡɔ pɛkŋɛ ɡɛ pɑ́Ꞌ sɑknɛkɛt kɑ cúnɛ lɑ́ ŋɡɔ: «Yɛ ŋu yɛ́ ntsu wɛ́, mbíꞋŋɡɔ njí ŋ́kiɛ pɛ́ ɡʉ.»

³³ Kɔɔ pʉʉ pɛ́m pɛ́ fu wʉ́ʉ, pʉʉ mɑ́ɑ ńdikŋɛ ŋɡɔ tɑ́ɑ-kuꞋú kɛpɔŋ lɔ mbʉ́ʉpɛ cúꞋ?

³⁴ Pʉʉ ɡẅɛɛ mbʉʉ yʉ́ʉ nǔu ntɛ́ yi ɛ́ ḿbɔŋ Sɛ́, kɔɔ pʉʉ pɛn ŋ́ɡɛ mɛnu kɛpɔŋ. N cú mbíꞋŋɡɔ mɔ sɛ́ ńjʉ́ɔ pɛcɔ́ pʉɔ pɔ́ tsɛtsɛt pʉʉ ḿbɔɔ Sɛ́ jí, n cú pɑ́Ꞌɑ ńtsɑ́ɑ ŋɡɔ sʉ́ʉ kɔ́ wʉ́ʉ.

Nu nǔu mbɑp-mbʉʉ-pɑzẅíimɛ nǔu nɛvú

³⁵ Ḿbɔ́ ŋu píkŋɛ ŋɡɔ pɛpfú zẅíimɛ nǔu nɛvú ŋɡɔ́ku ɔɔ? Ḿbɛn ŋ́ɡẅɛɛ yɛ́tɛ́ ntɛ́ mbɑp-mbʉʉ ŋkɔ̂ɔnɛ?

³⁶ Ŋu lɑɑ ḿbíkŋɛ pɔ́Ꞌɔ, mbɔ ɑ ɡɛɡʉʉ, mbíꞋŋɡɔ ŋu pi yúu, ɛ́ piitɛ ńdʉ̈ɔ́, lɑ ɛ́sɑ́Ꞌ ŋ́ɡɑ́ nɛtsɛ́n-yúu yi fí.

³⁷ Yúu mi ŋu pɛnnɛ ḿbi sɛ́ ɛ́ pɔ́ pɔ mbɑŋ-yúu níinɛ, kɛ yɛ́ ŋɡɛsɑ́ŋ ɔɔ, kɛ yɛ́ yɛcɔ́ yúu ndɛꞋ ɔɔ, ɛ́ kɑ́ pɔ́ nɛtsɛ́n yúu mi ɛ́ ɡʉ ńtɔ́ cẅɛt sɛ́ pɔ́.

³⁸ Sɛ́ pɑ́ɑtɛ ŋ́ɡɑ́ ntɛ́ nɛtsɛ́n ni ɑ kɔŋnɛ mbɔ̌ mbiyúu ɛ̂mɑ́, ŋ́ɡɑ́ kwɑꞋ ntɛ́ nɛtsɛ́n yîyɑ́ mbiyúu pɔ́ mbɔ̌ yɛ́.

³⁹ Ɛ́ ndʉ́ŋndʉŋ pɑ́Ꞌ mbɑp-mbʉʉ yɛcɔ́ yúu kɑ́ fí yɛ́ yɛcɔ́ pɔ, mbɑp-mbʉʉ-pʉɔmɛsɔŋ ndɛꞋ, yɛ mɛyúu mɛku pɔ́ ndɛꞋ, yɛ pɛshʉ́ŋ pɔ́ ndɛꞋ, yɛ mɛshú pɔ́ ndɛꞋ.

⁴⁰ Yúu pɛn ḿbɔ́ tʉ́ nɛfɑŋ, Yɛcɔ́ pɔ́ ndǔ tsɛ́tsɑ́Ꞌ. Nɛsíi wɛ yúu mi ɛ́ tʉ́ nɛfɑŋ ɛ́ pɔ́ pɔ ndɛꞋ, wɛ yúu mi ɛ́ ndǔ tsɛ́tsɑ́Ꞌ pɔ́ pɔ ndɛꞋ.

⁴¹ Nɛsíi wɛ nɛm ɑ ndɛꞋ, wɛ sɑŋ pɔ́ ndɛꞋ, wɛ pɛcʉ̈ɔ́Ꞌ-sɑŋ ɛ́ pɔ́ ndɛꞋ. Mbɑ wɛ́tɛ́ cʉ̈ɔ́Ꞌ-sɑŋ ɔɔ, síi pɔ nɛ́ yɛ́ ntɛ́ nǔu pɛcɔ́.

⁴² Ɛ́ ɡʉ ńdɑ́Ꞌ ḿbɛn ḿbɔ́ pɔ pɔ́Ꞌɔ, ŋkɑ́ yi pɛpfúsɛ́ ɡʉ ńdɑ́Ꞌ ńzẅíimɛ nǔu nɛvú. Yúu mi pɛ́ pinɛ sɛ́, mbʉʉ yi ɛ́ lʉ̈ɔ́nɛ, lɑ́ mbʉʉ yi ɛ́ zẅíimɛnɛ nǔu nɛvú kɛ́ lɑ́Ꞌ ḿbɛn ńdʉ̈ɔ́ pɔ́.

⁴³ Pɛ́ ɡɔ́ ńníꞋ yɔ mbɑp-mbʉʉ sɛ́, ɛ́ pɔɔ kuꞋ nǔu yɛcɔ́ nu pɔ́, ŋ́ɡɛ ḿbɔ́ tɛ ńzẅíimɛ nǔu nɛvú, ŋ́ɡẅɛɛ nɛɡúꞋ. Pɛ́ ɡɔ́ ńníꞋ sɛ́ ɛ́ pɔ́ pɔ yɛpɔ́t, ŋ́ɡɛ ḿbɔ́ tɛ ńzẅíimɛ nǔu nɛvú ŋ́ɡẅɛɛ mɛtʉʉ tɛꞋ.

⁴⁴ Pɛ́ ɡɔ́ ńníꞋ sɛ́, ɛ́ pɔ́ pɔ mbɑp-mbʉʉ-ŋumɛsɔŋ, ŋ́ɡɛ ḿbɔ́ tɛ ńzẅíimɛ nǔu nɛvú, ḿbɔ́ mbɑp-mbʉʉ yi ɛ́ fúnɛ mbɔ̌ Zẅikŋɛ yi ɛ́ ɡɛnɛ pɛ́ pɔ́ ɡú, ɛ́ lɔk pɑ́Ꞌɑ ḿbɔ́ ŋɡɔ yɛcɔ́ mbɑp-mbʉʉ pɔ́ pɔ yɛ́ ŋumɛsɔŋ, yɛcɔ́ pɛn fú mbɔ̌ Zẅikŋɛ.

⁴⁵ Ɛ́ yúu mi ɛ́ kɑ ɡɛnɛ pɛ́ ŋwɑꞋnɛ ŋɡɔ Ádɑm ẅí ɑ kɑ pɔ́nɛ nduŋmbi ŋumɛsɔŋ, Sɛ́ kɑ ɡɛ lɑ ɑ pɔ́ ɡú, lɑ́ ndẅiknzʉʉ Ádɑm tɔ́ ḿbɔ́ pɔ Zẅikŋɛ yi ɛ́ ŋ́ɡɛ pɛ́ pɔ́ ɡú.

⁴⁶ Pɛ́ kɑ́ pɔ́ ḿbiitɛ ńjʉ́ɔ pɔ mbɑp-mbʉʉ yi ɛ́ fúnɛ mbɔ̌ Zẅikŋɛ yi ɛ́ ɡɛnɛ pɛ́ pɔ́ ɡú pɔ́, pɛ́ piitɛ ńjʉ́ɔ pɔ mbɑp-mbʉʉ-ŋumɛsɔŋ. Mbɑp-mbʉʉ yi ɛ́ fúnɛ mbɔ̌ Zẅikŋɛ ɡɛ ḿbɑ́ɑtɛ tɛ ḿbɔ́ ɡú.

⁴⁷ Sɛ́ kɑ tsʉ́Ꞌ nɛpɔ́ɔ nduŋmbi ŋumɛsɔŋ, ńdɔk tsɛ́tsɑ́Ꞌ ḿbɔ́ɔ wɛ́. Ẅîwɑ́ ŋu lɔk pɔ́Ꞌɔ, ɛ́fú ndǔ tsɛ́tsɑ́Ꞌ, lɑ́ ŋu mbɑ́ɑtɛ yɛ́pɑ́ fú pɔ tʉ́nɛ́pú.

⁴⁸ Pʉɔ pi pɔ́p ndǔ tsɛ́tsɑ́Ꞌ, fí ŋu ẅí Sɛ́ kɑ lɔknɛ tsɛ́tsɑ́Ꞌ ḿbɔ́ɔ wɛ́, pʉɔ pi pɔ́p tʉ́nɛ́pú fí ŋu ẅí ɑ kɑ fúnɛ tʉ́nɛ́pú ńcúŋ.

⁴⁹ Ndʉ́ŋndʉŋ pɑ́Ꞌ, pɛkŋɛ fínɛ ŋu ẅí Sɛ́ kɑ lɔknɛ tsɛ́tsɑ́Ꞌ ḿbɔ́ɔ wɛ́ lɑ́, ɛ́ ɡʉ ńdɑ́Ꞌ ḿbɔ́ yɛcɔ́ lɛ́Ꞌ, pɛkŋɛ fí ŋu ẅí ɑ kɑ fúnɛ tʉ́nɛ́pú ńcúŋ.

⁵⁰ Pɔ́ɔpɛ́mɑ́ pɑ́ɑ, n dɔk pɑ́Ꞌɑ ńcú ŋɡɔ, ḿbɔ́ ŋu pɔɔ lɔk mbɑp-mbʉʉ yɔ yi ɛ́ ɡẅɛɛnɛ mbɑp-mbʉʉ nɛ́ mɛci lɑɑ, ńdɔk ŋ́kúu tsɛt nɛfɔɔ-Sɛ́ pɔ́. Ḿbɔ́ yúu mi ɛ́ lʉ̈ɔ́nɛ pɔ́p yi ɛ́ kɑ́ lʉ̈ɔ́ pɔɔ ńtɛmtɛ tɑ́Ꞌ zʉꞋ pɔ́.

⁵¹ Tsʉ́Ꞌnɛ ɛ sẅíi wʉ́ʉ nɛ́ yɛcɔ́ nu yi ɛ́ kɑ zɛɛnɛ ḿbɔ́ yi lʉɔmɛ́nɛ, pɛkŋɛ pɛtsʉʉ kɛ́ lɑ́Ꞌ ńtɛmtɛ ḿpfú pɔ́, lɑ́ pɛkŋɛ pɛtsʉʉ ɡʉ ńdɑ́Ꞌ ńtɛmtɛ ɡẅɛɛ yɛcɔ́ mbʉʉ yi fí,

⁵² pɔ tɑ́Ꞌ ŋkɑ́ ŋɡɔ: «Gɑk!» Mbɔ ndẅiknzʉʉ ŋɡi-ntɑŋ cʉ́ɔ, mbíꞋŋɡɔ yîyɑ́ ŋɡi-ntɑŋ ɡʉ ńdɑ́Ꞌ ńcʉ́ɔ pɛpfú zẅíimɛ nǔu nɛvú pɑ́Ꞌ pɔ́p kɛ́ ɡʉ ńdɑ́Ꞌ ḿbɛn ḿpfú pɔ́, ɛ́ pɔ́ pɔ́Ꞌɔ, pɛkŋɛ ɡẅɛɛ mbʉʉ yi fí.

⁵³ Ɛ́ lɔk ńcú ŋɡɔ yɔ mbʉʉ yi ɛ́ pfúnɛ, ńdʉ̈ɔ́ lɑɑ, ɡʉ ńdɑ́Ꞌ ɛ́shɔtnɛ ńtsʉ́Ꞌ yi ɛ́ kɛ́ pɛn ḿpfú pɔ́, ŋ́kɛ́ mbɔɔ lʉ̈ɔ́.

⁵⁴ Ɛ́ ɡʉ ńdɑ́Ꞌ ḿbɔ́ tɛ yɔ mbʉʉ yi ɛ́ pfúnɛ ńdʉ̈ɔ́ lɑɑ, shɔtnɛ ńtsʉ́Ꞌ yi ɛ́ kɛ́ pɛn ḿpfú pɔ́, ŋ́kɛ́ ḿbɔɔ pɛn ńdʉ̈ɔ́ pɔ́, sẅiŋɛ yi pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ lɔk ḿbuutɛ. Pɛ́ kɑ ŋwɑꞋnɛ ŋɡɔ, nɛvú kɑ́ pɛn ḿbɔ́ ɡú pɔ́, pɛ́ mɑꞋ wɛ́ tɛ ńjʉ́ wɛ́.

⁵⁵ Nɛvú, mú mɛtʉʉ lɔk ńjʉ́ ntsɔ lɛɛ nɛɡɔ́? Nɛvú, mú mɛ́tɛ́ lɛɛ nɛɡɔ́?

⁵⁶ Sʉʉ ẅi nɛvú lɔknɛ ńtsúk ŋu ɛ́ mɛnu kɛpɔŋ, mɛtʉʉ-mɛnu kɛpɔŋ fú nǔu nɛpʉ́ʉ-Sɛ́ ni ɛ́ nyɛtnɛ ŋɡɔ ŋu vu ntsɑŋ.

⁵⁷ Lɑ́ pɛkŋɛ ɡɑ́ pɑ́Ꞌlɑ́ mbɔ̌ Sɛ́ ẅí ɑ ɡɛnɛ pɛkŋɛ lɛɛ nǔu Tsɑpʉɔ wɛkŋɛ Yɛ́su Kɛlístɔ, ŋ́ɡɛ pɛkŋɛ tsɑ nu kɛpɔŋ mbɑ nɛvú.

⁵⁸ Pɔ́ɔpɛ́mɑ́ pɑ́ɑ pɛtʉʉndɛn, pɑ́Ꞌ ɛ́ pɔ́Ꞌɔ lɑ́, pʉʉ tɛntɛ tɛntɛnɛ, kɔɔ ŋu cʉɔꞌ, pʉʉ kẅiꞋ ɛ́fɑꞋ mɛfɑꞋ-Tsɑpʉɔ ńdɔk ŋ́ɡʉ pɔ nɛ́ mbi, ŋ́ɡɔ ɛ́fɑꞋ ḿbɔ́ ńjí ŋɡɔ fɑꞋ yi pʉʉ fɑꞋnɛ, mbíꞋ ŋɡɔ pʉʉ pʉɔ-Tsɑpʉɔ lɑ́, kɛ́ ɡɛ ńdɛɛ níinɛ pɔ́.