1 Kɔlɛ̂ŋtɛ 12 - Kɑɑ Fí

Zẅikŋɛ Lɛ́ɛnɛ́nɛ fuꞋ níinɛ-pʉɔ pɔ́p fɑꞋnɛ mɛfɑꞋ ntɛ́ nɛ́ ntɛ́

¹ Pɔ́ɔpɛ́mɑ́ pɑ́ɑ, ɛ́ ɡʉ nǔu pɑ́Ꞌ Zẅikŋɛ Lɛ́ɛnɛ́nɛ ɡɑ́nɛ fuꞋ níinɛ mbɑ pɔ́fɑꞋ wɛ́tɛ́ ŋu lɑ́, mɔ sɛ́ ŋ́kɔŋ ŋɡɔ pʉʉ jínu nɛ́nẅín nǔu nu-pɔ́fɑꞋ ɛ̂yɑ́.

² Pʉʉ sɛ́ ńjí ŋɡɔ, ɛ́ kɑ pɔ́ ŋkɑ́ yi pʉʉ kɑ pɛ́tnɛ kɛ́ zɑ́p tʉ́m nǔu Yɛ́su Kɛlístɔ, yɛcɔ́ yúu pɔ́ ńtsʉ́ʉnɛ wʉ́ʉ pʉʉ ɡúꞋlɛ mɛsɛ́, tɛ mbɑ pɑ́Ꞌ ɛ́ yúu mi mbɔ ɛ́ pɔɔ nu cú lɑ́.

³ Ɛ́ pɔ́Ꞌɔ lɑ m bɔ́ ŋ́kɔŋ ŋɡɔ pʉʉ jí ŋɡɔ Zẅikŋɛ-Sɛ́ lɑɑ mbɔɔ ńtsʉ́ʉnɛ ŋu nɛcú nu pɔ́, mbɔ ḿbɔ́ ŋɡɑŋ pɔɔ níꞋ ndɔɔ tú-Yɛ́su pɔ́. Zẅikŋɛ Lɛ́ɛnɛ́nɛ lɑɑ ḿbɛn mbɔɔnɛ tsʉ́ʉnɛ ŋu nɛcú nu pɔ́, mbɔ ŋɡɑŋ kɑ́ kuꞋ nɛcú ŋɡɔ Yɛ́su Tsɑpʉɔ pɔ́.

⁴ Pɔ́fɑꞋ yi Zẅikŋɛ Lɛ́ɛnɛ́nɛ lɔknɛ ŋ́ɡɑ́ fuꞋ níinɛ-ŋu, ɛ́ mɛntɛ́ mɛntɛ́, lɑ́ Zẅikŋɛ Lɛ́ɛnɛ́nɛ yi ɛ́ ɡɑ́nɛ fuꞋ níinɛ ɛ̂yɑ́ kɛ́ ḿbɔ́ pɔ wɛ́mɔ́Ꞌ.

⁵ MɛfɑꞋ mi Tsɑpʉɔ ɡɑ́nɛ mbɔ̌ pʉɔ, ɛ́ mɛntɛ́ mɛntɛ́. Lɑ́ Tsɑpʉɔ ẅí ɑ ɡɑ́nɛ kɛ́ ḿbɔ́ pɔ wɛ́mɔ́Ꞌ.

⁶ Mɛndúŋ nɛlɔk ɛ́fɑꞋ mɛfɑꞋ mɛntɛ́ mɛntɛ́. Lɑ́ tɑ́Ꞌ Sɛ́ wɛ́mɔ́Ꞌ ɡɑ́nɛ mɛtʉʉ mbɔ̌ mbɑ wɛ́tɛ́ ŋu lɑ́.

⁷ Pɔ́Ꞌɔ lɑ́, Zẅikŋɛ Lɛ́ɛnɛ́nɛ lɔk pɔ́fɑꞋ ŋ́ɡɑ́ fuꞋ níinɛ mbɑ wɛ́tɛ́ ŋu lɑ́, ńdɔk pɔ́Ꞌɔ, ńnyɛt ŋɡɔ ɛ́ nǔu ŋɡɑŋ. Yîyɑ́ pɔ́fɑꞋ pɔ́ pɔ nɛlɔk ńcẅɛ́lɛ pʉɔ tsʉʉ.

⁸ Ɛ́ pɔ́Ꞌɔ lɑ Zẅikŋɛ ɡɑ́ pɔ́fɑꞋ wɛcɔ́ ŋu, ɑ pɔ́ ŋ́ɡẅɛɛ shʉ́ nɛlɔk jínu ḿbʉ̈ɔt nu, wɛcɔ́ ɡẅɛɛ shʉ́ nɛpʉ̈ɔt nu nǔu ntɛ́ yi pɛ́ ɡʉ ńjí nu nɛ́nẅín, tɑ́Ꞌ zẅikŋɛ kɛ́nɛ ŋ́ɡɛ.

⁹ Zẅikŋɛ ɛ̂yɑ́ pɛnnɛ ŋ́ɡɛ wɛcɔ́ ŋu pɔ́ ńzɑ́p tʉ́m yɛ́ nǔu Sɛ́ tɛꞋ, wɛcɔ́ ɡẅɛɛ nɛɡɛ ɡɑŋɡɔɔ fíitɛ.

¹⁰ Ɛ́ tɔ́ nǔu wɛcɔ́ ŋu yɛ́ pɔ́fɑꞋ yi ɑ lɔknɛ ŋ́ɡɑ́ fuꞋ níinɛ-ŋɡɑŋ ɛ́ pɔ́ ŋɡɑŋ nɛɡɛ mɛnu mɑ̌ɑmɑɑnɛ, ńtɔ́ nǔu wɛcɔ́ ŋ́ɡɑ́ fuꞋ níinɛ yɛ́ ɛ́ pɔ́ nɛcẅi Ŋkʉʉ ẅí ɛ́ fúnɛ mbɔ̌ Sɛ́, ńtɔ́ nǔu wɛcɔ́ ŋ́ɡɑ́ pɔ́fɑꞋ yɛ́ ɑ jí yúu mi ɛ́ fúnɛ mbɔ̌ Zẅikŋɛ Lɛ́ɛnɛ́nɛ mbɑ yi ɛ́ fúnɛ mbɔ̌ mɛzẅikŋɛ kɛpɔŋ, ŋ́ɡʉ nǔu wɛcɔ́ ŋ́ɡɑ́ fuꞋ níinɛ yɛ́ ɑ sẅiŋɛ mɛsẅíŋɛ mi ɑ kɑ zíꞋnɛ, ŋ́ɡʉ nǔu wɛcɔ́ ŋ́ɡɑ́ fuꞋ níinɛ yɛ́ ɑ jí shʉ́ nɛlɔk ŋ́kyɛ́Ꞌtɛ mîmɑ́ mɛsẅíŋɛ.

¹¹ Tɑ́Ꞌ Zẅikŋɛ Lɛ́ɛnɛ́nɛ, pɔ yɛ́tɛ́ ɡɛnɛ mîmɑ́ mɛnu, ḿbɔ́ ŋ́ɡɑ́ fuꞋ níinɛ mbɑ wɛ́tɛ́ ŋu pɑ́Ꞌ Zẅikŋɛ kɔŋnɛ.

Mbɑp-mbʉʉ tɑ́Ꞌ, mɛzʉꞋ mɛ́ zɑ́ɑ

¹² Ndʉ́ŋndʉŋ pɑ́Ꞌ mbɑp-mbʉʉ pɔ́ pɔ tɑ́Ꞌ lɑ́, tɛ mbɑ pɑ́Ꞌ ɛ́ ɡẅɛɛnɛ mɛzʉꞋ-mbʉʉ tɛ ɛ́ zɑ́ɑ zɑ́ɑnɛ lɑ́, mɛzʉꞋ-mbʉʉ zɛɛ ńzɑ́ɑ tɛꞋ lɑ́, ŋ́kɛ́ ńcúꞋlɛ ḿbɔ́ pɔ tɑ́Ꞌ mbɑp-mbʉʉ wɛ́mɔ́Ꞌ, ɛ́ pɛn ḿbɔ́ pɔ pɔ́Ꞌɔ nǔu Kɛlístɔ.

¹³ MbíꞋŋɡɔ Sɛ́ kɑ lɔk tɑ́Ꞌ Zẅikŋɛ wɛ́mɔ́Ꞌ ńtɛmtɛ wɛkŋɛ pɛtsʉʉ nɛpɔ́ yi pɛkŋɛ ɡʉ ńdɔk pɔ́Ꞌɔ, ḿbɔ́ tɑ́Ꞌ mbɑp-mbʉʉ, pʉɔ lɑɑ ḿbɔ́ pɔ pɑyúdɑ, kɛ pɔ pʉɔ pi pɔ́p kɑ́ pɔ́ pɑyúdɑ pɔ́ ɔɔ, mbɔ pɔ pɛkwɑɑ kɛ pɔ́ɔ-lɑ́Ꞌ ɔɔ, mbɔ Sɛ́ kɑ tɛmtɛ ńníꞋ tɑ́Ꞌ Zẅikŋɛ wɛ́mɔ́Ꞌ tʉ́m pɛkŋɛ pɛpɔ́p pɛtsʉʉ.

¹⁴ Pɛkŋɛ zɛɛ ḿbɔ́ ńjí ŋɡɔ mbɑp-mbʉʉ kɑ́ pɔ́ pɔ tɑ́Ꞌ kɛm pɔ́, ɛ́ ɡẅɛɛ mɛzʉꞋ-mbʉʉ tɛ ɛ́ zɑ́ɑ zɑ́ɑnɛ.

¹⁵ Ku lɑɑ ḿbɔ́ pɛ́Ꞌnɛ ńcú ŋɡɔ pɑ́Ꞌ ɑ pɔ́ pɔ́ lɑ́, mbɔ ɑ kɑ́ pɔ́ ńdɔk ńdɑtnɛ nǔu mbɑp-mbʉʉ pɔ́, ɑ lɑɑ ŋ́kɛ́ ńcú pɔ́Ꞌɔ, mbɔ ɛ́ kɑ́ lɔk ḿbɔ́ pɔ ŋɡɔ ɑ kɑ́ pɛ́t nǔu mbɑp-mbʉʉ pɔ́ pɔ́.

¹⁶ Nɛtúutɛ lɑɑ ḿbɔ́ pɛ́Ꞌnɛ ńcú ŋɡɔ pɑ́Ꞌ ɑ kɑ́ pɔ́ lík pɔ́ lɑ́, ɑ kɑ́ pɔ́ ńdɔk ńtɛmtɛ nǔu mbɑp-mbʉʉ pɔ́, mbɔ ɑ kɑ́ cú pɔ́Ꞌɔ, ńdɔk ńnɑ́ kɛ́ pɔ́ pɔ nǔu mbɑp-mbʉʉ pɔ́.

¹⁷ Mbɑp-mbʉʉ tsʉʉ kɑ pɔ́ pɛ́Ꞌnɛ ḿbɔ́ pɔ ndɑꞋ lík, mbɔ ɛ́ lɑɑ ḿbɔ́ pɛ́ lɔk kʉ̈ɔ́ ńzúꞋ nu? Ɛ́ kɑ pɔ́ pɛ́Ꞌnɛ ḿbɔ́ pɔ ndɑꞋ nɛtúutɛ, mbɔ ɛ́ lɑɑ ḿbɔ́ pɛ́ lɔk kʉ̈ɔ́ ńzúꞋ jɑ́k-yúu?

¹⁸ Lɑ́ Sɛ́ kɑ kɔŋnɛ, ńtík mbɑ yɛ́tɛ́ zʉꞋ-mbʉʉ lɑ́ pɔ nǔu yɛ́ zʉꞋ.

¹⁹ Mbɑp-mbʉʉ kɑ pɔ́ pɛ́Ꞌnɛ ḿbɔ́ pɔ tɑ́Ꞌ kɛm wɛ́mɔ́Ꞌ, mbɔ pɛ́ fúŋ ŋɡɔ mbɑp-mbʉʉ?

²⁰ MɛzʉꞋ-mbʉʉ zɛɛ ńzɑ́ɑ tɛꞋ lɑ́ ŋ́kɛ́ ńcúꞋlɛ ḿbɔ́ pɔ tɑ́Ꞌ mbɑp-mbʉʉ.

²¹ Mbɔ́ lík pɔɔ cú mbɔ̌ pɔ́ ŋɡɔ mbɔ ɑ pɔɔ wɛ́ lúꞋnɛ pɔ́, tú kɛ́ mbɔɔ cú mbɔ̌ mɛku ŋɡɔ mbɔ ɑ pɔɔ mɛku lúꞋnɛ pɔ́.

²² Tɛ ńtsʉ́Ꞌ pɔ́Ꞌɔ, mbɔ mɛzʉꞋ-mbʉʉ mí pɛ́ kwɑŋɛ́nɛ ŋɡɔ ɛ́ mɛtʉʉ kɑ́ ɡẅɛɛ, kɛ cẅɛ́lɛ́ cẅɛ́lɛ́nɛ ɡúu.

²³ MɛzʉꞋ-mbɑp-mbʉʉ mi pɛ́ pɛn mbɔɔ lɔk ɛ́fúŋ yúu pɔ́, pɛ́ ɡɛ mɛkuꞋ mîmɑ́ tɛꞋ. Mɛcɔ́ mi pɛ́ zɛɛ mbɔɔ nɑ́ŋ ŋ́kẅíi mbɑ kẅíinɛ pɔ́, pɛkŋɛ líŋɛ nu ŋ́ɡɑ́ nǔu tɛꞋ,

²⁴ ŋ́ɡʉ nǔu mi pɛ́ zɛɛ ńnɑ́ŋ ŋ́kẅíi nu ŋ́ɡɑ́ nǔu, pɛ́ pɔɔ líŋɛ nu ŋ́ɡɑ́ nǔu ndɛnnú pɔ́. Lɑ́ Sɛ́ kɑ tsʉ́Ꞌ nɛniitɛ mbɑp-mbʉʉ, ŋ́ɡɑ́ mɛkuꞋ nǔu mɛzʉꞋ-mbʉʉ mi pɛ́ ɡwɑ́knɛ nu nǔu ɡwɑ́knɛ,

²⁵ ńjí ŋɡɔ mbɑp-mbʉʉ kɛ́ nɑ́ŋ mɛnji mɛnji pɔ́, tɛ ńtsʉ́Ꞌ pɔ́Ꞌɔ, zʉꞋ-mbɑp-mbʉʉ ɡɔ́ ɛ́fɑꞋ yɛ́ fɑꞋ, ɛ́fɑꞋ pɑ́Ꞌ mɛcɔ́ mɛzʉꞋ ɡʉ ńjʉ́ pii yɛ́.

²⁶ Lɑ́ ḿbɔ́ yi mɛcɔ́ mɛzʉꞋ-mbʉʉ lɑɑ ḿbɔ́ ńjʉ́ɔ ŋɡʉ̈ɔ́Ꞌ, mɛcɔ́ pɛn ńjʉ́ɔ yɔ́p ŋɡʉ̈ɔ́Ꞌ yîyɑ́ ɡúu, ḿbɔ́ yi pɛ́ lɑɑ ḿbɔ́ ŋ́ɡɑ́ mɛku yɛcɔ́ zʉꞋ-mbʉʉ, mɛcɔ́ pɛn ńtsɑ́ɑtɛ yɔ́p ɡúu.

²⁷ Ɛ́ ɡʉ nǔu mbʉʉ-Kɛlístɔ, mbɔ pʉʉ wɔ lɔknɛ ḿbɔ́ yîyɑ́, ẅîwɑ́ ŋu pɔ́ nǔu pʉʉ, ḿbɔ́ tɑ́Ꞌ kɛm nǔu mbʉʉ ɛ̂yɑ́.

²⁸ Sɛ́ kɑ tsʉ́Ꞌ nɛniitɛ cúꞋlɛ yɛ́, ḿbiitɛ ńzɑ́p ɡɑŋntúu, ḿbɑ́ɑtɛ ńzɑ́p pɑcẅiŋkʉʉ pi pɔ́p fúnɛ mbɔ̌ wɛ́, ḿbɑ́ɑtɛ ńtík pɑzíꞋ pʉɔ nɛ́ nu-Sɛ́, pɛ́ fú nǔu pɔ́p ńjʉ́ɔ pʉɔ pinɛ ɑ kɑ ɡɑ́nɛ fuꞋ níinɛ yɔ́p, ɛ́ pɔ́ pɑ́Ꞌ pɔ́p ɡʉ ŋ́ɡɛ mɛnu mɑ̌ɑmɑɑnɛ, ḿbɑ́ɑtɛ ńjʉ́ɔ pʉɔ pi ɑ kɑ ɡɑ́nɛ fuꞋ níinɛ yɔ́p, ɛ́ pɔ́ pɑ́Ꞌ pɔ́p ɡʉ ŋ́ɡɛ ɡɑŋɡɔɔ fíitɛ, pɛ́ fú nǔu pɔ́p ńjʉ́ɔ pʉɔ pi yɔ́p pɔ́fɑꞋ ɛ́ nɛcẅɛ́lɛ pɛcɔ́ pʉɔ mbɑ pʉɔ pi pɔ́p niitɛ́nɛ cúꞋlɛ, tɛ mbɑ pʉɔ pi ɑ kɑ ɡɑ́nɛ fuꞋ níinɛ yɔ́p ɛ́ pɔ́ pɑ́Ꞌ pɔ́p ɡʉ ɛ́sẅíŋɛ mɛsẅíŋɛ mi pɔ́p ŋkɑɑ zíꞋ.

²⁹ Pʉɔ pɛtsʉʉ tsɛt cúꞋlɛ kɑ́ pɔ́ ɡɑŋntúu pɔ́, ŋ́kɛ́ mbɔɔ pɑcẅiŋkʉʉ pi pɔ́p fúnɛ mbɔ̌ Sɛ́ pɔ́, ŋ́kɛ́ mbɔɔ pɑzíꞋ pʉɔ nɛ́ nu-Sɛ́ pɔ́, Sɛ́ ŋkɑɑ ɡɑ́ fuꞋ níinɛ-pʉɔ pɛtsʉʉ pɑ́Ꞌ pɔ́p ɡʉ ŋ́ɡɛ mɛnu mɑ̌ɑmɑɑnɛ pɔ́,

³⁰ kɛ pɔ nɛɡɛ ɡɑŋɡɔɔ fíitɛ ɔɔ, kɛ pɔ nɛsẅíŋɛ mɛsẅíŋɛ mi pɔ́p kɑ zíꞋnɛ pɔ́, kɛ pɔ nɛkyɛ́Ꞌtɛ mîmɑ́ mɛsẅíŋɛ pɔ́.

³¹ Pɔ́Ꞌɔ lɑ́, pʉʉ sɛ́ ńtsɑ́ɑ ŋɡɔ Sɛ́ lɔk mɛyúu mi ɛ́ cẅɛ́lɛ́nɛ tɛꞋ ŋ́ɡɑ́ fuꞋ níinɛ yʉ́ʉ. Lɑ́, mɔ ŋ́kɛ́ ńnyɛt wʉ́ʉ nɛ́ sɛ̂ndúŋ ẅi ɛ́ lɛɛnɛ mɛcɔ́ tsʉʉ.