1 Kɔlɛ̂ŋtɛ 1 - Kɑɑ Fí

CɛꞋlɛ

¹ Yɔ ŋwɑꞋnɛ fú mbɔ̌ mɔ Pɔ̂l ɡɑŋntúu-Yɛ́su Kɛlístɔ. KwɑꞋ jʉ́ Sɛ́ kɑ tsɔ́Ꞌnɛ wɑ́ɑ nǔu wɛ nɛkɔŋ ńdɔk ŋ́ɡɛ wɛ́tɛ́. Mbɑ mɔ́ɔmɑ́ wɛkŋɛ Sɔstɛ̂n ɡúu.

² Mɔ ŋwɑꞋnɛ́nɛ ŋ́ɡɑ́ mbɔ̌ cúꞋlɛ-pʉɔ-Sɛ́-tʉ́sɔŋ-Kɔlɛ̂ŋtɛ, pɔ́p pinɛ Sɛ́ kɑ tɛmtɛ́nɛ wɔ́p nǔu Yɛ́su Kɛlístɔ ńdɔk wɔ́p ŋ́ɡɛ pʉɔ pɛ́, ńcú mbɔ̌ pɔ́p ŋɡɔ pɔ́p pɔ́ kwɑꞋ pʉɔ pɛ́. Ŋ ɡɑ́ yɔ ŋwɑꞋnɛ mbɑ mbɔ̌ pʉɔ tsʉʉ pi pɔ́p mbɑ ɡɔ́ lɑ́, ɛ́fúŋ lík-Tsɑpʉɔ wɛkŋɛ Yɛ́su Kɛlístɔ. A lɔk pɔ́Ꞌɔ, ḿbɛn ḿbɔ́ Tsɑpʉɔ wɔ́p ɡúu.

³ Tɑ́t wɛkŋɛ Sɛ́ mbɑ Tsɑpʉɔ Yɛ́su Kɛlístɔ pɔ́ mbɔ̌ nɛ́ pʉʉ ḿbɛn ḿbɔ́ ńníꞋ mɔ́fíitɛ tʉ́m pʉʉ.

Mɛnu sʉ́Ꞌnɛ mi Sɛ́ lɔknɛ ŋ́ɡɑ́ fuꞋ níinɛ-pʉɔ-Kɔlɛŋntɛ

⁴ Mɔ sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ ŋkɑ́ tsʉʉ mbíꞋ wʉ́ʉ, nǔu mɛnu sʉ́Ꞌnɛ mi ɑ kɑ lɔknɛ ŋ́ɡɑ́ fuꞋ níinɛ yʉ́ʉ, ńdɛɛ nǔu pɑ́Ꞌ pʉʉ pɛ́ Yɛ́su Kɛlístɔ kɑ kɛ́mɔ́ ńtɛmtɛ lɑ́.

⁵ Pɑ́Ꞌ pʉʉ pɛ́ Kɛlístɔ kɑ kɛ́mɔ́ ńtɛmtɛ lɑ́, Sɛ́ kɑ fú pɔ́Ꞌɔ, ŋ́ɡɑ́ pɔ́fɑꞋ tsʉʉ mbɔ̌ pʉʉ. A kɑ ɡɛ pʉʉ kuꞋ nɛsẅíi nu yɛ́, ḿbɛn ŋ́ɡɛ pʉʉ kuꞋ nɛjínu nɛ́nẅín.

⁶ Ɛ́fú nǔu pɑ́Ꞌ pɛ́ kɑ sẅíinɛ wʉ́ʉ nɛ́ nu yi pɛ́ jínɛ nǔu Kɛlístɔ lɑ́, pʉʉ pɛ́m nɛ́ tʉ́m yʉ́ʉ tsʉʉ,

⁷ tɛ ɛ́ ŋkɔ̂ɔnɛ ḿbɔ́ mbɔ̌ pʉʉ pi pʉʉ sɛ́ ńzẅíꞋlɛ ŋkɑ́ yi Tsɑpʉɔ wɛkŋɛ Yɛ́su Kɛlístɔ ŋ́ɡɛ ŋ́ŋwɑk, yɛcɔ́ fuꞋ yi ɛ́ fúnɛ mbɔ̌ Sɛ́, tɛ pʉʉ pɛ́t ḿbɔ́ ḿmuŋɛ muŋɛ́nɛ kɑ́ pɔ́ ɡú pɔ́.

⁸ Jʉ́ Yɛ́su Kɛlístɔ ɡʉ ŋ́ɡɛ pʉʉ tɛntɛ tɛntɛnɛ tɛ ńdɑ́Ꞌ ḿmɛkŋɛ, ɛ́ lɑ́Ꞌ lɛ́Ꞌ yi jʉ́ Tsɑpʉɔ wɛkŋɛ, ɡʉ ńdɑ́Ꞌ ḿbɛn ńtɔ́ pɛ́ pɔɔ ḿbɔ́ ńdɑ́Ꞌ wʉ́ʉ nǔu yɛcɔ́ yúu pɔ́.

⁹ Jʉ́ Sɛ́ ẅi ɑ kɑ tsɔ́Ꞌnɛ wʉ́ʉ pɑ́Ꞌ pʉʉ ɡʉ ńnɑ́ŋ ŋkɑ́ tsʉʉ ńtɛmtɛ mbʉʉ yʉʉ nǔu Mɔ́ɔ nɛ Yɛ́su Kɛlístɔ ẅi ɑ Tsɑpʉɔ wɛkŋɛ, ɑ lɔɔ ŋ́kɑꞋ yúu mi ɑ ɡʉ ŋ́ɡɛ ḿbɛn ŋ́kúpmɛ pɔ́.

Fɑkŋɛ tsɛtsɛt pʉɔ-Kɛlístɔ-Kɔlɛŋntɛ

¹⁰ Pɔ́ɔpɛ́mɑ́, n dɔk lík-Tsɑpʉɔ wɛkŋɛ Yɛ́su Kɛlístɔ ńcú mbɔ̌ pʉʉ ŋɡɔ: «Pʉʉ ɡẅɛɛ tɑ́Ꞌ ntsu, ŋɡɔ kɔɔ fɑkŋɛ pɔ́ tsɛtsɛt pʉʉ, ŋɡɔ pʉʉ ɡẅɛɛ tɑ́Ꞌ ntɛ́ nɛsɑ́ŋ nu, ŋ́ɡẅɛɛ tɑ́Ꞌ kwɑŋɛ.

¹¹ Pɔ́ɔpɛ́mɑ́ pɑ́ɑ n zɛɛ ńcú pɑ́Ꞌ mbíꞋŋɡɔ pʉɔ nǔu njẅɛt-Kɛlɔwɛ̂ kɑ ɛ́sẅíi wɑ́ɑ ŋɡɔ fɑkŋɛ kɑ kɛ́mɔ́ ŋ́kúu tsɛtsɛt pʉʉ.

¹² Ŋ kɑ fú nǔu ńzúꞋ ŋɡɔ mbɑ wɔ̌ lɑ́ tsɛtsɛt pʉʉ tsʉ́Ꞌ ɛ́sẅíŋɛ pɔ nǔu yɛ́ ntɛ́. Wɛcɔ́ ŋu ɡɔ́ mɔ ŋu-Pɔ̂l, wɛcɔ́ ɡɔ ɑ ŋu wɛ Apɔlɔ́s. Wɛcɔ́ ɡɔ ɑ ŋu-Kɛfɑs, wɛcɔ́ cú ŋ́ɡɔ ɑ ŋu wɛ Kɛlístɔ.

¹³ Ɛ́ pɑ́Ꞌɑ mbɔ Kɛlístɔ ɡɑp mbʉʉ yɛ́? Pɛ́ kɑ kẅii pɔ Pɔ̂l nǔu tʉ́ mbɑ́ŋtɛ pɑ́ŋtɛ́nɛ mbíꞋ wʉ́ʉ? Kɛ pʉʉ kɑ cẅɛ́ɛ ŋki pɔ nǔu lík-Pɔ̂l?»

¹⁴ «Mɔ sɛ́ ŋ́ɡɛ́mtɛ Sɛ́ mbíꞋŋɡɔ ɑ kɑ́ pɔ́ ndɑꞋ Gɑẅîs pɔ́p Kɛlíspus pɔ́, mbɔ wɛcɔ́ ŋu wʉʉ kɑ́ kɛ́ ńcẅɛ́ɛ ŋki mbɔ̌ mɔ pɔ́.

¹⁵ Pɔ́Ꞌɔ lɑ́, wɛcɔ́ ŋu ẅí ḿbɔ́ ɑ cú ŋɡɔ pʉʉ kɑ cẅɛ́ɛ ŋki ńdɔk pɔ́Ꞌɔ, ńtsʉ́Ꞌ pʉɔ pɑ́ɑ kɑ pɔ́ ɡú pɔ́.

¹⁶ Ɔ́ɔŋ, n dikŋɛ kʉ̈ɔ́, kɔꞋndɑ́-Stɛfɑnɑs kɑ pɛn ńcẅɛ́ɛ ŋki mbɔ̌ mɔ, ɛ́ kɑ́ pɔ́ ndɑꞋ pɔ́Ꞌɔ pɔ́, mbɔ mɔ ŋ́kɑɑ pɛn ńjí wɛcɔ́ ŋu tsɛtsɛt pʉʉ ẅi ɑ kɑ cẅɛ́ɛnɛ ŋki mbɔ̌ mɔ pɔ́.

¹⁷ Kɛlístɔ ŋkɑɑ zɛɛ ńtúu wɑ́ɑ ŋɡɔ ŋ ɡʉ ŋ́ɡɛ pʉɔ cẅɛ́ɛ ŋki mbɔ̌ mɔ pɔ́. A kɑ túu wɑ́ɑ pɔ ŋɡɔ ŋ ɡʉ ńcẅi Ŋkʉʉ Sʉ́Ꞌnɛ. Lɑ́ ŋ́kɛ́ mbɔɔ lɔk pɔ́ jínu-ŋumɛsɔŋ ńcẅi pɔ́, ḿbɔ́k nɛɡɛ mɛtʉʉ mi ɛ́ fúnɛ nǔu pɑ́Ꞌ Kɛlístɔ kɑ pfúnɛ nǔu tʉ́ mbɑ́ŋtɛ pɑ́ŋtɛ́nɛ ḿmɛ.»

Yɛ́su Kɛlístɔ mɛtʉʉ mbɑ jínu-Sɛ́

¹⁸ Pɛ́ zɛɛ ńcú nu nǔu nɛvú-Kɛlístɔ nǔu tʉ́ mbɑ́ŋtɛ pɑ́ŋtɛ́nɛ ɛ́ pɔ́ mbɔ̌ pʉɔ pi pɔ́p nǔu sɛ̂ndúŋ nɛpɛ́ ḿbɔ́ pɔ nu-pɛpɑ́lɛ́, lɑ́ ŋ́kɛ́ ŋ́ɡʉ nǔu pɛkŋɛ pi pɛkŋɛ nǔu sɛ̂ndúŋ-luk, yîyɑ́ nu pɔ́ mbɔ̌ pɛkŋɛ ńdɔk ńdɛꞋlɛ pɔ mɛtʉʉ-Sɛ́.

¹⁹ Sɛ́ kɑ zɛɛ ńcú tsɛt ŋwɑꞋnɛ yɛ́ ŋɡɔ: «Mɔ ŋ́ɡɛ ɛ́sɑt jínu-pɑjínu, ḿbík jínu-pʉɔ pi jínu yɔ́p ɡú.»

²⁰ Jínu lɔk pɑ́Ꞌɑ ḿbɛn ḿbɔ́ ɡɔ́? Ŋkyɛ́Ꞌtɛ ŋwɑꞋnɛ-Sɛ́ pɔ́ ɡɔ́? Nzɔŋnu nǔu yɔ kɛm-njí pɔ́ yɛ́ ɡɔ́? Sɛ́ ŋkɑɑ kɛ́ ŋ́ɡɛ jínu-ndǔmbí tsʉ́Ꞌ mɛnu-pʉɔ pɔɔ?

²¹ Ɛ́ pɔ́Ꞌɔ, pɑ́Ꞌɑ mbíꞋŋɡɔ pʉɔmɛsɔŋ ŋkɑɑ lɔk yɔ́p jínu ńjí Sɛ́ pɔ́, tɛ mbɑ pɑ́Ꞌ Sɛ́ sɑ́ɑnɛ sɑ́ɑnɛ́nɛ ńnyɛt jínu yɛ́. Ɛ́ yúu mi ɛ́ kɑ ɡɛnɛ Sɛ́ zɑ́p ŋɡɔ ɑ ɡʉ ŋ́ɡɛ pʉɔ pi pɔ́p zɑ́pnɛ tʉ́m nǔu wɛ́ luk, ɛ́fú nǔu yɔ nu yi pɛkŋɛ sɛ́ ńcú lɑ́, pʉɔ pɔ́ ńjʉ́ɔ ŋɡɔ ɛ́ pɔ́ pɔ mɛnu pɑ́lɛ́ lɑɑ.

²² Pɑyúdɑ nǔu yɔ́p ɡúŋ ḿbɔ́ ḿbíkŋɛ ŋɡɔ pɛ́ nyɛt yúu mi ɛ́ lɛ́Ꞌlɛ́nɛ mɛtʉʉ-Sɛ́. Pʉɔ-Ŋɡɛlɛ́k pɔ́ ḿbíkŋɛ yúu mi ɛ́ lɛ́Ꞌlɛ́nɛ kwɑꞋ jínu.

²³ Lɑ́ ɛ́ kɛ́ ŋ́ɡʉ nǔu pɛk, pɛk sɛ́ ɛ́sɑ́Ꞌ pɔ nu-Kɛlístɔ ẅi pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ. Yîyɑ́ nu pɔ́ mbɔ̌ pɑyúdɑ ḿbɔ́ nu yi ḿbɔ́ pɛ́ zɛɛ mbɔɔ kẅíi tɛ ɛ́sẅíi ŋu pɔ́, ḿbɔ́ mbɔ̌ pʉɔ pi pɔ́p kɑ́ pɔ́ pɑyúdɑ pɔ́ ḿbɔ́ pɔ mɛnu-pɛpɑ́lɛ.

²⁴ Lɑ́ ɛ́ ɡʉ mbɔ̌ pʉɔ pi Sɛ́ tsɔ́Ꞌnɛ wɔ́p, kɛ ɛ́ pɔ́ pɔ pɑyúdɑ ɔɔ, kɛ pʉɔ pi pɔ́p kɑ́ pɔ́ pɑyúdɑ pɔ́ ɔɔ, Kɛlístɔ lɛ́Ꞌlɛ́nɛ pɑ́Ꞌ mɛtʉʉ-Sɛ́ pɔ́nɛ, mbɑ pɑ́Ꞌ jínu-Sɛ́ pɔ́nɛ.

²⁵ MbíꞋŋɡɔ yúu mi Sɛ́ ɡɛnɛ ŋumɛsɔŋ jʉ́ɔ ŋɡɔ ɛ́ nu-pɑ́lɛ, jínu nǔu ńdɛɛ yi ɛ́ nǔu yúu mi ŋumɛsɔŋ ɡɛnɛ. Yúu mi Sɛ́ pɛnnɛ ŋ́ɡɛ ŋumɛsɔŋ jʉ́ɔ ŋɡɔ ɛ́ pɔ́t pɔ́tnɛ, yîyɑ́ ɡẅɛɛ tʉʉ ńdɛɛ yi yúu mi ŋumɛsɔŋ ɡɛnɛ.

²⁶ Pɔ́ɔpɛ́mɑ́, pʉʉ pi Sɛ́ kɑ tsɔ́Ꞌnɛ wʉ́ʉ, pʉʉ jʉ́ɔ ntɛ́ yi pʉʉ lɔknɛ ḿbɔ́, pʉɔ pi pɛ́ ndǔmbí ńjʉ́ɔ ŋɡɔ pɔ́p pɑjínu, pɔ́p kɑ́ pɔ́ tsɛtsɛt pʉʉ tɛ ńzɑ́ɑ pɔ́. Pɑɡẅɛɛ mɛtʉʉ kɑ́ pɔ́ tsɛtsɛt pʉʉ tɛ ńzɑ́ɑ pɔ́. Pɑfú nǔu mɛtsɛ́nndɑ́-pɛmɑ́ pʉɔ pɛn ŋ́kɛ́ mbɔɔ tsɛtsɛt pʉʉ tɛ ńzɑ́ɑ pɔ́.

²⁷ Lɑ́, Sɛ́ kɑ tsɔ́Ꞌ yúu mi ndǔmbí jʉ́ɔnɛ ɛ́ pɔ́ pɔ yúu pɛpɑ́lɛ́ ńdɔk ńtɛ́m sʉ́ʉ nǔu pɑjínu, ńtsɔ́Ꞌ yúu mi ɛ́ ndǔmbí ḿbɔ́t pɔ́tnɛ ńdɔk ńtɛ́m sʉ́ʉ nǔu mi ɛ́ ɡẅɛɛnɛ tʉʉ.

²⁸ Sɛ́ kɑ tsɔ́Ꞌ yúu mi ɛ́ ndǔmbí ŋ́kɛ́ mbɔɔ yɛcɔ́ yúu kuꞋ, ŋ́kʉ̈ɔ́k ŋ́kʉ̈ɔ́knɛ, pɛ́ ɡwɑ́k ɡwɑ́knɛ, ńdɔk ńcɔŋ ndɛn yúu mi pɛ́ kwɑŋɛ́nɛ ŋɡɔ ɛ́ yúu tɛꞋ.

²⁹ Ɛ́ lɛɛ pɔ́Ꞌɔ, wɛcɔ́ ŋumɛsɔŋ pɔɔ ŋɑ́Ꞌlɛ mbi Sɛ́ pɔ́.

³⁰ Jʉ́ Sɛ́ kɑ lɔk wɛ́ ŋ́ɡɛ yɛkŋɛ jínu. Sɛ́ fú nǔu wɛ́ ńjʉ́ɔ wɛkŋɛ pɑ́Ꞌ pɑkɛfɑɑnɛ, ńdɔk wɛkŋɛ ŋ́ɡɛ pʉɔ pɛ́, ńzɑ́Ꞌ ŋkʉ-puꞋ-nu kɛpɔŋ nǔu pɛkŋɛ.

³¹ Ɛ́ lɔk pɔ́Ꞌɔ, ńcʉ́ɔkŋɛ nǔu nu yi ŋwɑꞋnɛ-Sɛ́ cúnɛ ŋɡɔ: «Ŋu lɑɑ ḿbɔ́ ŋ́kɔŋ nɛŋɑ́Ꞌlɛ, ɑ lɔk pɔ yúu mi Tsɑpʉɔ kɑ ɡɛnɛ lɑ ńdɔk ŋ́ŋɑ́Ꞌlɛ.»