Markus 1 - Jarawa

¹ Ban swaptak ɓwaɗan kun la Yeso Kristi, Ɓo la Koǝl.

² A nywangal i ɓaal nggup la Ishaya, mayak taktum la Koǝl na: “Mi tumun la ma tumun la, i dumu, ɓi ɗǝ'ǝs njar ru.”

³ “Yi nǝk na zum ma yam ma ɓa, i ngam i ki shappi ɓo na, ‘Ɗǝ'ǝs na nǝk lawun lakunla ban yu la Matadla, ɓi njar ma yi bil gha gan nggwang ɓa.’ ”

⁴ She Yohana yu, i ki pak baptisma ɓi ɓoɓa ɓaal zum ma yam ka ɓa ma, i wad ki shap kun ɗiya, na ɓe yak tubi, a pak baptisma, ɓi Koǝl kumban zub mbuk ɓe i mud ɓǝsǝn kun ɓa la ya.

⁵ Bǝlǝn ɓoɓa ki nǝk i Urshalima la ɓoɓaan i ban ɓaan ɗangɗang, i nzaal Yahudiya, sa ɓe kumban sǝni la ban wak kun li gha i zum ma yam ka ɓa ma, a dabban shap ɓǝsǝn kun ɓa a pak, la i pak baptisma ɓe i sal Urdun.

⁶ Yohana ma'an lu'ut ma a swaran la ngyong rakumi. I kud nggur nggup ɓi dwangal ɓuni. Mbaas la ngyi ma yi ki kum i zum na gǝrliin li.

⁷ Kun ma i shap lami: “Kaa ganɗa i takwad shap laa mi, ɓoma gul i taɓa ɓi yuun, ma sun gam ɓa ndwang swat koǝt li ɓa.

⁸ Mi ki pak baptisma ɓi wun la yam, ama yi yu pa'an ɗi wun, la Wuus la Koǝl.”

A pa'am baptisma ɓi Yeso

⁹ I mǝs ma ki Yeso purun i Nazarat i nzaal Galili la Yohana pak baptisma ɓi i sal Urdun.

¹⁰ Ban pur la Yeso i gyangat sal ma, she i sun takkoǝl ma sa'ad gǝb ɓaali rwap. She Wuus la Koǝl dwang ɓi mud wa kurkutuk na.

¹¹ La ging maan pur i takkoǝl shap na: “Wu Ɓo la na ma mi yad shangmi, ɓaala nwangam la wu ma kaan.”

Sheɗan pya'as Yeso

¹² Takwad wa, she Wuus la Koǝl mak ɓi ɓeer i zum ma yam ka ɓa.

¹³ I nǝk i zum ma ma tangal lumi yiin. Sheɗan ki pyaʻasi. I bana yi gha ma ɓi ngyam zum nga. Ɓi muntum ɓa la Koǝl ɓi ki pak gǝrɓa i yadti.

Ban swabtak gaan la Yeso

¹⁴ Rangan Hiridus mak ɓe gib Yohana i nda ma gib ɓo. Takwad wa, she Yeso ɓeer i nzaal Galili, yi ki shap ɓwaɗan kun la Koǝl.

¹⁵ Yi na, “Mǝs ma Koǝl mak pa'am. Ban nwang rangan li shi'im tuu. Lakunla wa, yak na tubi i mud ndarak kun ɓa la wun, wun mak ɓaal wun i mud ɓwaɗan kun mi!”

¹⁶ Ma Yeso ɓi sa kwaʻat i gyang shiim Galili, she yi sun Siman la ngyimi ma bid Andarawus ɓi mak raga ma bwal nji i ɓaal shiim ma. Gaan laya na ban bwal nji.

¹⁷ Yeso shappe na, “ Bil na mi, mi shiʻin wun la woma wun yuun ɓo gha bana i karkun nji.”

¹⁸ Ban wak wa, she a shik raga laya ma, a bili.

¹⁹ Ma i li dum gap la ban sa i gyang shiim ma, she i sun Yakubu ɓola Zabadi la ngyimi Yohana i ɓaal kurlukbiin ɓi ɗǝʻǝs raga laya.

²⁰ Ma i sun ya, she i tuʻul ya, la a bwa'al a shik tadya Zabadi la ɓoɓa pak gaan ɗi ma wurup i ɓaal kurlukbiin ma, a bili.

Yeso purun ɓiɓin kwaʻar i yid ɓomaan

²¹ Yeso la ɓoɓa ki bili ɓeer i Kafarnahum. Ma lib Asabar pak, lib ban wuus laama, she Yeso ko nda ban raam la Yahudawa. Yi ki yiʻil ɓo la kun la Koǝl.

²² Gǝrɓa i yiʻil ɓoɓa gha sheel ya shangmi. Lakunla i yiʻil na ya, wa yi gha la nggur kun ban shap kun ɓa taɓi la ɓoɓa shik nzu la Musa.

²³ Ya mud wa, she ɓomaan ma ɓiɓin kwaʻar i yiɗi i ɓaal nda ban raam la Yahudawa ma, ngaʻat gingi, yi na,

²⁴ “Yeso ma pur i Nazarat, mala pangaɗu la su? U yuun ɓu walsu ɓi su wu ne? Mi, ndaal na wu – wuna Ɓoma Koǝl tar, ma miik ka yiɗu ɓa!”

²⁵ Yeso ngang ɓi mud, i shappi na, “Mwad yang! Pur i ɓaal yiɗi!”

²⁶ Ma ɓiɓin kwaʻar ma wak wa, she i ngam, i mak ɓi ɓoma tuko i nzaal, yid ɓoma ki ɓin, la ɓiɓin kwa'ar ma ki ngam, she i pur i yid ɓoma.

²⁷ Gǝrma sheel ɓoɓa raam i bana, she a ki maas biib ya na, “Mala mi? Piip ban yi'il gǝr- la ngyap! Yi ki mak ɓi ɓiɓin kwaʻar pur i yid ɓo, she a yakti'i, a pur.”

²⁸ Kun i mud Yeso kangar yak koyab ban i nzaal Galili.

Yeso pa ɓǝs ɓi bǝlǝn ɓo

²⁹ Sun ganɗa, ma a pur i ɓaal nda ban raam, yi, la Yakubu la Yohana ɓeer i la le ɓi Siman la Andarawus.

³⁰ Ngga li maam la Siman nga, nwang ni mud ban nwang, lakunla yidkwanan, la a shappi Yeso.

³¹ She Yeso ko ban ngga li maam la Siman ma, i bwal ɓuk ɓi i ngaʻaɗi ɓi jaam i mud kwaʻaɗi. Ban pak wama she yidkwanan la maam ma ɓwar. Ma maam ma kum ɓǝs, she i pa gǝrliin ɓe li.

³² Ma tangal ko, i kurup lama, ɓiɓo yuun bǝlǝn ɓoɓa yidkwanan la ɓoɓa ɓiɓin kwaʻar i yid ya ɓi Yeso.

³³ Ɓiɓo pyang ɓa pur i gari ma raam i kun la ma.

³⁴ Yeso pa ɓǝs si bǝlǝn ɓoɓa ɓiɓin yidkwanan ɗangɗang. I mak ɓi ɓiɓin kwaʻar pur i ɓaal yid ɓoɓa ɓiɓin kwaʻar bwal ya. I ɗak ɓiɓin kwaʻar ɓa la ban shap kun, lakunla a daal ma na, yi na Ɓo ma Koǝl tar.

Yeso kam Koǝl i ban ma ɓo gha ɓa

³⁵ I mud duru ki tuʻum suma, Yeso lwak, i ɓeer i ban ma ɓo gha ɓa, ɓi kumban kam Koǝl gha.

³⁶ Takwad wa, Siman la ɓoɓa yi la ya, lwak a ɓeer ɓi ngal bana Yeso gha.

³⁷ Ma ya kumi, she ya shappi na, “Koyab ɓo ɓi ngal ban la wu.”

³⁸ Yeso kaɗan ɗiya na, “Su ɓeer na ban ma ɗang – ɓi ban ɓa tuu–tuu ɓa kumban shap kun la Koǝl gha ɓe. Gǝrma yuuna lama.”

³⁹ Lakunla wa she i ki ɓeer i koyab ban i Galili, i ki shap kun la Koǝl i nda ban raam ɓa la Yahudawa la ban mak ɓi ɓiɓin kwaʻar pur i ɓaal ɓoɓa ya gha yid ya.

Yeso pa ɓǝs si da'al maan

⁴⁰ Ɓo ma yidkwanan da'al maan, yu ban Yeso, yi dwangat i mud kungǝli, yi kam Yeso na, “Wu gha la ngyap ma pa ɓǝs, wu la ya'am ti'i, pa ɓǝssa ɓiya gin ta mudta ɓa.”

⁴¹ Shuur ɓoma wal Yeso shangmi, she yi naat ɓu'i yi paʻan ɓoma, yi na, “Ngyaʻam tiʻi, u kumum muɗu!”

⁴² Sun ganɗa takwad wa, she ɓoma da'al i yiɗi ma kum ɓǝs, nggup yiɗi ma yidkwanan da'al suk ma, ɗǝʻǝs yiɗi.

⁴³ She Yeso tangas kidti, i shappi na ɓi kaa, she i na,

⁴⁴ “Wak, gin shappi ɓomaan na paam ɓǝs su ɓa, ɓeer i ban daatban, shiʻi la yiɗu ɓi sun na u kumum ɓǝs. She u pa gǝrma Musa mak ɓoɓa la yidkwanan da'al paaɓi Koǝl ma ya la kumum ɓǝs. Ɓi daatban ma shapka na u kumum ɓǝs. She gus na u kumum ɓǝs.”

⁴⁵ Ama ɓoma bwal ban nggwak ki shappi bǝlǝn ɓo i koyab ban na Yeso paam ɓǝs si. Lakunla wa Yeso sun mak yiɗi ɓi ko gari maan gǝli-gǝli ɓa. Yi ki nǝk na ban ma ɓo gha ɓa. Pyang la wa, ɓo pur i ban ɗangɗang, a ki yu bǝni.