Romaned 1 - Testamant Nevez 1897 (Jenkins)

CHABISTR I.

¹ Paol, servicher da Jesus‐Christ, galvet da veza abostol, choazet evit annons Aviel Doue,

² an Aviel prometet dija ganthan dre he brofeted,

³ er Scrituriou‐sacr, hag a gomz divarben he Vab, ganet euz a lignez David hervez ar c’hig,

⁴ hag, hervez ar spered a zantelez, discleriet da veza Mab Doue en eun doare galloudus meurbed, dre he resurrection a‐douez ar re varo, da lavaret eo, Jesus‐Christ hon Aotrou,

⁵ dre behini hon euz recevet ar c’hras hag ar garg a Abostol, evit digas da blega d’ar feiz en he hano an holl Jentiled;

⁶ euz an niver a bere ez oc’h ive, c’houi pere a zo bet galvet gant Jesus‐Christ;

⁷ d’an holl dud muia‐karet gant Doue, pere a zo galvet, ha d’ar zent a zo e Rom; ra vezo ar c’hras hag ar peoc’h ganeoc’h a‐berz Doue hon Tad, hag a‐berz an Aotrou Jesus‐Christ!

⁸ Araog pep tra, e rentan gras evidoc’h holl d’am Doue, dre Jesus‐Christ, abalamour ma’z eo ho feiz brudet dre ar bed holl.

⁹ Rag Doue, pehini a zervichan em spered en Aviel he Vab, a zo test d’in e ran heb ehan memor ac’hanoc’h em fedennou,

¹⁰ o c’houlen bepred diganthan ar c’hras da hellout, mar d’eo he volontez, dond a‐ben da gavoud eun occasion favorabl‐benag da vond d’ho kwelet;

¹¹ rag c’hoant braz em euz d’ho kwelet, evit rei lod deoc’h euz a eun donezon spirituel‐benag, evit ma viot krenveet,

¹² da lavaret eo, evit, pa vezin en ho touez, ma en em gonzolimp assambles dre ar feiz a zo commun etrezomp holl, deoc’h kerkoulz ha d’in‐me.

¹³ Hogen, breudeur, ne fell ket d’in e tremenfec’h heb gouzoud em euz alies lakeat em sonj mond d’ho kavoud, evit gallout dastum eur frouezen‐benag en ho touez, evel e‐touez an nationou all; mes beteg‐hen eo bet harzet ouzin kement‐se.

¹⁴ Dleour oun d’ar Greked kerkoulz ha d’ar Varbared, d’an dud gwiziec kerkoulz ha d’ar re ignorant.

¹⁵ Dre‐ze, en kement ha m’az eo em galloud, ez oun prest da annons an Aviel deoc’h‐hu ive, pere a zo e Rom.

¹⁶ Rag n’em euz ket a vêz euz a Aviel ar C’hrist, rag galloud Doue eo evit silvidigez d’ar re holl a gred, d’ar Judeo da genta, ha d’ar Grek goude‐ze.

¹⁷ Rag enhan ez eo dizoloet eur justis euz a Zoue, hag a zo dre ar feiz hag evit ar feiz, hervez m’az eo scrivet: An den just a vevo dre ar feiz.

¹⁸ Rag coler Doue en em ziskouez euz an env a‐enep holl impiete hag injustis an dud, pere dre fallentez a stourm ouz ar wirionez,

¹⁹ rag ar pez a heller da anaoud divarben Doue a zo lakeat sclear dirazhe, rag Doue hen deuz hen diskouezet dezhe.

²⁰ Rag ar perfectionou invisibl a Zoue, he c’halloud eternel hag he zivinite, a veler ker sclear ha gant an daou‐lagad, abaoe ma’z eo bet crouet ar bed, pa zeller outhe dre he oberou, en hevelep doare ma’z int heb escuz;

²¹ rag goude beza anavezet Doue, n’ho deuz ket glorifiet anezhan evel Doue, ha n’ho deuz ket rentet grasou dezhan: er c’hontrol, en em faziet int bet en ho zonjezonou, hag ho c’halon dibourvez a skiant‐vad a zo bet karget a devalijen.

²² O pretanti beza ho‐unan tud fur, ez int deuet da veza zot;

²³ hag ho deuz troet gloar an Doue immortel en imach an den mortel, hag en imachou lapoused, ha loened a bevar droad, hag a amprevaned.

²⁴ Abalamour da ze ive, Doue hen deuz ho livret, hervez gwall‐ioulou ho c’halon, da eul louzdoni ker braz, ma ho deuz dishenoret ho c’horfou ho‐unan;

²⁵ int pere ho deuz lakeat ar gaou en plas gwirionez Doue, hag ho deuz adoret ha servichet ar c’hrouadureleac’h ar C’hrouer, pehini a zo benniget da viken. Amen!

²⁶ Abalamour da ze eo hen deuz Doue ho abandonet da ioulou mezus; rag memeus ho gragez en ho zouez ho deuz chenchet an usach naturel en eun all a zo a‐enep an natur.

²⁷ Er memeus doare ive, ar oazed, o tilezel an usach naturel euz ar vreg, ho deuz devet en ho c’hoantou an eil e‐kenver egile, o commetti goaz gant goaz traou iffam, hag o receo enhe ho‐unan ar recompans a oa dleet d’ho gwall‐fazi.

²⁸ Hag, evel n’ho doa sourci e‐bed da anaoud Doue, Doue hen deuz livret anezhe da eur spered a zireizted, en hevelep doare ma reont traou mezus.

²⁹ Leun int a bep seurt injustis, a louzdoni, a fallentez, a avaristed a valis; leun a avi, a vuntrerez, a zisput, a dromplerez, hag a zrougviez;

³⁰ flaterien, droug‐prezegerien, enebourien da Zoue, brutal, ourgouillus, vên, ivanterien fallagriezou, dizent d’hozadou ha d’ho mammou;

³¹ diskiant, disleal, hep karantez naturel, criz, didruez;

³² pere, evithe da c’houzoud hen deuz Doue barnet dign euz ar maro ar re a ra an traou‐ze, a ra anezhe, hag ouzpen‐ze a gav mad ar re ho gra.