نامَه اَفسوسی کلیسارا 1 - کتاب مقدس به زبان تالشی شمالی1 پولُسی طرفی کا کِه خِدا پیستَه نَه مسیحْ عیسی رسول اِستَه، مقدّسینی را که اَفِسُسی شهری کا مَندینه، کسونی را که مسیحْ عیسی کا وَفاداری نَه: 2 فیض و صُلح و سلامتی خِدا طرفی کا، چَمَه دَده، و خِداوندْ عیسایِ مسیح، شِمَه را با. روحانی یَه بَرَکَتِن مسیح کا 3 مُتوارک بِبو خِدا و چَمَه خِداوند عیسایِ مسیح دَده، که اَمَه مسیح کا هَر بَرکت روحانی نَه،آسِمونی یَه جِگا اون کا بَرکت دوعَشَه. 4 چوم دنیا خَلق بییِه پیش، اَمَه مسیح دیلَه کا اِنتخاب کَردِشه تا چَیی حضوری کا مقدّس و بیعیب بِبَیم. محبتی کا، 5 اَ بینا بَر اِشتَنِش پیستَه و اِراده، اَمَه پیشتری اِشتَن فرزندخوندگی را مُعین کَردِشه تا عیسایِ مسیح واسِطه نَه خِدا زوعَه اون بِبییَم؛ 6 تا چَیی پُر جلالَ فیض ستایش بِبو، هَ فیضی که اِشتَن عزیزگِرامی دیلَه کا اَمَه بَرکت آدوعَشه. 7 اَمَه مسیح دیلَه کا چَیی خونی واسطه نَه آزادی هِستِمونه، که اِم هَ خَطا اون بخشِستِه یَه، که اَیی، اِشتَن بَرکَ فیضی قَدر، 8 هَر حکمتی کا و کامِلَ فهمی کا، فَت و فَراوون بَمون آدوعَشَه. 9 اَ اِشتَن اِراده سِرّی بَمون آزونیشَه. بینا بَر اِشتَنِش پیستَه که مسیح کا آشکار آکَردِشه. 10 خِدا نَخشه اِم بَه، هَتَه که اَ وخت آرَستِه گِردِ چییون، چِه آسِمونی کا و چِه زمینی سَری کا، یَندی نَه مسیح کا جمع آکَرِه. 11 اَمَه چَیی دیلَه کا وارِثون بَیمونه، چوم بینا بَر چَیی پیستَه که گِردِ چییون مطابق اِشتَن اِراده اَنجام بَدای، پیشتری اِنتخاب بَه بیمونَه. 12 تا اَمَه که اوّلین کسونی بیمونَه که بِه مسیح اُمید داریمون، چَیی جلالی ستایش بِکَرَم. 13 شِمَه نی اَیی کا، وختی که حقیقتی کلامی، که شِمَه هَ نجاتی اِنجیلَ دَرَسِرونَه و اَیی ایمان وَردِورنَه، روح القدسِ موعودی نَه مُهر بیرونَه، 14 که چَمَه اِرثی بیعانه یَه تا وختی که اَیی کاملا بِه دَس بواَرَم، تا خِدا جلال ستایش بِبو. دعا و شُکرکَردِه 15 اِمی واسی هَتَه که از نی شِمَه تعریفی دَرَسِمَه که چِه ایمانی بِه عیسایِ خِداوند اِستِرونه و شِمَه محبتی بِه گِردِ مقدّسون دَرَسِمَه، 16 شِمَه را شُکرکَردِه کا دَس پِگِتَه نیمَه، شِمَه که همیشه چِمِن دعااون کا ویر بواَردیم، 17 تا چَمَه خِداوند عیسایِ مسیح خِدا، اَ پُر جلال دَده، حکمت و مکاشفه روح آدَه شِمَه، تا اَیی آزونَه، 18 تا شِمَه دیلی چِمِن روشون آبون، تا اَ اُمیدی که خِدا شِمَه چَیی واسی دَخوندِشه آزونَه، و خِدا اَ بی حَدو اندازه و پُر جلال میراثی، مقدّسون دیلَه کا بِفهمَه، 19 و چَیی بَرکَ قدرتی کا نسبت بِه اَمَه که ایمان هِستِمونه، خَوَردار بِبییَه. اِم قوّت، خِدا پُور زورَه قدرتی کا که کارا، کار بَکَردی بومَی، 20 که اَیی مسیح کا بِه کار بَردِشه، اَ موقع که اَئی مَردَه اون دیلَه کا زِنده آکَردِشه و آسِمونی یَه جِگا اون کا، اِشتَن راسَ دَسی وَری کا نِشوندِشه، 21 که هَر ریاست، اِقتدار و قوّتی و فرمانروایی کا، کفاتَرَه و کَفاتَر هَر نومی کا، نِه فقط اِم دورَه زمانه کا بَلکَم آینده زمانه کا نی هَتَه. 22 و اَ گِردِ چییون مسیح پا جیری کا نوشَه، و مُعین کَردِشه که اَ، کلیسا را گِردِ چییون دیلَه کا سَر بِبو. 23 کلیسایی که چَیی بَدنَ، و چَیی پُوری گِردِ چییون گِردِ چییون دیلَه کا پُور بَکَردی. |
@ 2024 Korpu Company