پطروسی دومین نامه 1 - کتاب مقدس به زبان تالشی شمالی

¹ شَمعون پطرسی طرفی نَه، عیسایِ مَسیح رسول و نوکر، کسونی را که خِدا عدالتی واسطه نَه و چَمَه نجات دَهنده عیسایِ مسیح، ایمانی چَمَه ایمانی شیوار چَوون نصیب بَه:

² فیض و صُلح و سلامتی، خِدا واسطه نَه و چَمَه خِداوند عیسی آزونِسته نَه، فَت و فراوون شِمَه را با.

خِدا اِنتخاب بِیه اِن

³ چَیی قدرت الهی هَر چیی که زِندگی و دینداری را اِحتیاج دارَم اَمَه بَخشِستَشه. چَیی آزونستِه نَه یَه که اَمَه اِشتَن جلال و چاکی را دعوت کَردَشه.

⁴ که اِم چییون اِشتَن یال و با اِرزِشَه وعده اون واسطه نَه بَمون بَخشِستَشه، تا چَوون واسطه نَه طبیعت الهی کا شریک بِبییَه و اَ فسادی کا که هَواهَوسی واسی دنیا دیلَه کا وجود دارِه،آزاد بِبییَه.

⁵ اِمی واسی، تا بَشایرون تَقَّلا بِکَرَه که شِمَه ایمانی، چاکی اِضافه آکَرَه و چاکی نَه، آزونِستِه،

⁶ و آزونِستِه نَه، خود داری، و خود داری نَه، مقاومت، و مقاومتی نَه، دینداری،

⁷ و دینداری نَه، برااون نَه خِش بییِه و برااون نَه خِش بییِه نَه، مُحبت.

⁸ چوم اَگم اِم صِفَتِن شِمَه دیلَه کا بِبون و وِر آبون، نییَرزِن چَمَه خِداوند عیسایِ مَسیح آزونستِه کا، بی اَثر و بی‌ثمر بِبییَه.

⁹ چوم هَر کَسی که اِم صِفتون نیشَه، هِندی کورَه که اِشتَن پا پیشی نی نِوینِه، و ویر بَرکَردَشه که اِشتَن قدیمَه گناه اون کا پاک آبییَه.

¹⁰ بَس اِی بِرااِن، وِرتَر تَقَّلا بِکَرَه تا شِمَه دعوت و اِنتخاب بییِه ثابت بِکَرَه، چوم اَگم اِم صِفَتون بِه کار بِگِرَه هرگز نِبَلَکَه.

¹¹ و اِنتَه، شِمَه کاملا اِجازه دوعَه بَبی که، خِداوند و چَمَه نجات‌دهندۀ عیسایِ مَسیح اَبَدی یَه پاتشایی دیلَه بایَه.

¹² بَس از پیستِمَه که اِم چییِن هَمیشه شِمَه ویر بومونِه، هَر چَن اَوون بَزنیرون و اَ حقیقتی کا که بِه دَس وَردَرونه، پابَرجا ایرونَه.

¹³ از فیکر بَکَردیم که اِم دُرستَه، تا وختی که اِم بَدَنی دیلَه کا ایمَه، اِم صِفتون شِمَه ویر بواَرِم تا غیرتی بِبییَه.

¹⁴ چوم بَزنیم که اِم زودیون اِم بَدنی کا بِرون بومَیم، هَتَه که چَمَه خِداوند عیسایِ مَسیح مِن نیشون دوشَه.

¹⁵ و تا بَشایم تَقّلا بَکَردیم تا بِشایَه چِمِن اِم دنیا کا شییِه پَش همیشه اِم چییون ویر بواَرَه.

¹⁶ چوم اَ موقع که چَمَه خداوند عیسایِ مَسیح قوّت و چَیی اومِه شِمَه را اِعلام بَکَردیمون، داستانونی دومله نِشیمونَه که زیرنگی نَه وَج آبَیینه، بَلکَم چَیی شکوه و جلالی چَمَه چِمون نَه ویندَمون بَه.

¹⁷ چوم اَ موقع که اَ خدای دَده کا، جلال و اِحترام گِتِشه، و اَ شکوه و جلالی کا سَسی بَیی آرَستَه که، «اِم چِمِن عزیزَه زوعَه که اَیی کا راضیمَه.»

¹⁸ چوم اَمَه اِشتَن اَ مقدّس کوه کا اَیینه بیمونَه، اَ آسِمونی یَه سَسی چَمَه گوشی نَه دَرَسِمونَه.

¹⁹ و اَمَه، پِیغَمبرون گفون هِستِمونَه که بَبی اَوون اِطمینان بِکَرَم، که چاکَه شِمَه ویری کا بمونِه، ایلَه چِرایی شیوار که ظُلماتی دیلَه کا دَتاوه تا اَ موقع که صِبی سَر آبو و صِبی سِتاره شِمَه دیلون روشن آکَرِه.

²⁰ هَر چیی پیش، اِمی شِمَه ویری کا بِدارَه که مقدّس نیویشته اون نبوّتِن هیچ گِله، پِیغَمبری اِشتَن تفسیر نینَه.

²¹ چوم که هیچ نبوّتی، اِنسانی اراده نَه وَردَه نِبَه، بَلکَم آدَمِن روح القدسی واسطه نَه خِدا طَرَفی کا گَف ژَندِشونَه.