اوّلین نامَه تَسالونیکی کلیسا را 1 - کتاب مقدس به زبان تالشی شمالی

¹ پولُس و سیلاس و تیموتائوسی طرفی کا، تَسالونیکی شهری کلیسا را که خِدای دَده و چَمَه خِداوندْ عیسای مسیح کا اِستینه: فیض و صُلح و سلامتی شِمَه را با.

اِم ایماندارِن سرمشق بَبین

² اَمَه همیشه، شِمَه واسی خِدا شُکر بَکَردیمون و چَمَه دعااون کا دائم شِمَه ویر بواَردیمون،

³ شِمَه کار که ایمانی کایَه و زحمتی که محبتی کا کَشَه و شِمَه پایداری اُمید که چَمَه خِداوند عیسایِ مسیح کایَه، خِدا و چَمَه آسمونی یَه دَده پیشی کا، ویر بَواَردیمون.

⁴ چوم اِی بِرااِنی که خِدا را عزیزگِرامی ایرونَه، اَمَه بَزنیمون که خِدا شِمَه اِنتخاب کَردَشه.

⁵ چوم که چَمَه اِنجیل فقط گفی نَه آنِرَسته بِه شِمَه، بَلکَم قوّتی نَه و روح القدسی نَه و کاملَ اِطمینانی نَه آرَستَه بِه شِمَه؛ هَتَه که بَزنیرون شِمَه واسی چِنتَه شِمَه دیلَه کا رفتار کَردِمونه.

⁶ شِمَه اَمَه کا و خِداوندی کا سَرمشق گِتِرونه، چوم وِرَه رَنجون کا، خِدا کلامی، اَ شادی نَه که روح القدوس آدَه قبول کَردِرونه.

⁷ اِنتَه شِمَه مقدونیه و اَخائیه گِردِ ایماندارون را سرمشق بیرونَه.

⁸ چوم که نِه فقط خِداوندی کلام شِمَه واسطه نَه مقدونیه و اَخائیه منطقه اون کا دَپیچِستشه، بَلکَم شِمَه ایمان بِه خِدا، زَوونون سَر دَلَکه، جوری که دِ لازِم نییَه اَمَه چیی بوآجَم.

⁹ چوم اَوِن، اِشتَن، اِمی کا گف ژَنین که شِمَه گرمی نَه اومیرونَه چَمَه پیشواز، و اِم که چِنته بُتون کا دَس پِگِتَرونه، آگردِستیرونَه خِدا طرف تا خِدای زِندَه و حقیقی خِدمت بِکَرَه،

¹⁰ و تا آسِمونی کا خِدا زوعَه اومِه منتظر بِبییَه، که خِدا اَیی مَردَه اون دیلَه کا زِنده آکَردِشه، یعنی عیسی، که اَمَه اَ غضبی کا که در پیشَه رهایی بَدای.