پطروسی اوّلین نامَه 1 - کتاب مقدس به زبان تالشی شمالی1 پطرسی طرفی کا، عیسایِ مَسیح رسول، اِنتخاب بییَه اونی را که، پونتوس، غَلاطیه، کاپادوکیه، آسیا و بیطینیَه منطقه کا، غریبی کا، وِلا آبَیینه؛ 2 کسونی را که طبق خِدای دَده پیشدانی و خِدا روح کاری واسطه نَه که تقدیس بَکَردی، عیسایِ مَسیح اِطاعت کَردِه کا و چَیی خون که چَوون سَری کا پِشَندَه بَه، اِنتخاب بَیینه: فیض و صُلح و سلامتی فَت و فَراوون شِمه را با. زِنده امید 3 مُتوارک بِبو خِدا و چَمَه خِداوند عیسایِ مَسیح دَده که اِشتَنش بَرک رَحمتی نَه، عیسایِ مَسیح زِندَه آبییِه واسطه نَه مَردَه اون دیلَه کا، ایلَه تازه تولدی اَمَه بَخشِستِشه، زِنده اُمیدی را 4 و اِرثی که از بِین نِشو و فاسید نییَب و چیلیکیستَه نییَب که شِمه را آسِمونی کا غَم هَردَه بییَه؛ 5 شِمَه را که خِدا قدرتی نَه و ایمانی واسطه نَه، حفظ بَییرونَه اَ نِجاتی را که حاضیر بییَه تا آخِر زمانی کا آشکار آبو؛ 6 و اِمی واسی وِر شادی رونَه هَر چَن که حِسَه روکتِه زمان، اَگم لازم بِبو جور بَه جوره آزمایشون کا غمگین بَییرونَه، 7 تا شِمَه ایمانی اِصالت، آزمایشی کا ثابت بِبو و اَ روزی که عیسایِ مَسیح ظهور بِکَرِه، ستایش و جلال و اِحترامی باعیث بِبو، هَ ایمان که طِلا کا وِر با اِرزِشتَرَه که هَر چَن از بِین بَشی، ولی آتشی نَه آزمایش بَبی. 8 با اِمکه شِمَه عیسی مسیح ویندَه نیرونَه، اَیی نَه خِشیرونه؛ و هَر چَن حِسَه اَیی نِوینَه، اَیی ایمان هِستِرونه و خوشحالی بَکَردیرون اَ شادی نَه که نییَب واتِه و جلالی کا پورَه، 9 شِمَه ایمانی نتیجه بَویندیرون که شِمَه جانون نجاتَه. 10 هِم نِجاتی درباره، پِیغمبرِن دِقّتی نَه جستجو کَردِشونَه. اَ پِیغمبرونی که اَ فیضی درباره که قَرار بَه شِمَه شِن بِبو شِمَه را نبوت بَکَردین. 11 اَوِن تَقَّلا بَکَردین بِفهمِن وختی که مَسیح روح چَوون دیلَه کا مسیح جَلالون و عذابون که چَیی پَش بومیَ، پیشگویی بَکَردی، کِی یا چِه زمانی نیشون بَدای. 12 اَوون را آشکار آبَه که نِه اِشتَن، بَلکَم شِمَه را خدمَت بَکَردین، اَ موقع که اَ چییونی درباره گَف ژَنین که حِسَه اَیی اِنجیلی پیغوم آوَرون کا دَرَسَه. اَوونی کا که روح القدسی واسطه نَه که آسِمونی نَه ویسا آبَه، اَ خوشَ خَوَری شِمَه را بَداین. حتی ملائیکَه اِن نی آرزو دارِن اَ چییون بِوینِن. مقدّس بِبییَه 13 بَس شِمَه فیکرون آمادَه آکَرَه عمل کَردِه را، شِمَه هَواس جمع بِبو، و شِمَه امید تمام کمال اَ فیضی کا بِبو که عیسایِ مسیح ظهوری موقع شِمَه آدوعه بَبی. 14 اَ مطیع خِردَنون شیوار، اَ هَواهَوسون شیوار مبییَه که نادونی دورانی کا داریرون. 15 ولی هَتَه، اَیی که شمه دعوت کَردَشه، قدّوسَه، شمَه نی گِردِ رفتار کرداری کا مقدّس بِبییَه، 16 چیرا که توراتی کا نیویشتَه بییَه: «مقدّس بِبییَه، چوم که اَز قُدّوسیمَه.» 17 اَگَم اَیی دَده دَخونه که هَر کسی بیدون اِمکه چَیی طرفداری بِکَرِه چَیی اَعمالی داوری بَکَردی، بَس خِداتَرسی نَه غریبی دورانی سَر بِکَرَه، 18 چوم بَزنیرون، شِمَه آزادی، اِم بیخودی یَه راه اون دیلَه کا که شِمَه دَده اون کا اِرث بَردَه رونَه، اَ چیونی نَه که از بِین بَشی، طِلا و نِقره شیوار خِریَه بَه نییَه، 19 بَلکَم مسیح با اِرزِشَه خونی نَه خِریَه بَه، اَ بی عیب و بی نقصَ وَرَه نَه. 20 اَ، دنیا خلق بییَه پیش مُعَین بَه، امّا اِم آخِر زمانون کا شِمَه را آشکار آبَه. 21 شِمَه که چَیی واسطه نَه بِه خِدا ایمان وَردَرونه، اَ خِدایی که اَیی مَردَه اون دیلَه کا زِنده آکَردِشه و جلال دوشَه، تا شِمَه ایمان و امید بِه خِدا بِبو. 22 حِسَه که حقیقتی کا اِطاعت کَردِه نَه، شِمَه جانون پاک آکَردَرونه، تا بی ریایَه بِرااون نَه محبت بِدارَه، یَندی نَه خالِص و پاکَ دیلی نَه خِش بِبییَه. 23 چوم شِمَه هَنی از نو دُنیا اومَیرونه نِه اَ تُخمی نَه که از بِین بَشی بَلکم اَ تُخمی نَه که از بِین نِشو، یعنی خِدا کلامی واسطه نَه که زِنده یَه و تا اَبَد باقی بَمَندی. 24 چوم، «جِسم گِرد واشی شیوارَه و چَیی جَلال گِرد واشون گُلی شیوارَه؛ واش خِشک آبو و چَیی گُلِن ویبون، 25 امّا خِداوندی کلام تا اَبَد بَمَندی.» و اِم کلام، اَ خوشَ خَوری یَه که شِمَه را اِعلام بَه. |
@ 2024 Korpu Company