Ŋwàʼà kə Pôl twâ awò aghě Lûm 1 - Isu New Testament

¹ À ŋwàʼà kə̀ twà mìə̀ Pôl, wè kə̀fàʼ ə̀ Yesù Kə̀litò. Zə̀kìy kə sày kə miə nə̀ mə doʼò wè ntwùm Yesù. U twum sòʼò mìə̀ nə̀ mə bû naʼà ntwùm ìdzòŋə̀ yə̀.

² Ù kə tɛb naa zî bə̂ nəniy anə yiə yə aghee ntwùm ə̀ Kə̀zə̀ kə twâ na nəniy anə ŋwàʼà k-a-zə̀.

³ Ntwùm ìdzòŋə̀ yə̀ kwùmə̀ yə̀ nə̀ Wà Kə̀zə̀, Mwe ə̀ mbyi ə̀ ŋgàŋ, Yesù Kə̀litò. Anə ayiə yə ù kə də fə wè mbyi anə gùw wè, ù kə fyi bə̀ anə tu kə Devìd.

⁴ Zwàykə̀zwekiy kwuni dè bə̀ nə̀ Yesù də̌ Wà Kə̀zə̀ wə̀ ù kwu nəniy daʼa kiy aŋwòə Zə̀kìy kə zɛ̀mə̀ ŋwò dzwoŋi bə̀ we anə ipfə.

⁵ Zə̀kìy kə dè mìə̀ nə̀ fòŋ ì dzòŋə̀ yìy, bòʼ Kə̀litò, sày kə miə nə̀ mə doʼò wè ntwùm ə̀ Yesù, tə̀ aghû anə nàʼà tə̀dzə̀m ki zuw ayiə we à dziy yiy, tə̀ ghu kəli soʼò ìbɛmə.

⁶ Ghà də sòʼò aghû yə̀ Zə̀kìy sây na nəniy nə̀ ghu doʼò àghě Yesù Kə̀litò.

⁷ Mə twâ bə̀ ŋwàʼà kə̀ awò gha dzə̀m anə inaʼ i Lûm. Zə̀kìy liə ŋwô gha, ù mə gha sày sòʼò nə̀ ghà doʼò àghè ə we à zwe yiy. Mə gwùŋə̀ nə̀ Tè ŋgàŋ Kə̀zə̀, nə̀ Mwe ə̀ Mbyi ə ŋgàŋ Yesù Kə̀litò nə̀ ghu dê ghà nə̀ fòŋə̀ ì dzoŋə̀ yìy, ghu nyiə̂ soʼò ghà nə̀ ìbvay yiy.

Pôl ə nyə̀ kə̀zòŋə̀ awò Zə̀kìy anə igwùŋì

⁸ Mə səsə kiy nyiə̀ kə̀zòŋə̀ â Zə̀ kam kiy anə utuw ghi udzə̀m, abidzəmə̀ Yesù Kə̀litò. Mə ghî zəŋə aŋwòə aghê dzîy ŋwò anə ndə̀mə̀ tə̀lòʼo anə mbyi, ndzòʼò ìbɛmə yə ghà kwu nəniy awò Zə̀kìy.

⁹ Zə̀kìy kwu ŋwô nə̀ mə bwi kòʼò dzə̀ wày ani gwùŋì anə utuw ghi, yəə mə faʼà nəniy â we nə̀ fòŋ yam idzə̀m, nìʼà yə̀ sòʼò ntwùm ìdzòŋə̀ yìy kwùmə̀ yə̀ nə Wà We.

¹⁰ Anə igwùŋì yam sòŋi dzə̀m, mə bwoʼo tsə̀ kə kə̀wo nə̀ Zə̀kìy nyiə̀ mìə̀ nə̀ bwòʼ kìy ani bù kòʼ ghà.

¹¹ Mə ŋge liə ani bù kòʼ ghà nə̀ mə nì də ani zəŋi tsə gha, ghà kəli tsə kəlwì awò Zwàykə̀zwekiy, tə̀ lwì kə ghà kə̀ ki fày nə̀ ghà təmi taw tsə anə ibɛmə ghi.

¹² Iyiə yə mə dziy à də nə̀ ŋgà ki də ani kwe tyili yə̀ fòŋ tə ŋgàŋ anə ibɛmə yə ŋgà kwu nəniy.

¹³ Awizə̂ yamə, ghà kəli tsə nə̀ mə taw byay nia tsə̀ ŋwô ani bù kòʼ ghà. Ayiə liy yiy kwuni kàm bù tyàlì màʼà tsə miə nə̀ mə kə kâm bù. Mə liə ani bù zəŋi tsə nə̀ aghê kəli tsə ibɛmə awò Kə̀litò anə inaʼ i Lûm anə yiə yə mə zəŋi dzə̂ anə ndə̀mə̀ nàʼà tə̀liy tə.

¹⁴ Mə kwu kə fàʼ kə də yəə à də̀ kəndàŋ ani nàʼà ntwùm ìdzòŋə̀ yìy awò àghè dzə̀m. Mə naʼà awò àghè lyaʼa moo à twabə yiy, me naʼà awò àghè nê yiy moo awò liy mə̀ aghù yə.

¹⁵ À yù də̀ ighe mə kwu nəniy ighaa yiy ani nàʼà bə̀ ntwùm ìdzòŋə̀ yìy awò ghà yə̀ ghà muə nəniy a Lûm.

Daʼa kə̀ ntwùm ə̀ ìdzoŋə̀ yìy kwu nəniy

¹⁶ Mə dələ̀ dzə̀ way nə̀ tuw kiy ani nàʼà ntwùm ìdzòŋə̀ yìy kwùmə̀ yə̀ nə̀ Yesu Kə̀litò. Ì də̀ daʼa K-a-zə̀ ani bii fyi aghû yə̀ ghu bɛmə nəniy â we ani kaʼ tsə anə aghě Dzû isə zù kwùm nə̀ àghù yə̀ ghu də wày aghee Dzû.

¹⁷ Ntwùmə ì dzoŋə̀ ì ghà yə̀ dè bə̀ yiə yə Zə̀kìy zəŋə tsə nə̀ aghê si faʼà yə ayiə tsitsi yiy anə səkə we abu ghu kwu nəniy ibɛmə yiy awò Yesù. I bvami də ighəd yiə ŋwàʼà K-a-zə̀ kìy dzây nə̀, “Aghù yə̀ ghu muə nəniy mùə tə̀ tə də nəniy tsitsi â Zə̀kìy bòʼ ìbɛmə i ghu, ghu kî pfə dzə̀ wày.”

Zə̀kìy ŋəmə̀ nə̀ fòŋ anə ayiə àbɛbə yə Aghê zəŋə

¹⁸ Zə̀kìy mə dè fyi tswi bə̀ fòŋə̀ we ì ŋəmə̀ yìy an-a-vələ awò àghù yə̀ ghu zəŋə ibɛb yiy nə̀ àghù yə ghu zəŋə nəniy ayiə à bɛ̂b bɛbə yiy, ayiə ghu àbɛbə yiy zəŋə nə̀ aghê kə kəli ayiə yə a də àsoŋə̀ yìy.

¹⁹ Ghu kwu mà ŋwô ayiə yə àdzə̀m ghu kwu ani kəli kwùmə yə̀ nə̀ Zə̀kìy, aŋwòə Zə̀kìy maa dê mà ayiə yə yiy awò ghu.

²⁰ Ani nìy ŋwò bə̀ soŋə fə Zə̀kìy kə bwam nəniy mbyi, aghê mə kòʼ daʼa kə we kə kə doʼò təŋ nəniy nə̀ ùmwamə u we wiy. Ghu mə kôʼ kəli sòʼò anə ufyiə wə ù zəŋi naa, tə̀ aghê ki də kwu way bwôʼ kə̀ te fyiə kiy.

²¹ Ghu mâŋ kwu nə̀ Zə̀kìy də ŋwô. Ghu kwuni nyiə̀ wày we nə ŋkwiʼi miy nə̀ zòŋə̀ kìy. Môʼ tə ghu tiy mə fə̀d bwa doʼò yə̀ anə ayiə yə a də kwu way fàʼ kìy. Ghu moʼò kə ì lìàʼì anə mòʼ tə ghu, də̀ sòʼò an-a-ləm.

²² Ghu moʼò dzìy ghu kwu utwab, ghu kwuni də̀ aghê àlyaʼa yiy.

²³ Awò ghu ani fwulə yəə Zə̀ kə̀ kə nî də pfə kòʼ dzə̀ wày, ghu fələ̀ fwùlə yə̀ ùfyiə wə ghu zəŋi na nəniy nə̀ u fwunə ŋwùni, moo tə nyâm, moo nyâm tə̀ tə see nəniy nə̀ ùnìə̀ wìy.

²⁴ À yu də̀ ighe Zə̀kìy na tsə nəniy ndzòʼò àghù yə̀ nə̀ ghu zəŋi ayiə àbɛbə yə fôŋ tə ghu tiy liə nəniy. Ghu zəŋə àyiə yə ghu liə nəniy ani zəŋi. Ayiə ghu àdzəə yə ghu moʼò nəniy a mə zəŋi ghu nə̀ ghu si zəŋə ayiə dələ kətuw yiy anə iwè i ghu.

²⁵ Ghu twe màʼà ani bɛmə ayiə àsoŋə̀ yə̀ a də kwùmə yə̀ nə̀ Zə̀kìy, fə̀d bɛmə yə̀ àyiə à guw yiy. Ghu fələ̀ fwùlə̀ yə̀ ùfyiə wə Zə̀kìy zəŋi na nəniy fwùlə wày Zə̀ kə̀ kə zəŋi na nəniy ufyiə ughè wə̀. À də̌ Zə̀ kə̀ a kwu nəniy ani nyiə̀ we nə̀ ùkali wiy sòŋi ndzə̀m. Àmày.

²⁶ À də̀ ighe, Zə̀kìy na yə̂ ghu nə̀ ghu dzwumì yə̂ ayiə à dələ kə tuw à lyaŋə yə fôŋ tə ghu tiy liə nəniy. Iyəŋi niŋə̀ kwùnə̀ nə̀ iyəŋi. Ghu nyiə̀ zəŋə sòʼò ayiə anə yiə yə ghu liə nə̀ à wày dzə yə Zə̀kìy kə zəŋi na bə̂ nəniy.

²⁷ Ighəd soʼo, iŋə̀mə̀ kamə̀ nìŋə̀ wày nə̀ iyəŋi, ghu niŋə̀ yə̀ kə nə̀ iŋə̀mə̀. Ghu zəŋə àyiə à dələ kətuw yiy nə̀ wù ùmoʼumòʼ. Ghu mə nìy bə̀ mfəm anə iwè i ghu anə ayiə àlyiʼa yə ghu zəŋə nəniy.

²⁸ Anə yiə yə aghû yə̀ twe maʼà nəniy ani bɛmə iyiə ìsoŋə̀ yìy kwùmə̀ yə̀ nə̀ Zə̀kìy, à yu də̀ ighe Zə̀kìy na tsə nəniy ghu nə̀ ghu mùə̀ anə yiə yə fôŋ tə ghu tiy liə. Àyu də sələ kə iyiə kə ghu zəŋə nəniy dzə̀ dzə̀ tə ayiə tiy.

²⁹ Ghu də aghê bɛbə yiy. Ghu zəŋə ndə̀mə̀ àyiə àbɛbə yiy. Ghu kwu mə mwìy anə dzə̀lə tədzə̀m. Ghu liə ani kəli ufyiə wə aghê liy yiy kwu nəniy. Ghu wiy àghù, zwàʼà anə iwè, tsè ìwee. Ghu taw mòʼò ayiə àbɛbə yiy azoŋə̀ àghê liy yiy, Ghu ŋge kwu sòʼò təfɛm.

³⁰ Ghu taw dzìy ayiə àbɛbə yiy kwumə̀ yə̀ nə̀ aghè liy yiy. Ghu bâ yə̀ Kə̀zə̀ ghi. Ghu kwoʼo ìwe anə tə̀fòŋ dzìy soʼò ayiə nê yìy. Ghu taw mòʼò kə ani kaw dzələ tə̀ fyiə tiy ani zəŋi ayiə àbɛbə yiy. Aghê ghè yə̀ ndwàmə̀ nyìə̀ dzə̀ wày ŋkwiʼi miy awò nə̀ təli ghu yiy.

³¹ Ghu də aghê àlyaʼà yiy. Wù wày dzə ani zoʼo na dzəm azoŋə̀ ghu. Ghu kwu dzə̀ way iliə yiy azoŋə̀ àghè liy, kwoʼo wày nə̀ mwuli kiy soʼo azoŋə aghê liy yiy.

³² Ghu mgbaŋ kwu ŋwô nə̀ Zə̀kìy mə dzày anə ulàŋ u we nə̀ wù wə̀ ù zəŋi nəniy ndzòʼò àyiə yə ghî, ù kpe ani pfə. Ghu kwuni namə zəŋə kə àyiə bɛbə yiy. Ghu bây ŋwùmə̀ kə sòʼò àghè liy yiy nə̀ ghu si zəŋə ndzòʼò àyiə ghè yə̀.