Matìyò 1 - Isu New Testament

Nə̀ tě Yesù

¹ À wə̀ də̌ ŋwàʼà kə̀ kə dê nəniy azəd ə nə̀ tě Yesù Kə̀litò yìy, wà tu kə Devìd wə̀ ù kə də nəniy wà tu kə Ablàhâm kìy.

² Ablàhâm kə də̌ tè Ayzìk, Ayzìk ə də̌ tè Dzàkôb, Dzàkôb ə də̌ tè Dzudà nə̀ awizə̂ ə we yiy.

³ Dzudà kə də̌ tè Pelèz nə̀ Zelàh. Zə̂ ghu kə də̌ Tamàl. Pelèz kə də̌ tè Hezlòn. Hezlòn ə də̌ tè Lâm.

⁴ Lâm kə də̌ tè Àminadàb. Àminadàb kə də̌ tè Nasòn, Nasòn kə də̌ tè Samùn,

⁵ Samùn kə də̌ tè Bowàs, Zə̂ Bowàs kə də̀ Lahàb. Bowàs ə də̌ tè Obèd, Zə̂ Obèd kə də̀ Lût. Obèt ə də̌ tè Dzesì.

⁶ Dzesì ə də̌ tè Devìd wə̀ ù kə də nəniy dòŋ kìy. Devìd ə də̌ tè Solomùn. Zə̂ Solomùn kə də̌ wìy Yulìyà.

⁷ Solomùn kə də̌ tè Lèhobwàm, Lèhobwàm ə də̌ tè Abidzà, Abidzà ə də̌ tè Asàf.

⁸ Asàf ə də̌ tè Dzèhosafàt, Dzèhosafàt ə də̌ tè Dzulàm, Dzulàm ə də̌ tè Yuzìyà.

⁹ Yuzìyà ə də̌ tè Dzotàm, Dzotàm ə də̌ tè Ahàz, Ahàz ə də̌ tè Hèzèkayà.

¹⁰ Hèzèkayà ə də̌ tè Mànasè Manasè ə də̌ tè Amòn, Amòn ə də̌ tè Dzòsiyà.

¹¹ Dzòsiyà ə də̌ tè Dzèkonayà nə̀ àwizə̂ we a sòŋə fə ghu kə dzûm na nəniy ghu a Babilòn.

¹² Abù aghee Islàel dzwoŋi ŋwô bə̂ nəniy a Babilòn, bù kwùm tsə anə sòŋə fə ghu kə byi nəniy Yesù ate, Dzèkònayà ə byi bə̀ Shiltìyèl, Shiltìyèl ə byi bə̀ Zèlubabèl,

¹³ Zèlubabèl ə byi bə̀ Abiyùd, Abiyùd ə byi bə̀ Eliakìm, Eliakìm ə byi bə̀ Azòl,

¹⁴ Azòl ə byi bə̀ Zadòk, Zadòk ə byi bə̀ Akìm, Akìm ə byi bə̀ Elwìd.

¹⁵ Elwìd ə byi bə̀ Èliyazà, Èliyazà ə byi bə̀ Matàn, Matàn ə byi bə̀ Dzàkôb.

¹⁶ Dzàkôb kə də̌ tè Yùsə̂f, ŋə̀m ə̀ Mə̀li wə ù kə byi nəniy Yesù wə̀ ghu kə tyoŋə we nə̀ à də̌ Kə̀litò.

¹⁷ I dê tsə nə̀ nə̀ təli kə də̀ àvəm nə̀ ghè kyàʼì ani ŋwò tsə anə̀ tu kə Ablàhâm bù tswi kwùm tsə azòŋə̀ Devìd. Utu ivəm nə̀ ùghe wiy soʼo ù kyàʼì ani nìy ŋwò tsə a sòŋə fə Devìd, bù kwùm tsə anə sòŋə fə ghu kə nîy zù nəniy nə̀ àghě Islàel a Babilòn. À nam də̀ sòʼo utu ùvəm nə̀ à ùghe wiy ùkyàʼì ani nìy ŋwò tsə soŋə fə ghu kə də a Babilòn bù kwùm tsə anə sòŋə fə ghu kə byi Kə̀litò ate.

Ghu byi bə̀ Yesù

¹⁸ À yù də̀ ayiə yə ghu kə byi nəniy Yesù Kə̀litò ate. Mə̀li kə də̌ nə̀ Yùsə̂f mə nyi na we anə wiy. Awò ghu ani bù nìy ìwee, a də̌ nə̀ Mə̀li mə wa boŋ sə nə̀ à zəŋi Zwàykə̀zwekiy.

¹⁹ Yùsə̂f kə liə way ani də̀d màʼà tuw kə Mə̀li, u nùw təŋ yə̀ kə idzwə ate, aŋwòə ù kə də̌ wè tsitsi. U khu tsə̀ dzəd ani màŋ twe màʼà təŋ kə we nə̀ aghee kə̀ kəli nə way.

²⁰ Abù Yùsə̂f namə myiŋə̀ nəniy ghii, tsə̀ndii ə̀ Kə̀zə̀ ə zù bù â we anə u dzə̀mə̀ dzày yə̀ a we nə, “A Yùsə̂f, wà Devìd, kə̀ tsəŋ dzə̀ ani nìy Mə̀li anə wiy, aŋwòə à zəŋi Zwàykə̀zwekiy nə̀ ù boŋ.

²¹ Ù kì byikə bə̀ wà ùŋəmə̀, wò kî kwe tsə izəd i we nə̀ à də̀ Yesù, aŋwòə ù nì bii fyiə àghě we anə bɛb tə ghu.”

²² Ayiə yə àdzə̀m kə bvami fyi kpe kə anə yiə yə Mwe ə̀ Mbyi, Kə̀zə̀ kə tɛb na zî bə̂ abidzəmə̀ wè ntwùm ə̀ Kə̀zə̀ nə̀,

²³ “Wà fə̀ghàŋ ùyəŋi nə̀ ù kamə nəŋì kôʼ nə̀ wìŋəmə̀, ù nì boŋə byikə bə̀ wà ùŋəmə̀ ghu ni tyoŋə we nə̀ à də̌ ‘Ìmanwèl’ i myiŋə̀ nəniy nə̀, ‘Zə̀kìy də nə̀ ŋgàŋ.’ ”

²⁴ Abù Yùsə̂f zɛ̀mə̀ kə nəniy, u bvami nìy yə̀ sòʼò Mə̀li anə yiə yə tsə̀ndii ə̀ Kə̀zə̀ kə dzây nəniy â we.

²⁵ Â Mə̀li ani byi bə̀ wà ùŋəmə̀ anə unìə̀ ughè wə̀, Yùsə̂f kə kə̀ nəŋì kôʼ dzə̂ nə̀ we. Abù yiə ù byi tsə nəniy, Yùsə̂f ə bvami kwe tsə sòʼò ìzəd i we nə̀ à də̀ Yesù.